Ka Nonanona, Volume IV, Number 22, 18 February 1845 — Page 111

111 KA NONANONA. (FEBERUARI,

nua." Aole malama na kanaka i keia kauoha, he hoowahawaha lakou i ka oihana mare. Ma na aina i malamaia keia oihana ua mahuahua na kanaka, a papu ka aina. O ka malama ole i keia oihana, a me ka moe kolohe, oia ka mea e neoneo ai ka aina i kanaka ole.
                2. O ka oihana mare, he mea ia e kokua nui i ka noho naauao ana o na kanaka. No ka malama ana o na kanaka i keia oihana, nolaila, ua aloha ia na keiki e ko lakou makua, ua hooponoponoia, ua ao ia mai. A noho ohua na keiki malalo o ko lakou makua ponoi, oia ka mea e pono ai lakou. Ua launa pu na makua me na keiki, a ua imi pu i ka waiwai a me ka akamai i kela hana i keia hana, i naauao ai, i pono ai hoi ka noho ana. Ma na aina i mare ole ia, ua noho hupo na kanaka e like me na holoholona; aole kupu mai ka naauao a me na mea e pono ai ka uhane. Ma na aina naauao a pau, ua mahaloia ka oihana mare, a ua kauia na kanawai e hoomalu ai i keia oihana.
                3. O ka oihana mare, he mea ia e kokua i ka noho pono ana. Ina malama ole na kanaka i keia oihana, ua ulu nui mai ka hewa, ka moe kolohe, ka hookamakama, ka lili, ka hakaka, ke kue a me na hewa he nui wale. Aole malu ka noho ohua ana, pono ole ka aina, pono ole ke aupuni. Aka, o ka malama pono i keia oihana, oia ke malama i ke Akua. He kumu ia o ka noho pono, noho kuikahi, noho haipule. He kumu ia o na mea maikai he nui wale, aole pau i ka heluia.
                Auhea oukou e na'lii a me na kanaka o keia pae aina, e noonoo oukou i ka maikai o keia oihana, a e imi oukou i na mea e lanakila ai keia pono maluna o ka moe kolohe a me na hewa e pili ana ilaila. Aole pono e ae e like me keia pono, e mau ai a e pomaikai ai keia aupuni.

NO KA HOI MAI O NA'LII I OAHU NEI.

                I ka la 4 o keia malama, hiki mai na'lii mai Maui mai; oia hoi o Kamehameha III. laua me kana wahine o Kalama, me ke Kuhina o Kekauluohi, Keoni Ana, Kiaaina o Maui, me kana wahine, me Paki, a me kana wahine.
                Maluna o na kialua, o Hooikaika a me Paalua ka holo ana mai. A hoea mai na kialua, kani na pu ma Puawaina, a hiki i kahi o ka manuwa Amerika, kani nui kona mau pu; a pae iuka ke Lii, kani na pu o ka Papu, a pela no hoi, ua kani na pu i ka wa i pae iuka ke Kuhina. Ua kahikoia na moku iloko o ke awa i na hae maikai a kani hoi kekahi o lakou no ke alii.
                Ua kahikoia na'lii i ko lakou nani a hele nui i ka hale hou i paa iho nei, iwaena o na puali koa a me na kanaka he nui wale.
                I kekahi po iho, hele nui na haole o Honolulu nei, e ike i ke alii a me na lii iloko o kona hale hou; he oluolu ka halawai ana; aloha aku, aloha mai. Hanohano ka hale, a me na'lii me na haole. He hanohano mae wale no nae keia; aia ka hanohano oiaio, o ka pono o ke Akua; ka naau maemae a me ka hana maikai.

NA KATOLIKA MA KAHUKU.

                Ua palapala mai nei kekahi kanaka no Kahuku ma Oahu nei, ua haalele ka poe pope malaila i ko lakou aoao; aole pule pope malaila i keia manawa; ke ku wale la kolaila Luakini pope. O na kamalii o ia aoao kekahi, ua hoi nui mai iloko o na kula o ka aoao hoole pope.

KIALUA NAHAHA.

                I keia mau la aku nei, ili a naha loa kahi kialua, o Pailota kona inoa, makai o Honolulu nei. Aia no ke waiho la maluna o ka akoakoa, e moe ana ma kona aoao; ua oki loa. Aole lohea ka mea e ili ai.