Ka Nonanona, Volume III, Number 12, 31 October 1843 — Page 52

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 3. HONOLULU, OAHU, OKATOBA 31, 1843. Pepa 12.

NO NA HOAHANAU ILOKO O KA EKALESIA MAI HAWAII A KAUAI.
HELU 1.

                E na makamaka, e na hoahanau mai Hawaii a Kauai, e hoolohe mai oukou i kahi mau manao a kekahi kumu kahiko a oukou e hai liilii aku nei ia oukou. Mai hoowahawaha wale oukou i kana mau mea e ao aku nei ia oukou; aka, e noonoo pono: aia ku like kona mau manao me ka olelo a ke Akua, e malama oukou, mai pale aku i ua mau mea la.
                Mai hoowahawaha oukou i kona elemakule, a i kona poohina, no ka mea, mai kona wa ui kona noho pu ana me oukou ma keia pae aina; a ua ike maka no ia i ko oukou noho ana i ka wa i hiki mua mai ai ka olelo a ke Akua ma keia mau mokupuni; a ua ike no hoi ia i ko oukou noho ana i keia manawa.
                Ua ike pono kakou i ka nui loa o ka poe i ae mamuli o ka pono e ola'i; a he nui na tausani i komo maloko o na ekalesia mai ka manawa i komo mua ai a hiki i keia wa. Komo lakou me ka lana o ko lakou manao e ola'i ko lakou poe uhane. Aka, he hopohopo ko'u i kekahi poe o lakou; a pela paha ka hopohopo o na kahu ekalesia a pau; no ka mea, ua nawaliwali ka mahao o kekahi poe i keia manawa ma na mea o ka uhane.
                Ua emi iho ka ikaika, aole like me ka wa i komo ai maloko o na ekalesia o Iesu Kristo. Ua kanalua kekahi poe; ua kahaha kekahi; ua kuihe kekahi; ua hoi i hope kekahi; ua hele hewa kekahi; a haalele i na hana a ka Haku i kauoha mai ai ia lakou, i na hana hoi a lakou i ae ai e malama loa, a hiki i ka manawa e make ai; a ua hele kekahi poe mamuli o ka pope i ka hoomanakii. Ua hoopunipuniia na kumu, a ua puni makou i kekahi poe, a ua hookomo hewa makou i kekahi poe, a ua komo hewa lakou iloko o na ekalesia, me ka hoomaopopo ole i ko lakou manao ma na mea e ola'i. Ua kuhi hewa me ke akaka ole ia lakou na mea e lana pono ai ka manao o na kanaka haipule oiaio no ke Akua.
                No keia mau mea, ea e na hoahanau, ke hai akaka liilii aku nei ia oukou i kekahi mau mea e pili ana i na kanaka hai pule io no Iehova a i na mea hoi i maopopo ia lakou.
                1. Ua manao nui na kanaka o ke Akua, ua manao oiaio, a ua manao mau no hoi ma na mea o ko lakou uhane: ma na mea o ke ola, a ma na mea o ka make.
                Aole lakou i noho me ka naaupo, me ka ike ole, a me ka maopopo ole a ua mau mea nui la elua, o ke ola a me ka make o ka uhane. Aohe like ko lakou noho ana me na mamo a Iseraela i ka wa kahiko, i hoakakaia ma ke mele a Mose, Kanawailua 32: 28—29. "No ka mea, he lahuikanaka nele i ka naauao."
                Aole hoi he ike maloko o lakou; Ina i noonoo, a ike lakou i keia. A i manao lakou i ko lakou hope." No ka nele i ka naauao, a i ka noonoo ole, oia ka mea i pono ole ai lakou; aia ka mea i poino ai lakou, a i lilo ai lakou i poe pio na ko lakou poe