Ka Nupepa Kuokoa, Volume II, Number 29, 18 July 1863 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

He Kanilau aloha no L. Kuhia

He uhane aloha no H. Kuhia

Kou kaikanane mai ka malu hale la o Haleola.

Mai ka hau anu la o Maihi,

Mai ka ua kilihune mai i ka lau o ka Ioia,

Kuu kokoolua o ka noho ana o ke ao.

Lawe aku nei ka make pau ka ike ana;

Auwe kuu kaikunane aloha i nalo aku nei a.

Ka hiki ana a ka ia, ka hele kunewa ana o ka uhane.

Kuu kaikunane o ka hale paa i ka ohu o Ohiki.

He mea iki ea hele ana o ka ubane,

Kuu kaikunane mai ka ua kipu mai iluna o ke Koa.

Kuu kaikunane mai ka leo o ke kahuli i kunahele,

Kuu kaikunane mai ka piha uwa lua o Piihala

Mai ka hihio lua a na lio i Haleaniani,

E haaheo ana i ka la lohi o ka aina,

Kuu kaikunane o ka aina kanaka nui,

Mai ka malu o ka hau o hakalono,

Hoolono aku au o ko leo o ka pane mai.

Kuu kaikunane mai ka malu kukui o Puukona.

Aloha ia wahi a kakou e noho ai,

Kuu kaikunane mai ka la makaponiuniu ai ole,

Hookihi no ai o ke ahe a ka makani,

Kuu kaikunane o ke kula wela o Kukuikaea,

Mai ka ihola eleo ana o Kainapahoa,

Kuu kaikunane mai ka pili enaena o Pooholua

Kuu aku ka luhi i ka malu hale o Halehuki,

Auwe kuu kaikunane pane ole mai ia’u—e,

Kuu kaikunane mai ka wai hu mai o Waipuhi,

Mai ka nalu haimuku o pohoele.

Kuu kaikunane mai ka pali kiekie o Keanakokea,

Mai ke ea hauliuli la e kuamoo, me ihukoko,

Kuu kaikunane mai ke kula loa la e Kaawaloa.

Mai ka pali kiekie la o manuahi, me Palipoko,

Ahi kuu kino ulala ia oe la ea,

Kuu kaikunane mai ke kula loa la e Huehue,

Mai na makani elua o ka aina,

O ka eka mai makai, o ka hau mai mauka,

Kuu kaikunane mai ka lau o ka ohe o ka hilinai,

Mai kea uliuli o ke ana o uwala me ka paniau,

Au ne makou o ko kino wailu ke ike aku,

Hoomaha aku ka luhi i ka malu niu o Kiholo,

Kuu kaikunane mai ka pele nee mai i ke one o Wailoa,

Mai na lae hou a ka wahine i wailea,

Kuu kaikunane mai ka pili loa o Puapa,

Mai ka ua lei kokoula i ka pili o Uaha,

Mai ka ua apuupuu o Waimea,

Kuu kaikunane mai ka wai hue mai o Lihue,

Mai ke kula loa la o Ahuli, me Inia,

E ola o L. Kuhia, i ka Mesia Iesu Kristo Amene.                 Mele Kuhilani.

He Kanikau he aloha no Leo e—a!

Kuu kane mai ka uka anu o Maihi,

Mai ka hau pukukui lua i ke anuanu,

Moe iho au a huli ae aole ka hoa pili o ke kane,

Ke keiki hoi ka hoa a’u e noho nei,

Ka hiki ana a ka la, ka hele hoolai ana o ka uhane,

Auwe kuu kane kuu mea minamina e noho nei ia oe-ea,

Kuu kane mai ka uka anu o Kawanui,

Mai ka ua nehe mai i ka lau o ke Kope,

Kopea iho nei au e ko aloha kaa wale oe,

Kuu kane mai ka ua hahi mai iluna o ka Alani,

He lani nui ua’u ke aloha e hiipoi nei,

Noho aku au nana o kahi a kaua e hele ai, aole oe,

Aia paha oe i ka maka o ka opua,

Pua mai ana ke aloha wela o kuu kane,

Auwe kuu kane kuu minamina pau ole ia oe,

Kuu lei aloha he kane o noho nei e—a,

Kuu kane mai ka uka anu la e Honalo,

Nalo na maka o kuu kane pale ka ike aku,

Ike aku a’u o ke aka kino wailua e maalo nei,

Kuu hoa o na wai elua.

A ka wai haaheo mai i ka maka o ka lehua,

Auwe kuu kane hana nui—e,

Kuu kane mai ka malu ulu o ke ala kauila,

Mai ka ai kau mai iluna o ka laau.

Kau aku na maka o ka ai ula wale o kanahele,

Kuu kane o kahi ai nuku hoonui i ka wai,

Kuu kane mai kahi i-a aumeume pu no,

Auwe kuu kane, kuu lei aloha,

Kuu minamina pau ole e noho nei,

Kuu kane mai ka wai komo o Waiakealoha

Kuu minamina pau ole e noho nei,

Mai ka ohu halii mai i kanahele

Mai ka ua noenoe hilii iluna o ka laau,

Kuu kane, kuu hoa pili o ka malu o ka Neleau

Nele au i ke kane ole e noho nei,

Ua lilo aku la ia Lilinoe,

Na wahine kiai hau o Maunakea,

Kuu kane kuu hoa hele o na halekuai,

Kuu hoa ohumu o kahi loaa uuku,

Kuu hoa lolii o ka po, me ke ao,

O kuu hoa pupuu anu wahi kapa ole.

Kuu kane mai ka malu hale nui Halehuki,

Mai ke kai hone lua i ke aumoe,

Moe au a hoolonoaku o ko leo,

Kuu kane mai ka pahoehoe anapa i ka la o Kuamoo,

Aloha ia wahi a kaua e hele ai,

Oia kula mehameha kanaka ole,

Kuu kane o ka wa naaupo,

Na na keiki kaua i hoonaauao mai,

Auwe kuu kane, kuu lei mae ole—a,

Kuu hoa o na la i kaahope ae nei,

                                    Kanaheleloa.

Maihiuka, Kona, Akau, Hawaii, Julai 7, 1863

No ka Ahaaina na o ke kula

PA.KO.LI, A KA MEA KAULANA,

TEOPILO WAHINEALII.

            E ouolu oe e waiho maikai ae i keia mea mua o na lehulehu o keia lahuikanaka, ke hiki ia me ke koena ole.

            Ua ahaaina iho nei ke kula Humeni a ka mea kaulana eopilo Wahinealii, ma kona la hoike, June 27 iho nei.  Aia ma ia la ahaaina, i hanaia’i na leo mele o kela ano, keia ano, ka leo mele e pili ana i ka hoonani aku i ke Akua, na leo mele e pili ana i ke kanikau, a pela aku.

            Aia no hoi ma ia la, ua akoakoa mai na keiki Himeni keikikane, a kaikamahine hoi, a malaila no ke kahukuia G. W. Pilipo, na luna.  Ekalesia, ame na luna apana, aine na makamaka he nui i hiki mai.  A no keia hana i kepuluia e t. Wahinealii, iloko o keia mau la kokoke wale no, ua umeia ku naau o o na haumana a me na makua pu no hoi, e keia hana maikai.  Ua hoike ia keia kula holookoa, iloko o na la hoike kula Aupuni, o ka apana o Kona Akau, ma Kailua, ame Keauhou, na wahi i hoike ai.

            A no keia mea hookahi, me he mea la e hoolilo ana neia hana i mea e hoonani aku ai i ka inoa o ke Akua, alaila makepono ka luhi ana.

            Ua kaulana ae keia kula iwaena o na apana e pili ana ma Kona Akau.  A na na haumana i hoolako i na mea ai he nui, me ke kokua pu mai no nae o na makua.  Ua kukuluia ua ahaaina la i mea e lawa ni kekahi hapa o ko lakou nuhau, ma ka lulu dala ana.

            A pau ka paina ana, mahope iho o ka ainaawakea, ku mai la na haumana Pa-ko-li me ke kumu pu, a mele mai la i kekahi kanikau, i kela wa no uwe mai na haumana i ke kumu, pela no hoi ke kumu i na haumana, me ka lulu ana o na lima, a ma keia hana ana, ua umeia ka naau o na haumana i ke kumu, no ko ke kumu kaawale hou aku.

            No na haumana hoi ka uwe haloiloi eu wale mai no ka wai koo lihilihi o na makamaka, ame na hoa o ka lai, oia no oe o ka wai lele i ka pali la, ka waimaka o na hoa.  Pela no ka Pa-ko-li ana, a hiki paha i ka horaeono, ua hanaia na leo mele, ao ia aku i na haumana, noloko mai o kela ano buke Himeni, keia ano buke Himeni.

            A pau ka Himeni ana, ame ka hiolo nui ana o na waimaka.  Ku mai o G. W. Pilipo, a hoike i kona manao, e mahalo ana, ae koi hou ana e hoi hou aku o T. Wahinealii ma Kona Akau, pualu aku la na leo makamaka, me ka olelo aku, e hoohikiia o Wahinealii e hoihou ma Kona, hooholoia ma ka o lima ana.  Kau koe e T. Wahinealii, hoolu aku no oe la, hai ke kiele a lakoula.  Me ke aloha i ka lehulehu.                                             L. W. P. Kanealii.

            Lahaina, Maui, Julai 9, 1863.

Niania a me ka Holoholo Olelo.

E ku Nupepa Kuokoa e : Aloha oe:

            Eia malalo iho nei ko’u mau manao, a nau hoi ia e lawe aku imua o ka lehulehu, ame na wahi au kanaka a pau, i ike iho hoi ka poe e hookipa ana ia oe.  Ma ke poo o keia kukulu manao ana, ua kauia kela mau hua olelo Niania ame ka Holoholo Olelo.  O ke kumu nae o ko’u manao ana pela, oia hoi ka lohe mau ana i kekahi poe e olelo ana kekahi i kekahi, o mea ame mea ua moekolohe, me ka ike maka ole nae e moe ana, hookaulana wale aku ma kela wahi keia wahi, me ka ike maka ole.

            Ina he Luna Auhau, a he Luna Helu paha, ka mea e lohe waleia me ka ike ole nae e hana ana ma ia hewa, alaila, lana ae la ka manao o ka mea Holoholo Olelo, e hoopuka aku ma na nupepa, i manao ia mai ai he kanaka hewa io.

            E na makamaka, he kumu nui keia a kakou e nana pu mai ai, oiai aole paha ma keia wahi wale no kahi e noho ai o keia mau kanaka, oia hoi o Niania ame Holoholo Olelo, noho aku paha ma ia wahi aku ia wahi aku.  Ina pela ke hai aku nei au i ko’u manao i ka lehulehu, mai Hawaii o Keawe, a Kauai o Manokalanipo, mai hoohalike kakou me lako ula, ma ka lohe wale no, a lilo ia lohe ana i mea e kamailio ai ma ke akea, aole, me ka ike maoli aku hoi o kona mau onohi.

            Auhea oe e ka mea Holoholo Olelo, mai hele wale oe i kauhale e hana ai i kau hana, oia hoi, he mea hewa loa ia, he mea e kue ai kekahi i kekahi.

            Eia ka Solomona, “O ka mea holoholo olelo, hookaawale oia i na makamaka.”  E na hoahanau a pau iloko o ka Haku, mai ka la hiki ma Kumukahi, a ka la welo i Lehua, e nana pu mai kakou, ina ua hewa au ma keia mea, e kala mai no, oia kekahi mea e pono ai iwaena o kakou, e kala aku kekahi i ka hewa o kekahi, ina pela, e kala mai no ko kakou Makua ma ka lani i ko kakou hewa.

                                    Me ka mahalo,

                                                                        W. Paele.

            Keoau, Puna, Hawaii, Iune 24, 1863.

Pakele Mahunehune.

E ka Nupepa Kuokoa e ; Aloha kaua

            Ma ka la 3 o Iulai nei, oia ka Poalima, ua haule iloko o ka mawae ma ka lua o Pele, kekahi keiki kane o Kekaamau kona inoa, ke keiki a Pinehasa Iaua o Keaka, no Olaa laua.  A penei ke ano o ia mea kaumaha a manaonao no hoi i ka nana iho; o ka makuakane oia o Pinehasa, ua hala i kai o Apua; o ka makuahine o Keaka, ua hele oia i ka ohi ohelo papa, ma kahi e kokoke ana ma ka hale hookipa o Nailima; ia ia e ohi ohelopapa ana malaila, me ka manao ole i kana keiki, hahai aku la ua wahi keiki nei mahope ona, ma ke alanui e hele ana ma Kau, ma kahi pali e hooiho aku i Kaauwea.

            Malaila he wahi mawae uuku, he eono iniha a oi iki aku paha ke akea o ka waha, naule iho la ua wahi keiki nei iloko olaila ; o ka hora S paha ia o ke kakahiaka o ia la; huli iho la kona makuahine a me kekahi mau hoa ona, e nana ana ma o a maanei, aole no i ikeia ua wahi keiki nei ; a ma ia hope koke iho no, lohe lakou i ka leo keiki mailalo mai o ka mawae, e uwe ana ; i nana iho ka hana e waiho ana kela ilalo lilo o kekahi kaulu o ka mawae, he 16 kapuai ka hohonu o kahi a ua keiki nei i haule ai.

            I ka ike ana iho o ka makuahine i kana keiki e waiho ana i kahi pilikia loa, nui mai la kona aloha i kana keiki, a kaumaha no hoi kona manao.  Ma ia hope iho, hiki aku la au malaila me ko’u kokoolua, oia o Iona, mai uka mai o Kuapaawela, i ka ohi ohelopapa no hoi maua.  A i ko maua ike ana i keia mea kaumaha nui, hu ae la ko maua aloha a me ka eha o ka naau ; alaila, huli ae la au a hoomaikai aku i ka mea nona ka hoopiha ana i ka lani a me ka honua, no keia pilikia e waiho nei imua o ko’u mau maka.  A pau ia, mama mai la ko makou manao, a hoomaka makou e imi i kahi kupono e eli ai ilalo ma kahi lepo, eli iho la makou a hala 7 kapuai, loaa ia makou ka pahoehoe paakiki loa ; koe aku 9 kapuai a hiki aku i kahi o ke keiki e waiho ana.

            Ku nana iho la ko makou manao no ka hana kupono ia makou e hana hou aku ai, a i ko makoa noonoo maikaiana, ua holo ka manao e hoohei i ke keiki ma ke kaula, ina e hei oia, alaila, huki ae iluna.  I ka hoomaka ana, ua holo ka hana me ka hakalia ole, na hei no ke kaula ma ka lima akau o ua keiki nei, a hoomaka makou e huki ae ia ia iluna, a i ka hiki ana o kona kino holookoa iluna, a i ko makou nana ana, aole nui ka poino i loaa ia ia, ma kona kuekue wawae akau nae kahi pohole iki, o ke poo a me na maka, ua oki loa i ka lepo.  Pela i pakele ai ke ola o keia keiki mai ka pilikia aneane ku i ka make.  Nolaila, e na makua mea keiki, e malama ono me ke kiai mau ana i na keiki, i ole e loohiaia e ka pilikia.

            Me ka mahalo,

                                                                        J. B. L. Makaonalii.

            Puueo, Hilo, Hawaii, Iulai 7, 1863.

He Hui Koho Balota.

E ka Nupepa Kuokoa e ; Aloha oe ;

            Ua ike au ma kou Helu 21, Buke II, i ka haiolelo a J. J. K. Kahulanui, o Kohala Akau nei.  no ke poo e kau ae la maluna, “He Hui Koho Balota.”  He nui no na manao ana i hai ai ma ia kumu manao ; aka, no ka pili ana i ka hoino maoli, a me ka akiaki, ua kali no au i ka pane aku malaila iloko o ka nupepa.

            Ua hele kino aku au e halawai kino pu a e kuka pu me Kahalewai Kahulanui la , ua ninau au ia ia no kela mea e laha nei iloko o kou kino nui, ma kela hai manao i oleloiamaluna, oiai hoi he mau hoa aloha maua no na la i hala ae mamua o kana hoolaha ana i kela hana hookue ; a i ko maua kamailio ana no kela mea ana i hoolaha ai, hoole mai kela, me ke kuhikuhi ana, na Kekaula, a me Aiwohik, i hoolaha i kela mea ma kona inoa, aole nana ponoi.

            A manao io iho la au he oiaio kana, kakali no au ia Kekaula, a hiki mai la kela mai Honolulu mai, a lohe kela ia hai no keia mea, hele mai kela io’u nei a hoole loa mai, aole nana, a me ka olelo mai, e kauoha aku ia H. M. Wini, e hoouna mai i ke hope o ia palapala, i ike pono au i ka oiaio o kana hoole ana.  Ua hana oia pela, a ke pane nei ka nupepa ma ka Helu 26, ma kahi e hai ana i na leta i loaa aku ma ke keena oihana o ka Nupepa Kuokoa, ua oleloia, he oiaio, aole na Kekaula.

            Nolaila, owai la ka uanei ka mea nana kela hoolaha lokoino?  I ka ike ana ma ka nupepa, o Kahalewai Kahulanui no.

            E hoolaha ae oe i keia, a na ka lehulehu no e nana mai i ka hemolele ana o ia haiolelo ana, a me kona okupe ana ma keia mau mau mea a J. J. Kahalewai Kahulanui, a pee nei, me he mea oiaio ole la, a pela io no, aole he oiaio o na mea ana i hoolaha ai, he hana opu keemoa wale no.

            Me ka mahalo,

                                                            D. K. Naiapaakai.

            Kohala A., Hawaii, Iulai 8, 1863.

He Naue.

            I ke Kuokoa, Aloha oe.—Hele aku la kekahi keiki akamai e ike i kona makuakane, aole ia e aloha e mai; aka. hoao mai la oia e ikeia kona akamai, ma ka waiho ana maluna o ka papakaukau i 15 alani, a i 15 ohia ; a koi aku i kana keiki e lawe i kekahi hapalua o ia.  Aohe ona makemake i ka ohia, a aneane lawe oia i ka alani aole makemake ka makuakane ia.  Olelo aku ka makuakane, e hoonoho a puni me he honua poepoe la, a e lawe i ka iwi ma kahi ana e hoomaka aku ai e helu.  Hoonoho iho la ua keiki akamai nei i na hua ma keia ano ; a ma ka lawe i ka iwi o na hua ma kahi ana e hoomaka ai, o ka alani wale no ke pau ia ia e like me kona makemake ; koe na ohia ana e hoowahawaha ai.  Pehea la ia e hoonoho ai?

                                                                                    J. M. P. Kaluahinenui

Make

E ka Nupepa Kuokoa Aloha oe:

            I ke kakahiaka o ka Poakolu, oia ka la 24 o Iune iho nei, make o D. B. Kamaiopui k, ka maua keiki aloha nui.  Ua hanau oia i ka la 9 o Dekemaba.  1863.  O ka nui o kona mau la ma ke ao nei, he 6 malama a me na la 16.  A ua kii mai no ka Mea Mana Loa, a ua lawe aku i kona Uhane.  Pomaikai ka poe make ke make iloko o ka Haku.

            A eia kona wahi Mele Kanikau Aloha :

Kuu keiki lei he aloha,

Hoa pupuu anu o uka,

Elua maua hookahi hoi oe.

Kani ka aka i ke alo o ka pali,

Pali mai nei hoi kuu hoa,

Kaawale ka pili a mana,

Huna aku la ka maka pale ka ike,

O ke kamalei a maua me kuu wahine, o ke keiki,

E hoalohaloha mai ana ka onini makani o ka aina,

E hea mai ana hoi i kuu keiki e hele,

Ua haalele mai nei hoi ia maua.

Pau ka ike ana i na pilikia o keia ao,

Ka mea aloha nui o ke keiki,

Hoopulu ana ka waimaka i kuu kino,

Au ana hoi au o kahi e ike ai,

Aole e ike, ua nalo, ua kaawale,

Ua hele i ke ala hoi ole mai,

Luuluu no au kaumaha i ke aloha.

E hoala mai ana ia’u i ke kuluaumoe.

Moe hoolono i ka leo o ke Kahuli,

Huli aku maua, aole oe i loaa,

Ka leo o ke keiki paaheahe i ke awakea,

Akea kaawale ka pili me kekeiki,

Pili aku maua o ka uka anu o Haloa,

Loa wale hoi ka noho ana a ke aloha,

                                                D. B. Laakaumokuakea.

Kaloko, Kona A., Hawaii, Iulei 7, 1863

Wahine Ikaika i ka Hana.

E ka Nupepa Kuokoa e ; Aloha oe :

            He mea hiki paha ia oe, ke kuupau ae ma ke akea, no kekahi wahine ikaika i ka hana, ma Honokohau, Maui; o Halalii kona inoa.

            Eia kana mau hana maikai a’u i ike ai, 1, o ka mahiai; 2, o ka hoaimu; 3, o ka lawai-a; 4, o ka pii iuka i kau-o wahie; 5, o ka hoaimu maauauwa; 6, o ka humuhumu lole; 7, o ka ulana papale; 8, o ke kuku kapa Hawaii, a me ka malama ana i ka ohana, a me ka hookipa oluolu ana i na makamaka, a me kekahi mau hana maikai e ae he nui wale.

            Nolaila, ke hoike aku nei au i keia wahine hana, i ike mai ai na hapauea o ko kaua aina hauau; i kumu hoohalike maikai no lakou.  O ke kumu nae o ka hana ana o keia wahine ma ka oihana pili i na kane, no ka mai loihi o kana kane mare, a me ka laua keiki.                L. Ahukui.

            Honokohau, Maui, Iune 26, 1863.

He leo Kahea.

            E ke Kuokoa.—Ua loaa mai ia makou ka mea kaumaha, a eia no ia.  Ua loohiaia ko makou Kahunapule i ka mai iloko o ka wa i kaa hope ae nei, a eia oia ma kahi moe e waiho nei i keia wa.  O ke ano o ka mai, aia ma kahi e pili ana i ke ake paa, a he kunu no hoi kekahi.

            Nolaila, ma ko makou aha haipule, ua hooholo iho makou e noi a’ku i na Ekalesia a pau mai Waiohinu, a Waioli, e huipu mai me makou ma ke noi ana’ku i ka mea Mana Loa, e hoola mai i kana kauwa, i mea nana e hana kana hana ma o makou nei.

            Aia a puka’ku keia leo kahea imua o ka lehulehu, alaila, o na mea a pau i kauia ka hoailona a ke Akua ma ko lakou lae, e ku mai lakou me ka naau i piha i ke aloha, no Rev L. Laiana.  No ka mea, oia nei kekahi mea i noho loihi ma keia pae aina, e hana ana i ka hana a ka Haku, a hiki i keia wa.

            Mai lohi a kanalua ke hiki’ku ka lohe.  E ala ! E ala!! Ma ke kauoha a ka aha hui haipule o Waimea.                                               L. P. Kakauolelo.

            Waimea, Hawaii, June 18, 1863

Kahuna Lapaau Hoopunipuni.

E ka Nupapa Kuokoa e ; Aloha oe:

            Eia ma Waiahole, Koolaupoko, Oahu, kekahi Kahuna Lapaau hoopunipuni, o Kamaka kona inoa, o Kaeho ka inoa o kana wahine.  Ua hele mai laua ma Waikane, e lapaau i kekahi kaikamehine mai, o Meleana kona inoa.

            Hele ua Kahuna nei a hiki ma kahi o ka mea mai, olelo aku la i na kupuna, a me na makua o ka mea mai.  “He make ko ia nei i ka makuahine nana i hanau mai, eia la ke ku mai nei, e kii mai ana e hele pu, aole he kahuna akamai e ola ai keia mai o ia nei, a ina ia nei na’u e hana, ola, ke uku mua mai nae i $1 50; alaila pau keia pilikia.”

            Alaila haawi mai na kupuna $1 50, alaila, olelo mai la ua Kahuna nei, “E hoonoho ae au i ka uhane o ka makuahine iluna o ke kaikuaana, oia hoi o Kale, pela ka olelo ana a ua Kahuna nei, ninau aku la ua Kahuna nei i ka inoa o ka makuahine nana i hanau mai o Meleana, hai mai la na kupuna o Kaleihaili ko ia nei makuahine.”

            Olelo ae la ua Kahuna nei, penei:  “E Kaleihaili e ! e noho oe iluna o Kale, e hoihoi mai oe i ke ola Meleana.”  Pela kana olelo ana, eha la ana i hana ai pela, aole no i noho iki mai ka uhane iluna o Kale, e like me kana i olelo mua ai.  Olelo hou mai no ua Kahuna nei, i moa, i puaa, a pau ia mau mea i ka loaa.  i hana iho ka hana, aole no he ola iki.  Hoaa iho la ua Kahuna nei, a ma ia hope iho, holo aku la ua Kauhna nei.

                                    Me ka mahalo,

                                                            S. E. K.

Waikane, Koolaupoko, Oahu, Iulai 6, 1863.

Kanikau Aloha no Mahi.

He uhane he aloha e Mahi—e,

Aloha ino no kuu keiki,

Kuu hoa luhi o ka hau anu,

O ka hau anuanu Maihi—e,

Ua maihi oe i ka pili a kaua—a,

Auwe no hoi kuu keiki—e!

Kuu keiki mai ke ala loihi,

Mai ke kula loa la e Kahilinai,

Mai ke a-a loa la e Kapaniau,

Aia paha oe i ka wai huai o Kiholo.

Kuu keiki mai ka Pele nee mai i ke one,

Auwe ku keiki aloha—e!

Kuu keiki mai ke kula loa la o Kaniku.

Kukuku lua ke aloha iloko o’u—e,

Kuu keiki mai ke kula loa la o Oulu,

Mai ka ua Apuupuu o Waimea.

Mai ke ala loihi o Wanaipoe,

I poe oe na’u i hooilina pau ole no ke’loha,

Auwe kuu keiki aloha—e!

Kuu keiki mai ke ala poho o Kapulena,

Mai ka pali huli lua la o Waipio,

Kuu hoa alo anu o ia aina makamaka ole,

Kuu keiki o ka la haaheo o ua aina nei,

Kuu keiki mai ka pihe uwa lua o Paauhau,

Auwe kuu keiki aloha—e!

Kuu keiki o ka nahele loa o Pulehua,

I lehua mau na’u ke aloha—a.

Kuu keiki mai ke one o Ahuaumi,

E uumi iho aloha—a,

Kuu keiki mai ka wai ale mai i Halelaau,

Au ae au aole oe la—e—a,

Auwe kuu keiki aloha—e!

Kuu keiki hoomanawanui o ka ilihune,

Kuu keiki o kahi ai uuku, i-a uuku,

Kuu keiki o kaiai aumeume i ka waha,

Auwe kuu kaiki aloha—e !

Kuu keiki o ka lako me ka ilihune,

Kuu keiki o ke kula loa la o Puunoni,

Mai ka iliili naehe mai i Keauhou,

Ke hou nei ke aloha iloko o ko’u kino,

Auwe kuu keiki aloha—e !

Kuu keiki mai ka ua hehi mai i ka lau o ke Kofe,

Kuu keiki o ka po kapa ole,

Mehana kaua i ka wela o ka poli,

Kuu keiki o ka malu hau o Haleolono,

O ka’u ia e hoolono hele nei,

E ake ana ka manao e ike aku ia oe,

Auwe kuu keiki aloha—e !

Kuu hoa o ka la hana nui o ka Luakini,

Kuu keiki, kuu kanaka, kuu luhi, o oe—e,

Kuu hoa i manao ai o oe ka hooilina,

O ka kakou wahi loaa uuku,

Auwe kuu keiki aloha hele hookahi—e !

                                    A. P. Kamehalau.

Honalo, Kona A , Hawaii, Iune 27, 1863

OIHANA LOIO!

JOHN L. NAILIII.I. AIA KONA KEENA Oihana Loio, ma ke Alanui Nauana, makaliho o ka Hale Kuai o A. S. Cieghera, ma ka Hale A@@na Kanaka Hawaii, i kapaia

O HALEOLE.

ma Honolulu, Oahu.  Ua makaukau eia e kokua ma ke ano Loio i ko oukou mau pilikia ma ka Kanawai, no keia hewa keia hewa i hoopii ia ai oukou, a ua makaukau no hoi oia e l@ana me ka maemae loa, a me ka pololei, i ko oukou mau Palapala kuni o kela ano a me keia ano, me na Palapala Hoolimalima, me na Palapala Haawi Waiwai Paa a Waiwai Lewa, ua Olelo Ae Like o kela ano a me keia ano, na Palapala Hoopaa o Kela ano keia ano, na Palapala Moraki, Waiwai Paa a Waiwai Lewa, o na Palapala Hoohui o kela ano a me keia ano, a me na Palapala Hoopii i na Ahahookolokolo, no kela hewa keia hewa Kivila a Karaima, a me na Palapala Kauoha a pau, a me na Palapala a pau o kela ano a me keia ano.  E ninau no ia ia no ka uku.

Honolulu, Nov. 7, 1862                                                                                  60-ly

He Loio, a he Kokua!

o

A. M. Kahalewai.

UA MAKAUKAU KA MEA NONA KA inoa maluna, e kokua ia oukou ma na hihia Karaima, a Kivila, a Hooponopono Waiwai o ka poe make, a me ka hooki mare imua o na Aha Hookolokolo o keia Aupuni ; ua makaukau hoi e kakau i na Palapala o na ano a pau.  A e loaa no au ia oukou ma Honolulu, ma ka Hale Hookolokolo, ma ke Keena o ka Mea Kaulana, C. C. Harris, Loio Kuhina, ina la a pau.  E hele mai no me ka makaukau i holo ka hana ; o ka uku, e like no me ka mea oluolu i na aoao elua; e ninau no i maopopo.

            Honolulu, Iulai 4, 1863                                                                       84 3m

HALE PAI KII.

MALUNA AE O KA KEENA PAI O KA

“Nupepa Kuokoa,”

Emi ka uku no ke kii, hookahi wale no dala no kii, he elua dala ka uku i ka poe Pai Kii mua.  E paila no ke kii iluna o he

ANIANI a me ka PEPA.

E hele mai e na makamaka e pai i ko oukou mau kii.

                                                                        H. L. CHASE (Keiki.)

            67-6m                                                                          Mea Pai Kii.

PAPA MAKEPONO!

AIA KA HALE KUALOLUI C. H. LEWERS,

ALANUI PAPU, kahi e kuai oluolu ai.

NA PAPA OREGONA 1 a hiki 3 iniha.

            LAAU KAOLA, oa a me na pou a me na opaka e a

                        LAAU PA a me na PINE PA,

                                    LAAU AHO HALEPILI.

                                                PAPA ULAULA, PAPA PAINA.

                                                            PAPA KEPA.

                                                                        PILI ULAULA a me KEOKEO.

                                                                                    PENA KEOKEO, OMAOMAO.

ELEELE, ULAULA.

            POHO, GALU, HULU PENA.

                        KUI o na ano a pau, LAKA.

                                    A@, KILOU, KUI KAKIAMOENA, KUINA

                                                PEPA HOONANI KEENA.

                                                            PANI HALE, PANI ANIANI.

                                                                        ANIANI KAAWALE, PATE.

                                                                                    PANI OLEPELEPE

            Ela ka mea kupanaha ma keia wahi, na ka mahu e hana i na aahu apo, he hikiwawe, kapanaha.  E hele nui mai e kuai a e ke wale keia i KAMELO,

KAKELA ME KUKE.

MA KA HALE POHAKU HOU, MA POLELEWA kahi kokoke i ka Halepule Betela ma Honolulu, Oahu.  Na laua no e kuai i na lole o

Kela ano keia ano.

NA MEA AI

            NA BAKEKE

                        NA IPU TINI

                                    NA PA LEPO.

                                                NA KAMAA.

                                                            NA PAHI me na O-O

                                                                        NA PAPA me na NOHO,

                                                                                    NA IPUHAO.

                                                                                                NA NOHO LIO,

NA MEA E KAKAU,

            NA PENA ME NA AILA.

                        NA MEA MAHIAI.

            A me keia mea keia mea.

Me na laau a Dr. D. Hayme.

Honolulu, Dekemaba, 1861

Olelo Hoolaha.

AUHEA OUKOU E NA MAKAMAKA A pao e ko’u maa apana nei, kahi a’u i noha olaola ai.  Ke hoolaha aku nei au ia oukou e na makamaka, ma kapali Kalaiao a Anebo a.  Owau o

Capt. A. White,

ke oukou hoa aloha aloha, e noho ana ma Hanalei ; ke kauoha aka nei au ia oukou a hele mai oukoa ma ko’u Hale Kuai, e nana ai i na ano NU HOU o ka LOLE o keia ano keia ano ; a me na KAMAA NU HOU pau o lalo, a me na NOHO LIO, o kela MALAEEKE a me na mea kuai he oui wale na oukou ; e naue mai e hana no oukou iho, a mau aka.

                                                                                                            A. WAIKA. (Haole.)

Hanalei, Kauai, Iune 16, 1863                                                                        83-3m

OLELO HOOLAHA

I NA KANAKA HAWAII!

Maikai iho o AIGUPITA

Ma hope iho o ka Pa

O MAHUKA !

KA

Pa Kuai Papa

o

LEWERS & DICKSON,

            MALAILA E LOAA AI NO PAPA O KELA auo keia ano, me ke kumukuai makepono loa, nolaila e naue mai oukou e ike i ka olaio o keia leo paipai ia oukou e @ makamaka Hawaii.

NA PAPA OLEGONA,

LAAU HALE A ME NA POU,

LAAU KAOLA A ME NA PINE PA,

LAAU AAHO HALE PILI MAOLI,

PAPA ULAULA, PAPA PAINA,

PAPA KEPA A ME KA AAHO,

PILI ULAULA A ME KE KEOKEO.

Eia ka mea

KUPANAHA

Ma keia hale—maanei i wiliia ‘i ka

 

PALAOA a ma ka HANA PAHU

e like loa me ko

ULAKOHEO

mamua, i kona wa e kau ana, aole a pau i ke ahi mamua ; e naue mai e makaikai.

            Na Pena Keokeo a me ka Omaomao,

            Na Pena Ulaula a me ka Eleele,

            Poho, Kolu, Hulu Pena,

            KUI o na ano a pau,

            LAKA o na ano a pau,

            Ami, Kilou, Kui kakai moena,

            Kui Nao,

                        Pani Hale,

                                    Pani Aniani, Pake,

                                                Aniani kaawale,

                                                            Pani Olepelepe.

A PELA WALE AKU.

            Aole o maua hoolimalima i poe e koi aku i na kanaka e kuai mai ma ko maua wahi ; aka, he hilinai no mauama ke ano mai kai o ka maua mau mea kuai, a me ke kumukuai o ka maua papa, me ka malama pono hoi i ka maua oihana iho, i hoomau ia mai ai ka domaikai, i lona mau ia maua mamua aku nei.

            Honolulu, Okatoba 30, 1862                                                                          (76-3m)

E MAKAALA!

OWAU

O KAMUELA,

KA HOA KUAI O NA

KANAKA HAWAII,

NONA KA HALE KUAI PAPA Mauka iho o ka

Hale Hookolokolo ma Honolulu.  Ke hai aku nei au ia oukou, he mau la ku wale no keia o kuu moku papa,

“CONSTITUTION!

a ke ku mai oia, e lona ana ia’u na

LAKO KAPILI HALE

o kela ano, keia ano.

EIA NO KE WAIHO NEI.

NA :

PAPA O KELA ANO, KEIA ANO.

            LAAU HALE, o kela ano, keia ano.

                        PILI HALE,

                                    PINE,

                                                AAHO,

                                                            KEPA,

                                                                        PANI PUKA,

PUKA ANIANI,

            OLEPELEPE,

                        KUI,

                                    PENA,

                                                AILA PENA.

            WAI HOOMALOO PENA.

IA MEA AKU, IA MEA AKU

            Ua makaukau au e kuai aku me ka oluolu i keia mau mea, a no ka maopopo no paha ia oukou he KEIKI KAMAAINA au, he hiki ia oukou e ka Lahui

Mai Hawaii a Niihau,

ke kipa mai i o’u nei.  E hiki ana no na moku papa o’u i na manawa a pau, a hoolako mau ia’u.  He mea mau i na poe o ka hiki mai ka haanui, a me ke kaena.  A e mau Luna kekahi i hoonoho ia e lakou e alako ana i ka poe maikai, me he lawehala la Aka, he hiki ole ia’u ke hana pela, o ko’u ano no ka oukou e imi mai a loaa, maopopo no na hana a kakou, no ka mea, o ko Hawaii nei kupa iho la no ia o ko oukou makamaka.

            KAMUELA, (Kaikaioa o Kimo Pelekane.)

Honolulu, Ian. 8, 1863.                                                                                   75-8m

OLELO KAHEA A KA

LUNA PAI.

O KA POE A PAU I LAWE I KEIA PEPE, e uku mua mai i ke DALA HOOKAHI no ka pepa, e pono ke hoomaopopo e pau ana ka manawa o ka oukou uku ana i ka ia

27 o Iune, 1863.

A mahope mai ola ia, o ka poe e makemake ana e lawe hou i ka pepa, e pono e        UKU MUA mai oe i hookahi dala, aole noe haawiia ka pepa ke uku e ole mai.  O ka poe wale no e uku mua mai aua, ka poe haawiia aku ana i ka pepa.

                                    Ma ke Kauohaa                                                           U. M. Wini.

79-3m                                                                                      Luna Pai o ke Kuokoa.