Ka Nonanona, Volume IV, Number 9, 20 August 1844 — Page 51

1844.) KA NONANONA. 51

o ua kanaka lawehala moekolohe nei i hoolilo ia'e nei i Kukakako, wahi a na lawehala; ua noa ka hale wahine lawehala i ua wahi Kukakako la; he oluolu ia hale ia ia, wahi ana, aole eha ke kua; a he eha kona kua, ina noho ia ma ko kane hale. Na ua luna nei aku la no kona komo ana iloko o ka hale wahine. He kahu imu kahi lawehala moekolohe, he aipuupuu ke ano paha, o Kaluahine ka inoa o ka aipuupuu lawehala, he kanaka hele pu ia ma kela wahi keia wahi me ka wahine a ua luna nei.
                Ua hoopaa aku i ka paa ohia kane ma ko ka wahine hale paa ohia; a i ka olelo ana aku a ua lawehala nei imua o ka luna i ka pono ole o ka hoopaa ia ana ona iloko o ka hale o ka wahine; huhu nui ua luna nei a hookomo ia ia ma kahi uuku o ka puka laau i pilikia ae kona mau wawae a eha iho, no kana hoole aku i ka pono o ka ia la huipu ana me na wahine.
                Ma keia mau mea i olelo ia'ku la maluna aole au i hoohewa aku, aole hoi i hoapono aku, i hoike aku no, oia no ka mea i mapopo, ma ka'u nana ana'ku i ka hana a ka luna hale paaohia, me kuu ninau aku nae i ka like pu o ka na luna hale paahao a pau mai Hilo aku nei a Kauai.
                Ua like anei kekahi luna hale paahao me keia luna o Hilo nei? o Wahiawa kona inoa? He inu awa no, a a he ae no hoi i ka huipu ana o na kane, me na wahine.
                E ka mea akamai e! e hoike mai oe i ka hailoaa o ka'u mau hoike ana maluna. KAIANA.
Hilo, Iulai 18, 1844.

                E pono e nana ke Kiaaina a me na luna nui o Hawaii i keia palapala a Kaiana; a e hooponopono i kela mea ma Hilo.

KA NONANONA.
Honolulu, Augate 20, 1844.

KUPANAHA.

                Eia no ka mea kupanaha loa ma Honolulu nei. Heaha? He hoomanakii. I ka la 1 o Augake nei, ala nui mai ka poe hoomanakii o keia wahi, a hele nui i ka papu e hookupu i ke alii. He lehulehu lakou i hele pu ia la ma ke alanui me ka waiwai, ka puaa, ka manu, ka maia, ke kalo, ka huamoa, a me kela mea, keia mea, a hiki i ka papu, ninau Kekuanaoa ia lakou, "heaha keia?" Olelo kekahi o lakou, "he aloha i ke alii, a eia kahi waiwai hookupu." Ua pono ia, wahi a ke Kiaaina: aole me e ae?" "He mea e ae no," wahi a lakou. Heaha? He akua; Owai? Ku iluna kekahi, olelo iho la, "o Kamehameha I au;" a olelo kekahi, o Pele ia; a olelo kekahi o Liholiho ia, a pela aku no, he nui wale na akua o lakou. I aku la ke Kiaaina, he poe hoopunipuni loa oukou, a paa keke i ka hao kekahi o lakou; o ka hoi koke no ia o ke koena me ka makau.
                Kainoa ua pau keia hana naaupo; eia ka, he nui ka poe hoomanakii ma Oahu nei! aole pouli a koe aku. Ua hiki mai ka malamalama oiaio; he 24 na makahiki o kona laha ana maanei, aole i ae pau ka poeleele o ka naau o kekahi poe. Auwe lakou! Pehea ka pono? Eia no ka pono, e hooikaika maoli ka poe naauao, e ao i keia poe hoomanakii; e paipai ia lakou; e haawi hoi ia lakou ka olelo Hemolele, a e pule i ke Akua nana e hoola ia lakou.

                MANUWA BERITANIA. I ka la 16 o Aug. nei, ku mai ka manuwa, Carysfort, ma Honolulu nei; ua kamaaina keia manuwa maanei mamua; o Lokeoki kona alii, oia hoi ka mea nana i lawe aku ka ea o ka aina. Eia no ia, ua hoi hou mai. Mai Valeparaiso