Ka Nonanona, Volume IV, Number 18, 24 December 1844 — Page 88

88 KA NONANONA. (DEKEMABA,

nui ia keia buke, no kona ano maikai; a ke kuil nei kekahi poe o Honolulu nei malaila. Ekolu hapawalu ke kumu kuai o ka Lira Hawaii.
                O ka makaukau i ka hoolea i ke Akua iloko o kona hale, he mea nui ia e oluolu ai ka naau, a e paipai i na manao pono a pau. O ka himeni hoolea me ka leo maikai, a me ka makaukau, he mea ia e lana ai ka manao, e ulu ai ke aloha, a e hoonaniia'i ke Akua. Nolaila e pono no e kula kekahi poe ma keia pa, ko, li, hou, a makaukau e ku ma kahi himeni, a e hoomau malaila.
                Eia kekahi hewa kupanaha au i ike ai; eia, ua kula ia kekahi poe ma ka hoolea, a ua makaukau no; o ka molowa ka hewa; aole hoomau; aole ku ma kahi himeni i ka la Sabati. Me he mea la ua hoowahawaha i keia hana maikai, a haalele honua wale iho no. Nolaila, kawalawala ka poe himeni i ka la hoano, a nawaliwali ka hoolea ana. No ke aha keia hoomolowa wale?
                O kekahi poe no Lahainaluna mai kekahi; ua makaukau no, o ka molowa a me ka hoohanohano ka hewa. Aole lakou ku paa iloko o keia hana maikai.

                KA MAKE.— I ka la 13 o Dek. nei, make o Kaaimalalo ma Lahaina.

                KEIKI ALII HOU.—Ua hanau ke keiki eha a Vitoria, ke alii wahine hanohano o Beritania, i ka malama o Aug. He keiki kane, a ua bapetisoia ua keiki nei i ka la 6 o Sep. iho nei. Eia kona inoa, "Alfred Ernest Albert."
                Nani ka hanau pinepine o Vitoria! waiwai loa kela aupuni ia ia.

                NA LUNA.—Ua lohe wale makou, ua holo mai Amerika mai, Mi. Rikeke laua me Haalilio i ka malama o Okatoba iho nei: aole nae maopopo loa.
                Mai loa o Haalilio, a ua pohala nae.
                O Binamu ma kekahi, e hoi mai ana. Pela ka lohe wale.

                BOLABOLA.—Aneane kaua iho nei o ko Beritania a me ko Farani, no na pilikia ma Bolabola; ua pau nae ka pilikia i ka hooponoponoia.
                Ua uku ko Farani ia Peritikada, kanikele Beritania ma Bolabola i $5,000 no ka hoopilikia ana o ka poe Farani ia ia.
                Pono maoli keia.

                AIHUE.—Ua wawahiia ka hale o Kapena Nai ma Nuuanu, a ua nui na waiwai pau i ka aihue: ua like me $200. Ua loaa ka aihue a me kau wahi o ka waiwai.

PEHEA KEIA?

                Ua ike au i kekahi misionari Amerika, ua noho oia ma keia pae aina he 20 makahiki a keu aku; ua hooikaika loihi oia ma ka hana a ka Haku; ua hai olelo, hoohalike olelo, ao kula, malama ekalesia, lapaau mai, a me kela hana keia hana e pono ai ko Hawaii nei. Aole nae i ukuia kana hana e na kanaka ana i kokua'i. No Amerika mai kona ola; kokua aloha wale mai ko laila poe haipule ia ia.
                A i kela makahiki mamua aku nei, kupu ka manao iloko ona, e imi i kona ola ma Hawaii nei, a e hoomaha i ko Amerika poe kokua. Aole ona manao e noi aku i kana poe haumana e kokua nui ia ia, no ka mea, he poe ilihune lakou; aka, ma ka hanai bipi a me ke kuai aku i ka bata i na haole kona imi ana i kona ola.
                Hoolimalima oia i kekahi aina i ke aupuni, a loaa mai; holo kona pua bipi malaila a maikai; hookahi pilikia i koe, he wahi aina uuku a kaawale no na keikibipi ana, i ole e pau ka waiu ia lakou. He aina kaawale no ma kona wahi, aole nae loaa oluolu mai, no ke koi nui o ka poe mea aina i ka uku nui; hoolimalima oia me kekahi hoahanau ma kona wahi i wahi aina uuku, hookahi paha eka, a he $10 dala ka uku i ka makahiki, no keia eka hookahi, no na keikibipi ana. He uku kaumaha loa keia, no ka mea, he nui ka aina maikai i hoolimalimaia ma Hawaii nei, he hapalua no ke eka hookahi. A mahope hoole hou keia hoahanau i na dala he 10, a koi aku oia i 20 dala no kela wahi eka hookahi, no ka makahiki hookahi.
                Pehea keia? Ku pono anei ka hana a kela hoahanau i ke aloha i kana kumu? Aole anei ku i ka puniwaiwai a me ka naau paakiki? Me he mea la e hoole ana oia i ke ola o kana kumu; aole loaa ke ola ma Hawaii nei.