Ka Nupepa Kuokoa, Volume I, Number 42, 13 September 1862 — He Kanikau no Kilauea, Kaiwiula, Kepola, Samuela. [ARTICLE]

He Kanikau no Kilauea, Kaiwiula, Kepola, Samuela.

Aloha ka lai o Kona i ka holu a ke kehau, Aloha ka lae o Hanamalo au ana i ke kai, Aloha ka Mauna kahi a ke au e hooipo nei, Aloha ka lai o Mahana hone i ka poli, Aloha na Hokuewalu i ka wai olu o ka pukini, Aloha Ahulae i ka holo a ka lio, Aloha Kuula i ka lai o Hanakai, Aloha Hinahele e pupue nei i ke anu, Aloha ka Ia ka-ka-pahi o Kapulau, Aloha ka piina wela o Lokoula, A me kaihona olu o Kalipo, Hoolipo ke aloha hikikii lua i ke kula o Haleula,

E ulu ae ana i ka waimaka aohe e paa, Aloha Puukani i ka malu a ka ohai, Aloha Maui Hikina i ka holu a ka inia, Aloha ka lai o Hoolale, A me ka malu aloha o Kiapalu, Aloha Hookaukeano i Halehulili, Aloha Kualoa o Kalihi a me Omokaa, Aloha ka wai olu o Mawae, A me ke one o Puluwai, Aloha Waiaka i ka lai o ka Halepule Aloha Waikuaala i ka niuwili o Milolii, Aloha ka lani hale, ka hale lai o Kona, Aloha Waikini i kilohiia e ke kehau, Aloha ka makani hoolale waa o Kona Hema nei he Eka, E holu ana i ka welelau o ka lihilihi, I kiina mai hoi au e ke aloha, Puni hoi a'u mamuli o ka leo, Aloha Puuhao i ka hoowali ke kula o Waiea Aloha Puunoni i ka la wela o Puukoea, Aloha ka uka o Papa i ka hone a ke kahuli i ke kuluaumoe, Moe au a hoolana i ka leo o ka manu, I ka holu malie i ka lau o ka awapuhi, Aloha ke kula o Puainako, kahi a kakou e hele ai, Aloha na lae makawalu e Kona, He liuliu nanaina, he koke i ka manao, Aloha ka ihu o Kekauluohi hone i ka ale, Aloha a'u keiki mai ka lai o Kalahiki, Hiki mai ka luna ka alele a ke aloha, Uhuuhu launa ole i ka pali o Alaihi, Aloha Manuahi haaheo i ke pili, I piliia ka nani o Haliilua, Aloha nui oukou e a'u mau keiki, Haalele oukou i ke ao nei, I ka puuwai o ka manaoio, I ka hihio lua i ke alanui o ka inuwai, E oluolu au ma ka olelo a ke Akua, He mea ole ka mea nana i kanu, A me ka mea nana i hookahe i ka wai, O ke Akua ka mea nana i hooulu, A loaa iho la au i ka olelo a Kepania, Hoka!! hoka!! Me ke aloha pau ole Amene. B. LEIALOHA. Kona Hema, Hawaii, Aug. 23, 1862.