Ka Nonanona, Volume III, Number 10, 3 October 1843 — Page 51

1843.) KA NONANONA. 51

pono no ia i Waimea. I ka po, hora 8 hiki i kahi o Laiana, me ke koekoe loa i ka ua a me ka makani. Olioli Laiana me kana wahine i ko maua komo ana iloko o ko laua hale; olioli no hoi maua; noho aloha pu makou i kela mau la eha me na hoaloha.
                WAIMEA. He aina uliuli ia, ulu wale ka nahelehele i ka nui o ka ua. Aole nae he ai malaila; aole mahi ai ko laila poe; no ka mea, ua oki loa kela aina i na holoholona o na haole; paapu i na bipi, kao, lio, hoki; aohe pa o ka aina e pono ai. No Hamakua mai ka ai; halihali kekahi poe ma ka ai, a na na bipi e halihali kekahi ma ke kua. He hana kaumaha loa keia no ka mea, ua ino loa ke alanui kahi e halihali mai ai; he 12 mile hoi ka loihi. Aloha ino ko Waimea ! pilikia maoli ko lakou noho ana.
                Hana ko. O kekahi Pake ka mea hana ko ma Waimea, aia i Lehue nae. He 30 paha eka ko e ulu ana, a ua aeae ke kopaa i hanaia.
                Halepule. He halepule nui ma Waimea; he halepohaku a ua akoia maluna i ka lauhala. Ua maheleia keia hale iwaena, a ma kekahi aoao o ka paku he hale kula, a ma kekahi aoao he luakini no Iehova. Ua aneane piha keia wahi i na noho a ua paa olalo i na papa koa: mamuli paa hoi maluna i na papa; no ka mea, aole puna malaila e paa ai. Ke hooikaika nei kolaila poe hoahanau e paa a maikai ko lakou hale pule. Ua pilikia nae lakou i ke dala ole, e kuai kui, a i papa koa a me na mea e paa'i. Nolaila he mea pono no ka poe mea waiwai e kokua ia lakou. Pehea na hoahanau ma Kailua, Kealakeakua, Lahaina, a me Honolulu? Aole anei e hiki ia oukou ke kokua iki aku i ka luakini ma Waimea? Ina i manao oukou e kokua, olioli na hoahanau a me ke kumu ma Waimea, a oluolu paha ke Akua, ke hana oukou me ka manao e hoonani ia ia.
                Eia kekahi, aole nui o na Katolika ma Waimea; elua kumu haole malaila mamuli o ka pope, aole nae he nui ka poe huli.
                O ka noho ana o na ekalesia malaila, ua like ole; Ikaika kekahi poe, a nawaliwali kekahi poe. Nui ka poe ku paa a nui hoi ka poe i haule. I ka la Sabati, ua maikai ka helehelena o ke anaina haipule, makaala mai, a hopu mai i ka olelo, a noho malie no hoi, aole ku wale a hoi iwaho. Ua maemae na kino o kekahi poe i ka lole maikai, a he kapa maoli wale no ko kekahi poe. Aole mea noho ilalo, ua pau lakou maluna o na punee maikai. Pau ka halawai nui, he kula sabati, ma ka "Hele malihini." Mahalo au i kela kula; ua pomaikai ka poe wehewehe i kela olelo nane, a ike maopopo i kona ano. Hookahi wale no halawai nui ma Waimea i ka la Sabati, no ka noho kawalawala, a me ka ua pinepine i ke ahiahi.

Make.
O BATIMEA UA MAKE.

                I ka la 17 o Sepatemaba nei kona make ana. Ma Wailuku ia i make ai: o ka mauliawa ke kumu o kona mai i make ai; o kona mai kahiko no ia; mai hele aku oia mamua no keia mai ona. Ma Honuaulu ko Batimea wahi i noho nui ai i keia mau makahiki i hala ae nei; noho lunaolelo oia malaila, e hoike aku i ka pono o ke Akua, a e malama i ko ke Akua poe malaila: a malaila hoi, loo-