Ka Nupepa Kuokoa, Volume IV, Number 12, 23 March 1865 — Page 2
Ka Nupepa Kuokoa.
mai nei, a nawaliwali loa paha, penei ka mohai ana, he ilio moo ka ilio, huipu me ka awa, a me ka ia ula, he kumu, he ko ula, he kohekohe, a o ke kapa olena ka wah-i ; alaila lawe aku iloko o ka lua o ka moo, hana a paa, alaila oluolu mai ka Aumakua moo, a hoola mai i ka mai. Pela no ke akua mano, he puaa-hiwa, he moa ulahiwa, huipu me ka awa, wah-i a paa i ke kolikoliko, oia ka wauke hou i kii'a a lawe mai, a kuku ; na ke Kaikamahine i ike ole i ke kane, a palahalaha ka wauke, a aiai keokeo, alaila wahi a paa, lawe i kahakai a hiki i ka unu (wahi e hoomana'i,) alaila, kahea aku la penei, " E na Aumakua mai ka la hiki a ka la kau, mai ka Akau a ka Hema, mai luna a lalo, e ka poe o ka pali, a me ka poe o ke kai, na mea hoi iloko o ka wai. Eia ka mohai, he makana na Naimu, homai ke ola, a kanikoo, a palalauhala, a makaiolea, a ili-pakalua, o kau ola ia ka ke akua." Alaila, hoolei aku la iloko o ke kai, kanu ola iho la ka moa, a o ka puaa paha ma kahi o ka unu, hoi aku nei ka mea nana i lawe a hiki i ka hale, nana i ka oa, ina i haule ka ua, ua ike ke akua, ua holoi mai la ua pau ka poino a me ka haumia, i na hoi ua kaumaha na ao i ke ao eleele, ua maikai no. Pela no ko Pele a me Hiiaka ma, eia ko lakou mohai he awa, a me ka luau, pela no ka mohai ana i kela mea i keia mea.
Aole i pau.
No ka Mahiai Pulupulu.
Ua ike no paha ka poe heluhelu Kuokoa a pau i ko makou paipai nui ana iloko o na makahiki elua a ekolu i kaahope ae nei, i ka oihana kanu Pulupulu ma keia Pae aina, no ka manaoio ana iho, aohe aina o keia honua i oi ae ka pono mamua o keia pae moku no ke kanu pulupulu, a aole no paha he oihana i oi ae ka puka o ka luhi, ke hoohalikeia ke dala a me ka luhi i hooliloia no ke kanu ana ia mea. No ka mea, o ka poe i lako i ka aina, he wahi lilo uuku loa ko lakou mawaho ae o na lilo o ke mahiai, a me ka hooulu ana ia mea. Ke hauoli nui nei makou i ka hoomaopopoia o keia oihana. Ma Hawaii a me Kauai, ua pa-e mai ka lono, ua kanalima na eka i hoouluia ma ia mau mokupuni pakahi. A pela no hoi ma Oahu a me Maui, e kanuia ana no ma ia mau mokupuni.
I kekahi mau mahina aku nei la, ua hoouna aku makou i kekahi o na ano pulupulu o onei ma ka eke leta i Nu Ioka (New York.) oia hoi ka pulupulu Helu 1 (Si Ailana) a me na ano pulupulu e ae no hoi he lehulehu wale. A ua nana ia a hookukuia hoi e ka poe akamai loa a i maa hoi i ka nana ana ia mea, a ua hooholo ia poe, "ua oi loa ka maikai o ko Hawaii nei pulupulu Si Ailana (Helu 1,) mamua o ko Amerika Huipuia pulupulu o ia ano." Oiai hoi o ko kakou nei pulupulu Helu 2 pokole o ka maawe, ua oleloia, ua pakeu lou ae ka maikai o ko kakou nei pulupulu o ia ano, mamua o ka pulupulu maikai loa o ia ano i kanuia ma Geogia. Ina e hoouluia ana ka kakou nei pulupulu Si Ailana (Helu 1) me ke " kaokoa, me, ka hoohuikau ole ia me na ano pulupulu e ae," alaila, aohe pulupulu o na aina e ae o keia honua e pakeu mamua o ka kakou, a e hikiwawe no hoi ke kuaiia'ku i na wa a pau e hoounaia'i e kuai ma na aina e. Aka o ka hapanui nae o ka pulupulu e kanuia nei e na kanaka maoli, ua hui aku hui mai ka Helu 1 me ka Helu 2, a no ia mea, nahili no ke kuai ana.
O ka nui o na paona o ka eka pulupulu hookahi ke kanu a waele pono ia, ua hiki no i ka 1.500 a hiki i ke 2.000 paona me ka hua, pela ka mea i haiia mai, o ka huina o ka loaa o ka mea nana e kanu, ina he maikai, mai ka haneri dala hookahi, a hiki i ka haneri kanaono dala, a he oi loa ae hoi ia mamua o ka loaa no ka eka ko, raiki, a kalo paha. He pono nae i ke kanaka ke kanu ka pulupulu e like me ka nui e hiki ai ia ia ke malama pono, i na paha he elua eka, a he elima eka paha. Aka, mai noho a kanu kupai loa, e komoia mai auanei oe e ka ma nao hoi-kua. Ina no oe e hoomaka ana e kanu i elua eka i kinohi, i keia makahiki, a ia makahiki ae hoi, hoonui ae i elima eka, a pela e kii akahele ai a hiki i ka nui a palahalaha loa ana'ku.
O ka manawa kupono no ke kanu ana i ka pulupulu, oia na malama mai Ianuari a hiki i Aperila, a ina e kanuia pela, alaila, e hua nui ana no ia makahiki. O ke kupono loa o ke kanu ana e like me ko ke ko, ma na lalani he eono kapuai ke akea, a i ekolu a i eha paha kapuai ke kaawale o kekahi kumu mai kekahi kumu aku iloko o ka lalani. Ma ia mea e loaa ai ke akea kupono i hiki ai ke waele i ka weuweu, a ke ohi hoi i ka pulupulu. O ka kekahi poe kanu ana hoi, hookahi lalani ko he ewalu kapuai ke kaawale mai kekahi lalani aku, a mawaena o ka pulupulu he eha kapuai ke kaawale mai ka lalani ko aku. A i ko ke ko ulu ana, lilo ia i mamalu no ka pulupulu, a mau no hoi ke kawau ana o ka lepo me ka maikai. A pau ae la ka hua o ka pulupulu i ka ohiia alaila, ookiia'e la ke kumu, a ulu hookahi iho la ke ko a hiki i kona oo ana. Manao makou he mea puka maoli ka hana ana pela, ma kekahi mau wahi, ma na wahi e kanuia ana ke ko me ka wiliia e na wiliko ma ka mahele, no ka mea, kaa no na lilo a pau o ke kanu ana i ka pulupulu a me ke ko, i ka loaa o ke ko. Aka nae paha, o ke kanu maikai ana ma na apana makani, oia no ke ano like me ke kanu ana a ka Mea Hanohano Ioane Ii o Honolulu nei, ka mea hoi i hooikaika nui ma ka oihana kanu pulupulu. He hiki no ke ikeia kona aina mahiai pulupulu ma Pawaa ma kahi a ke alanui e huli hele ana i kai o Ulukou. O ke ano o kana kanu ana, he ekolu lalani pulupulu, alaila kanu iho la ka lalani ko hookahi, a lilo iho la ka lalani ko, i alai makani no ka pulupulu. A, he mea kupono loa i ka poe a pau e hoomaopopo ana a e manao ana hoi e kanu pulupulu, ke hele e makaikai i ka mala pulupulu a ka Mea Hanohano Ioane Ii.
Hoomaka no ka pulupulu i ka hua iloko o na malama elima, a pela no e hoomau ai ka hua ana, a hiki wale mai i ka hooilo, alaila oki iho la ka hua ana, no ka pau o na pua i ka lu ia e ka makani lu pua o ka hooilo, a pau pu hoi na lala i ka haihai. A pau ke kau ino, alaila, hoomaka hou mai no na lala e puka, a hua hou mai no hoi. A i ole no hoi ia, alaila, he pono no ke okioki i na lala i ka wa ino, a ma na malama o Febuari a me Maraki, mahope iho o ka hoopulu maikaila'na o ka honua e na ku-a-ua o ka hooilo. I ka wa e hoomaka mai ai ka pulupulu e oo, alaila, e hookuu i na wahine a me na keiki e ohi i na hua pulupulu mai ke kumu mai, ke maloo, a hahao ia mea iloko o ka eke kupuno. Mai noho nae a " ohi pu me na pulupulu malili, a me na mea hoi i ai ia e ka mu." No ka mea, aole e lilo ia mea i ke kuai ia, e ohi wale no ma ka pulupulu keokeo maikai, mai noho a ohi ma ka pulupulu ino, a pulu hoi.
O kekahi poe kanaka nae, he hoohuikau i kela a me keia ano pulupulu i ka wa e ohi ai, a no ia mea, o ka pulupulu a ia poe e kanu ai, ua pau loa i ka huikau, a ua kuai ia ma ke ano pulupulu Helu 2, a poho wale iho la no ka pulupulu Helu 1, me ke emi hoi o ke kumukuai.
He ano pulupulu hou nae ia i lawe ia mai nei ia nei, i kapaia ma ka inoa " Peruvian " Tree Cotton" (Pulupulu Kumu o Peru.) O keia ke ano pulupulu maikai loa i ko makou manao. He hookahi tausani kumu paha i kanuia e Kauka Poka (Dr. S. P. Ford,) a e hua ana iloko o na malama ekolu a eha paha e hiki mai ana, alaila, loaa mai ia makou ka anoano o ia pulupulu. O ke kumu makua e ulu nei ma kona pa ma Peleula, ua kanuia no loko mai o ka anoano i laweia mai mai Peruselevenia. He keu a ke kumu laau maikai, he umikumamawalu kapuai ke kiekie, a he eha paha iniha ke anawaena, ua hele a ohuohu i ka pua. Ua oleloia, ina ka e wae ia na opuu he hookahi haneri, alaila, loaa ka paona hookahi ; a ua olelo ia no hoi, e loaa ana ka iwakalua paona no kela kumu keia kumu — o ia ano pulupulu, i kela makahiki keia makahiki. He ekolu iniha ka loa o ka opuu hookahi, a o kona ano i ka nana'ku, me he la, he kuahiwi i uhiia i ka hau, ka hele a kuakea, oiai e hoomaka ae ana e oo. He loloa kona maawe, a o kona kumukuai ma Enelani, ua like no me ko ka pulupulu Helu 1 kuai ana. Aole e loaa ka anoano o keia ano pulupulu i keia wa, aia nae i ka malama o Novemaba ae nei e loaa'i. I ko oukou wa e houluulu ai i ka pulupulu a hiki ka nui i ka 200 paona a oi ae, alaila, kukaa a paa, a hahao iloko o kekahi eke maikai, a hoouna mai no i Honolulu. Mai noho a waiho loihi loa iloko o ko oukou mau hale. Ina he pulupulu i maikai i hoomaemae pono ia, alaila, aole no e nele kona lilo koke i ke kuai, aka, ina nae he " iino" ka pulupulu alaila, aohe no he poe e makemake ana e kuai mai me ka haawi mai i ke kumukuai nui no ia mea.
O kekahi o na poe kanaka o keia mokupuni, ke holo mua nei ma keia oihana o ke kanu pulupulu, a ua loaa no ia lakou he mau hanere dala no ko lakou pulupulu i kanuia i ka makahiki i hala iho nei. Oia poe no o Hon M. Kalanipoo, o Waimea, Natanaela, Amala, a me J. P. Kauwalu o Wailua, a me G. H. E. Keauiaole o Waianae, a ua hoopili lakou i ko lakou mau poohiwi ma ka huila nana e kauo imua o keia " hana maikai" o ke kanu pulupulu, a ua pono ke hoopuka ia ko lakou mau inoa me ka mahalo.
Mai noho a anoninoni a kanalua hoi ka manao ke hanaino ia ka pulupulu e ka peelua, ke poko a me ka mu. No ka mea, ua hanaino no lakou i ke ko, a me ka huita i kekahi manawa. Anolaila, ina no e ino i kinohi, hoao hou no, a pela no e holo pono ai. Ina i lokahi na kanaka ma ke kanu ana i ka pulupulu, i na la ua hiki ia kakou ke hoouna'ku i hookahi miliona paona pulupulu i ka makahiki hookahi i na aina e, ma ia mea hoi e loaa mai ai iwaena o ka poe nana i kanu ka pulupulu na dala he $80,000. A ma ia mea hoi e loaa'i na dala e hiki ai ke hookaa i ko kakou aie, a ke hana i na halelaau hou, a me ka hooulu hoi i ka pulupulu, a nui ae mamua o ka nui o ka pulupulu a kakou i kanu mua ai.
Ka poe a pau e ake hana ana, o lakou no ke ike hikiwawe ana i ke kanu ana o ka pulupulu, a o ka poe e hooulu nui ana ia mea, me ka loaa o na paona he nui, o lakou ka poe e loaa ai ka makana a'u i hoike aku ai, no ka mea, e kupono ana no ka loaa ana o ia mea ia lakou. E kokua no hoi na wahine a me na keiki i na kane, no ka mea he hana hiki loa no i ke alu pu ; a i ke kokua likeia no hoi.
Me ke aloha a me ka mahalo,
H. M. WINI. Honolulu, Oahu, Maraki, 15, 1865.
Ka Nupepa Kuokoa.
HONOLULU, MARAKI 23, 1865.
Ke Ino o na Halekuai Rama.
Ma ka pepa o ka pule i hala ae nei ua hoolaha makou i kekahi mau manao no ka Ahahui Hoole i na Wai ona, i hoomaka ia iho nei ma keia Kulanakauhale. Ma keia pepa ke manao nei makou e olelo hou no na wai ona. He nui wale na mea keakea i ka pono o na kanaka o keia Pae Aina. O ka palaualelo kekahi mea alakai i kanaka i ka make, pela no hoi ka hehi ana i ke Kanawai ehiku, a pela no ka inu ana i na wai ona. He enemi ikaika loa ka rama, me na mea e ae e ona'i, no ke kanaka.
E nana iki kakou i ke ano o ko kakou noho ana i keia wa. He umi paha tausani ka huina o na kanaka o Honolulu nei. He eiwa hoi halekuai rama i ae ia e ke Kanawai, okoa na hale inu malu. Ua lako ua mau hale nei i na mea a pau e lealea ai ka manao o ka poe imi lealea, a e puni wale ai ka poe noonoo ole. Aia iloko oia mau hale na mea kani maikai, na keena ulu-maika, na papa-pahupahu ; he maunu ia mau mea e puni ai ka naau o ke kanaka, a oia ke kumu o ka hoopili ia ana o ia mau mea me na hale inu rama. O ka rama ka mea nui, oia ke kumu waiwai o ia mau hale, a o na hana lealea e pili ana me na halekuai rama, he maunu wale no ia mau mea, he mau MAKENEKA e ume ana i ka manao i o hale rama la. E like me ke puhi ana o ka poe lawaia i ko lakou maunu i hauna ke kai a holo mai na ia, pela na Kapena o na hale rama o Honolulu e pupuhi nei i na hana lealea i mea e hauna-lealea ai ko lakou mau hale, a lulumi mai kanaka iloko o ko lakou mau upena.
Eia hou hoi : Ma na hale inu rama o keia Kulanakauhale, he poe luna kekahi. O ka hana a ua poe luna la, oia ka imi i ka poe nana e inu na mea ona o ko lakou mau hale. Aole paha hale i nele i na luna, a he poe makaala lakou. Ina e hiki mai ka malihini i Oahu nei, na ka luna o ka hale inu rama ia e imi a alakai ma kona wahi. Ina ua ike kekahi kanaka inu rama i ke ino o ia mea, a hoao oia e haalele i ke kiaha o ka make, ke haule ka kekahi la o kona hele ana i ka halekuai rama, o ka imi koke no ia e ka luna iaia e hoomalimali ai. Ina e hoea mai na keiki o ka moana, oia hoi na luina a lakou e iini ana i kahi loaa ma ka holo moku, na ka poe luna o na halekuai rama lakou e alakai i na lua meki o Honolulu ; ilaila lakou e luaieleia'i a pau loa na wahi pono, pau loa na wahi hua o ka luhi ana, pau loa kahi manaolana, pau loa ka inoa maikai !
Aole nae oia wale. Ua hai ia mai ia makou kekahi hana okoa o na halekuai rama a kakou ; ua kapaia ua hana la " ka lulu ana." A penei no ia : Ma kekahi o na hale rama, ina e ona loa kekahi kanaka, alaila, o ke kii aku no ia o ka poe nona ka hale a hopu aku ma na wawae, hapaiia'e la na wawae iluna a ilalo ke poo, alaila lulu ia ua kanaka la, a ina he koena dala kekahi ma kona mau pakeke, pau loa i ka helelei, a hoi oia ke pau ka ona he kanaka ilihune ! Aole hiki ia makou ke hoohiki no ka oiaio o keia ; pela nae i haiia ia makou, a i ka nana'ku he oiaio no paha. Heaha la ka hana hiki ole i keia poe kuai rama ? Auhea la ko lakou hilahila ? Auhea la ko lakou aloha i na hoalauna ? Auhea la ko lakou manao i ka pono o kanaka ? Aole loa. Ua aho paha ka hele wale ana o na holoholona hihiu hae iwaena o kanaka mamua o ia poe.
Oia iho la kekahi mau mea ino e pili ana i ko kakou noho ana i keia wa, he mau ino i ulu mai no na hale rama, Ina aole ia mau ino, o ka ole no ia a na hale inu rama. I ola no ia mau hale no ka nui o ka poe hele ilaila. A ua hele nui kanaka ilaila no ka nui o ko laila mau hoowalewale. A ua waihoia mai na hoowalewale i inu kanaka i ka rama. Makemake ka poe kuai rama e inu ka lehulehu. Ina aole inu ka lehulehu i ka rama, o ka nele no ia o ka poe kuai. Nolaila, o ka hana nui a ka poe kuai, oia no ka hoohainu i ka lehulehu i na mea ona e make ai. Oia maoli no. Aole pomaikai o ke Aupuni i ua poe la, he ole loa no. Aole pomaikai ka lehulehu kanaka, aole hoi ka ohana kanaka ia lakou. He poe hoomahuahua lakou i ka ona, a ma ia mea he poe kue i ka maluhia o ke Aupuni. He poe enemi i ke ola o ka lahui. He poe hooilihune i kanaka. He poe hoolaha ino, haunaele me ka make, ka poe kuai a hoolaha i na wai ona. Aka, ke olelo nei paha kekahi, " Ua pomaikai ka aina ma na puu dala a lakou e uku nei i kela makahiki keia makahiki no na leikini kuai rama a lakou." He olelo naaupo ia. Heaha la ka waiwai o na kaukani dala ke hoohali-keia me ke ola o ke kanaka hookahi i make i ka rama ? A, ina e kaupaonaia na dala a pau loa i loaa mai i ke Aupuni no na laikini kuai rama o keia aina, me ka nui o ka poe i make no ka inu rama. Ma hea la ka aoao koikoi, o ke dala anei, o ke ola o kanaka paha ? E waiho ma kekahi aoao o ka mea kaupaona na waiwai a pau i loaa mai noloko ae o ke kuai ana i na wai ona, a ma kekahi aoao hoi ke ola o na kanaka he nui wale i make i na wai ona, a ma hea ka aoao koikoi ? Aole anei he mama loa ka aoao o ka waiwai, a kaumaha loa ka aoao o ko kanaka ola ? Ae, he mea ole loa ka waiwai ke kau pu ia me ko ke kanaka ola.
Mamuli o na manao i hoikeia'e nei, ke olelo nei makou no ka poe nona na halekuai rama a me ka poe kuai lilo aku i na mea ona, he poe kue lakou i ka pono, ka maluhia a me ke ola o ka aina. He mea pono hoi i ka poe i aloha i ka pono, ka maluhia a me ke ola o ko lakou aina, e kue mau a e kue ikaika i ke kuai ana me ka inu ana i na mea ona. E kue pono nae. Aole hiki ia kakou ke kii aku e wawahi i na hale o ia ano. Aole hoi pono ia kakou ke pepehi aku i ka poe hana ma ia mea. Ua malu lakou i ke Kanawai. Aka, he pono no ke kukulu i na Ahahui no ia hana. He pono no ke ao, a koi, a paipai, a noi, a kuhikuhi i kanaka ma ia mea.
Ke hooikaika nei lakou e hoolaha i ka ilihune me ka make. Aole anei he pono ia kakou ke hooikaika e pale aku i ka ilihune me ka make ? Ke hooikaika nui nei lakou ma ko ke kanaka poino. Aole anei he pono ia kakou ke hooikaika ma ko ke kanaka pomaikai ?
Oia kekahi mau kumu o ko makou manao ana he pono ke kukulu ia na Ahahui Hoole i na Wai-ona. He pono no hoi i na mea a pau e hoohiki ia lakou iho e haalele i ke kiaha wai awaawa, o ke kiaha no ia o ka make.
The Earthquake.
A severe earthquake was felt about 1 o'clock A. M., on the 3d inst. round the whole island of Hawaii and on Oahu, and very probably on the intervening islands,— though as yet we have not heard from them we hope to hear whether it was experienced on the island of Kauai.
It was one of the most severe earthquakes experienced during this century. It seems to have been most severe in Eastern Kau at Keaiwa, which is the point nearest the volcano of Kilauea from which we have yet received reports.
" A Resident" from Waimea Hawaii writes —" The most stirring piece of news we have had lately, came to us Friday morning, the 3d inst. 15 minutes before one o'clock, in the shape of the severest earthquake we have had for many years. Indeed we have not had but one equal to it I think in 27 years. There were two very distinct shocks, the last, as usual, much more severe than the first. The motion was lateral, but such was the confusion of thought on being thus summarily roused from sleep, that I could not possibly say from what point of the compass it came. There was no rumbling perceptable. As far as I have heard, all the sleepers in our quiet place, were made sensible that if our earth is stable, our little island is not immoveable."
Rev. J. D. Paris writes from Kona, Hawaii :—" We have had the most terrible earthquake I ever experienced. It occurred on Thursday night about half past 12 o'clock. The stone walls were thrown down, all over the Konas, and our house, which is a very strong frame, was shaken and shivered, as though it were the slightest fabric. " He looketh upon the earth and it trembleth. He toucheth the hills and they smoke.
Rev. O. H. Gulick writes from Waiohinu of Kau ;—" At 1 A. M. Mar. 3d. we had the heaviest earthquake known in modern times in Kau. It woke all hands in Waiohinu."
The most interesting details however are from Keaiwa, Kau. Our correspondent writes :—" We were waked at one o'clock out of sleep by the most severe earthquake we ever felt. I think it continued for more than a minute. Shock after shock shook the house as if it would tare it from the foundation. Windows and doors rattled, bottles fell, and there seemed to be great convulsions and noises in the earth right under our house. After the hard shocks, it passed off gradually, as we were dressing we heard a report as if something had come bounding up against the side of the mountain, from the inside, then it came rumbling and rumbling down, till it reached us as another shock. We felt as many as five more slight shocks before morning. At the volcano, there did not seem to be much more light than we often see."
Jacob is an active old man nearly 80 years of age, who every other week carries the mail perhaps 90 miles to Hilo from Waiohinu and back again. He is the principal luna in the Keaiwa church. Long may he live to do good and read the Kuokoa.
Our Keaiwa correspondent says that " Jacob and another man were up when the earthquake came on, reading the Kuokoa. He says there was first a loud report, and they thought it was thunder, then came the slight shocks of the earthquake, which increased in severity every shock, for a minute or so, then it passed off as it came, with slight shocks. He thinks it was three or four minutes in duration. He had never before experienced as severe an earthquake as this. There have been many times when they have been very frequent, but not severe like this. Before one of the lava flows on the pahoehoe below us he said they had slight shocks repeated at short intervals through the whole day, and at night they saw the lava flow."
We trust our friends on the island of Hawaii will keep us fully informed of all that occurs there regarding earthquakes and volcanic action, especially those who live at the Volcano. It is possible that an eruption may be working its way to the surface.
He Olai.
Ma ka hora 1 o ka po o ka la 3 o keia malama, aia hoi he olai ikaika ka i ike ia ma na wahi a pau o ka Mokupuni o Hawaii, a ma Oahu nei no hoi ; a pela loa aku la no hoi paha ma kekahi mau Mokupuni aku o keia pae moku, aole nae maopopo loa ia ia makou, no ka mea, aole i loaa mai ka lono mai kekahi mai o ia mau Mokupuni, ke lana nei ko makou mau manao e lohe ia mai ana no, he olai no paha ma ka Mokupuni o Kauai.
O ke keu keia o ke olai ikaika i ikeia ma keia Keneturi (haneri makahiki.) I ka nana aku, he keu aku ka ikaika ma ka aoao hikina o Kau, ma Keaiwa, oia no hoi kahi o Kau i kokoke loa aku i ka Luapele o Kilauea, a mai laila hoi makou i poloai ia mai ai, a lohe ai i keia mea kupanaha " Na kekahi kamaaina" o Waimea, Hawaii i kakau mai.— Penei. " Ka nuhou okalakala oia ke olai i loaa mai nei ia makou, i ke kakahiaka o ka Poalima la 3 o keia malama, he 15 minute mamua aku o ka hora 1 ma ke ano ikaika maoli o ke olai. Ua nui ko makou mau makahiki aole nae i ike ia kekahi olai e like me keia, hookahi wale olai ana e like ai me keia, iloko nae o na makahiki he 27. Elua wale no mau hoohakui maopopo ana i ikeia, o ka hakui hope ana iho nei nae ka oi o ka ikaika i ko ka mea mua.
Ke hele la na noao a halana, a he mea pioleke ia o ka manao i ka hoeueu ia o ka hiamoe, a nolaila aole e hiki ia'u ma ka aoao hea la o ke Panana kona hiki ana mai. Aole no hoi leo haalulu i loheia aku e a'u, o na mea a pau e hiamoe ana ma ko makou wahi lai ku, ua puoho ia lakou mai ka hiamoe mai."
Ua kokua mai o Rev J. D. Parisa o Kona Hawaii penei ;— Ua loohia iho nei makou i ke olai weliweli loa, a'u i ike ole ai mamua, ma ka po o ka Poaha, i ka hapalua paha o ka hora 12 o ke aumoe. Nui na pa pohaku i hiolo ilalo ma na wahi no apau o Kona. O ko makou hale no hoi, i hanaia me na laau nui ua naka nae ka hale, i ka ua mea he ikaika launa ole o ke olai, me he hale la i hanaia me na laau liilii. " Nana mai no oia i ka honua, a haalulu iho la ia. Hoopaa mai oia i na mauna, uwahi ae la lakou."
Ua kakau mai no hoi o Rev O. H. Gulika o Waiohinu, Kau :— Ma ka hora 1 o ka po o ka la 3 o keia malama, ua loohia mai makou e ke olai ikaika i ike ia i keia mau Kau. A ua hoohikilele ia ae ka lehulehu o Waiohinu.
O ke keu aku no nae o na mea ano e i haiia mai o ko Keaiwa ma Kau. Ua kakau mai ko makou hoa kakau palapala penei : Ua hoala ia ae makou ma ka hora 1 o ka po, mai ko makou hiamoe ana e ka ikaika lua ole o ke olai a makou i ike ai. I kuu manao ana ua oi aku mamua o ka minute, ka hoonei ana o ka honua e naka ana ka hale, me he mea la e lawe ia ana ka hale mai ke kahua ae. E nakeke ana na puka aniani, a me na puka komo, helelei na omole ilalo, i ka nana aku he leo haalulu iloko o ka honua, malalo pono ae no o ko makou hale. Mahope iho, o ka hakui ino ana, ke emi malie aku la no ia o ka ikaika a hiki i ka pau ana. Ia makou e komo kapa ana, lohe aku la makou he leo, me he mea la e upai ana i na aoao o ka mauna, mai loko mai, a pela ka haalulu hele ana mai ilalo a hiki i o makou la, o ka naka hou mai la no ia o ka honua, o ka loaa hou iho la no ia o makou i ka naka ana, elima no hoi naka ana ; mamua o ke owehewehe ana o ke kakahiaka. Ma Kaluapele he pouli malaila, aole malamalama e like me ka mea i ike pinepineia."
Aia kekahi kanaka kahiko eleu o Iakoba kona inoa, nona na makahiki i aneane aku i ke 80, oi hoi ka mea lawe leta mai Waiohinu a i Hilo, ua aneane e 80 mau mile ka loa mai Hilo a i Waiohinu, he keu a ke ahonui. He luna ekelesia no oia no Keaiwa. E loihi e pono ai kona noho ane ma ka pono a me ka heluhelu ana i ke Kuokoa.
O ko makou hoa kakau palapala o Keaiwa. Ua hai mai oia penei. " O Iakoba a me kekahi kanaka e ae, ua ala e no laua " e heluhelu ana i ke Kuokoa" i ka wa i olai ai. Olelo mai oia o ka mea mua, he halulu nui a manao ihola laua he Hekili, alaila o ka nawele malie mai la no ia o ka nakanaka ana o ka honua, a o ka hele mai ia no ia i ka nui loa, aole o kana mai, a e like no hoi me kinohi, pela no hoi ka hopena, i ke emi malie ana. Ma kona manao ana ua oi aku mamua o ke 3 a 4 paha mau minute o ke olai ana. I mai oia aole olai e like me keia ka ikaika, ana i ike ai mamua kahi wale no keia, he nui wale no na olai ana mamua aku nei aole he ikaika e like me keia. I mai no hoi oia, mamua aku nei ua kahe a wai mai ka pohaku hehee maluna o ka pahoehoe, malalo aku o lakou me ka halulu no o ka honua aole he ikaika, aole no hoi he loihi o ka manawa o ke olai ana mai ke ao a po ko lakou ike ana i ke kahe a ka pele."
Ke paulele nei makou i ko makou mau makamaka ma ka Mokupuni o Hawaii, no ko lakou hoolako ana mai ia makou i na mea kupanaha malaila, oia ke olai, a me ka hana a ka pele, o ka poe no nae o Kaluaopele. He mea maopopo no, o na hua o ka honua, e hana ana no ma kona aoao iho a hiki i ka ili honua.
HUNAHUNA MEA HOU O HAWAII NEI.
HANAU.— Ma ke awakea o ka Poakahi iho nei, oia ka la 20 o Maraki, ma Makiki, Oahu, hanau o H. —, na H. Kahanaumaikai, me Mary Keha.
KA UKU NO NA PALAPALA HOOKUU.— Ua lohe makou i ka hoopaapaa a na kanaka i ka auhau ia o lakou i ka hapalua no ka palapala hookahi no Maui. He manao wale iho no paha ia. (Advertiser.)
KA BUKE HEMOLELE.— I na malama eha i hala iho nei, ua nui na Baibala i kuaiia aku ma ka apana o Kohala, mamua o na Baibala i kuaiia aku i na makahiki elima. No ka ikaika paha o na luna i ka lawe hele i kauhale e kuai ai ke kumu i nui ai, a no ka manaolana paha kekahi.
HEIHEI LIO MA WAIALUA.— Ua lohe mai makou ua pio ka a ana o keia ahi ma Waialua. Ua ao ia mai lakou, ina lakou e hoopaakiki loa mamuli o ko lakou manao, alaila, hoopiia lakou. Nolaila, ua haalele aku lakou ia kahua heihei o lakou, a eia lakou ke hoohamama nei i ko lakou mau waha ma ke Kulaokahua, me he mau waha alapi ia ke kani. E pono e hoopio ia keia ahi lapalapa, o haulehia auanei kakou iloko o ka luameki mau o ka piliwaiwai.
KA MAKE O NA KANAKA MAOLI.— Ua nui na make ma Lahaina i na pule i hala iho nei, no ke anu a me ka ma-u o na hale o na kanaka e noho ai. I ka manawa e ua ai, pulu ko lakou mau hale, a ma-u na mea a pau o loko, o ke kumu ia e loaa ai na kanaku i ka mai piwa (fever,) a me ke anu. Ina aole e hoolilo ia na hale o lakou i mau halelaau, a a i ole ia i mau papa hele me ka hooluolu mau i na hale pili o lakou, aohe kahuna lapaau, aohe laau, aohe halemai e hoopau ai i ka make. (Advetiser.)
NA LIO HEIHEI.— Ua nui ke kue o na haole o Waialua no ka hoolilo ia e na kanaka o na la heihei lio i mau la lealea loa no lakou. Elua heihei ana o ka pule, i kahi manawa, oi aku mamua o ka lua. O ke kahua heihei, ua kokoke ma kahakai ; a e piha mau ana keia wahi ke heihei i na kanaka he mau haneri, a he mau tausani paha, mai na wahi mai a pau o Oahu nei, i hele aku e pili waiwai. I kekahi heihei ana, elua lio i make. Ua holo mai laua mai na wahi e mai o ke kahua, a hookui me ka ikaika loa, a make iho la na lio, a pomaikai ke ola o ua kaha. (Advetiser.)
No ka hale o ke Kahunapule o Waialua — Ua holo ka manao o ka ekalesia o Waialua e hoahu, i puu dala ekolu haneri ka nui i mea e kukulu ai i hale no ke Kahunapule. A ma ke Sabati hope o Feberuari ae nei, ua hoomaka mai ke kokua ana. He $33 62 i loaa. No na kane $20.37, no na wahine $9.50, no na keikikane $2.00, no na kaikamahine $1.75.
Ke lana nei ko'u manao, e holo ana paha keia hana ma keia kihapai, ina pela, e *** ana o Waialua i hikimua o na ekalesia a pau, e manao nei e kukulu i hale o keia ano, " no luna mai ia." Pomaikai na ekalesia i hapai pu i keia hana.
NO KA PULUPULU.— Ina i kanuia ka pulupulu i na lalani akea e like me ke kanu ana o ke kulina a me ke ko, alaila, he mea maopopo, e nui no ka hua ana mamua o ke kanu pipipi ana, e like me ka mea e ike ia nei. Ua ike iho makou i kekahi mau wahi mala i kanuia ka pulupulu a pili, aole e hiki i ke kanaka ke ohi me ka haki ole o ka la. Ina i kanuia pela, e lilo ka mea e hoohua mai ai i mea popopo, a uuku hoi kana pono e loaa mai. O ke kaawale kupono no ke kanu ana, e hoomaopopo no ke kanaka ma kona noonoo ana. (Advetiser.)
Na kokua Mahinahou o Kawaiahao no ka malama o Maraki, 1865. Honolulu - - - $39 50 Kula Sabati Kawaiahao - - - 6 06 Maemae - - - 2 62
Pauoa - - - 2 25
Kaakopua - - - 2 00
Kunawai - - - 1 87
Kapalama - - - 3 00
Maunakiekie - - - 1 12
Manoa - - - 5 00
Makiki - - - 2 12
Kamoiliili - - - 10 25
Waikiki-kai - - - 3 75
Palolo - - -- 75
Huina $80 29