Ka Nonanona, Volume IV, Number 23, 4 March 1845 — Page 106

1845.) KA NONANONA. 106

                Eono mau palapala kuhikuhi i ka mooolelo hemolele.
                Ua pau e ka nui o ka Baibala i ka unuhiia, i kona manawa i makaukau ai ma ka olelo Hawaii; nana no nae i unuhi i ka palapala o Nehemia.
                He mau palapala liilii e ae no hoi, ana i kakau ai.
                Ua kakau no hoi ia i kekahi mau palapala ma ka olelo haole i paiia,
                O ka Mooolelo o Hawaii nei.
                "O ka Leo mai ka aina e mai," a me kekahi mau mea e ae. "Malaila hoi ke olelo nei oia ka mea i make."
                Aole ia i pauaho koke. Ina i hoomaka oia i kekahi hana, hooikaika mau no a paa.
                He aloha nui no hoi kona i kanaka, o ke kumu no ia o kona ikaika; nolaila, aole oia i imi i kona iho, imi no ia i ola no na uhane o ko Hawaii nei.
                He paulele kapekepeke ole kona i ke Akua. Lana no kona manao ma kana hana, no ka mea, ua manao no ia i na olelo hoopomaikai a ke Akua he oiaio. Me he heleuma la ia no kona uhane, aole i kupikipikio, aole i kanalua, aole i hoka.
                Ua paio aku oia i ka paio maikai; ua hoopau ae ia i ka holo ana; ua hoopaa no hoi ia i ka manaoio; nolaila, ke manao nei kakou, ua loaa mai nona he lei o ka pono, ka mea a ka Haku a ka Lunakanawai hoopono i haawi mai ai ia ia.
                E ko Hawaii nei! ke hele nei na kumu o oukou i ka Ahaolelo nui, ke hoopau nei lakou i ka lakou hana; ua hai aku lakou i ka olelo o ke ola ia oukou. Mai hookuli oukou. Mai hoopanee. E paa aku i ke ola oiai e kani mai ana ka leo o ke Akua. E hoomakaukau e hahai maluhia mamuli o Dibela, a komo pu iloko o kahi maha e waiho mai ana no na kanaka o ke Akua.
Na ALEKANEDERO.

HE MANAO NO NA MAKUA A ME NA KEIKI.

Honolulu, Ianuari 27, 1845.
                Aloha oe e ka Nonanona, Eia kahi kanaenae, a me ka mohai aku ia oe, e hai aku oe i ko makou manao, i kahi a pau a makou e olelo nei.
                Ke papa aku nei makou ia oukou e na makua mea keiki a pau o Hawaii, mai haalele, a mai hookuu wale mai hoi i ka oukou mau keiki e hele wale mai lakou maluna o na moku a hiki ma Oahu nei, no ka mea, ke hai aku nei makou ia oukou ma keia palapala i ke kumu a me ke kuleana o ko makou papa ana'ku i ka oukou mau keiki, aole e hele mai. O ka aihue, a me ke kolohe o ka oukou mau keiki o Hawaii i hiki mai maanei; nui ke dala, a me ka waiwai o na haole, a me na kanaka maoli i pau i ka aihueia e ka oukou mau keiki kolohe, a nui no hoi ka pilikia o na kamaaina a me na malihini e noho ana ma keia kulanakauhale o Honolulu nei, no keia hana ino a ka oukou poe keiki.
                No ka mea, nui na keiki a oukou o Hawaii i hopaiia iho nei maanei i keia makahiki i hala aku nei.
                Papalua, papakolu, papaha, a palima ka hoopai ana i ka hewa o ke keiki hookahi, no ka mea, aole i pau ae ka uku a me ka hewa o kela hana ana, a me ia hoopai ana, hana hewa hou no, a aihue hou no, a pela no ka hana ino mau ana o kau mau keiki o Hawaii a hiki i keia la, a mau loa aku paha auanei ke ala ole oe a hana. Aka, i ike oe i keia pala-