Ka Nupepa Kuokoa, Volume I, Number 6, 1 January 1862 — Page 4

Page PDF (1.64 MB)

Ka Nupepa Kuokoa.

Na Mea Hou
NO NA AINA E MAI .

                Ma na moku elua i ku mai nei i i keia mau pule, mai Kalaponi mai, ua loaa mai ia makou na Nupepa me na mea hou ano nui e pili ana i ke Aupuni o Mesiko a me Sepania, Enelani, a me Farani, a me na mea e ae he nui wale no Amerika mai. Ke wikiwiki nei makou e waiho i ua mau mea hou la imua o ka poe heluhelu i ke Kuokoa. Eia no ua mau mea hou la.

                Ua loaa mai na palapala i ke Aupuni o Amerika, e hai mai ana i ka lilo ana o Beufota i na koa aupuni, a ke kukulu nei lakou i na pa kaua.

                Ua loaa mai ka palapala mai Wasinetona mai no ke aupuni, e hai ana, e weheia o Beufota i awa ku moku.

                I ka lohe ana mai o na koa kipi ma Manasa i ka poino ana o Poata Roiala, (aia ia wahi ma Karolina Hema,) ekolu papakoa i koi koke e hoi, aole nae lakou i aeia.

                Ua hiki mai ka lohe mai Poata Roiala, i ka lanakila o ka noho ana o na koa aupuni malaila, he nui ka hoomakaukau ana i na mea e lanakila'i. Ke kau ia nei na pu, a ke kohiia nei na auwaha, he 14 mile mai na Papu aku, e ku nei ma Hilitona Mead (Poo.)

                Ua hopu iho o Generala Sherman, (Samena.) i na pahu Pulupulu, i like ka nui o ke kumu kuai me $3,000,000, ma Beufota, Karolina Hema. A ua hoike nui mai kolaila poe makaainana i ko lakou aloha a me ka kupaa mamuli o Amerika Huipuia.

                KAHI NOHO O GENERALA MAKALELANA.—Ua oleloia, he kau mau o Generala Makalelana i kekahi wahi palapala i na la Sabati a pau, me na hua olelo i kakauia penei; "Aole he hana i hanaia ma keia Keena i ka la Sabati." Maikai ka hana ana pela.

                O ka nui o na koa a pau o Auseteria, 738,344, o ka nui o na pu 1,088. O ku huina nui o ko Perusia poe koa, he 719,092, he 1,444 pu. O ka puali koa o Rusia, he 850,000 ka nui, he 1,160 pu. O ko Farani, he 626,482 ka nui. A o ko Beritania Nui hoi, ma na wahi ona a pau o ka honua, 534,527 ka nui o na kanaka. Ma ke aupuni o Amerika i keia wa, he 515,000 koa i paa mau i na mea kaua, o ka akau wale no.

                Ke houluulu nei kekuhi puali koa pualu ma Nu Ioka, ua oi aku mamua o ke tausani ko lakou nui; he poe i waeia, aole hoi i mareia i ka wahine. O ka hana a keia poe i hoohui ai ia lakou iho, o ka hele e pepehi a e hoopai aku i ka poe nana i pepehi pono ole ia Col. Ellsworth, oia kekahi o ka poe keiki opiopio i hele ai i alii maluna o na koa kinai ahi o Nu Ioka.

                1,300 Ilikini i hele aku ma kela kapa o ka muliwai o Akanasasa. E hele ana i kahi a Generala Makalaka e noho nei; oia kekahi o na alii koa o ka Hema.

Ka pilikia e hakoikoi nei maluna o Mesiko.

                Me he mea la ua paa ka manao o Sepania, Farani a me Beretania, e ku-e aku ia Mesiko; no ka mea, pela ke ano o na mea e hanaia nei eia mau Aupuni nui. Aohe ano maikai loa o ka noho ana o Juarez me kona poe kokua, a o ka haalele ana mai hoi o Generala Otega, kekahi mea e manaoia nei, aole i lana malie ka waiho ana o ke Aupuni i keia mau la. Ua oleloia ua ae aku o Mesiko i na mea i koiia mai e Sepania a me Beritania; aka, aole nae i manaoia ma ke Kulauakauhale Alii o ia Aupuni.
                Ma na mea i oleloia ma Parisa, ka makemake oia Aupuni ka hoopau i ka hapai ana o na poe e kaua kipikipi nei ma ke Aupuni o Mesiko. Aole o lakou makemake e lawe lilo i kekahi o na aina a me ka lawe ae i kekahi pono mua o Mesiko. Ua hoopau o Enelani i ka makemake ana e hookomo iloko o ke Kuikahi oia hoi, penei: "E hoohiki na Aupuni  ekolu, aole e lawe i ka noho Alii o ke Aupuni o Mesiko, i kekahi o na keiki o ka papa Moi oia mau Aupuni, ma ke ano noho Moi ana; alaila, aole e kokua kekahi o keia mau Aupuni i ke 'Lii hookahi." Ua olelo kekahi Nupepa o Parisa, he 30,000 ka nui o na koa o Farani e kena'i laila. Aka, o ko Sepania manao no i keia manawa, e hoonoho i Alii Moi maluna o Mesiko ma ka maka o ka elau. Ekolu poe alii i kamailio nuiia no ia noho Alii; aka, o ka mea nae paha e komo ana e noho ana ma ka noho Alii o Mesiko, oia no o ke keiki Alii Monte, no ka mea, oia ka mea punahele loa i na 'Lii a me ka lehulehua no a pau.
                Mahope iho o ka lohe ana o ke Aupuni o Amerika i ka manao o Sepania, Enelani, a me Farani, e hooponopono ia Mesiko; nolaila, ua hoouna aku nei ka Peresidena i kekahi manuwa e holo e makai i ka pono o ka poe haole Amerika, na ke Kaikuono o Mesiko.
                No ka nui loa o na Alii kaua o Sepania e noho nei ma ka papa koa o na Kahuna, ke nana nuiia nei ia mau mea me ka hoolele pu i ka oili; ke hoomau nei no ka pii ana o ia poe koa, a eia kekahi, o ka ike ana'e i kekahi poe Alii o ka aina e kau ana i ka Hae Sepania, no ko lakou mau wahi. Ke hoike nei ia mau mea i ka pono o na Aupuni e ae, ke nana mai i ka hana a Sepania ma keia Apana o ka honua, a e makai mai i ka pono o ko lakou poe makaainana.

Ke koa ano e o Kapena
Wm. E. Strong.

                O ka hana koa i hanaia i keia mau la kokoke iho nei, oia ka hoopio ana a Kapena Wm. E. Strong, oia kekahi o na Kapena o kekahi papu koa o ka Akau e noho kiai nei ma o iki aku o Wasinetona, ke kulanakauhale alii o Amerika Huipuia. I kekahi mau la koke iho nei, oiai e hele ana ua Kapena la e hoonoho kekahi o kona poe koa ma kahi e hiki ai ke kiu aku i ka hana ana a na koa kipi, a mahope o kona kukulu ana i ua poe koa nei ona ma kahi ana i makemake ai; o kona hoi mai la no ia, aole nae ma ke alanui a lakou i hele ai, aka, ua hele ia no ke kokoke ma kahi alanui e ae, aole i liuliu kona hele ana, o kona loaa koke mai la no ia i kekahi o na koa kiu o na kipi, a lilo iho la ia i pio na ua poe kipi la. Eono ka nui o na kipi, elua koa lio, a eha koa hele wawae. Ae koke aku la na Kapena nei i kona pio ana, a kai hele ia aku la keia a hala na roda he 20 paha, me ka hailiili aku o ua poe kipi nei, me ka olioli nui i ka loaa ana o ka mea a lakou e li ai ia la; Kahaha iho la ua Kapena nei i ka lawe oleia o kana mau mea kaua, na pu a me ka pahi, aole oia nei ike iki i kahi e hiki ai ia ia ke holo i kaawale ai. Eia no a i ka ike ana mai o na koa kipi i ka hulali o na pu panapana a ia nei; pane koke mai la lakou e haawi aku i ua mau pu la ia lakou, o ko ia nei pane aku la no ia, "Ae no hoi paha e na Keonimana," ia manawa unuhi ae la ia i na pu mai ka ili ma kona aoao, a kulai malu mai la i ke kanaka o na pu ana, a pane aku la ia, "Eia ua mau pu la," i ka wa a ia nei i pane aku ai, oia no ka wa i kani ai o na pu, a haule iho imua ona elua o ua mau koa kipi nei, ua make loa. A lele koke aku la ia malalo o ka malu o kekahi kumu laau, hala na poka i kiia mai nona, a elua wale no i ku ia ia, lele kekahi poka a ku ma kona wahi waiho a-i ma kona kua, a o kekahi poka hoi, ku mai ma kona papalina, a puka mai la ma kona waha, me ka hemo ole o kekahi niho ona, aka, moku iki nae ka welelau o kona alelo. Puka mai la ia mai kahi ana i ku ai, paa e mai la ke alanui i kekahi o na koa kipi, me ka pu e kau pono mai ana i ka umauma o ua Kapena nei: Ki hou mai kekahi o na koa kipi, a huli ino ae la keia, pakika ae la ka poka, me ke komo iloko o kona kuka, puliki, a me kona palule, me ka hoomeheu iki i kona ili. Ia wa, lele koke mai la ka lio o ke kipi imua ona, o ko ia nei ki aku la no ia, a ku ke kipi ma ka poohiwi, a haule koke iho la mai ke kua o ka lio, me ka paa o kekahi wawae iloko o ke keehi, a puiwa hele aku la ka lio, me ke kuku o ke poo o ke koa kipi iluna o ka okumu laau. Ia wa koke iho no, loaa oia i kona poe koa ponoi, ua nawaliwali, a ua aneane e pau kona aho i ka nui o ka manawa ana i hakaka ai me keia poe koa kipi, pau nae na kipi i ka make.
                Ua nana makou i kona kii, a me kona kanaka maikai, a iloko o ko makou manao, he maikai Waipio, he alo lua na pali. He 20 ka nui o kona mau makahiki, i ka la 10 o Aukake i hala iho nei. He Loio kana hana, ma Nu Ioka kahi i hanau ai, a oia ka Luna o na koa pualu i kapaia ka "Belle City Rifiles."
                O keia kanaka ka mea akamai loa i ke ki pu ma ke Komohana. Ua oleloia, ua hele oia a hookuu he mau manu Nunu, alaila, waiho iho i kana pu ilalo, kuala poo aku la elua, a ekolu paha kuala ana, alaila hopu i ka pu a ki aku i na manu ana i hookuu ai, make koke iho la laua ia manawa. He keu a ke akamai.

Hopuia na Kuhina o ka Hema.

                Ma ka la 8 o Novemaba, ua hopuia ke kino o Slidell a me Mason, na Kuhina o ka poe kipi i manao ia e holo ma Beritania, maluna o ka moku lawe leta o Beritania ko laua wahi i hopuia'i, mawaho iho o Bamuda. O Lieut Fairfax, a me na kanaka he 33 ka mea nana i kii e hopu. Hoololohe iki no, aka ua hele mai no nae ma ia manawa koke no; Inaina loa ke'lii o ka Moku Leta, a kapa aku la i na poe i kii mai e hopu i ua mau Kuhina kipi nei, "he poe Amerika Powa." O Euratese, oia kekahi o ka poe kipi i kooikaika e hoole i ka hopuia mai, aka, aole i liuliu, o kona hele aku no ia e noho pu me kona mau Poo e paa pu ma kahi paa. Maluna no o ua moku la ka wahine a Slidell me na keiki eha, ua hookuuia no lakou e holo i Europa.
                Ua hui o Comodore Wilkes, (maanei no keia haole i na makahiki he 20 i hala aku nei, i hele mai e ana ia Hawaii nei, a ua holo pu o Kauka i kona wa e noho aupuni ana, i kona holo ana i Hawaii mai a nei aku,) me Gen. Wool, e kamailio pu no ka pono a me ka hewa o ka lawe ana mai i na kino o Slidell a me Masona, mai luna mai o ka moku Beretania, no ka mea, he ano kue ka hana pela i ke Kuikahi a me na Kanawai Aupuni. A ua hoapono mai o Gen. Wool ia Com. Wilkes me ka olelo mai, " Ina ua pono, a ina ua hewa, he pono ke hopuia keia mau kanaka, e hopuia no ka pono o ka lehulehu. A ina ua hana oe i ka hewa, ua hana oe i ka mea i hanaia mai ia oe."
                He nui ka olioli o ka poe a pau i Wasinetona, i ka hiki ana'ku o ka lohe ilaila, ua paa o Slidell me Mason, pela hoi ka olioli ana, i ka lohe ana i ka lanakila o na koa aupuni ma Poata Roiala, Karolina Hema.
                Ua manaoia, e ulu ana ka hoopaapaa a me ke kue mawaena o ke Aupuni o Beritania Nui, a me Amerika Huipuia, no ka hopuia'na, o Slidell a me Mason, oiai laua iluna o ka moku e kauia'ana e ka Hae Beritania, a ua kueia no na hana o ia ano, e na Kanawai pili Aupuni. Ua olelo hookaumaha kekahi mau Nupepa o Enelani i ke Aupuni o Amerika, no ka hopu ana i ua mau kipi la, me ka olelo mai, ina e manao o Amerika e mau kona noho hanohano ana, e aho ia ia ke hookuu aku i na kino o Mason ma.
                Ua hooholo ke kulanakauhale o Nu Ioka, me na Poo o kolaila Aupuni, he olelo hooholo, E mahalo ana ia Com. Wilkes no kona hopu ana ia Slidell a me Mason, me ka lawe pio ana mai ia laua iloko o Nu Ioka. Ua noiia mai oia e noho ma ke Keena o ke Kiaaina o Nu Ioka, i hiki ai i na makaainana ke hele mai e hoomaikai ia ia no ka hana maikai ana i hana'i, ma ka hopu ana i na kipi.

Kanikau no Mrs. Maleka Ii.

Kanikau aloha keia nou e Maleka,
Kuu kaikuahine aloha nui e,
Kuu mea minamina e noho nei,
Ka lei hulu mae ole i kuu manao,
Ka pua rose nani o ke Kaona,
Kuu lei pua Pikake aala i ke ahiahi,
E moani ana i ke kuluaumoe,
Moe lolii ke aloha i kuu kino e hana nei,
Ua kaumaha, ua luuluu au i ka minamia ia oe,
E Mareka, kuu kaikuahine aloha e!
Kuu kaikuahine o ka aina hanau,
O ka aina ua nui o Hilo;
E hehi haaheo mai ana i ka lau o ka Ulu,
Ke lulumi ae la iuka piha na kahawai,
Kuu kaikuahine mai ka ua kani lehua,
Mai ka ua nihi mai ma Leleiwi,
Ke hoonuu mai la iluna o ka Ohia;
Kuu kaikuahine o ka ua Kualau,
O ku ua halii mai i ka ili o ke kai;
Kuu kaikuahine o ka ua Lanipili,
O ka ua kinakinai mao ole la o Hilo;
Kuu kaikuahine mai ka pihe kanaka ole o Piilani,
Mai ka lai hulihia o Halekalewa,
Mai ke one haaheo o Punahoa;
He hoa holo lio no oe no ia one.
Me na kaikamahine o ke Kaona,
Ke u nei lakou me ka minamina ia oe.
Kuu kaikuahine o ka wai o Waiolama,
Mai ke kai leo nui ia o Paikaka,
A me ka malu hale o Maunaihi.
Aloha ke one loa o Ohele e waiho nei,
A me ka wai o Wailea, i ka huikau a na Waapa,
Kuu kaikuahine o ka bele leo nui o Haili,
E kani lua ole nei i ka lai o Hanakahi,
E hoene lea ana i ka wehe'na o ke alaula;
Aloha wale ka lai o ka luakini,
Kahi a kakou e noho iho ai,
E hoolohe ana i ka leo o na makua hai ola.
Ke hoohuoi nei kou wahi e noho ai ia oe,
Me na alanui o ke Kaona i kou nalo ana;
Kuu kaikuahine o ke kai luu Pihaa o Kanokapa,
Mai ka wai auau o Wailuku,
A me ke kawa lele opu o Piikea;
Aloha ka wai poai me na lehua o Mokupane,
Aloha Waikapu i ka wai huihui,
Aloha ka wailele o Waianuenue e pipio mai la i ka pali,
Aloha na puu o Halai i paa i ka ohu,
Aloha Makaulele i ka luhi ohu i ka lehua,
Aloha Mokihana i na lehua hoonaona,
Aloha Upeloa i ke ala o ka hala,
Aloha Kipaepae i ka moani a ka maile,
Pee aku la oe i ke ao uli la nalowale,
Pau kou maalo hou ana ma keia mau wahi,
I ka hoohihi aku a ka manao, i wehiwehi no ke kino,
Nou no kuu aloha pau ole, e Maleka, kuu kaikuahine e;
Kuu kaikuahine o ka aina hoopili wale o Kau,
Mai ka aina kua makani, kuehu lepo o Naalehu,
Mai na pali hauliuli o Kahilipali,
Kuu kaikuahine mai ka ua haao o Waiohinu,
Ke lele ae la mauka o Auaulele,
Kuu kaikuahine o ka wai nou i ke poo,
O ka wai aumeume pu me ka makani,
He aloha ka malu hale o Malulani,
Malaila no kakou i noho ai a kupa,
E hoomanawanui ana i ke aloha o ka makua,
Me ka hooikaika ana e loaa ka ike ma ka olele haole,
Aloha ua wahi nei la a kaua i noho ai,
Aloha ke kula wai ole o Kamaoa,
A me ka palai kaulana o Molilele,
Aloha ke pili nopu wela i ka la o Kalae,
Aloha ka wai o Palahemo i awili pu ia me ke kai,
Hemo ka pili a kaua la, ua kaawale oe,
Ua haalele mai oe ia'u e kuu pokii aloha e,
Aloha wale oe kuu kaikuahine o ka ia maka liilii o Kamilo,
A me ke kula holo lio o Mamakalepo,
E hikikii lua ana i ka malu laau o Ilama,
Aloha Pohina e alo nei i ka ino,
Aloha o Kawelohea, wahine noho i ke kai,
Aloha Honuapo i ka malu o na niu,
Aloha ka wai o Unahea i ka nalu hai o Kawa,
Aloha na iliili hanau o Koloa,
Aloha ka luana kanaka o ka wai hu o Kauila,
Aloha wale ua aa maka uliuli nei la, a kakou e hele ai,
Aloha ka piina o ke kula o Kanenelu,
E ake aku ana e hala mai Halape, moe aku i Keaiwa,
Aloha ke alanui mauna e waiho mai la,
Ke ala a kaua e hoi ai i ka poli o ka makua,
Hele aku he loa ka pahoehoe,
He ala kekee me na puu kinikini, a hiki aku i Pohakau,
E hoolai ana i ke one o Kahualoa,
He loa ka piina o Ohiakalani,
Loaa aku i ka makani o na makani paio,
E hooholu mai ana i ka lau o ka nahele,
A luna o Uekahuna kakou, ku aku nana i ka lua,
E mahalo ana i ka hana kupanaha a ke Akua,
E kilohi ana i ka nani o Pele, o ka wahine ahi ai honua,
E hoaleawai mai ana ilalo o Halemaumau,
He mau aku no ka iho'na a hiki i Kaauea,
Hoomaha aku i ka hale Kamalauki,
E hoopumehana ana i ke ahi a Kukaohialaka
I ka hoopulu ana mai a ka ua awa a me ka hau anu o ka mauna,
Aloha wale ia mauna anu mehameha a kaua e hele ai,
O ka huli hoi keia i ka Home, pau ka ike'na ia kaua,
Huli aku ke alo i ka Hikina,
Nana'ku i ke kua o ka aina hanau;
I uhiia mai e na ao ua eleele o ka lani,
O kona kahiko nani no ia,
Hoolele hauli wale ka manao i ka hauoli,
Aohe loa o Pohakuloa, i ka uhu a ka manao
E pae aku ana i hala mai o Oma-o-lala,
Paina aku i Kapueuhi,
Uhiia mai e ke ohu, paa i ka ua noe,
Alo aku kakou o ka ino nui,
O ka iho'na kapekepeke la o Kahoku,
He hoomanawanui i ka hele a hiki i Kanekoa
Aloha ia waonahele a kaua e hele ai,
Kuu kaikuahine mai ka la makaponiuniu ai ole o Olaa,
E hoona aku ana ke aho i ka hale makamaka
Aloha ka iho'na lepo poho o Kahuku, a hiki i Kukulu,
Kahi a kakou e hoomaha iho ai i ka malu o ka niu,
Komo aku o ka ululaau o Panaewa,
He olu ka hele ana maluna o na lio,
E hoolohe ana i ke kani maikai o na manu,
I ka hoene lea mai i luna o ka laau,
Hiki aku i Keawewai, nahenahe mai ke ala,
Ke onaona o ka lehua, me ka lau o ka maile,
Makahehi aku kaua i ke kino o ka laau,
I ke kupu ohaoha mai, luhiehu mai na pua,
Haiamu i ka manu, ka nahele i Paieie,
A Puaaloa kaua, ku aku nana ia Waiakea,
Ke awa ku a na moku e hookapeke ana i Keahua.
E oni ae ana ka lae o Makahanaloa.
Me he Io la i ka malie,
Ku kilakila mai ana o Maunakea,
Ka oi kelakela o na kuahiwi,
E waiho nani mai ana Hilohanakahi.
I kahiko ia i na laau uliuli,
I hoonaniia hoi e na kahawai wailele.
I hoopeia e ke ala a ka makani Puulena,
Makani halihali ala o Puna,
E lawe mai ana i ke onaona a lu i Hanakahi,
Ko kaua one hanau, kahi au i aloha nui ai,
E noho ana me ka oluolu, malalo o ka makua.
Me ka hoomanawanui aku i na leo ino o kou mau enemi.
A hala wale aku la oe i ka make,
Nolaila, ua lai no oe, ua hiolani,
Ua pau ka luhi, pau ke kaumaha,
Na ino o keia ao, ua hala ia mahope ou,
E Maleka, kuu kaikuahine e.
Ka nani o na hau o Maunakea i ka pouli,
Ka enaena o na ahi o Kilauea, i Hawaii,
Ko Punahoa pua lose lani,
I kukupu a ohaoha, ma ka Hikina,
I haule a mae wale ma ke Komohana,
O oe kai ka hikina a ka la i Kumukahi,
I nalo aku la i ka welo'na a ka la i Lehua,
Pela oe i hele aku la i ke ala hoi ole mai;
Aloha na makua o kakou,
E noho u nei me ka minamina ia oe,
A me ke kane wahine ole,
Ke noho nei ia me ka ehaeha o ka naau,
No kou haalele koke ana mai ia ia;
Pau kou ike ana i na nani pau wale o keia ao,
I ke komo mai i ke Pukiki,
A hikikii lua i ke anu waialeale;
I ka lawe mai i ka Hupa,
A hoohaha me he Pelehu la;
I ka hao mai i na kakini me na kamaa,
A uhene i ka moena Kina;
I ka hawele mai a ka papale,
A ai ka manu iluna;
Ilaila oe la oki, hiluhilu ke noho mai,
Nohenohea ka ike ana'ku,
Pela oe i haalele mai nei,
I na kahiko mau ole o ka Honua,
Pau ka ike'na i ka lehulehu,
I na kinikini makamaka,
Me na kauna hoahanau,
Nou e Maleka kuu minamina, e noho nei,
A me ka nele pu hoi i ka pokii wahine ole,
Nolaila, ua ehaeha loa au nou,
E Maleka, kuu kaikuahine aloha e,
E oluolu nae au ma ka noonoo ana i ka ka Baibala,
I hoikeia ma ka waha o Ioba,
Na Iehova i haawi mai, na Iehova hoi i lawe aku;
E hoomaikaiia ka inoa o Iehova.
Na JOSEPH N. KAAPA.
Waiohinu, Kau, Hawaii, Nov. 28, 1861.

No na Olelo Hoolaha.

O NA MEA A PAU E MAKEMAKE ANA e hookomo i na Olelo Hoolaha ma keia Pepa, eia malalo nei ke ano o ka uku ana, ke oi ole aku mamua o ka aoao palapala hookahi, a o na lalani hua kepau he 20.
                No ka pule hookahi, ............................ $1.00
                No na pule elua, ................................... $1.50
                No ka mahina hookahi, (4 pule)........... $2.00
                E like me maluna ka uku ana o na Olelo Hoolaha no na holoholona hele hewa.
                Aka, ina e oi aku ka nui mamua o ka aoao hookahi o ke kanana palapala, alaila e papaluaia ka uku, a ina loihi loa, hoonui iki aku ka uku.
                E hooili pu mai i ka uku me na Olelo Hoolaha i paiia, ina aole, aole no e paiia.
HANALE M. WINI.
Luna Pai o ke KUOKOA.

O KEAHA'KU KOE!
EIA AUANEI O NU IOKA I HONOLULU NEI.
MA KE ANO PAI KII.

HOOKAHI WALE NO DALA KA UKU! No na KII MAIKAI LOA, i like me na kii i paiia ma Honolulu nei mamua aku nei, me ka uku $2.50 a me $3.00.
                He Wa Ilihune Keia! E makemake ana e hoolilo i na mea a pau o ka oihana pai kii e waiho nei ma kona lima; i kaawale kahi no ua mea maikai wale e hiki mai ana. Nolaila, ua manao ae o KINI e hana e like me kana hana mau (ma Nu Ioka) o ke pai kii me ka EMI LOA o ka uku. A nolaila, ke kaliia aku nei ia i ka lehulehu a pau e hele mai e pai i ko lakou mau kii, oiai me lakou ka loaa makepono ana.
                E hele mai oukou e nana i na kii hoikeike ma ko'u Keena Hana. He makehewa ia oukou ke olelo ae, aole e loaa ia oukou ua kii, no ka mea, ua emi loa ka uku, oiai e loaa ana ia lakou na kii i like ka maikai me na kii i papakolu ka uku mamua o keia mau la.

Hookahi wale no dala ka uku!

No ke kii maikai i hanaia iloko o na Pahu Mikioi, i pakeu ka maikai mamua o na mea e ae oia ano i hanaiama Honolulu.
Ma ka Hale Pai o KINI,
Maluna ae o ka Hale Paipalapala o H. M. Wini.              4-2t

HALE PAI KII
o
E. D. Durana.

EIA MA KO'U HALE PAI KII, MA KE Alanui Alii, ma ka hale e pili ana ma ka aoao hikina hema o ka Hale Kuai o Daimana ma, kahi i ahu ai o na mea maikai a pau o ka oihana PAI KII.
                Nolaila, ua makaukau au e pai i na kii o ka poe makamake ana, me ka maikai ame ka nani, me ka uku oluolu loa. E pono no e hele kino mai oukou i ike maka.
E. D. DURANA, Mea Pai Kii.
Honolulu, Oka. 23, 1861.     3

E LOHE OUKOU A PAU!

NO KA MEA HOI, E HOOPAUIA'NA KE pai ana o ka "HAE HAWAII," i ka pule hope o Dekemaba o keia makahiki; nolaila, ke hoolaha'ku nei; e puka ana ka "Nupepa Kuokoa," ma ka la mua o Ianuari, M. H. 1862, a e paiia i kela pule keia pule, a pau ka makahiki.
                Mahope iho o ka la mua o Ianuari, alaila, e hoonaniia kona mau kowa me na kii maikai loa, i ku ai i ka makemake o ka poe e lawe ana ia ia.
                E paa mau ana maloko o ke " KUOKOA," na mea hou a pau, penei:
                1. — Na Nuhou a pau o na Aina e a pau, he nui loa.
                2. — Na Olelo Hoolaha a pau o ka Aha Hookolokolo Kiekie
                3.— Na Olelo Hoike Makahiki o na Kuhina Aupuni.
                4. — Na Moolelo o na Ahahui Mahiai a pau.
                5. — Na Olelo Hoolaha a na mea Kalepa.
                6.—Na Olelo Hoolaha e pili ana i na Holoholona Helehewa.
                7.— Na olelo hoike aku i ka Hanau, Mare, a me ka Make
                8.—Na Palapala mai Hawaii a Niihau, a ka poe e makemake ana e kakau mai.
                9.—Na Mele, na Kanikau, a me na Himeni.
                10.— A me na mea e ae he nui wale i pili i ka hoonaauao a me ka hoohauoli i ka noeau o ka poe e heluhelu ana ia ia.
                Nolaila, ke kaheaia'ku nei ka poe a pau e lawe ana i ka "HAE," e pono ia lakou ke lawe i ka "NUPEPA KUOKOA." A malaila oukou e ike ai i na mea hou a pau, a e loaa hoi ia oukou ka pepa maikai hookahi i paiia ma ka olelo Hawaii.
                E loaa i ka poe a pau i uku mai i na Dala Elua, ($2.00.) he Palapala Hookaa i paiia me ka inika ulaula; alaila, e haawiia ia ia ka pepa, a hiki i ka la hope o Dekemaba, 1862. E kakau mai ia
H. M. WINI
Luna Pai o ke Kuokoa.
Honolulu, Dekemaba, 1861.                5-1y

PAPA MANUAHI.

EIA KA MEA HOU LOA NO NA KANAka maoli o Hawaii nei, ua loaa mai ia'u na papa Oregona o kela ano keia ano, me ke kumu kuai make pono loa. E pono no e hele mai oukou e hoakaka i ka oiaio no keia mea. Eia ke ano o na laau a me na papa.
                Papa paina no Amerika a me na Pine pa, Pili. Laau nui, Laau Liilii, Papa hele, Papa kahiia, Papa kalakala. Eia kekahi: Wai hoomaloo a me na mea e ae, kupono no na hale, Pena keokeo Pelekane maikai loa, Pena omaomao lenalena, Aila pena. Aia ma kai, ma Aina Hou, Mauka iho o ka Hale Dute Hou.
GEO. G. HOWE.
Honolulu. Aperila 3 1861.   1-tf

NA MEA HAO HOU LOA.

UA HIKI MAI MALUNA O KA MOKU Amerika " RADUGA," ma Bosetona mai, na mea hao hou loa. A eia ma ko'u hale kuai, ma ke keena mauka o ka Hale Uinihepa ma ke Alanui Papu. Na waiwai hou he nui wale, o kela ano keia ano.
Na laka puka hale. Pahiolo a na kamana. Kuikahi o na ano a pau. Kui hana hale, hana pa a me ke kui hana waapa. Kui keleawe a me ke kui kepau no ka waa. Kuaina kupono no ka hana upena. Koi nui a me na koi liilii. No ka poe oo a me ka poe opiopio. Mau oo pe maikai no ka mahi loi. Mau ho maikai kekahi. Palau maikai. Pahi oki laiki. Me na oo he nui wale.
A me na mea e ae he nui wale. He EMI loa ke kumu kuai no na mea i haiia maluna. E hele nui mai i pau ko oukou kuhihewa.
W. N. LADD.        2

AKE, (A. S. CLEGHORN.)
Olelo Hoolaha.

O KA POE A PAU E MAKEMAKE ANA i na lole maikai a me na kamaa paa. E aho ia lakou ke hele ma ka Hale Kuai o Ake. (A. S. Cleghorn,) malaila e loaa'i na mea a puu e pili ana i ko ke kanaka makemake. Ua lako mau ia Hale Kuai i na WAIWAI KALEPA, i kela ano keia ano. NA KALAKOA PELEKANE, a me na waiwai maikai ie ae he nui wale.
                Aia na Hale Kuai ma ke Alanui Nuuanu mauka iho o "HALEOLA," a ma ke kihi o ke Alanui Nuuanu me Alanui Kalepa, makai iho o ka Loiala Hotele.   3

PA AUPUNI MA KUALOA.

NO KA MEA, UA KOHOIA MAI maua i mau Luna no ka pa holoholona hele hewa, e na mea Hanohano M. Kekuanaoa, Kiaaina o Oahu, ke hoolaha aku nei maua, aia ka pa ma Kualoa, Koolaupoko, ua makaukau maua e hana e like me ke Kanawai.
JUDD A ME WILDER
Honolulu, Nov. 29, 1861.     4-3m

KAKELA ME KUKE.

MA KA HALE POHAKU HOU, MA POLELEWA kahi kokoke i ka Halepule Betela ma Honolulu, Oahu. Na laua no e kuai i na lole o Kela ano keia ano.
NA MEA AI, NA BAKEKE, NA IPU TINI, NA PA LEPO, NA KAMAA, NA PAHI me na O-O, NA PAPA me na NOHO, NA IPU HAO, NA NOHO LIO, NA MEA E KAKAU, NA PENA ME NA AILA. NA MEA MAHIAI. A me kela mea keia mea. Me na laau a Dr. D. Jayne.
Honolulu, Dekemaba, 1861.                5-6m

HALE KUAI.
NALO MELI
o
HALEWAI.

JOHN THOMAS WATERHOUSE.

 Ma keia hale kuai, ua nui na ano waiwai ku pono i ke kane, i na wahine, a me na keiki, he waiwai hou mai Kaleponia mai.

Kamelo.

O ka poe kuai ma keia hale, e ike wale lakou i ke Kamelo me ka uku ole. E kau mau ana ka hae o ke AUPUNI HAWAII ma ka ipuka o keia Hale Kuai.       1 -6m.

LAAU, LAAU.

PAPA OREGONA 1, 1 1/2, 2 a me 3, iniha. Kaola 2x3, 2x4, 2x6, 3x3, 3x4, 3x6, 4x4. 4x6, 6x6, 6x8, 8x10, 6x12.
Papa Oregona, 3 iniha ka laula. Pine pa, papa kepa, papa paina, papa pili ulaula, papa ulaula o na ano a pau.
Pani puka, pani aniani, pani olepelepe, pena, aila pena, kui, aniani.
Pepa, laka, ami, palaki o kela ano keia ano.
C. H. LEWERS, (oia hoi o LUI.
Pa kuai laau ma Alanui Alii, Alanui Kalepa, a me Alanui Papu.   1-6m

PULUPULU!

PULUPULU, PULUPULU.

 

NO KA NUI O KA MAKEMAKE e kanu na kanaka o keia Pae Aina i ka Pulupulu, nolaila, ke ae nei au e lawe i ka Pulupulu, i kanu ponoia e ke kanaka Hawaii, i ukuno ka " NUPEPA KUOKOA."

                Penei: — O ke kanaka Hawaii e haawi mai ia'u ma Honolulu nei, i na paona pulupulu maikai i kanuiia i Hawaii nei, he 40; e loaa ia ia ka "Nupepa Kuokoa" no ka makahiki hookahi. E lawe no au i ka pulupulu i pau i ka waeia, i a i wae ole ia ka anoano.

                Auhea oukou e ka poe i nele i ke dala, me ka makemake nae e lawe i ka Nupepa. E hele oukou e kanu i ka pulupulu, alaila, e loaa no ia oukou ka Nupepa a me na pono e ae o keia ola ana.

                EIA HOU.— E kuai no au i ka pulupulu maikai a pau i kanuia e ke kanaka maoli iloko o ka makahiki 1862, me ka uku i elima keneta no ka paona hookahi, oia hoi ka $5.00 no ka 100 paona hookahi. Aka, i na e hoolaha kekahi poe Kalepa o Honolulu nei, e uku ma ke dala maoli no ka pulupulu, alaila, aia no i ku'u manao ke kuai aku a me ka ole mahope o ko lakou hoolaha ana. No ka mea, ua makemake wale no au e paipai aku e kanuia keia kumu waiwai hou, ma keia Pae Aina. Nolaila, ko'u hooia ana'ku i ka lehulehu, i hiki ia lakou ke kuai aku i na mea a pau a lakou e kanu ai.

Owau no o H. M. WINI,

Luna Pai o ke Kuokoa

Honolulu, Nov. 1861.           3.

 

HALE KUAI BUKE.

AIA MA HONOLULU HALE. (OIA KA HALE Leta.) ka hale kuai o Wini, he wahi e kuai ai i na Buke Haole he nui wale, O KELA ANO KEIA ANO BUKE KULA HAOLE, A B C, (Primer.) KUHIKUHI O KE KANAKA HAWAII, (Form Book.) BUKE PALAPALA HONUA MUA. BUKE HUAOLELO, (Phrasebook.) BUKE PA KO LI, (Kamina.) A me na Buke Kula e ae he nui wale.
Malaila no na Buke maikai no ke Kakau Waiwai, no kela oihana keia oihana, mai ka mea nui a ka mea liilii. —AIA NO HOI NA— Kanana Leta, rula ia a rula ole ia. Kanana Pepa loihi, rula ia a rula ole ia. Peni Hao, maikai loa. Inika, ipu inika. Peni kala, eleele, uliuli a ulaula. Kumu peni. Wepa ulaula a eleele. Wahi palapala, ulaula, keokeo a eleele, (mea kakau.) Papa pohaku, a me ka peni kala pohaku. Inika eleele, uliuli, a ulaula. Me kekahi mau mea e ae no he nui, no na kula, a me na oihana kakau. A he make pono no ke kuai ana malaila no keia mau mea. E hiki no i na kanaka maoli, mai Hawaii a Niihau, ke hele malaila e kuai ai.
1