Ka Nonanona, Volume III, Number 11, 17 October 1843 — Page 53

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 3. HONOLULU, OAHU, OKATOBA 17, 1843. Pepa 11.

No ke kaapuni ana o Limaikaika ma i Hawaii.
KOHALA.

            Poeha maua ma Waimea a holo i Kohala. Maluna o na lio ka holo ana; elua dala ka uku no ka lio hookahi; ma ka waiwai nae ka uku ana. Aole pono loa na lio i loaa mai ia maua, he molowa, a he holo ino kekahi. Ua oleloia he 24 mile mai ka hale o Laiana ma Waimea a hiki i ka hale o Bona ma Iole ma Kohala, a he ala ino loa ia; ua ike pono maua i ka ino, he aa, he kalakala, he kekee, iluna, ilalo, io ia nei; aole okana mai o ka ino. Ewalu hora nae a hiki aku maua i ka hale o Bona.
          He aina haaheo o Kohala; he aina akea, uliuli, hanohano; nui ko maua mahalo ana i kela aina. Ulu maikai na mea kanu; nui ke kalo, ko, uala. He ua pinepine loa malaila, a he ikaika hoi ka makani; o kahi mea ino iki ia malaila, o ka makani ikaika.
            Kahi o Bona. Olioli loa maua i ka hiki ana ae i ka hale o Bona ma; no ka mea, ua maloeloe. Olioli no hoi lakou, a noho aloha makou ia mau la ekolu. Akahi no a ike maua i kela aina. Maikai ka hale o Bona; maikai kona pa, he akea, a ua hanaia a maikai maloko. He nui wale na mea ulu iloko o kona kihapai; aia ilaila na hala, na uala, ohelo papa, na laau malumalu, a me na mea e, aole loaa ia'u ka inoa. He wahi Edena hou kela.
          He kula hanai ko Bona; he mau keikikane na haumana hanai; ua hele kekahi poe i Hilo i ke kula o Laimana a koe eono e noho nei. He mau keiki maikai ke nana'ku. I ka wa kula ole, lawelawe lakou iloko o ka mahinaai a Bona, a ua ukuia ka lakou hana, hookahi kenela no ka hora hookahi! Ma keia uku lako lakou i na mea o ke kino, aole nae lako loa paha.
          He kula no na kumu ao kekahi hana a Bona; i kela po akolu keia po akolu akoakoa na kumu ma kona wahi a nana no e ao ia lakou ma ka helu, a ma ka palapala honua, a ma na mea e ae, i makaukau lakou i ka lakou hana maikai. He kula maikai keia a ua pomaikai Kohala i keia hana. Aole nele kela aina i ka naauao ke hoomauia kela mau kula. O ka mea no ia e hanohano ai kela wahi.
          Ua maluhia ka ekalesia malaila; he nui na hoahanau, he 1,400 a keu aku, a ua hoi hope nae kekahi poe e like me ka ilio hoi hou i kona luai, aole nae he nui loa keia poe i kuu lohe ana. Ua ku paa ka nui ma ka berita a lakou i hoohiki ai. Aka, o ka naaupo, o ka palaka, o ka palaualelo, o ka lalau, aole pau ia mau mea ino o na hoahanau.

HANA KO.

            Hana ko kekahi Pake ma Kohala; he 60 kona mau eka ko e ulu nei; ua ulu maikai loa, nunui. I kona wa puhi ko, 700 pauna i loaa mai i ka la hookahi. He Pake noho malie keia e like me kela ma Waimea a ua ikaika i ka hana: aka, he helehelena ino ko ka lehulehu e noho pu ana.