Ka Nupepa Kuokoa, Volume II, Number 9, 28 February 1863 — No ka Mai Ahulau. [ARTICLE]

No ka Mai Ahulau.

E ka Nupepa Kuokoa e; Aloha oe: Owau kekahi i ninau aku i kekahi kanaka kahiko o ke au ia Kamehameha I, no ka mai Ahulau i kapaia he Okuu, a ua hai mai no oia ia'u. a eia no malalo iho nei kana mau olelo: 1. "O ka Okuu, oia no ka mai i make nui ai na kane, na wahine, a me na keiki; a na keia mai no i lawe i ka hapa nui o na kanaka iloko o ka make. Aole no he mai e ae e like me keia mai i oleloia. 2. O ka nui o ka make ma kela wahi keia wahi o keia Pae Aina, iloko o ka la hookahi, he kaau ma kauwahi, elua kaau ma kauwahi, a ekolu kaau ma kauwahi, a he lau ma kauwahi, a he mau kauna ma kauwahi, ma kahi nui o na kanaka, malaila kahi nui loa o ka make. 3. O ka loihi o ka manawa o keia mai o ka anai ana i na kanaka o keia Pae Aina, ua aneane ekolu paha malama a oi ae, me ka make mau i kela la a i keia la. 4. Oia no ke kumu nui o ka emi ana o keia lahui. Penei e maopopo ai. Ua pau ka hapa nui o na kanaka i ka make, a o ka poe i koe he hapa uuku loa lakou ; a na keia poe i koe na lakou no i hoolaha i keia lahui, a ina no la hoi e nui ka poe e ola maikai ana, ina ua nui no keia lahui. A he mea maopopo no ia, ina ua waiho kekahi kanaka i hookahi dala ma ka Baneko, alaila, aole e nui ke kuala ke hala ka makahiki. No ke aha la hoi ka mea e nui ole ai ? Eia, he uuku ke kumupaa." Oia na manao. Ua pau me ka mahalo. W. KAHALA. Kekaha, Puna, Hawaii, Jan 31, 1863