Ka Naʻi Aupuni, Volume I, Number 31, 2 January 1906 — He Mau Ninau ia Mr. Kinney. [ARTICLE]

He Mau Ninau ia Mr. Kinney.

E ka nupepa KA NA'I AUPUNI: Aloha Makahiki Hou kaua: I nonoi aku ia oe, e ae mai oe i kekahi wahi o kou kino ohohi nui ia, i wahi no'u e ku iho ai a ninau ia Mr. Kinney o ka Ekaiesia o Iesu Karisto o ka Poe Hoano o na La Hope Nei, ka Ekalesia hoi i ikeia a i kamaaina i kekahi poe, ka Ekalesia Moramona o Uta. Ua hoalaia mai ko'u noonoo e haawi aku i keia mau ninau iaia, ma ko'u ano, owau kekahi lala a hoa o ka Ahahui "Union Prayer Meeting" o ka lala Ekalesia o Iesu Karisto o na Poe Hoano o na La Hope nei i Hoonohonoho hou ia, ma Hawaii nei, a no ka mea, he ku-e au i ka mare o ke kane hookahi i na wahine lehulehu, e like me ka manaoio o ua kaikunane nei, a he apono hoi. au i ka loina alakai "hookahi no wahine mare a ke kane hookahi." A eia iho ua mau ninau nei: 1. Aole anei i hoikeia ma ka Buke (Vol. 15,) aoao 299 o ka Nupepa " Millenial Star," he nupepa pili hoomana i manaoioia e kou Ekalesia e kuu kaikunane Mr. Kini, keia mau olelo e like me keia: "Ua malamaia he halawai nui o ka Ekalesia o na Poe Hoano o na La Hope nei ma Kirtland, ma ka la 17 o Augate, 1835, no ka noonoo ana i na hana a ke Komite i koho ia ai e ka Ahahui Nui o ka Ekalesia, ma ka la 24 o Sepatemaba, 1834, no ka hoonohonoho ana i na itamu (pauku) o na a'o ana (doctrine) a lesu Karisto, no ka hooponopono ana i ka Ekalesia. O na inoa o ke Komite, oia o Iosepa Kamika Jr, Sidney Rigdon, Oliver Cowdery ame Frederick G. Williams; ka poe hoi i manao, mahope iho o ka pau ana o ka lakou hana ana i ua buke la e like me ke kauoha i haawiia aku ia lakou, ina paha he mea pono ke aponoia. a i ole, e apono ole ia paha ua buke la e na mana (authorities) o ka Ekalesia; i hiki ai hoi ke lilo ia i Kana- wai. a i rula alakai no ka manaoioa me ka lawelawe hana Ekalesia ana ina e aponoia ana ia?" 2. Aole anei i hoikeia ma ka aoao 224 ka buke "Compendium." i hoomakaukauia e F. D. Richards, kekahi luna ko'iko'i o kou Ekalesia, e ke kaikunane Mr. Kini, keia mau huaolelo; "Ma kekahi Ahahui Nui o ka ka Ekalesia ma Kirtland, Augate 7, 1855, ua aponoia ka Buke o na Berita (Book of Covenants) i rula alakai manaoio ame ka lawelawe hana ana?" 3. Aole anei i loaa mai kekahi olelo hoike mai ke Akua mai i ka Ekalesia ma ia wa, ma o Iosepa la, ka Mea Ike (a i ole, Kilo, Seer) ma ka malama o Maraki, 1831, a l hoikeia hoi maloko o ka Buke o na Kauoha me na Berita penei. Aole i pau.