Ka Nupepa Kuokoa, Volume IV, Number 12, 23 March 1865 — Page 1
KA
NUPEPA KUOKOA
Ke Kilohana Pookela no ka Lahui Hawaii.
BUKE IV. HELU 12. HONOLULU, MAKAKI 23, 1865. NA HELU A PAU 173.
" KA NUPEPA KUOKOA.,"
HOOPUKA MAU IA MA HONOLULU
I kela Poaha keia Poaha.
$2.00 no na mahina he UMIKUMAMALUA,
$1.00 no na mahina eono, ME KA HOOKAA MUA MAI.
NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani, $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O KA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA — ma ke kihi hema o ka Hale Hookipa Luina (Sailor's Home.) O na hora hana, mai ka eiwa o kakahiaka, a i ka ha o ke ahiahi.
L. H. KULIKA, (Lona Hooponopono.)
KA " NUPEPA KUOKOA."
Is published in Honolulu
EVERY THURSDAY,
$2 00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must he paid for in advance. KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives will be inserted on the subscription list until paid for. This rule must be strictly adhered to, on account of the low subscription price. THE OFFICE OF THE KUOKOA is in the South corner of the Sailors' Home. Office hours from 9 A. M. to 4 P. M.
L H. GULICK.
Publisher.
Volume I. II. and III of the KUOKOA, bound, for sale, $3.50 each.
Persons having complete sets of the above, can have them bound by paying $1.50 each.
A. F. JUDD,
ALAPAKI, (oia ke keiki a Kauka.)
LOIO !
Ma ke kihi o ke Alanui Papu, a me Kalepa Honolulu, Oahu, Iune 30, 1864. 151-8m.
A. W. B. NAHAKUALII,
He Loio ! A he Kokua !
AIA KONA KEENA OIHANA LOIO MA ka hale waiho Ipukukui Mahu, ma ke Alanui Maunakea, makai iho o Liberty Hall, (Lepekaholo.) Ua makaukau oia e kokua ia oukou ma na mea a pau a oukou e makemake ai e hoopii iloko o na Aha Hookolokolo a pau o keia Aupuni, ma na mea hiki ia ia ke kokua ia oukou, a ua makaukau oia e kakau i ko oukou mau Palapala, oia na Palapala Kuai, Palapala Hoolimalima, Palapala Moraki, Palapala Aelike, Palapala Hoolilo, Palapala Hoopaa, a me na palapala o kela ano keia ano, e hana no oia i na mea a pau e like me ko oukou makemake. A ke kahea aku nei oia ia oukou a pau, e ninau mua mai oukou i ona la, a mahope i na Loio e ae. E ninau no ia ia, no ka uku oluolu. Honolulu, Iulai 23, 1864. 162-6m
S. KUPANEA.
J. W. KEAWEHUNAHALA.
Loio ! Loio !
KE HOOLAHAIA'KU NEI I NA KANAka a pau o keia Aupuni, ua makaukau na mea nona na inoa maluna e Kokua, a e lilo hoi i LOIO no na mea a pau e loohia ia'na i ka hihia, a e pale ana no kekahi hihia imua o na Aha Hookolokolo o keia Aupuni. He mau mea laua i aoia i ka OIHANA HOONAAUAO ma ke Kulanui o LAHAINALUNA, a ua aoia hoi ma ka OIHANA Kanawai, a me ke kakau ana i na Palapala o kela ano keia ano, e ka Mea Hanohano G. M. ROBERTSON (LOPIKANA.) A o ko laua Hale Oihana, aia mauka iho o ka huina o ke Alanui Hotele a me Maunakea ma Honolulu, Oahu.
Honolulu. Feb. 6, 1865. 167-y
Na Buke i Pai ia e ka Papa Hawaii.
Eia na huke kuai, a me ke kumukuai, Baibala nui no na Awai o na Halepule, $4 00
" Ohana, ano nui, me na kii, } { 2 50
a me na Moohana, } 5 00
" Ohana uuku iho, me na Moohana, ili ulaula, } 1 00
" Ohana, me na Moohana wale no, 62 1/2
" Okoa, - - - 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 1/2
Kauoha Hou, hapa haole (Haw. Eng.) 25
Hoikehonua, Hoikemanawa, ame Kuhikuhi no ka Moolelo, } 25
Haiao, - - - - - 25
Hele Malihini Ana, - - - - 25
Wehewehehala, - - - - - 25
Lira Hawaii, - - - - - 25
Na Olelo Hoopomaikai, - - - 25
No ko ke Akua Ano, - - - - - 25
Lira Kamalii, - - - - - 25
Kumumua Hou, - - - - - 12 1/2
Moolelo Ekalekia, - - - - - 50
Hoike Palapala Hemolele, - - - - -25
Himeni Hawaii me na Leo Mele, 1834, 25
Ninauhoike, - - - - - 12 1/2
Eia na buke i haawi waleia.
Haawina Baibala.
Ui.
Olelo Ao i na Wahine Hawaii.
Ko Dawida Malo Kumumanao.
L. H. Kulika.
Kakauolelo o ka Papa Hooko o ka Ahahui Euanelio o Hawaii.
Ka Anesona moolelo
No Hawaii nei.
HELU 9.
KO BONA APANA.
O Kohala Akau ko Bona Apana, a o Kohala Hema, a me Hamakua ko Laiana. Ua hoomakaia ko Bona Apana e Balisa (Bliss) i ka M. H. 1838, maluna o ke kiekiena o kekahi o na puu, kahi i noho ai ke'lii, a kahi no hoi ana i kukulu ai kekahi halehalawai pili nui. Ka makani kamaaina, e pa pukiki ana ia mau puu, ka mea i hiolo ai ua halehalawai la, a ua nee aku ka misionari ilalo i kahi e pili ana i ke kai. Maanei no o Bele (Bailey) i kahi manawa. Iloko o ka M. H. 1841 hiki mai o Bona, a oia ka mea nana i kukulu ka Halepule e ku nei i keia wa. Ua kukuluia me ka pohaku a he bele no, me ka hale bele koluna. Ua oi aku mamua o elua tausani mau hoahanau i manaoia ua hoohanau hou ia, a i komo mai iloko o ka ekalesia o Kohala Akau, a o ka nui o kona mau hoahanau i keia wa, ua aneane he tausani, a oia ka hapakolu o kona mau kanaka. Ua hoomakaia kekahi kula hanai, no ke ao ana i na kumu iloko o ka M. H. 1842, a ua malamaia me ka hilinai ole i na dala kula Aupuni. Ua hoouna ia aku he hookahi haneri me kanalima haumana, a he nui o keia poe he mau kumu kula lakou. Ua ao wale ia no lakou ma ka lakou olelo ponoi.
KO LAIANA APANA.
Ke kumu o ka hele mua ana o na misionari i Waimea o Hawaii, no ka hooluolu kino, no ka mea, o kona kulana, he ekolu a eha tausani kapuai kona kiekie maluna ae o ke kai. Na misionari i noho malaila o Rugela, Balauina, Napa, a me Laiana. Ua hilinai nui no nae ka moolelo o ka Ekalesia o ia apana ma ka Laiana hooikaika ana, a ka mea hoi i hana i keia mau makahiki he kanakolu, me ka ikaika Aposetole. Ua like o Laiana me Koana, he mea lawelawehana wiwo ole. Ua hookomo mai oia he 2600 hoahanau iloko o ka ekalesia, i ka makahiki mua (1838) o ke ala nui ana mai o na kanaka e apo mai i ka euanelio, a oia poe ua manaoia he mau hoahanau i hoohanau houia, a i kekahi makahiki ae, ua aneane e like ka nui o ka poe i huli mai.
KA NUI O NA HOAHANAU O KONA APANA.
Ka nui o na kanaka i huli mai o kona apana he 7267; a he 3760 i make, a he 1752 e ku mau nei ma ka ekalesia. Ka nui o na kanaka iloko o kona apana i ka M. H. 1860 he 3448; ua oi aku mamua o ka hapalua o ko laila mau kanaka, he poe hoahanau wale no, a o ka hapanui o ia poe, he poe i kanaka makua. He oiaio, o na mea a pau loa i hanaia malaila, he oi loa ; a ua manao au a me kekahi mau hoahanau o'u e noho ole ana ma ia apana, ua nui no ka hookomo wale ia ana mai iloko o ka ekalesia. Hai ia mai au e kekahi mea, aohe ma ia apana kona wahi i noho ai, ua laulaha nui ka inurama mawaena o na hoahanau o Hamakua.
Hai ponoi aku au ia Laiana, i kau mau mea i lohe ai, no ia mea. Eia nae na hoike e pane aku ai no ia mea. No ko Laiana oluolu loa maoli no, a me kona ano haipule, ua manaoia ua hana aku ia me ka lokomaikai loa. He eleu loa ia, ua manao ole ia ia iho, a ua maa mau no hoi ia i ke kaapuni mau ana i kona apana nui, me ka manao ole i ke ino o na mauna, na awawa, a me ka ua. Malalo mau no ia e hele ai, a hiki i ka wa i akakuu mai ai kona ola. [Ke mau nei no nae kona hele wawae ana.] Ua hele mau meia kekahi diakona, a me kekahi mau kanaka, i mea nana e lawe na wahi kapa moe, kapa aahu, a me na mea kuke. Ma keia mau kaapuni ana, ua nui kana haiolelo ana, a ua kamailio pu no hoi me na mea he nui wale ; a ua manaoio ia, ua maopopo loa ia ia ke ano o kona apana, a me kona kanaka. Ua hai mai oia i ke kulana o kona ekalesia, ua maikai ia e like me ka mea i manao ia aku he hiki ke hana ia, a o kona manao mau no hoi ia ke hoi mai ia mai kona mau kaapuni ana i kona apana. Ua olelo mai no hoi ia, e nana aku kakou i kona poe hoahanau, ma ko lakou mau hua.
Iloko o na makahiki eono, he iwakalua tausani dala i hoolilo ia no ke kukulu ana i na hale pule he umikumamakolu, a ua lako no hoi ia mau halepule i na bele; Ua ao ia na kula Aupuni iloko o eono o keia mau halepule; no ka mea, ua kokua mai ke Aupuni elua haneri dala pakahi no ia mau halepule; a he mau manawalea mai hoi kahi mai na ekalesia o kekahi mau mokupuni, a hiki aku i ka elima haneri dala. No kela, no keia, oia mau hale hoomana, ua hookumu ia ae he ekalesia, aole nae i noho kekahi kanaka maoli i kahunapule. Elua kahu, a mau hope kahu hoi i loaa na palapala, a hoonoho ia ma kekahi mau luakini, a ua manao o Laiana ua hiki mai ka manawa e kukulu ai i oihana Kahunapule maoli. Ua loaa i ka hapa nui o ko laila mau ohana ke Kauohahou, a he nui no hoi o lakou i loaa ka Baibala holookoa, a ua hiki no ia lakou ke heluhelu. Ua oi aku mamua o ka haneri nupepa " Kuokoa," i laweia ma keia apana.
Ka halepule ma Waimea, o loko a me waho, ua kupono no me na halepule o kekahi kulanakauhale uuku o kakou nei o kuaaina. I ka wa kahiko, a i ka wa hoi a na kanaka e hele mai ai mai kela pea keia pea mai, malaila e halawai ai, o ka pa pohaku e hoopuni nei mawaho o ka halepule oia na kihi, a me na aoao o kekahi halepule pili nui mamua. Ke anaina i halawai mai iloko o keia halepule, ua like no kona Kristiano ma na ano a pau, me na anaina e ae o keia mau mokupuni. Aole i oi aku ka emi ana o ka ekalesia i houluulu mai mamua o ka emi ana o na kanaka o ia apana, aohe no hoi mau hoailona o ka haalele, aohe he pukoko ino, a ua maikai no kona kulana i keia wa, e like me na makahiki he iwakalua i hala aku.
He oiaio no paha he nui ka opala iloko o ka huita maoli, aka e nui wale no paha na hoku e loaa i ko kakou hoahanau, no kona lei alii o ka olioli.
NO KAWAIHAE A ME KA HEIAU NUI.
I ka Poaha, iho aku makou i kai o Kawaihae me Laiana. Ua moe aku ka iho'na mawaena o kekahi awawa laula nui, o Maunakea mahope, o na Mauna o Kohala ma kahi aoao, a o Mauna Loa makahi, o Hualalai, a me ka moana ma ke alo ponoi mai. I ko makou hiki ana aku i kai, pii aku la makou i ka heiau nui o Kamehameha, i kukuluia mamua iho o kona kaua ana ia Oahu. Oia kekahi o na heiau nui loa, a oia paha ka heiau hope loa o ke kukulu ia ana, o na luakini hoomana kii. Ua hoolaa ia keia heiau ia Kaili kona akua kaua. O kona loa ua oi aku mamua o elua haneri kapuai, a o kona laula he hookahi haneri kapuai. O ua heiau nei he puu pohaku eleele, helelei, pele nui. He ike pono ia aku ke kai ma ke kiekiena o ua heiau nei. Maluna olaila ua kukulu ia o Kaili, i hoopuni ia i kekahi mau akua haahaa iho. Ua hoike ia mai makou i kahi e mohai ia ai na kanaka. Aole e kala kahiko na kii i pau ai i ka nalowale; aole no hoi na kanaka i hele pu mai me makou, i makau i kahi eehia i ka wa kahiko. Ua kahea ia aku na kanaka a pau i ka wa i kukulu ia ai keia heiau.
HE WAHI MOOLELO NO TIMOTEO.
Ua hanau o Timoteo ke diakona, o ka mea hoi nana ka haiolelo ma Waimea, ma Hamakua, i kona mau makua i hele mai ai mai Hilo mai e malama i ke kalahea no ke kukulu ana i ua heiau nei, a mai make ia, aole i ike kona makuakane i ka mea e hana ai nona, aka no ke aloha o ke kaikunane o kona makuahine, ka mea nana i hanai i ke keiki, a lawe aku ia ia i Hilo.
Ma Kawaihae ua hookipa oluolu ia makou e Mi Alena, ke keiki a ka Lunakanawai Kiekie. Lawe mai ka mokuahi ia Bona, e holo ana ia i Oahu, i ke kula nui o Kapunahou, malaila kahi i waiho ai kana keiki i ka mai, a e pohala ae ana ; a me Hikikoki wahine kekahi o na wahine kane make misionari, oia hoi ke hele pu ana me Laiana ke hoi aku ia i Waimea.
KA MOOLELO O KEPAKAILIULA !
MOKUNA XXII.
KE KU ANA O KAIKIPAANANEA I KA IHE A
KEPAKAILIULA, A ME KONA MAKE ANA.
A PAU AE LA NA IHE HE UMIkumamalua a Kaikipaananea i ka alo ia eia nei, o ka pau ae la noia o kana make i manaoia'i. Ia manawa, ike mai la ua Kaikipaananea la aole i make kona hoa-paio, e ku malie aku ana no, alaila, ikeia'ku la oia, ua mae koke iho la kona ikaika a me kona akamai, ia manawa, pii mai la kona keokeo e like me ka hau o na mauna ke hiki i kona manawa. Alaila, hea mai la o Kaikipaananea ia Kepakailiula, me ka olelo mai, " E! e Kepakailiula, o kau koe hou ia a pololei i kuupiko," ia manawa, holoholo keia imua ihope, me ke akahele loa i ka ianei holoholo ana, i ka lima o ia holoholo ana pahu keia, ia pahu ana a ua keiki puukani la, he alo wale no ka ia la hana, pela'ku a pau na ihe he umi a Kepakailiula, aohe ku iki o Kaikipaananea, a i na ihe hope elua ku ai, o ka mea nae i ku ai ia mau ihe elua, i hana no ia e like me kona ano akamai, a me ka noonoo lua ole, oia hoi, i hoolei ia kekahi ihe ilalo i ka lepo, e like me ke ka ana o ka pua a kamalii. Pela ka ia nei hana i ka ihe.
A o ka lua hoi o ka ihe, i pahu ponoia maluna o ke poo. Ia hana ana pela, ike mai la ua Kaikipaananea nei i kekahi ihe i ka lele aku, i alo oe ka hana, aole e hiki, ia hiki ole ana ke alo ae, ia manawa koke no ua ku like ia mau ihe a elua i ka manawa hookahi, a haule iho la o Kaikipaananea i ka honua, me ka oni i-o a i-anei, me ka hopu iho o kekahi lima ona i ka ihe e huki ae, mailoko ae o kona kino, aka, aohe nae e hemo. Ia wa koke no, holo kiki aku la o Kiihele, a me Makaoku, a oki ae la i ke poo o Kaikipaananea, a ike kona poe alii ua make ko lakou Alii nui, hee aku la lakou, a me na Makaainana, a ia wa, luku ia'ku la na 'Lii e Kiihele, me Makaoku, a me Kiinoho, a me na'Lii a pau. A ua luku ia na Makaainana he nui o Maui ma ia kaua ana, a ua hee aku na kanaka, a me na wahine ma ka mauna me na keiki liilii e uwe alala ana i ka nahele, a me na keiki ai-waiu, a ua alualu aku na Makaainana o Hawaii, a ua loaa'ku maloko o na a-na, a maloko o ka nahelehele, a ua luku nui ia lakou, a o na keiki hoi, ua pakiia a make.
A ua kapaia ke kaua a Kepakailiula, " HE PAHI," oia kona inoa, no ka pahiia o na keiki liilii, no ka mea, ua pio ko Maui a pau a me na'Lii pu. Ai a humuhumu no hoi o Hawaii ia Maui. He keu no hoi ka naaupo o ko Hawaii nei kaua ana i ka wa kahiko ; ka luku wale aku no i na Makaainana, mai ia manawa mai ka lukuia o na Makaainana ke hiki i ka wa e kaua ai, a hiki mai i ka wa o Kaleiopuu ko Hawaii Alii, a hiki mai ia Kamehameha I., maluhia ka aina. Kau ia ke Kanawai eia Alii, he " Mamalahoa," pela mai a hiki i ke au ia Kamehameha II., AI-NOA ia Alii, hiolo na kapu o Hawaii nei a lilo i mea ole, oia hoi ka hala i make ai o Kekuokalani ma Kuamoo i Kona.
A pau ke kaua ana, aka, ua olelo nui ia, elua aina i luku hoomainoinoia e ka Hawaii, o Wailuku a me Hana i Maui. Oia na aina a Kiihele ma i anai loa'i, a ma ia hope iho, lilo ae la ke Aupuni o Maui ia Kepakailiula, a hoomaha iho la ke kaua ana. Aohe alii hou mahope iho ona i kipi aku ia ia, no ka mea, ua mahalo nui loa ia kana hana ana, no ka make ana o Kaikipaananea, ke alii opu kekeue i na'Lii oia manawa.
Eia nae, mahope o ka make ana o Kaikipaananea, ua kii no o Kepakailiula ia Makolea, a ua hoi mai laua a noho pu, oia hoi ka mea nana e hoomalo na kaula maawe makalii o ko ke Alii puuwai palupalu la o Haehae. No ka mea hoi, i ka la i kaua'i, ua hoikeia ko Makolea hoailona he lepa, a o ka makuakane o Keolonahihi, a me ka makuahine me Kahaluu, ua pepehiia laua e Makaoku, a ua okiia ko laua mau poo, a ua lawe ia'ku imua o Kuikuipahu, ia manawa, ike iho la keia i ke poo o ke kaikuaana, a me ka wahine a laua, alaila, i-ho la keia " A ! ike au i ou mau iwi la," e like me ka mea i olelo mua ia ma kela mau Mokuna, no ko laua hoopaapaa ana, a ua ko ka Kuikuipahu olelo.
A pau ke kaua ana, noho iho la o Kepakailiula ma Lahaina hookahi makahiki me Makolea, a me na'Lii a pau, a o kona Aupuni hoi o Hawaii, ua waiho aku oia i ka mana alii maluna o kona makuakane ponoi (Makaoku,) a o Kiihele hoi, he Pukaua nui ia, o Kawau ke Kahuna, a o Peapeaikaalona ke Kuhikuhipuuone. Ia ia i noho ai i Maui nei, a ua hu ae la kona manao e hele, alaila, olelo aku la oia i kana aikane (Keamohulihia) penei : " Ua imi mai no oe i ka pono, a ua pono a me ka pomaikai, noho ia ko Aupuni, ai ia ka momona o ka aina, malama pono, hoolohe i ka leo o na kanaka, hana'ku me ka lokomaikai, a me ka oluolu, alaila aloha mai lakou ia oe, a lilo oe i inoa kiekie loa maluna o ko kaua mau kanaka, pela kuu kauoha ia oe." Alaila ae mai la ke aikane, aole nae i ike ke aikane i ke kumu o keia kauoha ana a ke Alii, a he mea nui ia i kona noonoo ana, eia ka e hele ana oia i kana wahi i manao ai e hele, me he ano mahuka la ka hele ana a keia'Lii.
Ma keia olelo ana a ke Alii, noonoo nui iho la o Keamohulihia kana aikane aloha, i ke kumu nui o ka ke Alii olelo ana i keia olelo imua ona. A ma kekahi la mai, oia hoi ka malama o Kaelo, ua lohe mua ia ka ohumu ana o ke Alii, a me kona ku ana i ka pule imua o kona Akua. Aole nae i kakau mua ia keia pule maloko o keia Moolelo, aohe hoi he kanaka oia wa i hai mai i ka pule ana a ke Alii, e paa'i la hoi ma keia Moolelo ua pule la. I ka pau ana'e o ka pule ana a ke Alii, a ia po iho, ohumuhumu hou laua me kana wahine, no kona holo i Tahiti, ia manawa, e noho ana kekahi wahine hoolohe ohumu mawaho, e pili ana ma kekala o ka Halealii, o keia wahine, oia no ka wahine a Keamohulihia, a lohe oia i ka ohumu, kukulu iho la oia i hoialona e like me ke ano mau o ka wa kahiko ke lohe i kana mea e lohe ai.
A hai aku la oia imua o kana kane i keia olelo ohumu a na'Lii i kona wa i hoi aku ai. A ia lohe ana o Keamohulihia, nolaila, ma ia'o ana'e, kauoha ia ka olelo e kukala'ku ma na kuaaina a pau o Maui, he Kanawai ikaika penei : " E wawahiia na waa a pau loa, aole e hookoe kekahi waa, ina i minamina kekahi kanaka i kona waa, alaila, e pepehiia oia, a o kona hale e puhiia i ke ahi," nolaila, makau loa na kanaka, a ua hookoia keia olelo a ke alii kipi. Nolaila, ua hoa-a loa ke Alii i ka waa ole nona e hiki ai i Oahu, a pela'ku a hala loa i Tahiti, aka, i kona hele ana a loaa he wahi apana waa ianei o Kaanapali, maloko o ke kauwahi puoa hale.
(Aole i pau.)
Ka Hoomana Kahiko.
HELU 11.
HEAHA NA AUMAKUA MA KA MANAO O KA POE KAHIKO ?
Ua ninau aku au i ka poe kahiko no keia huaolelo, " Aumakua" aole loaa, pela kuu ninau ana ma Kauai, pela no ma Maui nei, oia ka'u i noonoo nui ai i keia mau makahiki i hala, a hiki i keia la, a eia ka mea a ko'u poo iho i noonoo nui ai.
Elua ano iloko o keia mau huaolelo Aumakua, o Au,— Makua, o Au, he huaolelo lehulehu, e like me keia ; " Aumoku kaua o Amerika Huipuia," aole ia hookahi moku, he nui, ina penei ka pane ana, "moku," hookahi no ia. Pela no ka huaolelo auwaa, aole hookahi waa ia ; he lehulehu na waa. Pela no ka huaolelo Aukanaka, oia kahi e noho nui ia ana e kanaka, pela ka huaolelo Aumakua, ua manao ko makou poe kupuna, oia kahi kanaka ole, mehameha loa, koho makou ia wahi, he wahi no ke akua ia, he auakua ia wahi. Pela no ke ano mua o keia mau hua Au,— oia hoi ua nui na'kua a ko makou poe kupuna i hoomana'i.
Eia ka lua : Ua manaoia no o na kupuna Alii, na kupuna o na Makaainana i make, a me na mea a lakou i hoomana'i, ua kapaia no he makua, o ko lakou mau akua no ia e hoomana'i, ka huipu ana o keia mau hua, o Au me Makua, o Aumakua no ia, oia hoi, ua lehulehu na mea a lakou i hoomana'i i ko lakou mau kupuna iho.
Eia ko lakou wahi e noho ai ; aia ma na pali, aia iloko o ke kai, aia i ka Luapele i Kilauea, aia ma ka lewa, he makani, he unihipili. O ka waiho ana no ma na pali, oia na'kua piipali o kekahi poe, me ka hoomana'ku ; o ka hoolei ana i ke kino iloko o ke kai, ua kuhi no lakou ua kino-wailua aku la, a ku-a mano, a puhi paha, o ka hoomana'ku la no ia, pela no ka mea hoolei ia iloko o ka wai ke kino, ua manao no lakou ua lilo i moo, o ka hoomana'ku la no ia. Pela no ke kiola ia na kino make, a me na iwi i ka luapele i Kilauea, manao no lakou ua lilo i ahi, a i Pele, a hoomana'ku ; aia ilalo i o Milu la, ua hoomana'ku, aia hoi ma ka lewa, oia na akua i oleloia ua huna i ka pouli o ka lani, a hoomana kekahi poe, eia hoi, he akua makani, a noho mai la iluna e kihe ana paha, e puha ana paha ke kanaka ola, oia ka mea i kapaia kona Ipu, a o kona Kahu paha, me kahi leo winiwini uuku loa, o ke akua unihipili : oia na keiki make, a moopuna paha, a penei ka hana ana, e ai mua i ka pua o ka hala, i kakahiaka ai, ke ahiahi ai, ka ai ana o na makua i ka ai, a kupuna paha, alaila kahea'ku la, " E Holokahiki e, e hoi, e ai, eia ka ai, a me ka ia," pela e kahea mau ai, a mahope ua hoi mai no, a keehi iluna o kona Kahu. A, ua kapaia keia mau mea a pau he Aumakua.
No ka laka loa o na Aumakua :— Ua oleloia, he mea laka loa ka mano, e hiki no ia lakou ke hamohamo i kona poo, a me kona waha, a hoohainu aku i kona waha i ka wai o ka awa, a holo aku ia. Pela no ka manu, ua oleloia he laka, ua ku ka Alaeaha ma ka lima o kona Ipu, pela ka Pueo, ua kii mai no a hoopakele i kona Kahu, ina ua paa na lima i ke kaula, a me na wawae, ua hiki ia ia ke kala, pela na Aumakua a pau loa, he laka a he kokua no.
Na mana o na Aumakua :— Eia na mana, ina e holo ke kanaka i ka moana a poho ka waa, aole lana hou ka waa, alaila kahea no i ka mano, " E Kuhaimoana — e, e lawe oe ia'u a hiki i ka aina," alaila, ua hoike koke mai la ka mano, pii aku nei ke Kahu maluna o kona kino, paa ana kona mau lala a paa, nana aku ka oe, aole he holo a koe aku, kuu pau ka ka puka puhi o ka mano me he moku mahu la. Pela ke akua o ka poe lua, oia o Kuialua, i na hele aku lakou ma kahi mehameha, aole makau i ka powa, a nana no e hoike mai ia lakou i ka powa, a e make ana no ka mea kue mai. Pela no ka Pueo, ina ua pepehiia ke Kahu o ka Pueo a make loa, ua kanu ia i ka lepo, na ka Pueo no e kii, a kahili i ka lepo me kona mau eheu, a loaa he kino, a haawi i ke ola, a ola hou kona Kahu. Pela ke akua unihipili, ina i kalohe ia mai au, a ohumu kekahi poe ia'u e pepehi, ua haiia mai no ia'u ; ina e hookolokolo ia ana'u, no kuu aihue paha, moekolohe paha, ua hai ia mai ia'u e pakele ana no oe, pela no ke mai, ua hai ia mai ka laau e lapaau ai e ola'i ka mai. Pela hoi ka manu Alaeaha, ina i huhu iho nei au ia oe, hoounauna aku nei au ia oe, e kii e hookau i ka mai, a i ka make hikiwawe. Pela ke akua o ka poe hoounauna, e kii ia mea, e ai ma ka puu, a ma ka lemu, i ole e puka mai ka lepo, ua paniia ka puka. Pela no ko Kalaipahoa ano, he akua mana wahi a ka poe kahiko, hoolei iho i kahi mea make iloko o ka umeke-ai, o ka make no ia ; iloko o ka ai, uala, kalo, me ka ike ole ia, eia iloko o ka maiao, a i ka pana ana iho iloko o ka hue-wai, o ka pehu ka mai, ka nae, a pela'ku.
Na mohai e oluolu ai na Aumakua : Eia na mohai, i na he moo, a ua inaina i kona Kahu, a i kana hanauna paha, a ke