Ka Nupepa Kuokoa, Volume III, Number 18, 30 April 1864 — HE KANIKAU NO KA MOI IOLANI KAMEHAMEHA IV., KA MOI I ALOHA NUI LOA Ia e kona mau Alii, ame ka Lahui o kona Pae Aina. [ARTICLE]

HE KANIKAU NO KA MOI IOLANI KAMEHAMEHA IV., KA MOI I ALOHA NUI LOA Ia e kona mau Alii, ame ka Lahui o kona Pae Aina.

He Uhane hele Hookahi, No ka Lani nui Liholiho—Ua hala, aku nei oe; I ke ala hoi ole mai! Ike wale aku hoi oe! I ka luhi mua o kaua; Noho wau, me ka minamina, Ia oe, me ko Lei mua, Eia ke kanikau nei; Kaikuahine o kaua— No ke'loha, lana mai nei, Ka manao, ia oe ea; Kuu hoa a'e ale kai, O ka hau o Nouaiki, Kuu hoa hele kuahiwi; Ma ke alanui kaa ahi, E puai una ka uahi ; E nonome ana ka huila. He mele kanikau, Nou e Iolani; Aloha no ko maka, Ua huna ia iho nei: Aloha! Aloha !! Aloha !!! wale oe. O oe ka Uhane e, I niau ae nei; He owe ana mai, Ka'u i lohe ae, Aloha! Hu mai ke aloha, O kuu kaikaina; O ka lai o Maleka, I alo ai maua, Aloha ! He Uhane he aloha, Nou no e Iolani; I hala iho nei, I ke kakahiaka nui; Imi aku nei oe; I ka lei o kaua. Ke u nei ko kuaana, Me ko hoa pili no hoi; Me na Makaainana, I kou hala ana'ku ; Wehe oe i ka pili la, Kaawale loa e. Aia paha oe, I ka maka o ka Opua; Kahi ike ole ia, Huna na maka nalo loa ; Pau kou ike ana, I kou nui a pau. Aloha no hoi oe, I ka hele hookahi ana, A loaa aku hoi ; Ke kama a kaua, Nani kou ike ana, I ke kama a kaua. Na L. KAMEHAMEHA V. 1 E uwe no, — Ke uwe aku nei o ka wahine hele la o Kaiona, Wahine hahai alualu Wailiula, Ia oe e kapu ka lani kapu ka honua, Hoi i hoanoano ihi ka leo, E hamau ka leo e kapu e.— 2 E uwe no, — E aloha ae ana ia oe e hole waimea i ka ihe a ka makani, Omai na ala a ke kipuupuu, Kuu hoa o ka aina ea i ka lepo, E kau ao malu ana ka lepo i ka Lani, Uhi iho la malu ke Kulanakauhale, Hohola aku la i kai o Ulakua, He ea wale no ke kai o Kuloloia e.— 3 E uwe no, — E aloha ae ana ia oe e lele Iolani, Ina hoa o ka wa kamalii, A ka haku o kakou i olelo mai ai, E noho i ka hale naauao, Mai ke kula o Pahua a hiki i Kahehuna e.~ 4 E uwe no,-— Hehu aku nei oe a hele, Haalele mai nei oe ia makou, Me ka hoa pili o ka wahine, I pilia na kai koekoe, Me na ale o Pailolo, Ehuehu kai aku la ka ihu o ka moku i ka hele ana ou, E lohaloha peleunu mahiki i ka ua e.— 5 E uwe no, — Auwe kuu hanai! Kuu kaikunane mai ka makani Maaa, E wehe aku ana i ka puka o na hale. A kakou e nonoho ai i ka lai o Lele, E nana ai i na hono o Piilani e.— 6 E uwe no, — E aloha ae ana ia oe e kuu kahu, I kahu i ka hanai ana ana makua, Kuu hoa o ka malu kuawa o Wailuku, Mai ke kaahaaha lai o Niua, O ia kula a kakou e haele ai, Pulu i ka ua Ukiu o Makawao e.—7 E uwe no, — E aloha ae ana ia oe, I ka hoa lena o Lilikoi, Aheahe mai ana ke kihi ka ewa, I ka na hele pua kawau, E hiki aku ai i ke kuahiwi wai ole o Haleakala e.— 8 E uwe no, — Ke uwe nei no ka honua; Ke haalulu mai nei ka mauna, Ke haaheo mai nei ka Lani, I ke aloha ia oe e Kaokinapau o ka Lani e.9 E uwe no,—E aloha ae ana ia oe, I ka hoa nana ohu o ke kuhiwi, Mehe kapakea la iluna o ka laau, Ka luluu o ke kehau i ka pua o Keaalii e. — 1 E uwe no, - Ke uwe aku nei o Kohai akalele ka iwa i ka malie, Ia oe e kau na kula o ka ua Kipuupuu, Ua nalo iu aku nei i ke koekoe. I ke'hu wai ua o Malanaoa, Ua elo wale i ka ua Lililehua e.-

2 E uwe no,— Ke uwe aku nei o maikai Waipio alo lua na pali, E ano wale mai ana no ke aloha o kuu kane ia'u, Me he wai puna la ka huihui i kuu manawa, Ka maeele o ke aloha ia olua, Me ka lei o kaua e.— 3 E uwe no— O ka'u no ia e uwe nei, I kuhi au i hele oe a hoi mai, Aia ka oe i ka uka anuanu e Kehoiwai, Ua lilo ka oe ia Puna, O Puna aina wai hiolo i ka Lani, Hoohiohiolo i ka maka o Kaopua.— 4 E uwe no— Ke uwe aku nei o ke kai Kuihala e ke Kuimanono, Kuu hoa o ka la wela koliliu, E anapu mai ana me he ahi la, Wela ke kula o Makahuna, Hoomaha aku i ka malu o ka Niu, I ke ahe a ka makani Kaelekei, Auau aku i ka wai o Punaakaualua.— 5 E uwe no— Ke uwe aku nei o Milia na o Kekaolauaiku, O ka pua ala o ka hala o Maihala, E aloha ana i kona kaikunane, Ia Hooinainau mea ipo ka nahele, Hookokoe ana ka maka i ka moani, Ua waiho ke kino o ke aka ia e hele la, O ke aka o ka uhane hele ololi, Oia kai maalo i ke kakahiaka, I oili Lani aku nei ka hele ana e.— 6 E uwe no— Ke uwe aku nei o maikai lili hemolele i ka la lena—e, Kuu kane i ka lai a ka manu—e, E hoolale ana i ka lawelawe malie, Malie aku la lalo o Hoolehua—e, I lehulehu au i ke aloha e noho nei.— 7 E uwe no— Ke uwe aku nei o Kamaioloa o ke kapu Liloa, O ka Liloa i holo ka ea o Umi, Kuu kaikunane mai ka hale lana i ke kai, Pio ke anuenue o ke ala ia i hele ai, I imi ai i na kama lei i na keiki a maua, Loaa aku i makani Koaniani, I walea i ka pua ala o Lanikele.— 8 E uwe no— Ke uwe aku nei o Kamakaeha, Makawalania i ke ahe makani—e, Auwe kuu hanai, Kuu hoa o ke kai nene lea o Uo—e, Oia kai hoala hiamoe, Pu-o ae la ke'hu a ke kai—e, [e. — Hohola ae la i ka hale o makou i hale aloha 9 E uwe no— Ke uwe aku nei o ka wahine hooulu pua o ka nahele— Ia oe e Koa-uli Koa-kea ka Lani, Ka pukoa-ku ka papa unaoa a Lono—e, E Alekanekelo e.— 1 Auwe kuu hanai. Kuu kaikunane hoi, Mai ka ua Kamakahala o Nuuanu, E ahai ana ma ke kua ka malu, A pulu kakou i ka ua Awa, Ke hehi mai la i ka pua o ka Ahihi, Kuu hoa o ka wai o Kahuailanawui e.— 9 Auwe kuu hanai. Kuu kaikunae hoi, Mai ka malu Inia o Pahua, E wehe aku ana i ka lau o ke Kukui, Hoomaha aku i ka puni a kakou o ke kowali, Kuu haku mai ka makani he Moae—e, 3 Auwe kuu hanai. Kuu kaikunane hoi, Mai ka ua Waahila o Manoa, Ke halii mai la la i ke pili, Ke hoihoi ia aela e ka makani, Auau aku i ka wai o Kahoiamano e— 4 Auwe kuu hanai. Kuu kaikunane hoi, Mai ke kai o Kapuni, Mai ka i-a hali ala o Kahaloa, Hooluana ka Lani i Ulukou, Me na kamalei a kakou, Huli aku nana i ka ua Puanaiea, Ke halii mai la la i Palehala e— 5 Auwe kuu hanai. Kuu kaikunane hoi Mai ka makani haualialia, Ke wa mai la la i Kuialauwahi. I ke oho pili o Mauuenaena, Ke kahiko mai la ka hala i Kahalauaola e— 6 Auwe kuu hanai. Kuu kaikunane hoi Mai ka makani he Kaelekei, Ke hoa la i ke oho o ke Kalamalo, Kilohi iho ana ia Hanauma, Inu aku i ka wai pili pali o Waiakaaiea e— 7 Auwe kuu hanai. Kuu kaikunane hoi Mai ke ala pili poli o Malei, E nana aku ana ia Kaohikaipu, O Manana e a-u ae la i ke kai, Holo aku o ke one o Apuakea, E hiki aku ai i Waimanalo e-— 8 Auwe kuu hanai. Kuu kaikunane hoi Mai ke kula loa o Alele, Me he kapakea la ke one o Kuaaohoe, Ke ike aku i ke hoa maokioki o Heeia, Me ka ua apuakea o Mololani, Ke hehi mai la la i Malaukaa e 9 Auwe kuu hanai. Kuu kaikunane hoi Mai ke ao poonui o Koolau, Mai ke kai ulu kapa o Maluaka, Ke hii mai la i na waa kiolea, Kuu aku ka luhi i Pohukaina e— 10 Auwe kuu hanai. Kuu kaikunane hoi Mai ka makani ahiu o Kahana, Ke lawe ia'la e ka Puahau, Aia ka wai la i Halalii, I ka lipo nahele i Piaimauna e— 11 Auwe kuu hanai. Kuu kaikunane hoi Mai ka maluhala o Kahuku,

Mai ka i-a peuhi kapa o Waimea, Inu aku i ka wai o Punanue, Kuu alii mai ka pohu lai o Waialua e— 12 Auwe kuu hanai. Kuu kaikunane hoi Mai ke kai leo nui o Puaena, Ke nu mai la i Kemoo, Pulu i ka wai kehau a ka mauu, Hohola aku la i ke kula o Malamanni e— 13 Auwe kuu hanai. Kuu kaikunane hoi Mai ka hale anu o Lihue, Mai ke kula kanaka ole o Kehumoe, Komo i ka hale ohai o Kaiona, I ka wiliwili i Kanehili e— 14 Auwe kuu hanai. Kuu kaikunane hoi Mai ka i-a kapio ohe o Kaunolu, Mai ke kula wai ole o Kahalapalaoa, Aia ka wai la i Maunalei, Lei aku i na lehua o Keahiakawelo e— 15 Auwe kuu hanai. Kuu kaikunane hoi Mai ka hale lewa i ka moana, Mai na ale kawahawaha o Papawai, Huli aku ke alo i Wailuku, Kuu hoa hele o na kuahiwi elua e— (Aole i pau