Ka Nupepa Kuokoa, Volume I, Number 53, 29 November 1862 — Page 1

KA

NUPEPA KUOKOA:

Ke Kilohana Pookela no ka Lahui Hawaii.

BUKE I.  HONOLULU, NOVEMABA 29, 1862.  HELU 53.

 

He Inoa no Kamokuhaaheo.

 

Nana aku o ka laula o Ewa,

O ke kuahiwi mauna pali o Kaala,

E ala mai oe e ko'u hoa,

Noho aku au o ka uka anu o Lihue,

Ua maeele wale i ke koekoe,

O kuu ipo, ua mahole i ka ua,

I na la i ka nahele o Lanihuli—e,

E huli mai oe e ke hoa, ua anu au—a,

Aohe hoa o ke aloha ke hiki mai—a.

Na AUIKAHALANI.

 

Anoai oe e ke aloha i ona,

I ona hoi au a hoi me ka nele,

I kuia paha au i hoi nele ai,

Ke hoi wale nei no aole i pono,

E pono ai la hoi au o oe kekahi,

A oe nalo ka puana o ka moe ianei—a,

Aohe hoa o ke aloha ke hiki mai—a.

Na L. KAAIPAKA.

 

Aala ka poli o ka ipo i moe ia,

Aala Waianuhea i ka ua Pinehalaole,

Aoe e hala ko aloha ke hiki mai,

Hiki mai ko aloha maeele au,

Maeele hoi au i ko kino wailua,

Elua a'u mea e honi nei i ke ala,

O ka Rose la o ka Mula,

O ku nani o Mauna Gula ka'u e ike nei,

O ke onaona o Maunaaniani ka'u e iini nui nei,

Iini aku hoi au o ko maka Alopeke—a,

Aohe hou o ke aloha ke hiki mai—a.

Na L. WAHINEALOHA.

 

Opua hiki i ka ua Kuahine.

Palaimaka i kanahele o Lanihuli,

Huikau ae la ka leo o ka Pelekei,

Ka manu hoonaue i ka maka o ka Lehua,

Puaiki o Kawaihoa i ke kai,

Ka lele hone a ka leo o ka manu,

Ka pono paiki me kuu aloha ia Kawaikini—a.

Aohe hoa o ke aloha ke hiki mai—a.

Na KAUAOHIHIMANU.

 

[No ke Kuokoa.]

                1. Heaha ka mea i kipi ai ko Inia poe i ko aupuni Beritania i keia wa iho nei? No ka noho oluolu paha? No ka noho kaumaha paha?

                2. Heaha la ka mea i kue iho nei o Nuzelani ia Beritania? No ka hana maikai ia mau panalaau paha? No ka hana ino paha?

                3. Heaha ia ka mea i kaniu-hu ai ka hapa nui o Beritania i ka noho ilihune ana? No ka hana maikai o ke aupuni paha? No ka pau loa ana paha o na waiwai o ke aupuni i na Bihopa a me kekahi poe e ae?

                4. Heaha la ka mea i komo ole ai ka hapa nui o Beritania ma ka ekalesia Enelani o na Bihopa? No ka oiaio paha? No ka wahahee paha ?

                5. Heaha la ka mea i haalele ai o kekahi mau Kumu o lakou i ko lakou puu dala nui, a huli ma na hoomana e ae? No ka oiaio i paha? Aole paha?

                6. Ina paha e haalele o Beritania i ke kokua ana, lawa anei i kahi uuku o Hawaii nei?  J. KAUHI.

 

Nu hou maoli.

E ka Nupepa Kuokoa e; Aloha oe :

                Akahi no kaua a halawa a kamakamailio pu, no ka loaa ana nae hoi o kahi makana e ike aku ai ia oe, oia kela wahi hua olelo maluna. Eia ua wahi nu hou la, ua hanaia kekahi auwai loihi, mai uka o Waikane, a hiki i Hakipuu, ua alua mile, mai ke kumu o ka wai a hiki i ka pau ana. Ua hanaia nae keia auwai i ka wa ia Umi, kekahi alii o Hawaii nei mamua.

                I keia wa, ua hana houia e na kanaka hana mahina, malalo o N. Paikuli, a me S. L. Holokahiki, na Luna hana o Judd, a me Wilder, na Haku hana, akahi no a ikeia keia mea hou e makou ka poe hanau hou, ua ola ko makou kula panoa wai ole i keia wa, no ke kahe ana o ka wai ma ko makou wahi.

                Nolaila, e wiki oe i ka hoolaha ae i ko kaua wahi hunahuna manao, mai lohi oe, ke Kilohana Pookela no ka Lahui Hawaii nei, a laha mai ia oe, olu iho au he wai olalo. Ua pau, e hoi ana wau, ke peahi mai nei ka lau o kahau ia'u e hoi maua, ua lai mai nei o Huaipau.  S. E. K. PAPAAI.

Koolaupoko, Waikane, Oka. 28, 1862.

 

KA MOOLELO

—O—

LAIEIKAWAI.

 

OLELO HOAKAKA.

                [No LAIEIKAWAI. — He umikumamawalu makahiki me ekolu malama ka malamaia'na o keia Moolelo Kaao, e ka mea nana e hoopuka nei keia moolelo maloko o kana Buke Moolelo, e hoomaka ana ma ka malama o Augate, M. H. 1844. O ka mea nae nona ka Buke Moolelo, no Kailiokalauokekoa no ia. Aka, aole o keia mau moolelo wale no na mea iloko o ua Buke Moolelo nei, o ka moolelo o Painahala, kekahi, ua malamaia ia moolelo ma ka malama o Okatoba, M. H. 1847. Ua like ka loihi o keia moolelo me ka mea nona ka moolelo ma ke poo o keia hoakaka ana; no ka mea, 375 aoao ka nui o ko Laieikawai, a he 363 aoao ko Painahala, a ua aneane like nae ke kamailio ana o ko Painahala me ko Keamalu, ma na kupunawahine nae ka like ole.

                O ka moolelo o Kualii, ko Moikeha, a me ko Lonoikamakahiki mau moolelo kekahi i huipuia iloko o ua Buke Moolelo nei.

                A no ka hooiliia ana, mai o ka pomaikai nui i ka mea kakau moolelo; nolaila, ua haawi pau ia'ku keia mau moolelo no ka Nupepa Kuokoa.

                E na mea a pau, e nana mai i ka Nupepa Kuokoa ma keia hope aku, ka mea nana e hoolealea ia oukou e like me ka makemake o kekahi poe. S. N. HALEOLE.

 

MOKUNA I.

                I KE KAMAILIO ANA I KEIA KAAO ua oleloia ma Laie, Koolau kona wahi i hanau ai, a he mau mahoe laua, o Kahauokapaka ka makuakane, o Malaekahana ka makuahine. O Kahauokapaka nae, oia ke Alii nona na okana elua, ma Koolauloa a me Koolaupoko, a ia ia ka mana nui maluna o kela mau okana.

                I ka manawa i lawe ai o Kahauokapaka ia Malaekahana i wahine mare nana (hoao) mahope iho o ko laua hoao ana, hai mua o Kahauokapaka i kana olelo paa imua o kana wahine o laua wale no ma ke kaawale, oiai iloko o ko laua mau minute oluolu, a eia ua olelo paa la.

                "E kuu wahine, he nani ia ua mare ae nei kaua, a nolaila, ke hai nei au i kuu olelo paa ia oe; i noho aku auanei kaua a i loaa ka kaua keiki a he keikikane, alaila pomaikai kaua, ola na iwi iloko o ko kaua mau la elemakule a haule aku i ka make, nalo no hoi na wahi huna, na ia keiki e nai na moku e pau ai, ke loaa hoi ia kaua ke keiki mua a he keikikane; aka hoi, ina he kaikamahine ke hanau mua mai, alaila e make, a ina he mau kaikamahine wale no ka kaua ke hanau mai e make no, aia no ke ola a hanau mai a he keikikane, ola na hanau muli i ua he mau kaikamahine."

                I ka ewalu paha o na makahiki o ko laua noho ana he kane a he wahine, hapai ae la o Malaekahana, a hanau mai la he kaikamahine, ua maikai na helehelena i ka nana aku, a no ka maikai o na helehelena o ua kaikamahine nei, manao iho la ka makuahine o ke kumu la hoi ia e lilo ai ka olelo paa a Kahauokapaka i mea ole, ola la hoi ua kaikamahine nei, aole ka! Ia manawa i hanau ai, aia nae o Kahauokapaka i ka lawaia me na kanaka.

                A hoi mai o Kahauokapaka mai ka lawaia mai, haiia aku la ua hanau o Malaekahana he kaikamahine. A hiki ke alii i ka hale. ua wahiia ke kaikamahine i ke kapa keiki, kena koke ae la o Kahauokapaka i ka Ilamuku e pepehi.

                Ma ia hope iho hapai hou o Malaekahana, a hanau hou mai la he kaikamahine, o keia nae ke kaikamahine oi aku o ka maikai mamua o kela kaikamahine mua, manao iho la e ola la hoi, aole ka! Ike ae la o Kahauokapaka i ke kaikamahine e hiiia mai ana, ua hoaahuia i ke kapa keiki, ia manawa, kena koke ae la ke alii i ka Ilamuku e pepehi.

                Mahope mai, ua hapai wale no o Malaekahana, he mau kaikamahine wale no, aole nae i ola iki kekahi oia mau hanau ana o Malaekahana, ua pau wale no i ka pepehiia e like me ka olelo paa a ke alii.

                A i ka hapai hou ana o Malaekahana i ke keiki, o ka lima ia, a kokoke i na la hanau, hele aku la kela a imua o ke Kahuna, a olelo aku la.

                "E! auhea oe? E nana mai oe i keia opu o'u e hapai nei, no ka mea, ua pauaho ae nei hoi i ka pau o na keiki i ka make i ka pakela pepehi a ke kane, aha ae nei a maua keiki, aha no i ka make, nolaila, e nana mai oe i keia opu o'u e hapai nei, ina i ike oe he kaikamahine, e omilomilo ae au, oiai aole i hookanaka ae ke keiki." Aka hoi, ina i ike mai hoi oe i keia opu o'u e hapai nei a he keikikane, aole ana. Alaila, olelo mai ke Kahuna ia Malaekahana.

                "O hoi, a kokoke i ko la hanau, alaila, hele mai oe i o'u nei i nana aku au i keia hapai ana."

                A kokoke i na la hanau, i ka malama o Ikuwa, i na la kapu heiau, hoomanao ae la o Malaekahana i ke kauoha a ke Kahuna. Ia ianei e nahunahu ana, hele aku la kela imua o ke Kahuna me ka olelo aku.

                "I hele mai nei au ma ke kauoha a ke Kahuna, no ka mea, ke hoomaka mai nei ka nahunahu hanau keiki ana, nolaila, ano oe e hana mai oe i kuu keiki e hapai nei."

                Ia Malaekahana me ke Kahuna e kamailio ana no keia mau mea, alaila, hai aku la ke Kahuna i kana olelo ia Malaekahana.

                "E hailona aku au ia oe ma ka mea a'u e noi aku ai, e haawi mai oe."

                Ia manawa, nonoi aku, la ke Kahuna ia Malaekahana e haawi mai i kekahi lima imua o ke alo o ke Kahuna, e like no me ka hailona mau o keia lahui, ma ka lima no nae ana e makemake ai e haawi aku imua o ke Kahuna.

                Ia manawa a ke Kahuna i noi aku ai i kekahi lima, haawi mai la o Malaekahana i ka lima hema, me ka hoohuliia o ke alo o ka lima iluna. Alaila, hai aku la ke Kahuna i ka hailona i ku i kana ike.

                "E hanau hou ana no oe he kaikamahine, no ka mea, ua haawi mai nei oe i kou lima hema ia'u me ka huli nae o ke alo o ka lima iluna."

                A no keia olelo a ke Kahuna, kaumaha loa iho la ka naau o Malaekahana, no ka mea, ua kumakena mau kela i ka pepehi mau a kana kane i na keiki mua; nolaila, noi aku la o Malaekahana i ke Kahuna e noonoo mai i mea e pono ai ka wahine, a e ola ai hoi ke keiki. Alaila, hai aku la ke Kahuna i kana mau olelo ia Malaekahana.

                "E hoi oe a ka hale, ina e hiki i ka wa e aneane hanau ai, alaila ea, e ono ae oe i ka ohua, me ka olelo aku ia Kahauokapaka, nana ponoi no e lawai-a, o ka i-a ponoi no e loaa ana ma kona lima oia kau i-a e ono ai; no ka mea, he kanaka puni kaalauohua hoi ko kane, i lilo ai kela i ka lawai-a, ike ole ia i kou hanau ana, a ina e hanau ae, alaila, na'u e malama ke keiki, i hoi mai ia ua lilo ia'u ke keiki, a ina e ninau mai, hai aku oe he heiki alualu, alaila pau wale."

                A pau ka laua kamailio ana no keia mau mea, hoi aku la o Malaekahana a hiki i ka hale, ia manawa, nui loa mai la ka nahunahu ana a aneane e hanau, alaila, hoomanao ae la o Malaekahana i na olelo a ke Kahuna i a-oa-o mai ai ia ia.

                A i ka mao ana'e o ka eha no ka aneane hanau, olelo aku la o Malaekahana i kana kane.

                "E Kahauokapaka e! ke kau mai nei i ko'u mau maka ka ohuapalemo, nolaila e holo aku oe i ke kaalauohua, me he mea'la a loaa mai ka ohuapalemo, alaila hemo kuu keiki, akahi wale no o'u hanau ino ana, a me ka ono o'u i ka ohua; nolaila, e hele koke aku oe me na kanaka i ka lawaia."

                Ia manawa, puka koke aku o Kahauokapaka a hele aku la. Ia lakou e hele ana, hanau ae la ua keiki nei he kaikamahine, a lilo ae la ia Waka ka hanai, a kapa iho la i ka inoa o LAIEIKAWAI. Ia lakou no hoi e lawelawe ana i ke keiki mua, hanau hou mai la he kaikamahine no, a lilo ae la ia Kapukaihaoa, a kapa iho la i ka inoa o ka muli o LAIELOHELOHE.

                A lilo na kaikamahine ma ka lima o Waka a me Kapukaihaoa me ke kaawale, hoi mai la o Kahauokapaka mai ka lawaia mai, ninau iho la i ka wahine.

                "Pehea oe?" I mai la ka wahine.

                "Ua hanau ae nei au he keiki alualu, ua kiolaia'ku nei i ka moana."

                Ua akaka mua no nae ia Kahauokapaka ka hanau ia lakou i ka moana; no ka mea, elua hekili o ke kui ana, manao ae la no hoi o Kahauokapaka ua hanau ka wahine; mai ka hanau ana o Laieikawai me Laielohelohe, oia ka hoomaka ana o ka hekili e kani iloko o Ikuwa, pela i oleloia iloko o keia moolelo.

                Ia Waka me Kapukaihaoa ma ke kaawale me na hanai a laua, olelo aku la o Waka ia Kapukaihaoa.

                "Pehea la auanei e nalo ai na hanai a kaua ia Kahauokapaka." I mai la ke Kahuna.

                "E pono oe ke huna loa i kau hanai iloko o ke kiowai i Waiapuka, aia malaila kekahi ana i ike ole ia e na mea a pau, a na'u no hoi e imi ko'u wahi e malama ai i ka'u hanai."

                Lawe aku la o Waka ia Laieikawai ma kahi a Kapukaihaoa i kuhikuhi ai, a malaila oia i malama mala ia ai o Laieikawai a hiki i kona manawa i hoomahuahua iki ae ai.

                Mahope iho o keia mau la, lawe ae la o Kapukaihaoa ia Laieikawai i uka o Wahiawa ma kahi i oleloia o Kukaniloko.

                Iloko o ko LAIEIKAWAI mau la ma Waiapuka, ua hoomauia ka pio ana o ke anuenue ma kela wahi, iloko o ka manawa ua a me ka malie, i ka po a me ke ao; aka, aole nae i hoomaopopo na mea a pau i ke ano o keia anuenue; aka, ua hoomauia keia mau hailona alii ma na wahi i malamaia'i ua mau mahoe nei.

                I kekahi manawa, ia Hulumaniani e kaahele ana ia Kauai a puni ma kona ano Makaula nui no Kauai, ia ia i hiki ai iluna pono o Kalalea, ike mai la oia i ka pio a keia anuenue i Oahu nei, noho iho la oia malaila he iwakalua la, i kumu e ike maopopoia'i o ke ano o kana mea e ike nei. Ia manawa, ua maopopo lea i ka Makaula he Alii Nui ka mea nona keia anuenue e pio nei, a me na onohi elua i hoopuniia i na ao polohiwa a puni.

                Ia Manawa, hooholo ae la ka Makaula i kona manao e holo i Oahu, i maopopo ai ia ia kana mea e ike nei. Haalele keia ia wahi, hiki aku la keia i Anehola, hoolimalima aku la keia i waa e holo ai i Oahu nei; aka, aole i loaa ia ia he waa e holo ai i Oahu nei. Kaapuni hou ka Makaula ia Kauai a puni, pii hou oia iluna o Kalalea, a ike hou no oia i kana mea i ike mua ai, aia no e mau ana e like no me mamua, alaila, hoi hou keia a hiki i Anehola.

                I ua Makaula nei malaila, lohe keia o Poloula ka mea waa o Wailua, no ka mea, he alii ia no ia wahi, ake aku la oia e halawai me Poloula, me ka manao e noi aku i ke alii i waa e hiki ai i Oahu nei.

                Ia Hulumaniani i halawai aku ai me Poloula, nonoi aku la oia i waa e holo ai i Oahu nei; alaila, haawiia mai la ka waa me na kanaka, ia po iho, i ka hiki ana o ka Hokuhookelewaa, haalele lakou ia Kauai, he umikumamalima ko lakou nui, hiki mua mai la lakou ma Kamaile, i Waianae.

                Mamua ae nae o ko ka Makaula holo ana mai, ua hoomakaukau mua oia hookahi puaa hiwa, he moa lawa, a me ka ia ula.

                Ia la o lakou i hiki ai ma Waianae, kauoha ka Makaula i na kanaka e noho malaila a hoi mai oia mai ka huakai kaapuni ana.

                I ua Makaula nei i hele ai, hiki mua keia iluna pono o Maunalahilahi, ike aku la keia i ke anuenue e pio ana ina Koolauloa, e like me kana ike ana i kona mau la iluna o Kalalea.

                A hiki keia i Waiapuka, kahi i malamaia ai o LAIEIKAWAI, ike iho la oia aole he kuleana kupono o kela wahi e nohoia'i e na'lii. I kela manawa nae a ka Makaula i hiki ai ilaila, ua nalo mua aku o Waka ma kahi i hunaia'i o LAIEIKAWAI.

                I ka manawa nae a ka Makaula e kunana ana, alaila, ike aku la oia i ka aleale ana o ka wai o ko Waka luu ana aku. Olelo iho Ia ka Makaula iloko ona. He mea kupanaha, aole hoi he makani o keia lua wai e kuleana ai la hoi ka aleale ana o ka wai, me he mea he mea e auau ana, a ike ae nei ia'u pee iho nei. A pu ko Waka manawa ma kahi o LAIEIKAWAI, hoi mai la oia, aka, ike ae la keia maloko o ka wai i keia mea e noho ana maluna iho, emi hope hou aku la o Waka, no ka mea, ua manao oia o Kahauokapaka, keia mea ma ke kae o ka luawai.

                Hoi hou aku la o Waka me kana moopuna, a hiki i ka molehulehu ana, hoomakakiu hou mai la oia me ka manao ua hele aku kela mea ana i ike ai, aka, aia no ua Makaula nei ma kana wahi i noho mua ai, nolaila, hoi hope hou o Waka.

                Ua noho ua Makaula nei ma ke kae o kela luawai, a moe oia malaila a ao ia po. Ia kakahiaka ana ae, i ka manawa molehulehu ala ae la oia, ike aku la kela i ka pio a ke anuenue i uka o Kukaniloko, haalele keia ia wahi, kaapuni keia ia Oahu nei, ma Koolaupoko kona hele mua ana, a ma Kona nei, a mai anei aku hiki ma Ewa; a hiki keia i Honouliuli, ike aku la ua Makaula nei i ka pio o ke anuenue i uka o Wahiawa, pii loa aku la oia a hiki i Kamaoha, a malaila oia i moe ai a ao ia po, aole oia i ike i kana mea i ukali mai ai.

(Aole i pau.)

 

WAI O KE OLA.

                I MAI ANA KEKAHI MOI I KEKAHI manawa, a manao iho la na mea a pau loa e make ana oia; a hele aku la na keiki ana iloko o ka pa mea kanu e uwe ai. Ilaila lakou i halawai ai me kekahi kanaka elemakule, ka mea nana i ninau aku i ke kumu o ko lakou kaumaha; a olelo aku lakou, ua kokoke loa ko lakou makuakane e make, aole ona mea e ola ai.

                Olelo aku ka elemakule, "Ua ike au i kona mea e ola ai, i na oia e inu i ka wai o ke ola, alaila oia ola; aka, he mea paakiki loa ia ke huli. "Olelo aku ke keiki mai, "Aole ia e emo loaa ia'u," a hele aku la oia e noi i ka Moi, e hookuu mai ia ia e hele e huli i ka wai o ke ola. Olelo mai ka Moi, "Aole, he nui loa ka pilikia; e aho ka make ana." Koi loa aku la no ua keiki nei a hiki i ka wa o ka Moi i ae mai ai; a hele aku la ua Alii opio nei. me ka olelo iho iloko ona ; " Ina wau e lawe mai i keia wai, alaila, punahele wau i kuu makuakane, a lilo ia'u kona aupuni."

                Ia ia i hele ai a loihi loa aku, halawai oia me kekahi Aa, a ninau aku, "I hea oe e wikiwiki nei." Olelo pakike mai la ua keiki nei, "I mea aha ia a'u e olelo aku ai ia oe." a holo aku la. Huhu loa iho la ua wahi kanaka uuku nei, a manao iho la oia o hana ino; a hiki aku la ua keiki nei i kekahi alanui ololi, e like me ka loa ana e hele nei, pela e ololi loa ae ai ua wahi alanui nei, a hiki i ka wa i ololi loa ai o ke alanui, a hiki ole ia ia ke hele aku; aka, aole e hiki ia ia ke hoohuli ae i ka lio ona; aole no hoi e hiki ia ia ke lele iho ilalo, a kau malie iho la oia iluna o ka lio, e like me ka mea ua ilihia.

                Ia manawa a pau loa, e kali ana ka Moi ia ia; aka, aole nae oia i hoike iki aku. a koi aku ka lua o ke keiki e hele ana oia e huli i ka wai; no ka mea, manao iho la ia iloko ona, "Ina ua make kuu kaikuaana, alaila, lilo mai ke aupuni ia'u." A hele aku la keia keiki ma ke ala hookahi no a ke kaikuaana i hele ai, a halawai aku la no me na wahi Aa nei, a ninau aku, " E holo wikiwiki ana oe i hea? "A pakike aku la no keia e like me ke kaikuaana, a holo aku la me ka nana ole ae. Aka, ua loaa ia ia ka hoopai, e like me kona kaikuaana; no ka mea, hiki aku oia i kahi nihinihi loa, e hiki ole ai ia ia ke hele imua a ke huli i hope. Oia ka hopena o ka poe huhu.

                No ka hoi ole ana mai o ka lua o ke keiki, koi aku kahi keiki hope loa e kii oia i ka wai o ke ola; a ma ia hope, ae mai ka Moi. I kona halawai ana me ua wahi Aa nei, a ninauia aku i kana huakai, noho iho la ia a olelo aku, "E hele ana au e huli i ka wai o ke ola, no ka mea, ua kokoke loa kuu makuakane e make." "Ua ike no oe i kahi e loaa ai," pela aku ua wahi Aa nei. Hoole aku keia, olelo aku ua wahi Aa nei, "No kou hana ana i ka mea kupono, aole e like me ou mau kaikuaana, nolaila, e hai aku ana au ia oe i kahi e loaa ai o ka wai o ke ola. Aia iloko o kekahi hale alii kupua kahi i kahe ai, aole nae e hiki ia oe ke komo iloko, ke haawi ole aku au ia oe i ke kookoo hao, a me ona popo palaoa. I ekolu au hahau ana me ke kookoo hao i ka ipuka, alaila hemo. Mahope aku elua Liona e hamama ana na waha, a ina oe e hookomo aku iloko o ko laua mau waha i ka popo palaoa, alaila noho malie; wikiwiki aku oe a lawe mai i ka wai o ke ola, mamua o ke kani ana o ka hora umikumamalua, o paa e auanei ka puka a lilo oe i pio."

                Ia manawa, aloha aku la ke Alii opio i na wahi Aa nei, a hele aku la oia me ke kookoo hao, a me ka popo palaoa, a i kona hiki ana aku i ka hale alii, loaa iho la ia ia e like me ka mea a ka Aa i olelo aku ia ia. I ke kolu o ke kike ana hemo ka puka; a i ka laka ana mai o na Liona i ka popo palaoa, komo loa aku la keia a loko o ka lumi, ilaila e noho ana he poe alii opio ua hookua kupuaia, a lawe mai la keia i na komo lima mai ko lakou mau lima mai; he pahi kaua a me ka popo palaoa kekahi mea ana i lawe mai ai. I kekahi lumi aku e ku ana he kaikamahine alii; a no kona olioli loa i ka ike ana mai ia ia nei, nolaila, hele mai la oia e honi, a olelo ae, oia kona mea nana i hoopakele, a haawi mai i kona aupuni a pau loa, a ina oia e hele aku i kekahi makahiki aku, alaila laua mareia. Hai mai la ua kaikamahine nei i kaihi o ka wai o ke ola, a hele koke aku la keia, o kani koke auanei ka hora umikumamalua mamua o kona hiki ana aku.

                I ka loaa ana o ka wai o ke ola, o kona hoi mai la no ia a kahi a laua i halawai hou ai me kahi Aa. I ka ike ana aku o ua wahi Aa nei i ka pahi, a me ka popo palaoa, olelo aku ua pono ia hana ana, no ka mea, he