Ka Nonanona, Volume IV, Number 9, 20 August 1844 — Page 49

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, Augati 20, 1844. Pepa 9.

KO DAVIDA MALO NINAU.

Lahaina, Iune 2, 1844.
                Auhea oukou e ko'u mau kaikuaana, na misionari? Ke hai aku nei au ia oukou i na mea a'u i lohe ai. Eia, ua haohao ia kekahi mau hana a oukou e hana nei, e kekahi poe hoahanau, a me kekahi o na lii, a me na hoomaloka. Ua manao lakou, he hana hookuee kekahi a oukou e imi nei ma ka oukou ahaolelo. Aole he hana kuikahi. Penei, o kekahi kahu ekalesia o oukou, papaikaika i ka baka, a hana ko Maui mau hoahanau e like me ka lakou kumu. A ina holo mai ko Oahu poe i Maui, palapala mai ko Oahu kahu, i ko Maui kahu, e ai pu i ka berena, ma ka la Sabati, a ike ko Maui mau hoahanau he puhi baka oia, kue lakou ia ia, a hai aku i kona puhi baka. A lohe ke kahu o Maui, hoonoho ia ia, aole e ai i ka berena, aole e inu i ka waina. Alaila, ukiuki loa oia i kona mea nana i hai, kue loa oia i kona mea nana i hai. A i ka halawai ana, o ko Maui kahu me ko Oahu kahu, aole laua i kue, aka, o na haumanu a laua ua kue loa.
                Ua manao ia no ka oukou hana mai keia kue, no ka ikaika o kekahi, palapala kekahi, ina he ikaika like, pono, ina he palupalu like pono no.
                Eia kekahi, o ka okoa o ka mea hookapu a kekahi kahu, okoa ka kekahi kahu. O ko Hawaii poe kahu ekalesia, papa ikaika i ka ilio, a me ka lei, a me ke komolima, a me ke gula pepeiao. A holo aku ko Maui kahu, e ahaaina pu i ka la Sabati, a ike ko Hawaii mau hoahanau, ua ai oia i ka ilio, a ua lei paha, he komo lima paha, hoonoho ia oia, alaila, kue oia i kona mea nana i hai. Nolaila, ua nui ke kue ma keia mea. Ua ninau mai kekahi poe ia'u, i mai, "Aole i papa ia mai ka baka ma ka olele a ke Akua, i mai kekahi, o kekahi mea o ka poe misionari i papa mai ia makou i ke puhi baka, a i keia wa, aia no e puhi ana oia i ka buka, ua i mai ka palapala, mai olelo aku ka mea e ai ole ana i ka mea e ai ana." I ko oukou wa e ahaolelo ai, i ae kekahi poe, ke imi nei na kumu i mau kapu hou. Pela mai ko Hawaii poe ia'u; i ae kekahi poe, e aho no e kuokoa na ekalesia. Aole e ai ko Oahu i Maui, aole e ai ko Maui i Hawaii, i ole ai e kue." Pela kuu lohe ana.
                Auhea oukou e na luna o ka mea kiekie loa? Aole au e hookolokolo aku ana, aka, e hai aku ana wau i lohe oukou, oia wale no ka'u, aole a'u hana ma ia mea, mai ninau hou mai oukou ia'u me he hookolokolo la, aka, i kaumaha oukou no keia mau mea, e ninau mai no oukou ia'u, aka, i kaumaha ole, ua oki ka ninau mai.
                Aloha oukou e o'u makamaka ponoi iloko o ka Haku Hemolele, ke Akua Makua hoonani mau loa ia.
                Owau o DAVIDA MALO, o ko oukou pokii.

                Auhea oe e Davida Malo. Eia ko'u manao ia oe, ua heluhelu no au i kau palapala i paiia maluna iho, imua o na kahu ekalesia ma ka ahaolelo mamua iho nei, a ua oluolu ko makou manao i kou ninau ana mai me ka