Ka Nupepa Kuokoa, Volume III, Number 2, 9 January 1864 — No ka Mea Aloha i Make. [ARTICLE]

No ka Mea Aloha i Make.

Ma ka hora elua o ke kakahiaka o ka la 13 o Dekemaba iho nei, ma ke kulanakauhale o Kapalakiko, ua make emoole o Edward Alexander Ragsdale, (Ailuene,) ka pasa oka moku kiapa Cometa, kekahi o na moku holoholo mau mawaen» o keia aina ame Kalefoni. He mai ma ka puuwai ke kumu o kona make ana. Ua hanau oia ma ka la 9 o Feberuari, M. H. 1839. a nolaila, he iwakaluakumamaha makahiki, ame na mahina he umi, ame na la eha, ka loihi o kona ola ana. He keiki oia na Alexander ame Kahawalu Ragsdale : no ka mokuaina o Vereginia ma Ameiika Huipuia kona makuakane, a no Hawaii nei kona makuahine. He kanaka opio oia i aloha nui ia e ka poe a pau i launa me ia, no kona kupaa mamuh o ka rula o ka hana pono ana'ku, i na poe a pau ana i huiai ma ke ano oihana. Ua hookaumaha nui ia kona makua nana i kokua iloko o kona mau la opiopio, oia hoi o Capt. James Smith v o Cometa. Ua hoomokumokuahuaia ka naau o kona poe kini a pau, no kona laweia ana aku e ka make. Ua waiho iho oia mahope nei he makuahine kanemake, he kaikuaana, a he kaikuahine, ame na kini eae no hoi. Ke noho nei lakou me ka u ame ka minamina hohonu nona. Ua hoihoiia mai kona kino kupapau, ma ka moku Cometa, a e hoolewaia ana mai ka helepule haole aku ma Polelewa, ma ka ha» palua o ka hora ekolu o ka la apopo.