Ka Nupepa Kuokoa, Volume III, Number 42, 15 October 1864 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

O na Luna a pau o ke Kuo koa ke kauohaia 'ku nei e hooili koke mai i na dala a pau i ohiia e lakou, a e waiho nei hoi iloko o ko lakou lima.  O na dala a pau o ka pepa, ua hala loa ka wa e uku ai, a he pono hoi ke hookaa kokeia mai ano.

MA KE KAUOHA A KA LUNAPAI.

 

Ka Nupepa Kuokoa

 

HONOLULU, OKATOBA 15, 1864

 

Ke oluolu nei makou i ka hai aku, ua hiki ia makou ke hai aku i ka lehulehu kanu aiki mai kela kihi a keia kihi o ka aina, ua hiki, ke kuai i ka lakou laiki ia Major H. Predergast me ke kumukuai makepono loa oia hoi elua keneta no ka paona.

He oiaio paha, ua nui ka poe i kanalua no ke poho ana o ke kumukuai o ka laiki, aka, i keia wa nae la aohe kumu e hiki ke kuihe, me ka manao iho e poho ana ka laiki, no ka mea, ke kuai mau nei ka mea nona ka inoa maluna i ka laiki, me ka hai mai no hoi, e makaukau mau ana oia e hana pela, i na manawa a pau; aka, mai manao nae kakou e na makamaka he makemake oia e kuai i ka laiki ino, no ka mea, aia wale no kona makemake o ka laiki maikai.

E na makamaka i e pono ia oukou e maliu ae a e kanu i ka pulupulu ame ka laiki, a oia ka mea nana e hoowaiwai io mai ia kakou, ka mea e ulu mai ana mai ka opu mai o ka honua, aia ilaila ke Gula oiaio, no ka mea, e hiki ana no ia kakou ke kanu i ke kalo ma kekahi mau loi, a e kanu hoi i ka laiki kekahi, ma ia mea e hoolakoia mai ai kakou i ka ai ame na pono a pau o ke ola ana.

Ua lohe mai makou me ka hauoli nui, ke kanu nui nei na kanaka o ka Apana o Waimea Kauai i ka laiki, a he mea kupanaha maoli paha keia ea?  Aia ia Apana ma ka Mokupuni Komohana, eia ka ia lakou la ka paipai mai ia kakou i keia hana maikai o ke kanu laiki.  E eu ae kakou, mai hookunana, e apo koke i ka o-o, e ala a i ka honua, a e kanu i ka laiki.  O ka anoano laiki maikai ke kanu, o ka anoano o ka laiki o Karolina Hema.  O ka poe a pau e makemake ana i anoano laiki, e hele mai no i ka Lunahooponopono o ke Kuokoa, a i ole ia ia Major H. Prendergast, e haawi wale ia'ku no i ka poe a pau e makemake ana.

 

Na mea Hoopiha Kuokoa!!

 

Ma ko'u halawi mau ana me ka'u nupepa Kuokoa:  aia hoi!  ua ike au i kekahi poe keiki e hoopuka ana no na Hoku:  iloko o na Kuokoa i hala'e nei.  A!  me he mea la, nona maoli iho ia ike ana i na mea ma ke aouli, ka hoaiai wale aku i ko hai akamai, i unuhi ia mai loko mai o ka Buke Ao Hoku.  Mahea la na ohenana a kekahi poe keiki Hawaii o'u, i hoike ae ai ma ka nupepa o na mile, mai kekahi hoku, a i ka Honua nei.  Mea e!  ka hikiwawe o ua mea he ike i na mea ma kahi loihi loa aku, ea!  pehea la!  Ua ike a nei oe i na mea ma kahi kokoke loa?  I mai paha oe, heaha ia mea ma kahi kokoke loa?  "Eia no o ke kiekie loa o ka naau."

Eia no hoi kekahi hana lapuwale: "o ka hoopiha wale mai o kekahi poe kanaka i ka nupepa, i na opala makemake ole ia e na lio, e like me "olioli makahiki hou ma ke poo, iloko o na nupepa i hala'e, a i ka hoao ana i ka weuweu, he mea ino wale no, e like me na weuweu hoomau ia e ka wai lio.  "He mea maikai ole na olelo kuamuamu e lawe mai iloko o ke kino maikai.  Okoa ke poo okoa ke ano:  nolaila, he mea ino loa ia la e ka poe e hoopuka manao nei, a hoopiha pepa wale no hoi, me ka manao oia ka mea e kaulana ai, oiai, aole no paha e loaa ana ia kulana i ke kiekie o ka naau, me ka ike ole aku i ka rula maikai, a me ka nani hoi i kuhikuhi ia ma Mataio 5:2-8.                                                                                  B. HOLI.

Honolulu, Oct. 14, 1864.

 

Hana pono ole i ka la Sabati.

 

Ua hoohalawai ia mai au a me kuu hoa aloha oluolu D. S. K. Kamahalo, i ka la 25 iho nei o Sepakemaba nei, i kela mau hua e kau ae la maluna.  He halawai ma ke kakahiaka o keia Sabati malaila no au a me kuu hoa aloha, aia maua e naue ae ana ma ka pa, mawaho ae o ka hale o J. W, Makanoanoa, ua ike maopoopo aku maua e kui ai pai mai ana o Keliihuluhulu a me ka makuakane, oia paha ka hora e 9 o ke kakahiaka: ua ninau aku wau i kuu hoa aloha, heaha ke kumu o keia hana ana?  Pane mai la oia, "no ka hiki ole i ka haku hale ke hoomalu ia ia iho.  Nolaila, nole hiki ke hoomalu i kona ohana."

   O ko makou hope makai nui no keia, mea nona keia ohana hoomalu ole i ke sabati.  Nolaila e nana mai oukou i keia hana pono ole i ka la sabati ma Kailua nei.

                                                                                    K. HAKUOLE.

Kailua, Kona, Oct. 12, 1864

 

KA NU HOU!

 

No Tekasa!

 

Ke kaua ma Mesiko!

 

Ua loaa hou ka 'Alabama' o Kapena Semmes!

 

Kaua Weliweli mawaena o na Puali Koa Kipi o Early, ame Generala Seredena.

 

Ke ano o na mea e hanaia nei ma Europa.

 

Haawi na Poe mea Dala o Geremania he 100,000,000 i ke Aupuni o Amerika Huipuia ma ke ano hoaie.

 

CHICAGO, SEPT. 10.  Ua hiki mai ka lono mai Tekasa mai, e hai mai ana i ka hoouka ia ana o kekahi kaua nui ma kahi i kapaia o Baraunuvile (Brownsville,) a iloko o ia hoouka ana, ua komo pu na koa Farani, na koa kipi na koa Mesiko, ame na koa Aupuni.  A eia iho mahope nei ke ano o ia hoouka ana:  Ma ke kakahiaka o ka la 6 o Sepatemaba, puka aela kekahi mau koa Farani he elima tausani ka nui mailoko ae o Bagdad, hoomaka aku la e holo iuka o ka muliwai o ka Rio Grande, me ka manao e hoouka aku ia Matamorasa.  Ua keakea ole ia ko lakou holo ana a hiki wale i kahi i kapaia o White Ranch, a ilaila lakou i halawai ai me Gen. Kotinasa (Cortinas,) me na koa Mesiko, me ka makaukau e keakea i ka hele ana'ku o na koa Farani.  Ia wa, kaua pukaa iho la na koa Farani me na koa Mesiko, a o ka hopena o ia hoouka ana, oia no ka hooemi hopeia o na koa Farani me ke kau liilii, a alualu heleia'ku la a hala na mile ekolu, a hiki hoi i kahi i ku ai o kekahi mala papipi, alaila, hoomaka hou na koa Farani e ku a kaua mai i na kea Mesiko, a ilaila hoi ki mai la na koa o Kotinasa i pu kuniahi, ame na poka poha.  Oiai na koa Mesiko e kaua ana ma ia wahi, aia hoi, hele mai la ka Luna Koa Kipi Nui o Tekasa ma ka aoao pili Tekasa o ka muliwai Rio Grande me ka puulu pipi nui na na koa Farani, a i ka ike ana mai o ke alii koa kipi e hoopilikiaia ana kona makamaka Farani, alaila, o kona hoomaka koke no ia e ki mai ma ke kua o na koa o koa Mesiko.  Ia wa, hoouka puahi aku la na koa Farani i na koa Mesiko, me ka manao e holo aku a hookui, aka, ua hooemi hopeia mai nae lakou me ka hikiwawe nui, a hiki hou imua o ka mala papipi a lakou i ku mua ai.  Iloko o ia manawa, loheia aku la ke kipu ana ma ka Rio Grande, alaila, hoounaia mai la ka puali kaua helu 91 o Ilinoe e noho ana ma Brazoa Santigo, e hele i kahi a ke kaua e hooukaia ana.  I ko lakou hiki ana mai no, kaua koke aku la lakou i ka puali kaua kipi malalo o Kanela Ford, a hooemiia aku la na kipi he elima mile, me ka hoopioia o na lako kaua ame na halelole, ame na pu ame na pono kaua e lawa'i na koa he kanakolu.  Iloko o ia wa e kaua ana, aia hoi, hee aku la na koa aupuni o Mesiko me ke kauliilii i na koa Mesiko malalo o Gen. Kotinasa (Cortinas,) a ho-a loaia aku la lakou a hiki i kahi i kapaia o Boca Del Rio.  Ua hiki ole nae i na koa o Kotinasa ke kaua aku imua o na pu o na aumoku kaua Farani, nolaila, hoihoi aku la oia i kona mau koa a hiki i White Ranch, a hoouna aku la he 500 io kona mau koa ma ka aoao poli Tekasa o ka Rio Grande, a malaila i moe ai na koa o Kotinasa me ka lakou mau mea kaua, ame na koa Aupuni o Amerika Huipuia.  I ka ae ana no o Gen. Kotinasa ma kela kapa o ka muliwai, aia hoi, huki koke iho la oia i kona hae ilalo, a huki aela i ka hae Amerika iluna me ka huro nui ana o na koa Mesiko, ame na poe Amerika.  Ma ka la 9 o Sepatemaba, alualu hele aku la o Gen. Cortinas i ka puali kaua kipi o ka Hema malalo o Kanela Ford, a hiki i ke kahua kaua kahiko ma Resaca de la Palma, a ilaila oia i hoomaha iho ai i kona puali ia po, a emi loa aku la hoi na koa kipi a hiki i Baraunuvile (Brownsville.)  Ia manawa, hoouna koke aku la o Gen. Cortinas i kekahi Elele e holo koke i Matamorasa, me ke kauoha i na koa ona e noho ana ilaila, e liuliu no ke kaua ana.  I ke kakahiaka nui o ia ao ana ae, pii aku la na koa Mesiko he 3,000 ka nui iuka o Rio Grande, a kaa iuka a-e, aela me ka aoao pili Tekasa o ka muliwai, a iho hou mai la i kai, a hoouka mai la i ke kulanakauhale o Brownsville (Baraunuvile) pu me ko Kotinasa mau koa.  O ka hopena o ia hoouka kaua ana, o ia no ka hee ana o na koa kipi o ka Hema, me ka hoopioia ana o ia kulanakauhale, a lilo iho la ia Gen. Kotinasa.  No ka pupuahulu loa o ka hee ana o na kipi, nolaila, ua haalele iho lakou i ko lakou mau hae e kau ana no iluna, o kekahi o na hale aupuni, aka, ua hukiia nae ilalo, a ua hukiia ka hae o Amerika Huipuia iluna iwaena o ka huro nui a na koa o na aoao a elua.

O ka olelo nae hoi a ka nupepa Pikiune (Picayune,) no ka hoouka kaua ame na mea i hanaia ma Baraunuvile, penei no ia:  Ua hiki mai ka lono hiki ke hilinaiia mai ka Rio Grande mai, e hai mai ana i ko Gen. Kotinasa a-e ana'ku ma kela kapa o ka muliwai me na koa he 3,000 ame na pu he 16, a hoopio aku ia Baraunuvile, me ke kipaku aku hoi i na koa kipi malalo o Col. Ford.  Huki oia i ka hae Amerika Huipuia iluna, a waiho aku iaia iho ame kona puali imua o Amerika Huipuia, me kona hai aku i kona makemake e kaua malalo o ke Aupuni Hui, pela kona hai ana'ku i ka Luna Nui o na koa Aupuni ma Barazoa Santiago.  I ka wa a Gen. Kotinasa i koi ai i na kanaka o Matamorasa e hoaie mai i dala iaia, me ka lawe mai i ka hooweliweli ana, i mea e maka'u ai na kanaka o ia wahi, o Kanela Fisher kekahi mea i noho me na puali kaua Mesiko mamua, a i keia wa, ua lilo i Alii Koa Kipi, ua hele mai oia a nonoi mai i ke alii koa Farani e huipu laua ma ke kipaku ana i na koa o Kotinasa mailoko aku o Matamorasa.  Aka, ua hoole mai nae ke alii Farani, no ka mea, aohe ona makemake e hoohui iaia iho me na moku Hui o ka Hema.  Aole no nae i ana iho ua Fisher nei, aka, hele aku la ia i o Kotinnsa 'la, a waiho aku la i ke kauoha, e i aku ana ina e koi o Kotinasa i na kanaka Farani, ame na kanaka o na moku Hui o ka Hema, e hoaie mai i ko lakou dala me ke kue i ko lakou makemake, alaila, e hana no na koa o na moku Hui o ka Hema e like me ka hana ana a Gen. Dana mamua aku nei, oia hoi ka a-e ana ma kela kapa o ka muliwai, a lawe i ka lakou mau dala ma kahi e maluhia'i.  I ko Kotinasa ike ana i keia manao, o ka pii koke no ia o kona inaina, anolaila, haalele malu iho la ia ia Matamorasa i ka po, me ka waiho pu iho i 300 koa nana e kiai ia wahi, a hele aku la me kona mau puali he 3,000 ka nui, me na pukaa he 16, a hoopio aku la ia Baraunuvile, a hoauhee aku la i na puali kaua lio malalo e Kanela Ford, aohe no ana mau pukaa. Ia komo ana no o Gen. Kotinasa iloko o Baraunuvile, o kona huki koke aela no ia i ka hae o Amerika Huipuia, a hai akea aela ia e paa ana oia ia wahi ma ka inoa o ke Aupuni o Amerika Huipuia, no ka mea, olelo iho la no oia he kanaka oia no Amerika Huipuia, no ka mea, ua hanau oia ma ka aoao Amerika o ka muliwai, ma ia manawa koke no, hai aku la oia i kana mau mea i hana ai i ke alii koa o ke Aupuni (Amerika Huipuia) e noho ana ma Barazoa Santiago, me ka hai pu aku hoi i kona makaukau ame kona puali kaua pu, e kaua mahope o ke Aupuni o Amerika Huipuia.  Me he mea la, he mau wahi koa Farani kakaikahi e noho ana ma ka nuku o ka muliwai, a i ko lakou lohe ana e iho mai ana o Gen. Kotinasa i kai o ka muliwai, puiwa e lakou la, a pau i ka a-e iluna o na aumoku, aka, hoi hou mai no nae lakou i ka ike ana iho o ke kulanakauhale o Baraunuvile kahi i makemakeia.

Ma na nupepa nae o Nu Olina, o ka la 13 o Sepakemaba, e hai mai ana i ka nui o ke kanaluaia o na mea i lohea ua hanaia e Gen. Cortinas; o ka poe no nae i ike, ua hai mai no he oiaio no na mea a pau i haiia maluna.  Ua haiia mai no hoi, aia no o Gen. Cortinas, i pakaua Brown kahi i noho, me na pukuniahi he 19 i kau pono ia ka waha i Matamorasa..  O na kipi i noho ai malalo o Kanela Ford, aia aku la lakou iuka o ka muliwai, he umi mile paha ka hala iuka o ka muliwai o ka Rio Grande.  Ua nee ae la na koa Farani, he umi mile mai loko ae o Bagdad.

 

Na mea o Pitabuga.

Mai ka wa mai o ka lilo ana o kekahi wahi o ke alanui kaahao o Weledona ia Gen. Garana, oia hoi kahi e pili la ma ka aoao hema iho o Pigabuga, ma ia mea i hooliloi'ai i hookahi wale no alanui e hiki ai i ke Kulanakauhale alii o ka Hema oia hoi o Rikemona, ke hui me na mokuaina ma ka Hema.  Aka nae ua lawe mai no nae na Kiki i ka waiwai a lakou mai Wiliminatona mai, kahi a na moku e hookomo malu mai nei i ka lako kaua o na ano a pau mai na aina e mai.  Mai laila mai e lawe ai a hiki i kahi i kapaia o ua Kahawai ia (Story Creek) he wahi hoi ia i noho ole ia e ko Gen. Garana mau puali koa kiai waho, a malaila ae e lawe hele ai ma na kaa lio a hiki i Pitabuga, a me Rikemona, aka, e hiki ana no nae i keia alanui ke hoopilikiaia, ke hookomo ae o Gen. Garana i ke kihi hema loa o kona puali kaua ma ke komohana aku me ka hoolilo o Sufoka ke kahua e hoolako mai ai i kona puali.

Aka me keia mau mea no nae a pau e pili ana i ka pono o keia alanui, ina e hiki mai ka wa ino, alaila, e pono ole ana no ke kauo ana i ka lakou mau ukana mai Wiliminetona mai, a nolaila, me he mea la hookahi no alanui a na kipi e hiki ai ke aloko mai i ko lakou mau mea ai mai ka Hema mai, me ke kuokoa hoi ma ke komohana hema iloko o ko lakou lima ka malama ana, oia hoi ke alanui kaahao e holo ana mai Rikemona a i Danavile a ina e pilikia ia alanui, alaila, papapau na poe o Rikemona i ka pololi.

 

KA NU HOU HOPE LOA.

Ma ke ku ana mai nei o ka moku mama Daniel Marcia ma ke kakahiaka nui o ka poaha iho nei, malaila i loaa mai nei ia makou na nuhou hope loa mai ke kahua kaua mai, a me Europa, i hoikeia i na nupepa o Kapalakiko.  Ke awa hope a ua moku la i haalele aku nei.  Ua hiki na nupepa i hiki mai nei i ka la 24 o Sepakemaba nupepa pule, a i ka la 25 ua nupepa la.  He 16 ka nui o na la o keia moku i holo mai nei, e holo loa ana i Kina.

O na mea i ikeia iho ma na pepa i hiki mai nei, oia no ka hooukaia ana o kekahi kaua nui mawaena o na kipi malalo o Gen. Early, a me na koa aupuni malalo o Gen. Seredene (Sheridan,) a ua pio loa na kipi, a ua emi hope aku i Rikemona, me ke pio mai o na koa he 3,500 a me kekahi mau pu a me na hae kaua; a e nana iho no ka poe heluhelu mahope nei, ma kahi e hoike ana i ka moolelo o ka hoouka kaua ana.

Ua haiia mai nei no hoi, ua puka hou ae ka olali moana o ka Hema, oia o Kapena Semmes kela alii kaulana o ka moku powa Alabama i hoopihoia'i, a aia kona moku ma Bremerhaven kahi i ku ai.  He moku nui no kona, he 300 ka nui o na kanaka iluna, a he 40 ka nui o na pu, aka nae hoi ma kekahi oleloia hoi, he 175 ka nui o na kanaka o luna, a aole i moapopo ka nui o na pu, a nolaila, aohe i maopopo ka mea hiki ke hilinai ia, ma keia hope aku paha kakou e lohe maopopo loa ai.

O ko Europa mau mea nui i ikeia iho nei, oia no ka liia ana o na poe nana i paipai i ke kipi ma Polani, a ua hoopukaia no hoi e ke aupuni o Rusia, he hoopai hoopaahao maluna o kekahi poe, a ua hoounaia i Saiberia e hoohanaia ai.  Ua ala mai o Rusia, Farani, a me Enelani, e lilo i poe nana e hooponopono ka hihia iwaena o Denemaka, a me na aupuni hui o Geremania, a iloko o keia mau la mai nei i halawai ai, ua lilo wale no ka manawa mamuli o ka hoopaapaa no na palena o na aupuni.

Ua olelo wale ia mai, ua hoouna mai ka ka Emepera o Rusia, i ke kauoha i kona aumoku ma ka Moana Pakipika nei e holo aku i Vera Cruzy e ku ai, a e kipu aku no hoi i ka Hae o ke aupuni hou o Mesiko.

Ua hoopuka mai na Kuhina o Enelani, i ko lakou manao no na mea e pili ana i ka moku Geogia i hopuia'i e ka moku Niagra (Niakala,) no ka mea he moku powa ia mamua, aka, ua olelo mai nae na poe nana i kuai ua moku nei, ua kuaiia e lakou ma Beritania, a ua hoopii ka mea nona ka moku i ke Aupuni Enelani, e koi aupuni mai i ua moku la i ke Aupuni o Amerika Huipuia.  Akahi mai nei no ke Aupuni Enelani a hai mai i kona manao no ua hihia la, e i mai ana i ka Ona moku, aole e hiki ia lakou ke lawelawe mai no kana kumu hoopii, aka, e waiho no na na Aha Hookolokolo Waiwai pio o Amerika Huipuia e hana no ia mea, a e pono no i ua ona moku nei ke holo aku ilaila e hookolokolo ai no kona waiwai.  A nolaila, he mea maopopo, eholo ana ma Amerika e hanaia'i kela hihia.

Eia iho malalo nei ka moolelo o ka hoouka kaua weliweli mawaena o na kipi malalo o Gen. Early ame na koa aupuni malalo o ke Generala Kaulana Gen. Seredena, ma ke awaawa o ke Senedoa kahi o ke kaua ana.  Ua laweia keia mau olelo malalo iho nei, mailoko mai o ka nupepa American o Balatimoa, mokuaina o Marilana, a penei no ua mau olelo la:

HEADQUARTERS MIDDLE MILITARY DIVISION.  WINCHESTER, SEPT. 19-9 P.M.  Ua hoouka aku ka puali kaua o Gen. Seredena i keia la i kekahi o na kaua weliweli a lanakila nui i hoouka iloko o keia aukaua, mai kona wa i hoomakaiaai a ua kau iho ka lanakila nui iluna o ka hae o ko kakou aupuni.  Ua hooheeia ka puali kaua kipi, a ua hooauheeia me ka poino he 3000 koa a oi ae, ma ka make a me ka hoehaia ke huiia me na Generala (kipi) elima i hoomakeia.

Ma ke kakahiaka o ka la Sabati, hoouna ae la o Gen. Early (kipi) i ka mahele koa pu kaupoohiwi o Gordon mai Bunker Hill mai, kahi hoi i hoomaha'i oia puali iloko o na la i kaahope ae, me ka hoouna aku e hele e kipaku ia Gen. Averill mailoko aku o Martinsbuga a e hoopoino aku hoi i ke alahaka ma ke alanui kaahao o Balatimoa a hiki i Ohio, ma ka a-ena o Opequan, a lakou i manao kuhinewa ai, ua kapili hou ia.  Noho iho la lakou ma Matinabuga (Martinsbuga) me ka hoopoino ole i ke alanui Kaamahu, a ma ia hope iho ho-aia e Gen. Averill a hiki i kahi i kapaia o Kukeville.  I ka lohe ana o Gen. Seredona i ko lakou ano o ka hele ana, o kona olelo koke ae la no ia i kona puali, e opiopi i na halelole, a e hoomakaukau no ka hele ana imua.

A no ia mea, ma ka hora 3 o ka auina la o ka la pule, pau na halelole i ka opiopi, a makaukau no hoi na puali a pau no ka hele ana imua ke kauoha ia.  I ka hora eiwa, loaa mai la ke kauoha mai a Gen. Seredena mai, e kauoha ana i ka puali helu eono, a me ka puali helu umikumamaiwa e hoomakaukau ia laua iho no ka hele ana ma ka hora 3, a o ka puali kaua hoi o Vereginia Komohana e hoomakaukau ia lakou iho no ke kaihele ana ma ka hora 5 o ke kakahiaka ana'e.  Mahope koke iho no o ka hora 5 ae aku la ka puali koa lio o Gen. Williams ma kela aoao o ka muliwai Opequan ma ke alanui kaa?  (Turnpike) o Berryville a me Winchester; hooholokiki oia i kona puali ma ia alanui me ka ho-a hele pu aku i na koa kiai waho o na enemi, hoouka aku la i na pakaua a na kipi, a hoopio aku la no hoi ia mea, ma ka maka o ka pahikaua, me ka hoopio aku i na koa kipi he 30.  Ma keia hoouka ana ua kuia i ka pu o Col. Brenton o ka papa koa lio @ helu 18 o Peneselevenia, ma kahi he mau kapuai wale no ke kaawale, mai na pakaua mai a ka enemi, oiai oia e alakai wiwo ole ana i kona mau koa imua.  Ua hanaia na pakaua e na kipi ma ke kula i mea e pale ai i ka papu ma Opequana; me ke keakea mai hoi i ke komo ana o na koa aupuni ma ia wahi.  Mahope iho o ka loaa ana o na koa lio, o ke alanui maikai no na puali koa hele wawae e ae ai, malaila, kai koke mai la ka puali kaua helu eono o ke aupuni ma kela kapa o ka Opequan, a me ka alanui kaa hoi ma na wahi nui e pili ana i Winchester a hiki i kahi he hookahi paha mile me ka hapa mai ka mano mai, a malaila hoi lakou i kukulu ai i na puali kaua ma ke ano kaua aku, a hoounaia aku la hoi he puali koa kiai waho.  A ma ia manawa no hoi, ki aku la na pukaa, a me na pu kuniahi i na papu o na koa kipi hele wawae i emi aku ai e pee, @ a hoomauia aku la no hoi ke kipu ana, me ke ki pu mai no hoi o na kipi.  He elua hora o ka lolohili wale ana, no ke kuhihewaia ana o ke kauoha, a ma ia mea i hiki ole ae ai ka puali kaua helu 19 a hiki i ka hala ana o ka wa kupono.  No ka lohe e ana mai o Gen. Seredena ma ka la Sabati, aia ka hapanui o ka Early mau koa, ma Bunker Hill, a ma kahi i kapaia o Stevensens Depot, nolaila, hooholo koke iho la oia e houluulu pu i kona mau koa ma ke alanui kaa o Winchester a me Berryville, a, ma ka hele eleu ana, hoouka ikaika mai mahope o ko Gen. Early puali.  Aohe no he kumu e kanalua aku ai i ka puiwa maoli ana @o na kipi, a ua hana maalea loa ia e Gen. Seredena, oiai oia e e hoouna ana i kona mau puali kaua ma na kulana ana i manao ai, aia hoi, o na puali kaua nui malalo o Torbett, a me Averill, kukuluia iho la lakou ma ke ano koa kiai waho e maoe loihi ana ma ka muliwai Opequan, a, ma ka hoolehulehu ana aku ma kahi i kapaia o Burns Ford, a nolaila, ua lilo kekahi mau koa lehulehu wale o ka enemi mailaila e kiai ai, ma kahi hoi i 12 mile ke kaawale, ma kahi mai i manaoia'i e kaua

I ka hiki ana mai no o ka puali kaua aupuni, helu 19, ua kukulu kokeia ma na laina kaua eha, he 300 i-a paha ke kaawale o kekahi laina mai kekahi laina aku, ma ka aoao akau o ka puali kaua aupuni helu eono, a i ka makaukau ana o na mea a pau, aia hoi, ua hoopukaia ke kauoha e hele imua ma ke awaawa ponoi.  Nana aku i ka nani o ka nee ana imua o keia mau puali aole i kanamai; me he mea la, e kai hele ana i ka paikau.  Aole paha i oi ae mamua o na i-a he 200 kahi i hala mai i ka laina koa mua o ke aupuni, aia hoi, halawai koke aku la lakou me ka enemi, a hoouka koke iho la ke kaua me ka pumehana nui, no ka mea, e ku koke mai ana no na kipi ma ka laina kaua ma kahi he 600 i-a wale no ke kaawale.  Ia manawa koke no hoi, ki kokeia aku la na pu kuniahi o ka aoao aupuni, me ke kiola puahi aku i na poka poha iloko o ka ululaau e hoopuni mai ana, kahi e ikeia aku ana ka hele ana mai o na koa kokua o na kipi.  Nee kuemi ole aku la kela laina keia laina o ka aoao aupuni, a hiki i kahi he 200 i-a ke kaawale mai ua laina kipi mai, aia hoi, kiia mai la he pukuniahi ame na pu poko paha, he pu i hunaia e na kipi, a ia wa, ua komo mai la na poka maoli ame na poka poha iloko o ka puali kaua aupuni, me ka anai hoomake nui mai i na koa aupuni.  No ka nui launa ole mai o ka make, nolaila, ua hooemi hopeia ka laina koa mua o ka puali kaua aupuni, a i kona hiki ana mai mahope iho o ka laina alua, aia hoi, ua ano hookunana ikiia ia mau puali; a no ia mea, ua kaa loa ia mau puali mahope o ka laina ekolu, ka laina hoi i kauohaia e moe ilalo, i pakele ai i ka make nui a na pu kipi e hookau mai ana iluna o na laina kaua aupuni.  Ia manawa, laweia mai la na pukuniahi aupuni, a kukulu ma kahi e hiki ai ke hoopio aku i na pu kipi nana e hoomake ana i na koa aupuni, a ma ia wa, kukulu houia na laina kaua i pioloke ai, a ane haunaele ai, a hele hou aku la ia mau laina mua, a ku hou ma kahi i lilo mua ai ia lakou, a kiia mai ai e na kipi; aka, aole nae i loaa hou mai ua wahi la, me ka haawi oluolu mai o na kipi, aka, ua hoopaa no lakou, a, no ka nui ikaika a hoopaa no hoi o ka akau, nolaila, ua lilo hou mai ua wahi nei i na koa aupuni.  Aka, eia nae hoi ka mea i hoopaa loa ai o na koa aupuni, ua holo ae o Gen. Seredena imua o na laina kaua ona a pau, a ua huro aku kona mau koa, me ka hoike aku i ke aloha nona, a no ia mea, ua paa ko lakou manao e hele imua a lanakila, a i ole ia e make no.

I ka hoi hou ana mai o kahi i pio mua ai i na koa aupuni, a, a lakou hoi i haalele ai no ka pumehana o na poka poha a na kipi, aia hoi, kauohaia aela na laina kaua aupuni a pau e moe ilalo, a e kali no ka hiki mai o ka puali kaua malalo o Gen. Crooks, no ka mea, ua waihoia ia puali i puali ku i ka wa, ma kela aoao o ka muliwai Opeguan.  Ua kauohaia lakou e hele mai a e kukulu ia lakou iho ma ke ano laina kaua, me ke kihi akau loa o ka puali kaua aupuni, i hiki ai ia lakou ke kue aku i na mea a na kipi i manao ai e hana'ku mai ko lakou kihi hema mai, no ka mea, ua ikea'ku na kipi e hooulu mai ana i na koa ma ia wahi, me ka manao e hoohuli mai i ke kihi akau o na koa aupuni.  I ka hora 3 ponoi, hiki mai la ko Gen. Crooks puali, a kukulu iho la i kona puali ma ka aoao akau o ka puali kaua helu 19, o ka mahele mua o kona puali, ua kukuluia ma ka akau loa, a o ka lua o kana mahele, mahope iho e kokua ana i kekahi mahele o ka puali kaua helu 19.  I ka pau ana o ka Gen. Crooks kukulu ana i kona mau mahele koa, alaila, holo aku la imua o kona mau laina koa a pau, a huro nui mai la na koa a pau e hoike mai ana i ko lakou aloha uo ko lakou Generala, me ka olelo mai hoi, e hele ane no lakou imua a hiki i ke pio ana o Winchester.  No ka a-e ana o ka mahele koa lio aupuni malalo o Gen. Torbett, Averill, ame Moritg ma kela kapa o ka muliwai Opequan i ka hora 9, ma ka manowai o Burus ame Kuox, ua nui no ko lakou hakaka ana me na puali koa hele wawae ame na koa lio o ka enemi, me ka halawai no hoi me ka pomaikai, a ua ho-aheleia na kipi imua o lakou, hiki mai la lakou ma ke kihi akau loa o ka puali kaua aupuni, a na komo pu hoi lakou iloko o ka lanakila nui o ka aoao aupuni.  Ia manawa, holo aku ia o Gen. Seredena ma kahi o Gen. Torbett i kukuluia'i, a mahope iho o ke kamailio iki ana me ia no ke ano o ka hoonohonoho ana i na koa lio, alaila, hoouka aela o Gen. Seredena i ke kauoha i na laina kaua a pau e hoouka i ka hoouka hope, a, no ka hikiwawe loa, ame ka paa maoli o ka manao o na koa e lanakila, nolaila, ua hiki ole i kekahi mea ke ku mai e alai i ka hele mua ana'ku o na puali koa aupuni.  Nee aku la ka laina kaua o ka aoao aupuni, e moe ana he ekolu mile ka loa mawaena o na huro nui wale, i lohe maopopoia maluna ka halulu wawalo o ka leo o na pukuniahi ame na pu kaupoohiwi.  Oiai e nee aku ana ka laina koa aupuni i kahi a na kipi i ku mai ai, aia hoi, pii loa aela ka weliweli o ke kaua ana.  Aole o kanamai ka make ia wa.  I kela ki ana keia ki ana o na pu, ua ikeia'ku ka haulehia ana iho o na koa e make, a o ke kaawale o na aoao kaua na koa kipi me na koa akau, he 200 i-a wale no.  Iloko o keia wa pilikia nui, aia hoi, loheia aela ka leo o ka O-le a na koa lio, a oia ka leo ku-o ana ka puali koa hele wawae o ke aupuni, me ka hoouka aku hoi i ka hoouka nui ai ka Akau.  No ka nahili o ka hele ana mai a ka puali kaua helu 19, nolaila, hiki ai ia Gen. Earley, ke hoouna i ka mahele koa Forden mai Bunker Hill aku he 10 paha mile ke kaawale, a hiki mai no hoi i ka wa kupono no ke kukulu ana i kaua hui me na puali o Breckenbridge, o Raeneo, a me Rhodes, ka poe i hiki mua mai, a i makaukau hoi no ke kaua, mawaho ponoi iho o ka ululaau e hoopuni ana ia Berryville me me Winchester.

no ka make o ka puali kaua kipi o Early, no ka mea, o ua leo la i loheia, he leo ia no ka O-le, e kauoha ana i na puali koa lio e hoouka.  Ua ikeia aku o Gen. Custar ame Gen. Merritt me na hae iloko o ko laua mau lima, e alakai ana i ka hoouka, ame na'lii e ae no hoi, a ma ko lakou ikaika ame ka ikaika o na koa hele wawae, i loaa ai ia lanakila nui.  Ua hoauheeia ka puali o Early, i ka hooukaia ana mai e na puali kaua lio, a na ia poe i okioki mai na koa kipi me he mauu la, a hoopioia he 720 koa ame na kaukaualii 9 hae kaua, 2 pu.  Holo aku la na koa kipi me ka maka'u nui, ke hele la a piha ke kahua kaua i na pu ame na mea kaua a lakou i kiola ai.  He lanakila nui keia o ka akau, a he poino nui hoi no ka Hema; he 50,000 ma kela aoao ame keia aoao.

 

KE KEAKA A FAYLOR.  Ma ke ku ana mai nei o ka moku Emily Banning mai Kapalakiko mai, ua kau mai ma ona la kekahi poe haole Hana Keaka akamai loa, ka poi i kapaia o na poe hana Keaka a Faylor, e holo loa ana i Kina, a no ke kipa ana mai o ka moku ia nei, nolaila, ua hana Keaka lakou maanei ma ka po Poaha ame ke ahiahi nei, a e hana ana i keia po a pau, alaila, holo ka moku; o lakou ka poe hana Keaka maikai loa i kipa mai nei ia nei iloko o keia mau makahiki ewalu i kaahope ae.  O ka poe i mahele i ka olelo Enelani, a i hiki hoi ke ike i ka lealea o ke Keaka haole, e pono ia lakou ke hele ae e makaikai i keia poe, i ikemaka'i lakou i na iini lea o ka hana keaka haole.  E hele ae, o ka po hookahi no keia e hiki ai ia oukou ke ike.

 

KA LA HANAU.  Ua pae ia mai makou e ka lono, e malamaia ana ka la hanau o ke Kama Aliiwahine o Hawaii, e ka Ahahui i kapaia ma kona inoa Alii.  E kukuluia ana he ahaaina, ma ka la mua o Novemaba ae nei, a ma ka po iho he hula ma ke ano Europa, kupono io no ka ! ka malama ana i ka la i eha ai ka puhaka o ke kaikamahine a Kamehameha, ka la hoi i hoopomaikaiia'i o Hawaii nei i ke Kama Aliiwahine.

 

            Ua weheia ka Hale Ahaolelo o Ka Moi, ma ka hora 12 o keia la.  A ua hele ae Oia me kona mau koa a pau me ka hanohano nui.