Ka Nonanona, Volume III, Number 4, 18 July 1843 — Page 16

16 KA NONANONA. (IULAI,

mai ana, a mahope loheia mai ke kani ana o ka pu: ewalu mau sekona ka wa i hala, mai ka ikea ana mai o ka malamalama a lohea mai ke kani ana.
          Ua ikea ka holo ana o na leo, he holo malie no, he 1,142 kapuai kona holo ana i ke sekona hookahi.
          E hoike mai oe, e ka mea akamai i ka helu, ehia mile ka loa mai ka hale o Mi. Kamalena a hiki i ua moku nei?

MANUA AMERIKA.

            I ka la 5 o Iulai nei ku mai ka Manuwa Amerika, o Uluhoku (Constellation) kona inoa, a o Komadoa Kearny kona ahi. Mai Kina mai keia moku a e hoi ana i Amerikahuipuia; o kahi wai inu wale no kona mea i kii mai ai maanei; kokoke holo hou aku.

No Kina.

            Ke lohe nei makou, he maluhia ma Kina; aole kaua, aole haunaele. Ke hooponopono nei na lii Beritania a me na lii o Kina, i na kanawai kuai. Oia ka hana nui i keia manawa.
            Ua holo ka olelo a ke Akua malaila i keia wa; aole kapu ma kekahi mau kulanakauhale elima e like me mamua. Piha na hale o na kumu hai ola no Amerika mai a me Beritania mai, i na Pake i kela la i keia la; hele mai lakou e lohe a e kamakamailio pu me na kumu, i maopopo ia lakou ke ano o ka ke Akua olelo a me ke ola nui i hoikea malaila. Aole nae maopopo loa ka huli naau o kekahi Pake, a me ka lilo ia Kristo i kanaka manaoio ia ia. Oia paha koe.
          Olioli kuu naau i kuu lohe ana i keia mea hou; i iho la au, "kei ke akamai a me ka lokomaikai o ke Akua! ka inoa, he huhu pau ole kona i na kinikini o Kina; ua haule ka pahikaua maluna o lakou, a ua nui ka poe i make; eia ka he lokomaikai ke Akua i na Pake. Ua kena aku la i ko Beritania e hele malaila e wawahi i na paku a e wehe i ka puka, e komo ai kana olelo e ola'i iwaena o lakou. Nolaila, o kela kaua ua lilo i mea ola no ko Kina. Nolaila e hoonaniia ke Akua o Iehova, a e hoomaikaiia kona inoa. Mamuli pau na akua wahahee o Kina i ka hina imua ona. E kau ka lei maluna ona.
            Eia kekahi; e pule nui kakou i ke Akua no ko Kina poe i keia wa, i haule nui mai kona Uhane maluna o kela aina, a e hoolanakilaia kona aupuni aloha malaila.

WAHINE KAAWE.

            I kela la aku nei, kaawe kekahi wahine ma Pauoa mauka o Honolulu nei, o Kaaukai kona inoa; he hoahanau oia, a moe kolohe ia me kekahi kanaka, a mahope kaawe iho la a make loa. Auwe ka mea i hewa e poino ana no ia!
          Aole anei keia he mea paipai a hooeueu i ko kakou manao; e kiai a e hoomau i ka makau a me ka hopohopo ia kakou iho? He mea weliweli ke kinai ke kanaka i ka Uhane o ke Akua, a lilo loa ka naau i ka hewa. Ua ike pinepine loa kakou, he oiaio kela olelo a Iakobo, "aia hapai ke kuko, hanau mai ka hewa, a oo ka hewa, e hoopukaia mai ka make." Ina i haalele ka Uhane o ke Akua ia kakou, o ka lele koke mai no ia o ka Uhane ino no ka po, e hoowalewale i ka naau a e alakai ia kakou i ka make mau. He Uhane ikaika loa ua uhane ino la, a poino loa ke kanaka, ke lilo kona naau ia ia. O ka Uhane Hemolele wale no ka mea mana nana e kipaku aku ia ia, a e hoopakele ia kakou i ka make.
          Nolaila, o ka noho haipule ka pono; a nonoi mau aku i ke Akua e kokua mai, e hoonoho mai i kona uhane maikai iloko o na naau, e hoomaemae a e hoolei aku i ka ino. Ua haalele o Kaaukai i ke Akua a nolaila haalele ke Akua ia ia, o kona lilo koke aku no ia i ka Diabolo.

I KUKE.

            Ke huli nei kekahi haole kokoke ma Honolulu nei, i kuke akamai, i kuke noho malie, hoolohe, hana pololei; nolaila o na kuke makaukau i ka hana ai na na haole a makemake i ka hana, e hele mai a ninau ia Limaikaika, a i ole ia, ia Mi Holo. Mai hele mai ka poe makaukau ole.