Ka Nonanona, Volume IV, Number 15, 12 November 1844 — Page 85

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, Novemaba 12, 1844. Pepa 15.

NO KA HANAI I NA KAHUNAPULE. Helu 10.

Makawao, Maui Hikina, Okatoba 15, 1844.
                E na hoahanau ekalesia o Hawaii nei. I ko oukou heluhelu ana i na mea a'u i hoakaka aku no ka hanai i na kahunapule, ua ae mai paha ka nui o oukou i ka pono o ia hana, aole hiki ia oukou ke hoole. Aka hoi, e kanalua ana kekahi poe, me ka manao, aole hiki ia lakou ke hapai ia hana, no ka mea, wahi a lakou, he poe ilihune na kanaka o Hawaii nei. No ia mea, ke manao nei au e hoakaka ia oukou i keia mea hou aku. Eia. O ka malama kumu, ma na mea o ke kino, he hana mama ia, ke hapai like na hoahanau a pau, me ka manao lokahi, a me ka oluolu.
                He poe ilihune anei oukou, e na hoahanau ekalesia o Hawaii nei? Ma kekahi ano, o ia hua olelo, he poe ilihune no; a ma kekahi ano, aole ilihune. Eia ka poe ilihune, na kanaka i oi nui aku ka lakou mau mea i makemakeia'i, mamua o na mea i loaa ia lakou ma ko lakou imi ana. O ka mea oopa, hiki ole ke hele wawae, aole loaa ka lio ma kona imi ana, he kanaka ilihune ia; aole pela ka mea mama i ka hele wawae. Nolaila, o ke ano o ka aina, a me ke ano o ko na kanaka noho ana, oia na mea e maopopo ai ka ilihune a me ka ole o kanaka. Manao paha oukou, he hana mama ma Amerika, o ka malama kumu, no ka mea, he poe waiwai kolaila poe haipule. He poe waiwai no kekahi, aka, o ka nui o na hoahanau, aole waiwai nui, he ilihune no. Ma ke kaupaona, ua mama ka oukou hana ma ka hanai kahuna, ua kaumaha ka lakou. O ka nui o na mea a lakou e makamake ai, na mea e pono ai ka noho ana, oia ka mea e ilihune ai na hoahanau malaila. E hoakaka aku au i kekahi mau mea e hemahema ai ko Amerika poe hoahanau ekalesia noho ana.
                Ua lohe oukou, he aina anu Amerika Huipuia. Eono malama, aole mahi ia ka aina, aohe mea e ulu ana ma ka nahelehele. Ua paa ka aina malalo a hohonu, a ua uhiia maluna iho i ka hau. No ia mea, make na kanaka a me kamalii i ke anu, ke loaa ole ia lakou kekahi mau mea. E kakau ana au i kekahi.
                Eia: O ka wahie 5 paha paila, $20,00
                O ka mauu maloo no ka bipi waiu, hookahi 1 1-2 tona, 10,00
                O ke kapa huluhipa, no ke kane, ka wahine, a me na kamalii eha paha, 50,00
                O na kamaa no lakou eono, 20,00
                No ka mahahiki hookahi, $100,00
                Pela ko Amerika poe ilihune. Aka, ua pomaikai oukou ma keia aina mehana. Aole oukou kuai wahie, aole kuai mauu maloo no na holoholona, aole kuai kamaa; aole kuai kapa hulu hipa, no ka mea, aohe aina anu keia, aohe hau maanei. Pono anei ko Amerika poe hoahanau ekalesia ke malama i ka lakou poe kumu, a me ka oukou poe kumu kekahi? I ko'u manao, aole pono iki.
                Eia kekahi mea e maopopo ai e hiki no ia oukou ke malama kumu, ma na mea o ke kino. O ko oukou kuai ana i na mea a oukou e makema-