Ka Naʻi Aupuni, Volume I, Number 31, 2 January 1906 — HE MOOLELO NO Alamira Ka U'i Hapa Paniolo. Hoomauia. [ARTICLE]

HE MOOLELO NO Alamira

Ka U'i Hapa Paniolo. Hoomauia.

MOKUNA VII. MAHOPE Iho o ka haalele ana iho o ka Loio Lutona i ka Ela, ua noho iho la ua Ela nei me na manao i lumilumiia e na haawina o ke kaumaha ame ka luuluu, me he mea la, ma kana hoomaopopo iho ia wa, he pouli pu wale no na mea apau e ku mai ana imua ona ia wa. Ala mai la na noonoo ikiiki ino ana i loko ona, i kona hoomaopopo ana iho o Renezo Alavareza ke kanaka e lilo aku ai na waiwai a pau o Sutawoleda, ke kanaka no hoi nona ka inoa ana ame kana wahine i hoowahawaha loa ai a i pahenehene ai hoi me ka awahia nui. Aka, iloko oia wa ana e nalu ana me ka ikiiki nui o kona uhane, me he mea la ua lohe ae oia i kekahi leo e pa-e ana me ke aheahe loa ma kona mau pepeiao, ua lohe ae la oia i kekahi mau huaolelo maopopo loa o ka pane ana iho iaia: 'E hoomanawanui a e manao lana," Aia wa no, lohe ae la oia i ka nehe ana ae o kekahi lole silika mai loko aku o kona keena apuka aku la iwaho; a ia wa i kau mai ai ke ano aloha kupouli maluna ona no Alamira. A oiai keia ano aloha e poipu ana maluna ona, pane wale ae la no ia: "E Alamira! Pehea la e hiki ai ia'u ke hoomanawanui a ke manaolana, oiai ka pilikia ame ka poino ke kokoke mai nei?" A ma ia manawa no i ala hou ae ai iloko ona ka manao awahia i ulu mua ae ai mamua, a olelo ae la oia: "Aole e hiki ia'u ke hoomanawanui —E aho paha ka make ana mamua o keia ola ana. He mea pono e hanaia kahi hana me ka hikiwawe loa." Heaha la nae ia mau mea a ua Ela nei e hana aku ai, aole maopopo iaia. Oiai nohoi oia e nohoanamaloko o kona keena, ia wa i hoea mai ai kana wahine me na helehelena -kaumaha no e umalu ana maluna ona, a ninau mai la oia i kana kane. 'Pehea kaua?" 1 kela wa i hoike aku ai o Robata i na mea apau e pili ana kana mau mea i lohe ai mai kona loio mai. Oia hoi, aia ka moraki o ko laua mau waiwai apau malalo o Renezo Alavaleia. Aole no i pau.