Ka Nonanona, Volume II, Number 13, 22 November 1842 — Page 68

68 KA NONANONA. [NOVEMABA,

akaka malaila, o na hana e pono like ai na 'lii me na makaainana, oia na hana no ke aupuni. Ina he hana e waiwai ai na lii wale no, aole ia he hana aupuni; a ina hoi he hana no na makaainana wale no, i pomaikai lakou, aole ia he hana aupuni. O ka hana alanui, he hana aupuni ia, no ka mea, ua pomaikai like na 'lii a me na makaainana i kela hana.
                Pela no ka pa o kekahi aina, o ka poe e pomaikai ana i ua pa la na lakou e hana: e like me Honolulu aina nei, ua paapu ka aina i na holoholona, a ua oki loa ka ai, a nolaila ua hooliloia keia hana pa he hana aupuni. Pela no hoi ka waiwai aupuni. Aole ia he waiwai no ke lii nui; aole hoi no na lii a pau; he waiwai ia e kokua i kela pilikia a i keia pilikia o ke aupuni, i pomaikai like na lii a me na makaainana.
                Ina hoi i lawe wale kekahi kiaaina a o kekahi lunaauhau paha i ka hana aupuni a me ka waiwai aupuni nona iho, i mea e hanohano ai paha, i mea e waiwai ai paha, ua hewa loa ia.

KANEOHE.

                Ua kokoke paa ka hale pule hou malaila; he hale pohaku, a he hale maikai hoi. Ikaika maoli na hoahanau olaila i ka hana; no kahi loihi ka laau, a he hana kaumaha loa ke kii ana.
                KOFE KANU. Maikai ke kofe ma ka aina o Piikoi ma. Eha pahu tausani e ulu ana; elua kapuai ke kiekie o kekahi, a ekolu ko kekahi, a ua uliuli maikai na lau. Hookahi makahiki a me ka hapa ka ulu ana. E holo auanei paha keia hana ma Hawaii nei. No hea ka ole?

PETERO.

                He wahine no kana; eia na olelo e akaka ai Mataio 8: 14. "Komo ae la o Iesu iloko o ka hale o Petero, ike iho la ia i kona makuahonoaiwahine e waiho ana i ka mai kuni."
                MAKUAHONOAIWAHINE, o ka makuwahine paha ia o kana wahine ponoi; aole anei? He oiaio no he wahine ka Petero ka lunaolelo a me ke kahunapule. O ka pope mua no hoi o Petero, wahi a kekahi poe. Aka, he wahine kana, a pehea ka poe hoole i ka mare ana o na kahunapule i neia manawa? Aole anei ku e lakou i ka ke Akua?
                Eia no hoi keia olelo, 1 Kor. 9: 5. "Aole anei e pono ia makou ke kono mai i kaikuwahine, a i wahine na makou e like me kekahi o na lunaolelo a me na kaikuaana o ka Haku a me KEPA."
                O Kepa, owai ia? o Petero no; a ua akaka ma keia olelo a Paulo, he wahine kana.
                Olelo nae ka poe pope, he wahine kana mamua, a i kona wa i lilo ai i lunaolelo, a i pope, aole ana wahine. Pela anei ke ano o keia olelo a Paulo maluna iho? Aole. He wahine ka Petero a me kekahi mau lunaolelo e ae, aole hoi hoohewa aku o Paulo i ko lakou noho wahine ana; he pono no i kona manao, a o ka uhane o ke Akua kekahi me ia.

KE AO ANA.

                "Ua make anei ke Akua? wahi o kekahi kaikamahine i kona makuakane.
                "Aole, e kuu kaikamahine. No ke aha la oe i olelo mai pela?"
                "Ea, eia ke kumu o ka'u olelo, ua maa oe mamua i ka houluulu ia makou i ke ahiahi a i ke kakahiaka, e pule aku ia ia, a ua noi aku no oe ia ia e haawi mai ia kakou i na mea maikai he nui wale; aka, ua hoopau mai nei oe i keia manawa, nolaila manao iho la au ua make paha ke Akua."

                Ku mai kekahi moku ma Honolulu me na ee moku he 81; ua palua na wahine i na keiki, a ua pakolu na kane i na wahine. Ehia kane, ehia wahine, ehia hoi keiki maluna o ua moku nei? Nawai e wehe keia? Na na keiki o Lahainaluna paha.

NA LIMAIKAIKA e hoopuka'ku