Ka Nonanona, Volume IV, Number 19, 7 January 1845 — Page 90

90 KA NONANONA. (IANUARI,

papa alii nui, he alii no o Kuakini i hanau alii ia mai.
                Ua hanau mai o Kuakini ma ka makahiki 1792 paha; o Kepuwahaulaula kona makahiki i hanau ai, ma Keauhou ma Kona i Hawaii, kona wahi i hanau ai.
                O Kameheaiku kona kahu nana i hanai, a nui oia ma Keauhou, a hooliloia o Kuakini e kona makuakane e Keaumoku, i kanaka haipule no na akua laau, o ka Kuakini hana ia i kona wa uuku, o ka haipule no na akua kii.
                Nana no e malama na heiau o Kona a pau, a me na Loulu, a no kona haipule, ua kapaia kekahi inoa ona o Kiipalaoku, no ka mea, o Ku ke akua ana e kii ai i pala.
                He keiki noonoo no o Kuakini mai kona wa uuku, he kanaka maiau no, he hana moku hooholo kana mea nui me kamalii, a i kona wa i nui ai, hele no oia me kona mau makua ma Maui, a mahope iho noho oia me Kamehameha akahi.
                A lilo oia i aikane na Kamehameha akahi, no ka mea, he kanaka maikai oia ma ke kino, he akamai o Kuakini i ka namu haole, he kanaka noonoo nui o Kuakini ma na hana o ke kino, he kanaka nunuha, aole e nui kana olelo.
                I ka wa i make ai o Kamehameha akahi, hele no o Liholiho ma i Oahu, hoonohoia o Kuakini i Kiaaina no Hawaii nei, nana no i malama o Hawaii nei, a hiki i kona wa i make iho nei.
                I kekahi wa, ikaika o Kuakini i ke kokua ma ko ke Akua aupuni, nana no i kukulu na hale pule nui ma Hawaii nei.
                Auhea oe e Limaikaika, e ninau hou mai oe ia Tatina paha, ia Bihopa paha, ua ike laua i kona ano, no ka mea, ua noho pu laua me ia.
                E ko'u makua e Limaikaika, ke noho nei au ma Hawaii nei i keia mau malama, a mahope hoi i Maui paha, aole paha.  D. MALO.

Kaluaaha, Molokai, Dek. 10, 1844.

                Aloha oe e Nonanona;
                Ua ike iho nei makou i kau, e ka elele mama ma Hawaii nei, a ua hoike mai oe i ka lilo o ka makou kumu ia Wailuku.
                Eia ka makou ia oukou, e ko Wailuku, aole e loaa ia oukou ka makou kumu, no ka mea, aole pau o ko makou hemahema. He mai pinepine o Hikikoke; eia kona mai, he eha kona puu, he maimai no hoi ke kino, pono i kekahi wa, pono ole i kekahi wa. He nawaliwali pinepine kona kino.
                Eia kekahi, he nawaliwali no hoi o Kulika; he eha kona poo, he nawaliwali no hoi kona kino, he maimai pinepine no hoi.
                Eia kekahi, ua lako oukou i na kumu, he kula nui ko oukou, aohe a makou kula nui. Aole anei ia la he hemahema no makou e ko Wailuku? a no ia mau hemahema o makou, nonoi aku la makou i ke Akua.
                Eia kekahi; aohe no e loaa aku ka makou kumu ia oukou, ina e manao ana o Aneru e uku, aohe na oukou na makou e uku.
                Eia kekahi; ua pau anei ko oukou uku ia Bele ma laua me Kalaka? aohe anei mea i koe? ua haawi anei oukou ia laua i ka laua mea a pau? aole anei oukou i aie ia laua?
                Eia kekahi; he poe waiwai loa anei oukou mamua o makou? nui no na kumu ia oukou? e hiki no ia makou ke uku ia Aneru.
                Eia kekahi, ia oukou wale no anei na keiki? aole anei a makou mau keiki? eia no ko Kaluaaha mau keiki