Ka Nonanona, Volume IV, Number 9, 20 August 1844 — Page 50

50 KA NONANONA. (AUGATI,

makou hana. Aole wahi kaumaha malaila; he pono maoli no ia.
                Eia nae ka'u mea hoakaka'ku ia oe, he oiaio no, ua like ole ka hana a na kahu ekalesia ma ia mau mea au i ninau mai la. Ua ikaika loa kekahi poe e hoohaule aku i ka hoahanau puhi baka, a o kekahi poe ua hoole i ka baka, aole nae oki aku paha i ka mea puhi baka. Olelo wale aku e haalele ia mea ino, a oki wale malaila. Pela no ma na lei, a me na komolima, a me na gula pepeiao, a me ka ilio. Ua ae like na kahu ekalesia i ka lapuwale o keia mau mea; he mau mea kohu ole no na haipule; a e pono ke waiho aku a kaawale; aole nae lilo ia mau mea i kumu no ka haule a me ka oki aku paha, iloko o kekahi mau ekalesia. Malaila wale no ka like ole o ka manao, a me ka hana ana.
                Aka, ea, mai kahaha kou manao ma keia like ole ana? Ua manao ka oe, ua like loa ka manao o na kahu ekalesia a me na luna ekalesia a pau. Aole like loa. Ma na mea nui a akaka loa, e like me ka ona, ka aihue, hoopunipuni, kailiwale, hakaka, pepehi kanaka, a me na mea like, ua like no ka manao a me ka hana ana; a ma kekahi mau mea iho, he mau mea pono ole nae, aole like loa ka hana ana. Pela ma Amerika, ma Beritania a me na aina Kristiano a pau.
                Eia kekahi; aole no na kahu ekalesia wale no keia like ole. No na luna kekahi a no na hoahanau kekahi; aia i ko lakou ae like ana.
                Nolaila, eia ka pono, e ae kakou i keia like ole, a e hana kela ekalesia, keia ekalesia e like me kona ae like ana mamuli o ka ke Akua olelo.
                Eia nae ka pono loa, e haalele like na hoahanau a pau loa i ka baka, i ka lei, i ka ilio, i na mea lapuwale a pau, a o ka pau no ia o keia pilikia.
                Pela ka manao o ka Nonanona. Pehea kou, e Davida?

NO KA HANAI I NA KAHUNAPULE. Helu 4.

Makawao, Maui Hikina, Maraki, 28, 1844.
                E na hoahanau Ekalesia, mai Hawaii a Kauai.
                Ke hoakaka hou aku nei au ia oukou i ka pono o ko oukou malama ana i ka oukou poe kumu na mea o ke kino. 4. Eia ka ha, he pono e malama i na kumu a oukou, i ole e hoomaunauna oukou i ka oukou waiwai.
                Ua hoomaunauna kekahi poe i ka lakou waiwai ma ka haawi pinepine ana i kela mea, a i keia mea, na ka poe palaualelo. O kekahi hoahanau a'u i ike ai, he kanaka ikaika loa ia i ka hana. Ua kanu palaoa paha, kulina, uwala kahiki, uwala maoli hoi; ka hoolimalima no hoi, a loaa ia ia he wahi apana lole, a ma na mea e ae he nui loa. A lohe ia, hele koke io na la kekahi hoohanau ona, he kanaka palaualelo, aole mahi, aole lawaia, aole hoolimalima, noho wale iho no; a noi aku ia ia he wahi lole, a he mau hapaha kala paha. Aole hiki i keia hoahanau ke hoole, haawi koke no, e like me kona noi ana ia ia. Pela ua emi ka waiwai a ua pau paha, i ka haawiia 'ku na ka poe palaualelo. Aole pono, e na hoahanau, aole pono keia hana a oukou. Ua kauoha mai ke Akua ia kakou e manawalea aku i ka poe ilihune i ko lakou popilikia; e kokua aku i ka poe wahine kane make, a me na keiki makua ole; aka, ua papa mai no oia i ko kakou hanai ana i poe palaualelo. Menei ka olelo a ke Akua: "Ina aole e hana kekahi, aole e pono ia e ai i ka ai." 2 Tes. 3: 10.
                A heaha ka mea e pau ai ka oukou hoomaunauna ana i ka oukou waiwai ma ka haawi ana na ka poe palaualelo? I ko'u manao, o ka malama ana i ka oukou poe kumu ma na mea o ke kino; o ke kuai ana i na buke no oukou iho, a e hoolaha kekahi ma na aina pouli; o ke kukulu i ko oukou mau hale pule, a me na hale kula, a o ke kokua mau mamuli o ka ke Akua hana, oia paha ka mea e hiki ole ia oukou ke hoomaunauna hou i ka oukou waiwai. Oia ka mea e hiki ia oukou ke pale aku i ka poe palauolelo me he poe nalo maoli la. Aole anei he pono oukou e hoao?
                Na'u na ko oukou hoalauna.
J. S. GELINA.

KA HANA A KA LUNA HALE PAAHAO MA HILO.

                Ua hoolilo ae oia i kekahi lawehala i kakau olelo nana, o kana iho la no ia e hana'i a pau kona mau malama e noho ai, o Haalou ka inoa