Ka Nonanona, Volume II, Number 12, 8 November 1842 — Page 64

64 KA NONANONA. [NOVEMABA,

aha? I keiki anei na Kamehameha? I kaikuaana no Liholiho anei? O Kepookalani hea la keia? O Kepookalani makuakane anei o Aikanaka? Ina oia, ea, e hoole aku au ia oe; aole o Kepookalani na Kamehameha, na Kameeiamoku ia keiki, i noho ia Kamakehikuli hanau o Kepookalani.
                O ko'u nana ana i keia hanauna kuauhau, aohe pono me he apo wale la.
                Mai hana i ke kuauhau me ka lohe ole. Na A. UNAUNA.

Lahaina, Okatoba 31, 1842.
                Aloha oe e Limaikaika,—Ua nana iho nei au ma ka Nonanona pepa 10, no ke kuauhau no na'lii o Hawaii nei.
                Ua hewa ke pai ana. E heluhelu ma ka aoao 49, a pau ia aoao, alaila nana aku ma ka aoao 51 a pau ia i ka heluhelu, alaila heluhelu ma ka aoao 50 a mahope ma ka aoao 52, pela ka pono e heluhelu ai.
                O ka inoa no kekahi i hewa o kekahi mau mea O Hinanalo ka pono; aole o Ainanalo. O Kumahele, aole o Kamakele, O Ulukou, aole o Ulukaee, O Loe ka pono, aole o Lae.
                O Kanaloa noho ia o Makoani O Huanuimakanalenale aole o Kalapanakuioiomoa na Kanipahu ia keiki me Alaikauakoko, O Keawenuiaumi ka pono, aole O Keaueenuiaumi oia na wahi hemahema ma ka heluhelu ana. Aloha oe, Na KAMAKAU.

KINAI RAMA MA NA WAHI KIEKIE.

                Ua mare ia ma Wasetona i ka la 31, o Ianuari i hala ai nei, o Williama Wallar, Esq., no Virginia, laua me Elisabeth, ke kaikamahine o ke Alii nui o Amerika Huipuia.
                A i ka ahaaina nui i haawiia no keia mare ana, o ka wai wale no ka mea i inu ia. Ua papaia ka waina a me na mea ona a pau, e ke Alii nui. He nani loa a me ka maikai kana hana; a he mea ia e hoomahuahua ai ke aloha o kolaila poe Aupuni a pau ia ia.
                E ke Alii nui o Hawaii nei. E ikaika oe ma kou manao, e kinai aku i na mea ona a pau. Na'u na A.

                Ua paiia a paa ma ka hale paipalapala i keia mau malama i hala ae nei, Ka ai o ka la 1843, 48 aoao, 12,000 buk. Hailoaa, 76 aoao, 2,000 buke.
Buniana 326 aoao, hui me 108 aoao i paiia i ka makahiki 1841, 450 aoao 10,000 buke.
                Ua hanaia a kokoke paa ka Himeni Kamalii me ka pa, ko, li, iloko.

MEA HOAKAKA.

                Auhea oukou e na makua o na keiki ma Lahainaluna, ina manao oukou e hooili mai i kekahi mea e pono ai ka oukou mau keiki iloko o ke Kulanui, i wahi kapa paha, i wahi lole paha, i mea e ae paha, e pono e kakau mawaho o ka ipu a o ka puolo paha i ka inoa o ka mea nona ka waiwai i hooiliia mai, a me kahi e waiho ai ma Lahaina. Penei, ina no Kauwe ka ukana, i hooiliia mai, penei e kakau ai mawaho,

NO KAUWE,

LAHAINALUNA,

Ma ka hale o Baluina ma Lahainalalo e waiho ai.

                Ina me ia ke kakau ana, aole nalowale; aka, ina i kau ole ia ka inoa mawaho, a me kahi e waiho ai, nalowale auanei. E waiho ma kahi o Baluina a na ke kaabipi e lawe iuka.
J. H. PAEHEWA.

NA LIMAIKAIKA e hoopuka'ku.