Ka Nupepa Kuokoa, Volume II, Number 25, 20 June 1863 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA KUOKOA.

HONOLULU IUNE @ 1863

Ka Hoike o ke Kulanui o Kapunahou.

       Ua hoomaka ka hoike o ke Kulanui o Kapunahou, ma ka Poalua, la 16 o keia mahina, ma ka Halekula, a ma ke ahiahi o ka Poaha ka hoopau loa ana, ma ka Halepula ma Kawaiahao, ua hoonaniia oloko o ka Halepule i ka maile, a me na hae – o ka hae @ o Hawaii nei maluna iho o ka awai, a ma na @ na hae o kekahi o ua mau aupuni @ aloha nei me keia aupuni. Ma @, mamua'ku o ka wa liula, ua hoo@ mai na poe he lehulehu wale e komo iloko o ka Halepule, a ma ka hapalua o ka hora ehiku, hoomaka ka hoike ana; a pau loa ka hapalua o ka hora eiwa. Eia ka papaluna o ka poe haumana i ku mai e haiolelo: F.S. Lyman, Aberahama Kahai, Alfred Caldwell Jr., Joseph Emerson, H.P. Baldwin, J.E. Emerson, Henry Thompson, a me A.B. Lyons.
       He nui ko makou mahalo no ka haiolelo ana a keia poe i haiia maluna ae nei, a ua aneane hiki ole ia makou he hoomaikai kekahi me ka mahalo, a ke mahalo ole hoi i kekahi no ka mea, ua like no ka maikai mai o a e, a he haaheo nui makou i ka lilo ana mai i poe nana e hai aku i kela mau mea @ naau o ka lehulehu, a ua hiki ia kakou ke olelo iho, ua holopono ka mea i manaoia no ke Kulanui o Kapunahou.  O Henary Thompson, a me Aberahama Kahai, he mau keiki laua no keia lauhi, he mau koko Hawaii, a he hiki pono i ka poe o ko laua lahui ke haaheo me ka manaolana e hiki aku ka mamo Hawaii i ka panepoo o ka naauao, ma o laau'la, ame na keiki Hawaii e ae no hoi e hooikaika ana e inu i ka waimapuna o ka naauao.

       He nui ko makou mahalo i na kaikamahine no ko lakou lea ma ke oli ana, ua hele ka leo o kekahi o lakou a like me ka leo o ka manu, e kani hoehoene ana i ke kuahiwi, kualono-e.  Oia o Miss Mary E. Cooke, o kahi nae a makou i imi nui ai o kona mele ona mai i kekahi Leo Mele Opera i kapaia, o Lucia di Lammermoor.  Nui no hoi ko makou mahalo i ka haole hookani Piano, ia Proff. Sipp, ke hele’la ke kanio ka Piano, a me he mea la e kamailio mai ana.  Ua maikai no ka hoike ana mai ka mua a hiki i ka hopena, a he kupono i keia lahui ke haaheo iho, no keia hana maikai e holo nui nei iwaena  kakou, oia hoi ka naauao.

       Mamua’e o ka hookuu ana i ka poe haumama e hemo ana, ua hoopuka mai ke kumu i kekahi mau olelo paipai ame ka mahalo no hoi ia lakou, no ka malama maikai ana i na rula o ke kula ame ka noho ana.  Pau kana ku ana, ku mai o Dr. R. Anderson.  L. L. D., a hoopuka mai i kekahi mau manao paipai no ko lakou kai ana i ka huakai o keia ola ana, a mahope iho o ia mau mea hookuuia ke anaina.  Eia nae ka makou mea i kaumahai, o ka hauwalaau o na kanaka makaikai, me ka hoohalulu launa ole, i ka wa e meleia mai ana kekahi mau leo nahenahe loa ; a i ka lawe no hoi kekahi o kekahi poe i na keiki liilii iloko o ka halepule, nana ‘ku oe i ua mea he alala mai aole i kanamai, nolaila, aohe lohe maopopoia ‘ku o kekahi mau leo mele maikai loa, ame ka haiolelo ana a na keiki kane; aole no ia he wahi kupono e lawe ai i na keiki liilii; anolaila e na makamaka.  mai noho a hele hou iloko o ke anaina o ia ano e hookamumu ai, a e walaau ai, no ka mea aohe kupono o ia hana no ia wahi. 

 

NA MEA HOU O HAWAII NEI.

       KIAAINA O MAUI.―Ua haiia mai makou, ua oluolu pono ke ola o ke Kiaaina o Maui, His Ex. P. Nahaoleiua.   He mea oluolu no ka lohe ana ia mea.

       He palapala ka W. H. Kamoana, o Kaluahole, Waikikikai, e paipai ana i na poe lawe Kuokoa oa a pau ma kona apana, a me na wahi e ae, e uku koke mai i ke dala o ka pepa.  Pono kau paipai ana e W. H. K., o ka manao iho la no ia e na makamaka, e uku mai ano.

       JOESEPH G. KAIA.―Ua loaa mai ia makou he leta na J. G. Kaia.  o Koloa, Kauai; e hai mai ana i ka hele ana'e o kekahi kanaka o Hanapepe, Kauai, o Alihi kona inoa, e kuai i kana oopu ma ka la Sabati, la 7 o Iune nei.  He keu io ia a ke kanaka kalohe ; a ke ninau nei makou, i hea la na kiai o ke aupuni ia la ?   E hiamoe ana no anei lakou ?

HAIOLELO IMUA O KA LEHULEHU.―Ma ka po o ka Poakahi ae nei, e haiolelo ana o Rev. Mr. Mason. (Kekahi o na Misionari Enelani.) ma ka Hale Hookolokolo ma Honolulu, no na mea e pili ana i ka mea kaulana William Shakespeare.  He hookahi dala, ka uku no ke komo ana iloko a o na loaa a pau o ia mea, e hooliloia ana no ka Halemai Moiwahine; he pono i na kanaka Hawaii a pau i mahele i ka olelo Beritania, ke hele ae ilaila, me ke kokua aloha ‘ku i ka poe pilikia o kona lahui nei, ma ka haawi aloha ana i ke dala, i me e kokua ai i kahi o lakou e malamaia’i.
       I NA MAKAMAKA KANU KOPE.―Ke olioli nei makou i ka hai ana ‘ku i ku makou mau makamaka o na kai ewalu ame no makani eha.  eia ma Honolulu nei kekahi wili kupono e hiki ai ke maihi ae i ka ili maloo, me ka aa noo ke kope.  He hiki i keia wili  maanei ke maihi ae i ka aa maloo, a koe iho ka io maoli o kekope.  He holo loa ka hana ana.

       HILAHILA OLE.―Ua minamina makou i ka ike ame ka lohe pinepine mai no hoi i ka mikiala mau o na wahine mauka o Puehuehu ame Waikahalulu, e makaikai aku i na kino kohana o ka poe e hele ana ma ia wahi e auau ai: pehea ia e hiki ai i ka naau hilahila ole o na poe ke hele pela e makikai aku ai i ke kino kohana o ka poe e auau ana?   He oiaio o kekahi poe wahine no i komoia e na manao haumia, a pelapela no hoi, ke makemake ana e hele aku e nana, no ka mea o ke ana oia poe, he hoooioi i ke lakau mau kino ma ke akea. me ka manao e hoowalewale aku i ka poe kane noho pono, i komo aku iloko o ka lakou mau upena paumeume.  A me he mea la o ka poe no e makemake ana i na hana haumia ka poe e hi-o hele nei ma ka wa e auau ai na kane ma na kahawai i haiia maluna ae nei.  Ke haiia ‘ku nei ia oukou, e ka poe a pau e hele hilahia ole an imua o ka poe e auau ana aole he kupono o ka hele ana ‘ku e makaikai i ka wa a kekahi mea e auau ai, a nolaila, mai hana hou pela.

       MAKE I KA AINA MALIHINI.―Ua loaa mai ia makou he leta na J. A. Kapahu o Salmon Riven Eldorado County, Kalaponi: e hai mai ana i ka make ana o J. Kaukau, o Palolo, o Oahu.  A penei no na kumu i hoakakaia mai no kona make ana:

“Ua make oia i ka malama o Maraki, la 30, M. H. 1863 ma Tailinge kona wahi i make ai o ke kumu o kona make ana.  eia na ia, i haneeia e ka lua hana dala, makeoia i ka manawa pokole loa, me ka ike ole o kona mau hoa’loha o keia aina malihini,”

       PALEMO I KA WAI.―Wahi a O. M. Kalauli, o Moanalua, Oahu, ua palemoia i ka wai o Sela, he kaikamahine, a ua make ; a penei no kana mau olelo :

       “Ma ke ahiahai o ka la 1 o Iune nei, oia paha ka hora ekolu o ke ahiahi, ua palamo kekahi kaikamahine i ka wai, o kona inoa o Sela; o ka nui o na makahiki o keia kaikamahine, he ewalu makahiki, a ke noho nei na makua me ka menemene, a me ke kaumaha nui.  Auhea oukou e na makua mea keiki, mai hookuu wale i na keiki a oukou, o palemo i ka wai, a nele i ke keiki ole.”

       HALE PAU I KE AHI.―Ua haiia mai nei makou e D. Waiau. o Hamakua, Hawaii. i ka pau ana o ka hale i ke ahi ma Hamakua, a penei kanamau olelo:

       “ Ua pau i ke ahi na hale ekoku o L. Kahuli, ma Kanahonua, Hamakua, Hawaii.  ma ke kakahiaka o ka la 5 o Iune nei.  Eia ke kumu i pau ai, na hoolapalapa kekahi kanaka i ka aila bipi, a i ka wa e paila ana o ka aila, olelo kekahi kanaka e ninini i ka wai iloko o ka aila, i waliwali ai aole e paakiki a lohe kona makuahine i kana olelo e ninini i ka wai iloko o ka aila, olelo kela ‘ Aole pono ke ninini i ka wai, o pau auanae ka hale i ke ahi.’  Hoopaakiki no kela a ninini aku no i ka wai ; a i ke komo ana o ka wai iloko o ka ipuhao aila, o ka wa iho la no ia i anapu koke mai ai o ke ahi ua ane like me ka uawila, a wela koke ae la ka hale, a wela pu me ka lima o ua kanaka la, a me kona lauoho.  La manawa, hooikaika mai la na mea a a pau malaila e kinai i ke ahi aole nae he pio iki.  No ka ikaika loa o ka makani, a me ka wela o ka la, nolaila, ua lanakila ae la ke ahi, aole e hiki ia lakou ke kinau aku i ke ahi ; aka, hooikaika nui lakou i ka lawe i na ukana, a ua pakele no ka nui o ka ukana, a ua pau no kekahi i ke ahi.  Ua nui ka poino o ka mea nona na hale, a me ka poe e ae no hoi malala; mamuli o ka paakiki a me ka naaupo o keia kanaka, nolaila e hoomanao oukou e ka lehulehu, e naua mai i keai wela nui ana, a me ke kumu i wela ai.”

       KA AHA HOOMALU.―Eia malalo nei ka papahelu ame na inoa o na hihia i hanaia imua o ka Aha Hoomalu o Honolulu, no ka pule e pau ana i keia la.
       June 15―KAHUALOA.―Hoopiiia no ka mahuka mai kona haku hana.  G. P. Judd.  Hoopaiia ma ka hoopaahaoia ma ka hana oolea, 3 mahina me ka uku 83 koina.
       June 15―Akai, (Pake).―Hoopiiia no ka hakaka aku me ka hoeha ia Ahu.  Hoopaiia  $6 me $3.50 koina.
       ALOHA NO.―Ua ili mai ia makou ka luuluu o ka hai ana‘aku i ka lehulehu i ka make ana ma ka Poaha iho nei o keia pule, o HANA,  wahine a Mr. John D. Holt, o keia kulanakauhale, a he kaikamahine hoi na Mr. Andrew Auld, kekahi o na haole kamaaina kahiko o keia wahi.  Aia me ke kane a ka mea i make, a me kona mau makua a me kona mau hoahanau he lehelehu, ko makou aloha menemene ana.  Ua waihoia kona kino kupapau ma ka pa kupapau ma Kawaiahao ma ka hora 5 o nehinei.  He kaikamahine oia i aloha nuiia e kona mau makamaka, a me ka poe no hoi a pau i launa ia ia.

       KAILIWELA.―O Kahinano, Hilo Hawaii, ua hiki mai kau palapala e hoike mai ana no ka ahaaina maikai ma Laupahoehoe, i ka la 23 o Mei iho nei, aia paha ma hope aku e puka ai kau palapala.

KA NU HOU !

Ke ku ana mai o ke Cometa !

Ka Hoouka Kaua Weliweli ma Feradarikabuga !
Ka Hoopuni ana ia Vikibuga !

Ka make ana o Gen. Stonewall Jackson !

Ka helehelena o na aoao e kaua nei !

       Ma ke ku ana mai nei o ka moku Cometa iloko o na la he 13 mai Kapalakiko mai,  ua loaa mai ia makou na nu hou mai ke kulana kaua ma Amerika Huipuia, ame na mea nui i hanaia ma Europa, iloko o keia mau la.

       He kaua nui weliweli kai hooukaia ma Feradarikabuga, ma ka la 1, 2, ame 3, o Mei iho nei, mawaena o na koa Aupuni, malalo o Gen. Huka, ame na koa kupi malalo o Gen. Lee.  A eai no ka moolelo o ia hoouka ana, mailoko mai o na nupepa o ka Akau.

       Wahi a ka mea kakau moolelo o ka nupepa Manawa (Times.) o Nu Ioka, mahope iho o na la kaua ekolu, aia hoi ma ka Poaono ae (Mei 21,) ua hoomaka hou mai na kipi e hoouka ma ka auina la, ame ke ahiahi i ka aoao Akau o ka puali koa aupuni ua lele mai ko Gen. Iakesona puali holookoa  he 10,000 koa ka nui, iluna o ka puali koa o Gen. Howard o ke aupuni.  Aka, aole no i hololea ka lanakila o na kipi ma ia manawa, no ka mea, ua hoouna koke ia mai na koa e kokua i ka poe Akau, a nolaila, ua kupu ka poe kipi.  O na mahele koa iloko o ka puali a Gen. Howard, oia na Division malalo o Schurz, Steinwehr, a me Gen. Devens.  Ua haiia mai ka hohe wale o na koa o keia mau mahele i haiia ae la maluna, a i ka hoomaka ana no o ke kaua, o ka wa iho la no ia o ka pau ana o ia poe i ka holo, i hiki aku ai i ko lakou mau wahi  hoomoana mau.  A no ia mea, ua huli  holookoa ka aoao akau o ka puali koa o ka Akau, a e hele pono mai ana na poe Hema, e hoopio loa mai i na poe aupuni.  Ia wa, kau koke ae la o Gen. Huka iluna o kona lio a kahea koke aku la i ke Generala o kana puali ponoi.  "E Generala, e kiola koke oe i kou puali ma ka waha o ka pakaua, a e pale aku i ka enemi, ma ka oioi o ka elau.  Mai kipu iki aku oe.  Aole e hiki ia lakou ke ike mai ia oe."  Ia manawa, holo koke aku la ua puali nei, me na mea e hulali ana i ka la.  No ka hana ana a ia poe pela, hoi hou aku na kipi iloko o ko lakou mau pakaua, ka pakaua o ka poe Akau i pio ai ia lakou.  Ma ia wa, hoomaka mai la na pakaua, ma na wahi kiekiena e ki mai i na poka, me ka kiola nui ma no hoi i ka make, a hiki wale i ke aumoe.  Iloko o kekahi hoouka ana mai a na kipi, ua lilo aku he 12 pukuniahi, mai ka poe hohe wale o ke aupuni, ka poe no i hee ai i kinohou.  Nana'ku oe i ka mama ka o ka poe puali olelo e o ka Akau i ka holo.  Noke aku na'lii koa me na pupanapana, e ki aku ai i ua poe la i ku aku i ke kahua kaua, aole no he ku iki aku o ia poe, hoomau ikaiki loa no i ka holo i hiki aku ai i kahi kaawale i ka poka a na kipi.  Hooko keia poe i ka olelo a ka poe kahiko.  " A'o i ke koa, a'o i ka holo."  Ua hoomau ke ki ana o na pukuniahi a hiki wale i ke anumoe.  Ua komo o Gen. Huka, ame kona puali iloko o kahi weliweli loa o ke kipu ana.

       Wahi a kekahi mea kakau moolelo o ka nupepa Manawa.  Ua hoikeia mai ka hoomaka koke ana o na koa kipi ma ka Poalima aku, e hana i alanui ma ka aoao akau o ka puali koa aupuni, aole no nae i hoomaopopoia ka oiaio o ia mea.  Ma ka Poaono ae, ua hoounaia o Gen. Sickles me kona mau koa, e hele e kiu i ke kulana o na poe kipi, aole no i liuliu, halawai oia me na laina hope o ka puali koa o Gen. Iakesona, (ke kamaeu o ka Hema,) a pio i ka poe o ka Akau kekahi papa koa holookou o ka puali koa kipi, a me na'lii koa pu no hoi o ia papa.  Ma keia hana ana a Gen. Sickles, ua okipuia mawaenakonu o ka puali koa o Gen. Iakesona, a ua manaoia no hoi, e holopono ka Gen. Williams (o ke aupuni,) hoouka ana mai, ma ka aoao o ke kihi akau o ka puali koa kipi.  Ua hilinai Huka,  e hiki ana la i ka puali koa aupuni malalo o Gen. Howard.  ke alai aku i ka nee ana mai o ko Gen. Iakesona mau puali imua.  Eia ka auanei aole e hiki ana ; aka, i ka wa no i hooukaia mai ai o ka mahele malalo o Gen. Schurz.  e na kipi, o ka hee koke iho la no ia me ka pupuahulu nui, me ke kiola i na pu, a pau aku la i ka holo.  Na ia mahele hoi i holo, puiwa ka mahele malalo o Gen. Devens―holo hoi ia poe.  O i hooikaika'ku na'lii koa i ua poe koa hohe wale nei a, aole hoi kii mai ; no ia mea, koe wale aku ia no ekolu papa koa iloko o ka hoouka kaua:  a i ko lakou ike ana iho i ka lahilahi o ko lakou hope, nolaila.  ua hooemi hope mai no lakou me ka maikai.  No keai poino ana.  nolaila, ua kahea hou ia'ku o Gen. Sickles e hoi mai, a hoi mai no hoi o Gen. Williams, a i komo aku ka hana iloko o kona mau pakaua, e noho mai ana na koa kipi iloko.  No ka hiki ole ke hoounaia'ku ka ia Gen. Sickles, nolaila, ua kauohaia e Gen. Huka, e poi po aku i na kipi.  Hoomaka na koa aupuni malalo o Gen. Brest, e kaua aku i ka enemi.  i ka hora 11 o ka po ; a iloko o ia kaua ana, hoi hou mai kekahi mau puali o lakou i pio mua ai i na kipi, a hooemi hope ia'ku no hoi na kipi, a hala he mile hookahi.  Ma ia po, ua hooluolu iho no na koa aupuni a pau, iluna o ko lakou mau pu.  

       Ma ke kakahiaka ae o ka la Sabati, i ka hora 5, ikea moopopo ia'ku la na kipi, mai kahi aku a na koa i hoomoana'i, he hookahi paha mile me ka hapa ke kaawale.  Ma ia manawa, kukulu koke ia na papa koa, a iloko o ka hapalua hora komo na papa koa mamua o ka puali aupuni iloko o ka hoouka.  Ia wa no ka hoomaka ana o na papa koa a pau e komo iloko o ke kaua, a iloko paha o ka hora hookahi ma ia hope mai, ua puni ke kahua kaua i ka hauwalaau o na poka.  Hoouna mai la ka poe Hema, i na koa pu liilii he lehulehu wale me ka manaopaa, e kinai koke i na koa aupuni.  Aka ua ikaika loa na koa aupuni malalo o Gen. Sickles, a me Slocum, i ke kupaa ma ke keakea ana i ka nee ana mai o na koa kipi imua, me ka hoomake nui no hoi i na koa o ka aoao kipi.  Hooumaia'ku no hoi ka poe aupuni malalo o Gen. French, e kaua aku i na enemi e kii mai ana e kaua i ka aoao akau o ka puali koa aupuni.  A ua hoopioia'aku no hoi na kipi malaila, e kona papa koa.  Ma ka hora 8 o ia kakahiaka no, hoouna mai o Gen French i kona aloha ia Gen. Huka, me ka hai mai, "ke holo aku nei na kipi mai o'u aka la,"  He ilima Divisiona hoolokoa i hoouka mai i na puali o Gen. Sickles; aka, ua paleia'ku no nae lakou e na koa aupuni wiwo ole malalo ona, a ua pio mai no hoi ia ia he 2,600 koa kipi.  Aole i kanamai ka weliweli o ka make.  Ua haiia mai ka hele o ke kahuakaua, a piha pono i na koa make o na aoao no elua, he nui loa nae na kipi, no ka mea, aole no he maka'u iki iloko o ia poe :  he holo okoa mai no a ka waha o ka pu ; aohe kuemi aku, aohe no hoi he komo ikiia e ka hohe :  me he mea la he malihini ia mea ia lakou.  He ehiku na hoouka ana o ka papa koa (Brigade) malalo o Gen. Mott, a ua pio ia ia he ehiku papa hae mai na kipi mai.  He eha papa hae o na kipi i pio i ka papa koa Helu 7 o Nu Ierese, a he 500 koa kipi.  Ua hoomauia ke kaua mai ka kapalua o ka hora elima, a hiki i ka 8:15 o ke kakahiaka ; a ma ia wa, ua pau ka pauda, nolaila, ua pale aku ka poe koa aupuni i na enemi me na elau.  A i ka loaa ana mai o ka pauda, alaila, emi hope hou na koa aupuni, a i ko lakou wahi mau, a ma ka hora 11, pau ke ki ana o na pu liilii.  He eono hora ka loihi o ke kaua ana, a ua nui no ka make ma na aoao elua.  E hiki ana paha ka nui o ka make a me ke pio i ka 17,000 o ka Akau, a he 18,000 o ka Hema ; aka, ua lanakila no nae ka Hema, no ka mea, ua ho-a hou ia ae na koa aupuni, mai kahi a lakou i hoopunana mai nei, a ua hoi hou ae me ka aoao akau o ka muliwai Rapahanoka.  Ke noho nei no o Gen. Lee, ma ka aoao hema o ua muliwai la, e hoomakaukau ana e a-e aku ma ke kapa akau o ka Rapahanoka, me ka manaopaa e hoouka'ku i na koa aupuni, a e nee loa aku no hoi imua a hiki i Kalapepa , me ke kii aku ia Wasinetona ; aka, ke ku makaukau aku nei no nae o Gen. Huka, me kona mau koa, e ala'i aku i ko lakou hele ana ilaila.

       Mahope iho o ka emi hope ana o na koa aupuni a kaa ma ka aoao Akau o ka muliwai Rapahanoka, ua hoomaka hou no o Gen. Huka, e kii e kaua'ku i na kipi, no ka mea, iloko o kona manao ana.  ua hoonawaliwaliia na kipi, e na poino i ilihia ia'ku ia lakou, iloko o ke kaua ana mamua koke iho, aka, ua hiki koke mai ke kauoha a ka Alihikaua Nui Gen. Halleck, e keakea ana i ke kaua hou aku.  No ia mea, ua hele wikiwiki aku o Gen Huka i Wasinetona e kukai'i me Linekona, me ka hoike pu aku no hoi i ke kii o ke ano o kana hoouka ana i manao ai, ame ke hana hoi e hiki ai ke hopu aku ia Rikemona; a ua olelo mai ka Peresidena iaia, ma keia hope aku e hana oia e like me ka pono i kona manao.  Nolaila, ua manaoia e holo pono ana kaua hana ma keia hope aku.  No ka mea, o kekahi kumu poino nui na ma ka aoaoa aupuni.  no ka lauwili mau ia o na luna koa. e na luna aupuni. ame ka Ahakuhina ma Wasinetona.

Ke kaua ma Vikibuga.

       Eia malalo nei ka moolelo o na kaua ma Vikibuga, i hiki aku i ka la 20 o Mei iho nei, imua o ke Kuhina Kaua. E. M. Stanton.  Ua loaa ia Gen. Grant ka lanakila nui maluna o na koa kipi ma Vikibuka, malalo o Gen Pemberton (o ka Hema,) ma na alanui Jackson, ame Vikibuka, ma Baker's Creek, ma ka la 16 o Mei.  He kulana maikai ko na kipi i ka wa i hoomaka ai ka hoouka ana, no ka mea iluna lakou o na pali ame na kiekiena, ma kahi e akea loa ana ke ala nui, a he 25,000 paha ka nui o na koa kipi malaila.  Ua hoomaka ke kaua ma ka hora 11 o ke awakea, a  ua lanakila ka Akau i ka hora 4 o ke ahiahi.  O ka poe puali Akau i komo nui iloko o ia kaua ana, o ka mahele koa malalo o Gen. Harney (Hane,) o ka puali koa a McClernand, ame na mahele malalo o Gen. Crocker, ame Logan, o ka puali koa o Gen. McPherson (Makapesona.)  O Gen. Harney, ka mea nana i kaua aku i ka poe koa kipi iluna o na puu, a malaila oia kahi i hoomau ai i ke kaua a hiki i ka hora 2; no ka nui o ko lakou poe i make, oia hoi he 1,600, nolaila ua pani ia ko lakou hakahaka  e na poe koa (Brigade,) o Gen. Boomer (Buma.)  ame Holmes (Holome,) noloko ae o ka Gen. Crocker mahele koa, a na lakou i hoopau ke kaua ana ma ia aoao o ke kahua kaua.  Ua make he 500 koa o ko Buna papa koa.  Komo ae o Gen. Logan, ma ka aoao Akau o na koa kipi i hiki ai ia lakou ke emi hope pololei aku, no ia mea, ua emi lakou iloko o ka ululaau, ma ka apua Akau o ko lakou puali.  He 400 ka nui o na koa i make o ko Gen. Logan poe.  He 2,000 ka nui o na kipi i pio ia lakou.

       Ma ka la 17 oiai e hele aku ana na koa aupuni i kahi i kapaia o Big water (wai nui.)  kaua hou no me na koa kipi, ma kekahi alahaka na ia wahi, a na pio malaila, he 3,000 koa kipi.  Iloko o na lua na poe kipi i kaua mai ai i na poe koa Aupuni.  Hookahi hooukaia'na o ua mau lua kipi nei, e Gen. Lawlen me kona papa koa, ua oi ae ka nui o na poe kipi i pio ia ia, mamua o ka nui o kona poe koa ponoi.  Ia manawa, puhiia ke Alahaka a huli o Pemberton (Pebatona.) ame ke koena o kona mau koa a holo loa'ku iloko o na papu waena ma Vikibuga, kahi a na kipi i hooikaika iho nei, ma ka hana ana i na papu nui, me ka paa aui, i hiki ole ai ke komo aku na koa aupuni ilaila, me na pukuniahi 3, a he 57 pu kai pio aku i ka Akau. 

       Ua hiki ae o Gen. Grant, imua o ke kulanakauhale o Vikibuga, ma ka la 18 o Mei, a ua paa ao hoi kona kulana imua o ia wahi  A ua weheia no hoi he alanui e hiki ai ke laweia mai na mea ai na na koa aupuni, mai na wahi ma i waiho ia'i na mea ai o ke aupuni.  Ua lilo ae la o Haine's Bluff, a ke noho la o Gen. Grant ilaila.  Ua nui no ke ka kaua ma ka la 19, a ua manaoia e lilo ana ke kulanakauhale o o Vikibuga i ke aupuni, i ka la 20 o Mei iho nei.  He 20 paha tausani koa kipi malaila.

       Ma ka palapala hoike a Porter, kekahi o na Luna Nui o na moku kaua ma ka Misisipi, ua ikeia iho ka e lokou ka hiolo ana o kekahi o na papu paa loa i hanaia e na kipi iloko o ka makahiki hookahi, i na pu a ka Akau, iloko o ka hora hookahi.

       Ua hai aku o Gen. Grant, ia Linekona, aole loa e hiki ia Gen. Johnston, ka luna o na koa kipi ma ka Misisipi, ke houluulu i 100,000 koa iloko o na la he 15, no ka mea, ua pau loa na alanui kaamahu i ka hanaino ia e Col. Grierson, o ka Akau.  Aole no hoi e hiki ana i na kipi ke paa ia Vikibuga. a hala na la elima ma mai ia manawa aku.

Ka make ana o Stonewall Iakesona.

       Ua hoikeia mai ka make ana o Gen. Stonewall Jackson, ka Olali o ka Hema. i  ku no i ka pu a kona poe koa ponoi iho.  Ua nui ka poe i hele i kona hoolewa, o na luna aupuni no a pau o ka Hema, mai a Jeff. Davisa, a hala ilalo.  E kukuluia ana i kia hoomanao nona, maloko o ke kulanakauhale alii o ka Hema.  Ua lilo ia he mea kaumaha loa no ka Hema, no keia make ana o Stonewall Iakesona, a me ka nui no hoi o na koa i pio mai nei i ke aupuni.

No Kaletona.

       Ua hoikeia mai nei ke kaua mawaena o na kipi he 1,000, a me na koa aupuni. ma Morris Island, (Mokupuni Morris me ke awa o Kaletona, Karolina Hema. a ua emi hope aku no na koa kipi : he hookahi mea i make ma ka aoao aupuni.  Ua hooholoia mai no ka, e hoomaka e ana na mokuhao aupuni, e hoopio mua i na papu o waho, e pili la ma ke kowa e komo aku ai, mamua o ka hoouka ana'aku ia Papu Sumeta.

       ―Ua hoikeia mai e na nupepa o Bamuda, ua haalele o Kamadoa Semmes, o ka Alabama ia moku, v ua hoi ae iluna o kekahi moku kaua hou, he 22 pu oluna, a he waa maikai no hoi.

       ―Ua hoikeia ae ke pio ana o ka moku kipi Retribution, i ka moku Alabama o ka Akau.  Mawaho ponoi iho o ke awa o St. Domingo kahi i kaua ai a pio ai.

       ―Ua hiki ae ka lona mai Kenetuke ae, ke mau la no ka noho maluhia ana o ia wahi.  Aia o Gen Burnside a me kona puali imua o na puali koa kipi na Wayne County, Kenetuke.

       Ua hoike mai na kanaka pili aupuni o ka moku aina o Lusiana, ke makaukau nei nei no ia mokuaina e komo hou ae iloko o ka hui kahiko, a no ia mea, o ke kumu wale no e hakalia nei, no kekahi wale no i ka pau aku o na koa kipi, i ke kipakuia mai loko aku o na kulanakauhale o ia wahi.

       ―Ua ikeia kekahi mau moku e kaua ana mawaho ae o Pedro Bluff (Inia.) ma ka la ehiku o Aperila iho nei, ua like ke ano o kekahi o ia mau moku, me ka mo ku kipi Alabama.  Mai ka hora 9 o ke kakahiaka ke kaua ana, a hiki i ka hora 2.  Aole no i maopopo ka hope o ia kaua moana ana.

No Vereginia.

       O na mea hou hope loa i hiki mai nei mai Vereginia ame na wahi e pili ana, ea ikeia iho ke hoomakaukau nei na kipa e kii aku e hoouka i na koa aupuni, ma ka aoao Akau o ka muliwai Rapahanoka, me ka manao e komo mawaena o ka puali koa aupuni malalo o Gen. Huka, ame ke Kapitala oia hoi o Wasinetona.  No ke paniia ana mai no hoi o ka hakahaka o ko lakou mau koa i make ai ma na kaua o Feradarikabuga, nolaila, ua manao no lakou, ua hiki pono ia lakou ke kii ia Wasinetona, me ka hiki pono ole i na koa aupuui o Gen. Huka ke keakea mai.  Ma keia mea, ua hoikeia mai ka mea i maa mau i na kipi, oia no hoi ka hikiwawe loa ma na mea a lokou e manao ai e hana aku, aohe lolohili, aka, he eleu mau no. Aka, ua olelo ia nae, ke hele mai nei o Heintzleman (Honesilamana,) me na koa he 30,000, mai Wasinetona mai, i hoopuipui ae ai i ka puali koa o Gen. Huka.  ina pela, alaila, e hiki hou ana no ka ikaika o na aoao kaua, e like me ka wa mamua'ku o ka hoomaka ana i na kaua ma Feradarikabuga, ma na la mua iho o Mei.  A me he mea ala, e halawai hou ana no ke kila a na aoao kaua, ma na kahua e pili ana i ka Rapahanoka, mawaena o Feradarikabuga, ame Kalapepa, iloko o na la mua o Iune nei.  Pela ke ano, ke oiaio ka hauwawaia, e hoounaia ana kekahi hapa o na koa kipi malalo o Gen. Bragg, mai Tenesi aku a i Vereginia, i mea e hoopuipui ae ai i ka puali koa kipi o Gen. Lee, ma ia wahi, a ke hoouna ia nei no hoi kekahi o na koa o ka puali malalo o Gen. Biurigada ma Kalolina Hema, ilaila.

       I ka wa i kaua mai nei ma Feradarikabuga, aia hoi, ua hele aku o Gen. Keyes.  ka mea ia ia kekahi kulana maikai a ikaika loa, ma West Point (Lae Komohana,) a me Gen. Stoneman, ka luna koa o na poe koa lio, a ua holo aku a kokoke loa i Rikemona, a i ka ikeia ana mai o ko laua mau puali koa, aia hoi ua puiwa nui ka poe kamaaina o ke kulanakauhala o Rikemona.  O kekahi mau lala o na alanui kaamahu, a me 800,000 busela