Ka Nonanona, Volume III, Number 6, 8 August 1843 — Page 27

1843.) KA NONANONA. 27

mau Alii, ma ko lakou Ahaolelo ana i kona mau kanaka.
                No ka mea, ua pii mai kekahi mau hihia a me na mea i manaoia he ku e iwaena o makou a me ke aupuni o Beritania. Nui, no ka mea, mahope mai o ka Haaawi ana o ko makou aina ia Beritania Nui me ka manao i hoihoiia mai no, a hiki mai i ka wa i lawe hou ai makou i ko makou Alii ana, ua lawelawe kekahi poe kanaka o ko makou aupuni i ka oihana, a ua hana i ka hana o kela ano a o keia ano aole i olelo makou e hana pela, aole hoi i olelo aku ko makou poe Luna ia la e hana pela,
                No ka mea, ua paa kekahi poe o ka paahao mawaena o ka manawa i oleloia maluna aole nae makou i olelo aku e paa. Nolaila, no ko makou manao i hoike aku i ko makou aloha aku i ke Akua a ke aupuni o Beritania a me ko makou olioli no ke kau hou ana o ka hae o ko makou aupuni.
                Nolaila, ke hoolaha aku nei makou
                AKAHI. Aole e hoopaaia kekahi o ko makou poe kanaka ma ka oihana o makou no kana hana e ino ai ke aupuni iwaena o ka wa mai ka la 25 o Feb. 1843 a hiki i keia la.
                ALUA. E pau na lawehala i ka hookuuia aku mai Hawaii a Kauai a pau loa aohe koe.
                AKOLU. E hoana e ia na hana o ke aupuni i na la he umi mai keia la aku i kaawale na mea a pau i ka lealea a me ka ahaaina kupono i keia wa.
Hoopaaia ma Honolulu, Oahu, i keia la 31 o Iulai, 1843.
(Inoa,) KAMEHAMEHA III.
(Inoa,) KEKAULUOHI.

"O KA LANAKILA O KA POE HEWA. HE POKOLE IA."

                Owai ka mea ike ole i ka oiaio o keia olelo? Ua pono ia ia ke heluhelu ma ka Baibala, malaila e ike oia i ka oiaio o keia olelo. Pehea o Parao, ke lii o Aigupita, ka mea i hooluhi hewa, a hookaumaha wale i ka poe Iseraela? Aole make koke anei ia, a me kona poe kaua a pau ma ke kai Ula? A i kona make koke ana i ke kai ula, pehea o Mose ma? Aole anei lakou mele, a mililani, a hauoli, a hoomaikai aku i ke Akua, no kona hoopakele ana ia lakou, mai ka lima aku o kela enemi? E heluhelu ma ka Pukaana ma ka mokuna 14, a me ka mokuna 15, malaila e akaka ai.

HAMANA.

                Pehea hoi o Hamana, kekahi alii i inaina aku ia Maredekai a me kona poe kanaka? Eia kekahi mau pauku e hoike mai ana ia kakou i kona hope. Esetera mokuna 7. Ninau mai la ke alii ia Esetera, peneia; Heaha kau mea e nonoi mai ai, e ke alii wahine, e Esetera? E haawiia no ia ia oe. Olelo aku la o Esetera, i aku la, e haawiia ko'u ola no'u ma kuu nonoi ana, a me ko'u lahuikanaka hoi, no ka mea, ua kuaiia e lilo aku, owau, a me ko'u lahuikanaka, e lukuia, a e pepehi ia a make.
                Alaila olelo mai ke alii, Owai ia, a auhea hoi ka mea i hoopiha ai kona naau e hana pela? I aku la o Esetera, o ka enemi ka mea i ku e mai, o keia Hamana hewa no ia. Alaila, makau o Hamana imua i ke alo o ke alii a me ke alii wahine. Olelo mai o Harebona, kekahi o na luna imua o ke alii, aia hoi ke olokea, he kanalima kubita ke kiekie, ka mea a Hamana i hana'i no Maredekai, ka mea i olelo i ka maikai no ke alii; ke ku la no maloko o ka hale o Hamana. Alaila, i mai la ke alii, E liia ia maluna o ia.
                A li lakou ia Hamana ma ke olokea ana i hoomakaukau ai no Maredekai. Alaila, emi iho la ka huhu o ke alii."

IUDA ISIKARIOTA.

                Eia hoi. Ua kumakaia o luda Isi-