Ka Nonanona, Volume IV, Number 15, 12 November 1844 — Page 86

86 KA NONANONA. (NOVEMABA,

ke ai. E noonoo oukou. Ehia hoahanau maoli mea lio? He lehulehu na lio ma keia pae aina, a ua ike au i ke kuai pinepine ana a na hoahanau ekalesia ia holoholona. Pela na mea e ae. Ua kuai pinepine na hoahanau, i na lole, i ka kilika, i kaliko, kapa komo maikai, a me na kamaa. Ua kuai no hoi kekahi poe i na wati, a me na mea e nani ai ke kino. Aole au e hoohewa ia oukou no ko oukou kuai ana i keia mau mea. Aka, ea, ke ninau aku nei au ia oukou, ina e hiki ia oukou ke kuai i na lio, a me na mea e ae he nui loa a oukou e makemake ai, aole anei e hiki ia oukou ke kuai buke, a ke malama no hoi i ka oukou poe kumu? E noonoo oukou malaila.
                Eia kekahi mea e maopopo ai ka mama o ka oukou hana, ma ka malama i ka oukou poe kumu ma na mea o ke kino. O ka lehulehu o na ekalesia ma keia pae aina. Auhea na ekalesia e ae e like me na ekalesia ma Hawaii nei? Aole paha. E nana i na ekalesia ma Hilo, a me Waimea, a ma Kailua. Ina e haawi na hoahanau a pau ma Hilo na ka lakou kumu, he hapawalu pakahi, ehia dala malaila? A pela ma Lahaina, a ma Honolulu, a ma Waimea ma Kauai, he nui na hoahanau makaukau ma na holoholona, a ma na dala hoi. Ehia hoahanau a pau mai Hawaii a Kauai? Iwakaluakumamakolu paha tausani.
                E noonoo kakou i ko lakou haawi ana.
                Menei, 23,000, ma ka hapawalu, $2,875,
                                ma ka hapaha, 5,750,
                                ma ka hapalua, 11,500,
                                                dala okoa, 23,000,
                                dala a me hapalua, 34,500,
                Oia, o ka haawi pakahi ana hookahi dala a me ka hapalua a na hoahanau a pau o keia pae aina, oia ka mea e malama ia'i na misionari a pau mai Hawaii a Kauai, a me na kula nui kekahi. Ina he mea hiki ole i kekahi poe ke haawi mai ia mea, ua pani ko lakou hakahaka ma ka haawi a kekahi poe elima, umi, iwakalua, kanalima dala! Aole anei he hana mama, ke hapai like na hoahanau a pau loa? E noonoo oukou.
                Eia kekahi mea e maopopo ai i ko'u manao, ka mama o ia hana ke hapai hoahanau a pau. O ka hana a na hoahanau ma Maui Hikina. I ka makahiki 1843, malama o Feberuari, ua hiki mai makou, owau, a me ka'u wahine, o me na keiki elua, i Makawao nei, no ka mea, ua hoohiki na hoahanau o Hamakua a me Kula, e hanai mai ia makou. Kokoke pau ka lua o ka makahiki o ko makou noho pu ana me ko nei poe hoahanau. A ua malama pono lakou ia makou e like me ko lakou hoohiki ana. Menei ka lakou hana. Ua haawi mai lakou i ka palaoa, a me ke kulina; i ka uwala maoli, a me ka uwala kahiki; i ke kalo a me ka maia; i ka pia, a me na ipu; i na moa a me na palahu; na hua moa, a me ia mea aku, ia mea aku. Ua kokua mai lakou ma ke kukulu hale, a ua haawi mai no hoi he kanalima dala maoli. Ua kokua no hoi lakou ma ka mahina hou, a mamuli o ka poe hooluhi ia na dala he kanaono a me ke keu. I ka nana aku, ua oluolu na hoahanau ma ka malama kumu, aole lakou manao e haalele aku; a i ka nana aku, aole emi ka lakou mau mea e pono ai ke kino, ma ia hana; no ka mea, ua kokua ia mai lakou e ke Akua. Alaila manao oukou he ekalesia nui loa keia. Eha haneri, kanalima kumamahiku lakou, na kane, na wahine,