Ka Nonanona, Volume IV, Number 20, 21 January 1845 — Page 94

94 KA NONANONA. (IANUARI,

                Aole anei pela ka nui o kanaka ma na mea o ka uhane? Oiaio. Ua pale aku lakou i ka ai a ke Akua i hoomakaukau ai e ola'i lakou; hoole lakou i na mea a ke Akua e haawi mai e pau ai ko lakou pupule. Inu rama, waina, awa, baka, moe kolohe, hana ia mea ino aku, ia mea ino aku, a piha ko lakou mau la, alaila hele lakou i ka make.
                Oiaio. "Aia no ka ulala iloko o ko lakou ola ana, alaila hele lakou i ka make.

Na manao uuku.

                1. No ke kanaka ka hewa o kona pupule ma na mea o ka uhane. He hewa maoli ia. Aole no ke Akua mai ia.
                2. He mea weliweli keia mai no ka lehulehu o ka poe pupule, ka poe hoomana kii, pule Mahometa, pule Roma, pepehi kanaka, moe kolohe, aihue, wahahee, hoomaloka. Aloha ino! "A o ke ao nui a pau, he moe nui ia iloko o ka hewa."
                3. O ke Akua wale no ka mea e hiki ai ke hoola mai i ka poe pupule. Pono e hele koke i o na la. Manaoio aku i kana Keiki.
                4. He mea mau ka pupule o kanaka, ke hoola ole ia lakou ma keia ao. Nolaila, e wikiwiki kakou a pau i ko kakou hele ana i o Iesu la, i loaa mai ia kakou ke ola. Amene.
Nau na KEKAHUNA.

KA HOOPII ANA O HOOLILIAMANU IA KEIKENUI.

                Ua hoopii o Hooliliamanu no ke poho o ka waiwai o ke aupuni, a me kekahi mau mea e ae imua o na Lunakanawai kiekie, eia na mea i hoopiia'i
                1. O ka hoopoho i na loi ai paahao.
                2. O ka lawe wale i ko ka lunaauhau wahi.
                3. O ka lawe wale i na loi ai me ka lohe ole o ka Luna.
                4. O ka noho luna ana o ke kanaka naaupo maluna o ka poe naauao. Oia na hewa i hoopiiia'i imua o na Luna Kiekie.
                A i ka la 16 o Dekemaba, hookolokoloia imua o na Luna Kiekie, a haiia keia mau mea imua o na Lunakanawai Kiekie, a me na lii, a me na Jure.
                Na ka Lunaauhau ka hai mua i na olelo a pau e like me kana hoopii ana; hoike oia i kana mau palapala a pau, a hai mai la i ka nui o na dala i lilo i na kumu; a me ke kii ana'ku a ke Kahu i ke dala pili ma na la paahao.
                Hai mai la no hoi oia i ka nui o na loi ai i lilo i na kumu, mai Honolulu a Ewa, a hoike mai la i ka hoopoho ana o ke Kahukula i ka uku o ia mau loi, aole like me kana kuai ana; o ka loi ai i make i ka Luna i na dala $200 ke oo, a no ka opiopio $100 i ka Luna, i ke Kahu he $50 wale no. Oia ka loi i Waikiki: o ka loi ma Pauoa, he $40 i ka'u kuai ana, i ka ia nei kuai ana me na kumu, he $20; o kela loi o Walana, ia'u he $50; ia ia nei he $30 wale no ka. A pela i ka nui o na loi a pau a ke Kahu i hana ai. A hai mai la no hoi i ka lawe wale i ko ka luna wahi; i ka hele o na luna kula e kakau i na kanaka pili i ka la paahao. Aole ia o ka ke Kahu hana, o ka ka Luna hana no ia.
                Aole e hiki ia'u ke lawe wale i kekahi o kana oihana, a pela hoi oia i ka'u oihana, a ke ike nei au ke hele nei kana mau luna e kakau i na kanaka pili i ka la paahao, a pau ia. Eia kekahi; o ka lawe wale i na loi ai me ka lohe ole o ka Lunaauhau, o ka mea a ka Luna i haawi mai, a me ka mea i loaa ole mai ia ia, ua pau pu ia i ka lawe ia e ke Kahu. Kainoa o ka mea i loaa aku