Ka Nonanona, Volume III, Number 18, 23 January 1844 — Page 85

1844.) KA NONANONA. 85

ai, hiki pinepine mai ka wi, a he poe hoomolowa lakou, a me ka palaualelo. Pela na Inikini ma Amerika, a me ko Kahiki poe.
            He lehulehu na mea ai i lona i ka mahiai, a he mahuahua ke kino o ka mea kanu, he uuku ka mea ulu wale. Hiki wawe ka loaa o ka mahiai, hakalia loa ka imi ana i ka mea ulu wale. Ua moa e ka io o Iakoba moloko mai o ka pahipa, a ua loaa ia ia ka hoomaikaiia e kona makua, aka ua poino o Ekau no ka loihi o kona imi ana i ka mea holo wale.
            No ka poe mahiai na holoholona maikai i hanaiia, na lio, na bipi, na hipa, na puaa, na manu: no ka mea he ai ka lakou e hanai aku ai. He ole loa na holoholona holo wale ma ke kula.
            No ka mahiai wale no na mea loli, ka palule, ke kilika, ka lole paina, ka ie, a ia lole aku, ia lole aku.
                Nolaila mai koonei mea kuai aku, a loaa mai ka waiwai o na aina e. Oia hoi ke ko, ke kofe, ka uala, ka papapa, ka palule, ka raiki, ke kilika,   ke koli, ka olona, a me na mea e ae he nui wale.
            2. Malaila wale no e waiwai ai ko keia pae aina; aole kumu waiwai e ae. Aole hao, aole keleawe, aole ke kala a me ke gula, aole pohaku waiwai, a o ka ia, noonei wale no ia.
                Aole hoi e waiwai koonei i ke kalepa.
            Auhea anei ka waiwai ke haawi ka lima akau i ka lima hema?
            Aole waiwai nui na kanaka oonei i na lawehana, e like me ke kamana, a me ke kui hao, a me ke kela, a me ke kuene. E aho ko na aina e malaila, kahi i lawa ole ka aina no na kanaka.
            Ua pono no nae ia mau hana i mea kokua mahope o ka mahiai.
            Nolaila, ua maopopo lea, noloko mai o ka lepo ka w aiwai o keia pae aina. Na ke akamai a me ke ahonui o ke kanaka e unuhi aku.

NO KE KAKAULIMA.

                Manomano ka maikai o ka ike i ke kakaulima. Aole hoi i loihi ka loaa ana ke hoao a hooikaika. Hiki no i ka poe elemakule, hiki no i ke keiki uuku, hiki no i na wahine a me na mea lima a pau loa. Eia kekahi pono o ke kakaulima. O ke kakau i ka manao a paa ma ka pepa a lilo i palapala e ao aku ai ia hai e like me ka Hoikehonua a me ka Olelo a ke Akua. O ka palapala aku o kekahi kanaka i kekahi ma kahi loihi aku, a maopopo ka manao. He mea lealea no hoi ke kakaulima ke manao   ae kekahi pela. He mea waiwai ke kakaulima, a he mea hanohano hoi, a he mea hoi e pono nui ai na kanaka, aia i la manao o ka mea nana e palapala aku.
                Eia kekahi mau mea e pono ai ke kakaulima.
            1. O ka pepa maikai nakolo ole i ka inika. 2. O ka pahi koli peni oioi loa.