Ka Nupepa Kuokoa, Volume IV, Number 27, 6 July 1865 — Page 1
KA NUPEPA KUOKOA
KE KILOHANA POOKELA NO KA LAHUI HAWAII.
BUKE IV. HELU 27. HONOLULU, IULAI 6, 1865. NA HELU A PAU 188.
" KA NUPEPA KUOKOA.,"
HOOPUKA MAU IA MA HONOLULU
I kela Poaha keia Poaha.
$2.00 no na mahina he UMIKUMAMALUA,
$1.00 no na mahina eono, ME KA HOOKAA MUA MAI.
NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani, $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O KA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA — ma ke kihi hema o ka Hale Hookipa Luina (Sailor's Home.) O na hora hana, mai ka eiwa o kakahiaka, a i ka ha o ke ahiahi.
L. H. KULIKA, (Lona Hooponopono.)
KA " NUPEPA KUOKOA."
Is published in Honolulu
EVERY THURSDAY,
$2 00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must he paid for in advance. KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives will be inserted on the subscription list until paid for. This rule must be strictly adhered to, on account of the low subscription price. THE OFFICE OF THE KUOKOA is in the South corner of the Sailors' Home. Office hours from 9 A. M. to 4 P. M.
L H. GULICK.
Publisher.
Volume I. II. and III of the KUOKOA, bound, for sale, $3.50 each.
Persons having complete sets of the above, can have them bound by paying $1.50 each.
S. KUPANEA. J. W. KEAWEHUNAHALA.
Loio ! Loio !
KE HOOLAHAIA'KU NEI I NA KANAka a pau o keia Aupuni, ua makaukau na mea nona na inoa maluna e Kokua, a e lilo hoi i LOIO no na mea a pau e loohia ia'na i ka hihia, a e pale ana no kekahi hihia imua o na Aha Hookolokolo o keia Aupuni. He mau mea laua i aoia i ka OIHANA HOONAAUAO ma ke Kulanui o LAHAINALUNA, a ua aoia hoi ma ka OIHANA Kanawai, a me ke kakau ana i na Palapala o kela ano keia ano, e ka Mea Hanohano G. M. ROBERTSON (LOPIKANA.) A o ko laua Hale Oihana, aia mauka iho o ka huina o ke Alanui Hotele a me Maunakea ma Honolulu, Oahu.
Honolulu. Feb. 6, 1865. 167-y
HUA KUKUI, HUA KUKUI.
E IKE AUANEI NA MEA A PAU LOA O ke kua aina, owau o ka mea nona ka inoa malalo iho nei, he hoaloha no oukou no na kau i hala ae nei, ma ke kuai Pepeiao Laau ana. Ua hala aku la ia kikina, he AU HOU keia, a ke kahea aku nei au, e kuai no au i na HUA KUKUI i kalua ia a moa, alaila, e ki-ke ia ka iwi a pau, a o ka IO wale no ke lawe mai, e hoomaemae i ka la a maloo maikai. A e haawi no wae EKOLU DALA ME HAPALUA ($3.50) no ka barela hookahi. I ka poe e imi ana i keia, a lawe mai, e loaa no wau ia lakou ma ka Halepohaku o M. Kekuanaoa, ma AIENUI.
E WIKI, MAI KAULUA !
CHUNG HOON & CO. Aienui, Honolulu, Mei 1, 1865. 2-3m
MA KE KUAI !
UA LAKO AU I NA KUKA PAINA ELEELE maikai, he hookahi haneri. Mai ka Umikumamalima aku a ke Kanakolu dala ke kumukuai o ke Kuka hookahi, oia hoi na Kuka maoli, na Koheoheo, me nu Kuka Holoku.
He mau lole manoanoa kekahi, oia hoi na Palemai, na Kakini, me na Palemai wawae i hanaia noloko mai o na lole maikai loa. He mau Kuka Palu Holoku no kekahi, me na Koheoheo, mai ka a 7 a hiki i ka 14 dala o ke Kuka hookahi.
O na lole i haiia ae la maluna, he mau lole maikai, aohe aie, he dala kuike wale no.
H. McDONNA.
Ma kahi e kokoke ana i ka Pa Kuai Papa o Lui a me Dikesona. 176-3m
HALE PAI KII.
AIA KO'U HALEPAI KII MA KA HALE e pili ana me ka Hale Leta, maluna'e o ke Keena Pai o ka " Nupepa Kuokoa," Ua emi loa na kii. Elima dala no ke Kakini Pepa Kii hookahi. A elua wale no dala no ke kii aniani.
H. L. CHASE (Keiki.)
174-6m Mea Pai Kii.
KUOKOA HUMUHUMUIA.
EKOLU BUKE — BUKE 1, 2, A ME 3
Umi kala ke kumukuai no na buke ekolu. No ka akahi buke $3.50. E ninau ma ka Hale buke o H. M. WINI.
Na Buke i Pai ia e ka Papa Hawaii.
Eia na buke kuai, a me ke kumukuai, Baibala nui no na Awai o na Halepule, $4 00
" Ohana, ano nui, me na kii, } { 2 50
a me na Moohana, } 5 00
" Ohana uuku iho, me na Moohana, ili ulaula, } 1 00
" Ohana, me na Moohana wale no, 62 1/2
" Okoa, - - - 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 1/2
Kauoha Hou, hapa haole (Haw. Eng.) 25
Haiao, - - - - - 25
Hele Malihini Ana, - - - - 25
Wehewehehala, - - - - - 25
Lira Hawaii, - - - - - 25
Na Olelo Hoopomaikai, - - - 25
No ko ke Akua Ano, - - - - - 25
Lira Kamalii, - - - - - 25
Kumumua Hou, - - - - - 12 1/2
Moolelo Ekalesia, - - - - - 50
Hoike Palapala Hemolele, - - - - -25
Himeni Hawaii me na Leo Mele, 1834, 25
Ninauhoike, - - - - - 12 1/2
Eia na buke i haawi waleia.
Haawina Baibala.
Ui.
Olelo Ao i na Wahine Hawaii.
Na Dawida Malo Kumumanao.
Ko Olelo Ao Liilii.
Ka Moolelo o Batimea Puaaiki.
L. H. Kulika.
Kakauolelo o ka Papa Hooko o ka Ahahui Euanelio o Hawaii.
Ka Nupepa Kuokoa.
KE KAAO O ASIMEDA !
HELU 6.
(I unuhiia noloko ae o ka Buke Moolelo a Geberiana.)
Ia ia i hele aku ai, ike aku la oia hookahi kukui e a ana ma ka hale i kaawale loa ma kahi mamao aku mai na kauhale e ae. Alaila, hele aku la oia malaila'ku a hiki i ka hale a ke kukui e a ana, aia hoi, ua paa na puka a pau : Hookokoke aku la oia ma ka puka makani mawaho aku, aia hoi, lohe aku la oia i ka leo pule, he leo wahine nae, a pau ka pule ana, ku ae la ua wahine la, e aahu ana me ke kapa keokeo hulu-hipa, he kapa o ka Oihanakahuna, ua kauia ka uhimaka imua ona. Huli pono aku la ke alo iwaho ma kahi a Asimeda e ku aku ana, me ka manao ua paa ka puka-aniani, nolaila, wehe ae la oia i kona kapa a pau, a me ka uhimaka, aia nae ua pau ke kino holookoa a pau i ka waiho wale, me he kii lohi la imua o kona mau maka, ia manawa, ike aku la o Asimeda, o ke kino no o kana mea i moeuhane ai, ka mea hoi nana i uneune ke a-na kaumalie o kona puuwai, a i imi ai hoi, me ka manao ua paa loa na puka, aia nae, ua kapakahi ae la ka lole paku oloko o ka puka-aniani, malaila o Asimeda i ike aku ai. Ia Tamala e komo ana i ke kapa-moe po, lalelale koke ae la o Asimeda a ku mawaho o ka puka komo, kikeke aku la. Ia manawa, puiwa koke ae la o Tamala, a komo koke ae la i ke kapa Oihanakahuna, me ka manao o ka Epitobo Nui : A makaukau oia, hele aku la a ma ka puka komo o kona hale, kikeke hou ana no, o ka elua ia o ka Asimeda kikeke ana, aka, aole nae o Tamala i wikiwiki e wehe koke i ka puka : Ia manawa, pule aku la oia, a pau ka pule ana, kikeke hou ana no, o ke kolu ia.
Ia manawa, pane koke aku la o Tamala ; " Owai mawaho ?" " He malihini," wahi a Asimeda : " E wehe mai oe i ka puka, i ike aku au ia oe, a me oe ia'u, alaila, e haawi aku au i ko'u aloha ia oe, a me kou aloha ia'u." I aku la o Tamala ; " E ka malihini, aole wau e haawi aku ana i hookahi hapaha o ko'u aloha nou, no ka mea, ua hele mai oe io'u nei ma kou ano powa, ma kahi i malama ia'i ka maluhia no'u ; a pehea la i hiki mai ai oe iloko nei, kahi oi o ka maluhia ma keia honua ? A nolaila, ma ko'u aoao haipule, a kupaa no hoi mamuli o na Kauoha Hemolele ; ke i aku nei au ia oe ano : E hoi koke oe i keia manawa, aole e weheia ka puka nou." " I aku la o Asimeda. " E ke kaikamahine Haipule a Hemolele hoi, e hoomanawanui iki mai oe malaila, i olelo aku ai au ia oe ma ka mea pili i ka haipule. Ke i aku nei au ia oe ; i na paha he kaikamahine haipule oe, i na paha ua ike oe i ka ka Haku mea i olelo mai ai iloko o kana Kauoha Hemolele. " O ka hale au e komo aku ai, e haawi mua aku i ke aloha." A penei hou, " O ka mea kikeke e weheia nona." A no keia mea, ke ninau aku nei au ia oe e ke kaikamahine haipule : Pela anei ke ano oia mea, a ka Haku i olelo mai ai ; " O ka hale au e komo aku ai," e haawi aku i ka olelo kipaku, a " o ka mea kikeke," e pani i ka puka nona ? Ina ua hewa wau ma keia mea a'u e hoakaka nei, e pono oe e kala mai, oiai o kaua wale no."
A no keia olelo ana a Asimeda pela, wehe koke ae la o Tamala i ka puka, a olelo aku la, " E ka malihini, aloha oe ; aole o oe ka'u e kala aku, aka, owau kau e kala mai, no ka mea, ua haule ia'u ia mau Kauoha Nui a ka Haku."
Mahope iho o keia mau olelo ; olelo aku la o Asimeda, " E Tamala Hemolele e ; e haawi maikai mai oe ia'u i hookahi honi ana, a mahope oia manawa, alaila, e hoike aku no au ia oe he moolelo loihi loa e pili ana mawaena o kaua."
" Auwe ! e ka malihini e !! Wahi a Tamala ; ua noi mai oe i ka mea ku i ka haumia, ka mea hiki ole ia'u ke ae aku, nolaila, e hookaawale koke oe ia oe iho." I aku la o Asimeda ; " E Tamala oiaio e ; e hoomanawanui iki hou mai oe, i olelo aku ai au no ka'u mea i noi aku nei ia oe: Aole au i noi aku e haawi i mai oe ia'u e honi ma ke ano haumia, aka, ma ko kaua aoao haipule no, i mea e like ai ma kou ano hemolele, e like me ka mea i oleloia iloko o ke Kauoha Hemolele, kahi au e hilinai nui nei, i oleloia penei : " E haawi aku i ka honi hemolele o ke aloha :" Pehea la keia ?"
A lohe o Tamala i keia mea, noonoo iho la oia a liuliu iki, alaila, olelo aku la, " He oiaio kau mea i kuhikuhi mai nei, aka, aole nae au i ike i kou haipule oiaio, no ka mea, ke ike nei au, aole oe i noi mai ma ka honi ku i ke Kauoha au i kuhikuhi mai nei ; o ka honi a ke Diabolo kau mea i makemake nui ai e haawi aku au. Nolaila, aole a'u olelo i koe nou, e hoi oe." Pau ka Tamala olelo ana, hoopaa mai la oia i ka puka.
I aku la o Asimeda. " E oluolu oe e ku mai pela, e hai aku au i ka moolelo e pili ana no kaua. He mau makahiki eha mamua ae nei, i ka umikumamalua o ko'u makahiki, halawai mai la oe me a'u ma ka moeuhane, a hala hookahi makahiki me ewalu malama. Iloko oia manawa, ma ko'u hiamoe ana, a hihio hoi, a me ke akaku, ua hookui mau mai oe ia'u ma ka moeuhane, a lilo iho la kuu naau opiopio i mau mea na ke kuko e hoouluhua ai, nolaila, haule ka manao maikai mai o'u aku ; a na ia kuko malihini au i hooki mai i ko'u hele ana i ke kula. Iloko oia manawa, noonoo nui iho la wau i mea e ike ai au i kou helehelena kino okoa, e like me a'u e ike nei ia oe i keia po, nolaila, wehe ae la au i ka aahu keokeo o ka manao maikai i uhiia maluna o'u, a kiola aku la iloko o ke ahi. Aka, lalau koke ae la au i ka nahu hinuhinu o ka hoopunipuni, a hele aku la imua o ko'u makuakane Moi a me kona Ahu Kuhina, e ae mai ia'u e hele e makaikai i ka honua, i ike ai au i na kulana o ke ao nei, o na mea a ke Akua i hana ai ma ka aina, a ma ka moana. A nolaila, haalele aku la wau i ko'u one hanau a me ka NOHO ALII Hanohano o ko'u makuakane ; a hele mai nei e makaikai ma na wahi a pau o ka honua nei, iloko o na makahiki eha, aole nae au i ike ia oe. Aka, ua hiki ole i ko'u Kakauolelo ke hoomaopopo i ka nui o na lilo ma keia huli ana a'u ia oe, aole nae oe i loaa. A no ia mea, ua ike ke Akua i kana Kauwa nei, ua makepoho ko'u noonoo ana nou, o loaa ole paha ; nolaila, ia'u i kipa mai ai ma ko oukou Mokupuni nei, ia'u iloko o ka Hale Alii o Cinigamalaina, ma ke awakea o ka la o ka po a kaua e ike nei, halawai mai la me a'u ka leo o ko kaua Akua ;— e olelo ana ia'u, " E hele oe e lawe mai ia Tamala, a e hoopaa i kona lima Akau me kou, e noho olua malalo o ka Berita paa o ke Kuikahi a hiki i ko olua mau la hope, no ka mea, o ka hoohalawai mua ana ia olua ma ka moeuhane, mai A'u aku ia." A mamuli o keia leo, ua haawiia mai ia'u ka makaukau e kamailio pu me oe, mamuli o ko kaua aoao haipule."
A lohe o Tamala i keia olelo, i aku la oia. " Ua nui kau mau mea i olelo mai nei ia'u, aka, o kona ano oiaio, ua makemake oe e hoohaumia mai ia'u. He oiaio, ua loaa wau ia oe ma ka moeuhane, a pela no hoi au, ua loaa no hoi oe ia'u ma ka moeuhane, iloko o na hihio, a me na akaku, ua halawai mau mai oe me a'u, e like me ka hoomaka ana o ka manawa i loaa'i au ia oe, oia no kou manawa i loaa'i ia'u : A o ka loihi o ka manawa ia oe, pela ka loihi o ka manawa ia'u. A no ia mea, ike iho la au ua pilikia kuu uhane no ia mea, nolaila, pule aku la wau i ke Akua i na manawa a pau o ka hiki ana mai oia moeuhane ; lilo iho la ia ike ana a'u ia oe i " welu aila" imua o'u : A nolaila, heaha la oe ia'u ? A nolaila, o ka manao maopopo mai a'u aku, e hoi oe. O ka mea au i olelo mai nei, " Na ke Akua oe i hoouna mai e halawai me a'u," he wahahee ia." I aku la o Asimeda. " A no kau mea i olelo mai nei, " Aole au na ke Akua i hoouna mai e halawai me oe," ke ehaeha nei kuu uhane nou, no ka mea, ua hoole oe i ka mea a ka Haku Iesu i oluolu ai. A nolaila, ke noi aku nei au ia oe e wehe mai i ka puka, i ike ai oe i ka mea a ka Haku e hana ai nou."
A no ia hana ana'ku a Asimeda, wehe hou mai la o Tamala i ka puka, ninau aku la ia Asimeda, " Eia wau. Heaha ka ka Haku mea e hana mai ai no'u ? E hai mai."
Ninau aku la o Asimeda ia Tamala, " Ke ike mai nei anei oe ia'u ?" " Ae ke ike aku nei au ia oe," wahi a Tamala, " No ka mea, ua makaukau kou mau lima e powa mai ia'u." I aku la o Asimeda, " Heaha la kau mea e hookui pinepine nei ia'u ia olelo pono ole ? Ke i aku aku nei au ia oe, i na he wahine haipule oe, i na ua ike oe i ka ka Haku mea e hana aku ai nou a me a'u pu."
Olelo hou mai o Tamala ; " Ua ike au ka ka Haku mea e hana mai ai no'u, mamuli oia ano i hilinai nui ai au i ka Haku."
Ninau hou aku la o Asimeda, " Ina ua ike oe i ka ka Haku mea i hana mai ai nou, i na ua manaoio oe i ka'u mea i olelo mua'ku ai ia oe, a no kou ike ole ia mea, nolaila, ua ike ole oe i ka Anela e ku nei ma kuu lima akau, a me kuu lima hema, a o ka Haku au e hilinai nui nei, eia no ia maluna o'u ano, e amo ana i ke Ke-a, nolaila, e manaoio mai oe i ka'u mau olelo, i lilo ai oe i wahine haipule io no Iesu."
I aku la o Tamala, " Heaha oe i makemake nui ai i ka hoopunipuni ? I olelo hooiaio ai oe, " Aia na Anela elua ma ou mau aoao, a me ka Haku pu maluna ou."
I aku la o Asimeda, " Ke hoopau loa nei au i ka'u ao ana ia oe, i mea e manaoio ai oe i na mea a pau a'u i olelo mua'e nei, no ka mea, ke ike nei au, e aneane ana kou manaoio haipule e lele mai a oe uku, no ka mea, ua haule oe mamuli o kou manaoio kuhihewa : A i mea e ike ai oe, eia ka Haku me a'u i keia hora, a na ka Haku mai keia halawai ana o kaua i keia po. A nolaila, ke hai aku nei au ia oe i ka olelo hoike maopopo no ko ka Haku lawe ana mai ia'u.— E nana oe i keia Pa au e ike nei, i hanaia ekolu hapaha mile ke kiekie, i hanaia a pahee owaho me ko loko, he mea e pale aku ana i na enemi ; ua hoopaaia me na pani hao ehiku, me na Lala nui paa loa, i kukulu paaia'i ko oukou maluhia : He mau haneri makahiki mamua ae nei, aole i loheia, a i ikeia hoi iwaena o ko oukou lahui kekahi mea i komo mai iloko nei e like me a'u e kamailio loihi nei me oe i keia po : A nolaila, e kuu makamaka haipule e ; aole anei e hiki ia oe ke noonoo iho, o ke Akua ko'u mea nana i lawe mai iloko nei, maluna o ka eheu o na Anela, i kuleana ai wau ma ka ike ana me oe i keia po ? A no kou manaoio ole i ka'u mau mea a pau e olelo nei ia oe, nolaila, ua hiki mai ka leo ia'u ano mai ka lani mai, e kaili koke ia ana wau mai keia halawai ana o kaua, a e huna ia'u mai kou maka aku ma ke ano hoomaluleia, a e laweia aku au maluna o ka eheu o na Anela, a hoonoho ia'u ma ka lani kuakaa i luna lilo. A na'u no e Hookolokolo mua ia oe ke hiki ae oe ilaila : O ka pau keia ; Aloha oe."
Hele aku la o Asimeda mai ka hale aku o Tamala a ma kahi mamao aku, a pee mai la, i mea e lohe aku ai oia i ka leo o Tamala.
Ia manawa, lohe aku la o Asimeda i ka leo pihoihoi o Tamala, e hea ana, " E Asimeda e ! E ke Kauwa a kuu Akua ; mai wikiwiki oe i ka huhu a haalele mai i kau Kauwa wahine nei, no ka mea, ke wehe nei au i ka puka o kuu hale nou, i hai hou mai ai oe i ka mea pono ia'u e hana aku ai ia oe a i ko kaua Akua."
A lohe o Asimeda i keia leo o Tamala, aole oia i wikiwiki e hoi hou aku : A i mea e lohe hou ai oia i ka lua o ka leo kahea hou mai a Tamala mai, nolaila, kali iho la oia ; aka, aole i hea hou mai o Tamala.
Mahope iho o ka Tamala hea ana mai ia Asimeda, kali iho la oia a hala elima minute paha, aole nae oia i ike hou ia Asimeda : Nolaila, hoi ae la o Tamala a ma ka rumi e pule ai, me ka wehe i na puka o kona hale, alaila, pule aku la o Tamala :
" E ka Haku ; E aloha mai oe ia'u,
E ka Haku ; E kokua mai oe ia'u,
E ka Haku ; E lawe hou mai oe ia Asimeda,
No ka mea, ua makaukau au e oluolu pu maua ma ke kamailio ana,
No ka mea., ua hewa au ma ko'u manao,
E ka Makua, E hoouna mai oe ia Maria,
E lawe mai ia Asimeda,
E Petoro, e pule aku oe i ke Akua,
E hoouna hou mai ia Asimeda,
Ke oluolu nei kuu uhane,
E halawai pu me ia,
I ka inoa o ka Makua,
A me ke Keiki,
A me ka Uhane Hemolele — Amene."
A i ka pau ana ae o ka Tamala pule ana, kikeke ana o Asimeda ma ka puka, no ka mea, ua ike iho la oia ua haawi pau loa ia ka manao o Tamala ma ke ano haipule, holo koke mai la o Tamala a ma ka puka, ike mai la ia Asimeda, ia wa, kukuli iho la o Tamala imua o Asimeda, me ka i mai :
" Mamua o kuu kamailio oluolu ana me oe, pono ia oe ke kala mai, i mea e nani ai ka'u olelo ana." I aku la o Asimeda me ka leo nui ano huhu. (Eia ka he wai oloko) " Aole e hiki ia'u ke hoomaikai aku ia oe, aole no hoi e hiki ke kala aku, ke ole oe e manaoio i ka'u mau mea i olelo mua ai ia oe." " Ke manaoio nei au i na mea a pau au i olelo mai ai, ke ole oe e hoohuli hou ae i ka maikai o kau olelo mua i mea ino." I aku la o Asimeda ; " Ua kalaia oe, o oe me a'u i kela noho ana Lani ; aole a'u ino e hana aku ana nou, no ka mea, e like me ka'u olelo mua ia oe, e oia mau ana no ; aka, o ka mea au i manao ai e olelo mai ia'u e pono oe ke olelo mai." I aku la o Tamala ia Asimeda ; " Ua makaukau ka puka nou, nolaila, e komo ae oe a ma ka rumi hookipa, alaila, e olelo aku au ia oe." Alaila, komo ae la o Asimeda a ma kahi i kuhikuhiia nona. I aku la o Tamala ; " Ke manaoio nei au i na mea a pau au i olelo mai ai ia'u : He oiaio, na ke Akua oe i hoouna mai i o'u nei, i hoopaa ai kaua i na lima akau o kaua malalo o ka Berita paa o ka manao kuikahi. Aka, o ka honi au i noi mai ai no'u ma ko kaua aoao haipule, e pono e waihoa ia mea pela : A nolaila, e hoi oe i keia po, a ma ka hale i hoomakaukauia nou, a malaila oe e kali ai, a loaa ia'u ka hoopomaikaia mai ka Epitobo Nui mai, a me ka poe nana i hookiekie ae ia'u ma na mea a kaua i kamailio mua ae nei, nolaila, e hoouna aku no au i ka olelo kauoha ia oe me kuu palapala pu ma ka lima o ka Luna e hiki aku ai i ou la, alaila, ua hookoia, ia manawa oe e komo mai ai iloko nei me ke kaulua ole. Aka, i na i kali oe, aole he luna e hiki aku i ou la i ka la apopo, alaila, aole i ae ia."
(Aole i pau.)
KA MOOLELO.
— O —
HAWAII NEI.
HELU 4.
NO KE KAAPUNI MAKAIKAI I NA WAHI KAULANA A ME NA KUPUA, A ME NA'LII KAHIKO MAI HAWAII A NIIHAU.
Kaha iho la au e ike i ka makalua o Maikoha, aia ma Puiwa, ma ke kapa kahawai. Ua oleloia na kupuna kahiko loa o Hawaii nei : Aole kapa maoli. Eia ke kapa o ka ahu moena ; o ka laui maloo i ulana makalii ia ma ke au ; a waiho ia ka laui mawaho : O ka paaa i ulanaia, a mawaho ka huluhulu. O ka akia i uhole a ku kai ia, a ulanaia mawaho ke keokeo o ka lauhulu.
I ka make ana o Maikoha, kauoha mai oia i kana mau kaikamahine. " A i make au ; e lawe olua ia'u a ma kapa kahawai e kanu ai ; a i ulu mai ka laau maloko mai o kuu lua : Oia ke kapa, ka pau, ka malo a me na pono o olua. O ka ili owaho."
Hooko iho la na kaikamahine ; a ulu mai ka laau. Oia hoi ka wauke. A ike na kaikamahine, kii aku la a hana iho la, a kuku iho la i kapa, i pau, a i malo ; a kahe iho la ka wai, ulu iho la ka wauke ma kahawai a hiki i kai o Kikihale.
Oia ka laha ana o ka wauke ma Hawaii nei. Eia hoi na kapa ; he paiula, he moelola, he puakoali, ke uauahi, he makue, he kaha, he aeokahaloa, he pulou, he holei, he puulepo, he aho, he ahapii, he akoa, he ihuanu, he puukuikui.
Eia hoi na pa-u : He nau, he kumanomano, he waialua, he puaniu, he halakea, he palupalu, he uaua, he paikukui, he mahuna, he puakai, he wailiilii, he pele, he pukohukohu, he moeula.
Eia hoi ka malo : He kapeke, he hamoula, he haena, he puakai, he uaua, he puahala, he moeula, he ninikea.
Eia hoi ke kihei : He kalukalu, he akaka, he pauakoa, paukikokiko, paunahunahu, he paunanahu, he paupaiula.
O na kaikamahine a Maikoha, o Lauhuki, o Laahana ; lilo laua i mau Aumakua no ka poe a-kuku, a me ka poe kapala. O Maikoha, ua lilo ia i aumakua no ka poe kanu wauke. O ke kino o Maikoha, ua kalaii i mau umeke, ua waihoia imua i na Kahuna, a i na'lii, he mea hoomanao.
Oia na kumu hana kapa ma Hawaii nei, a ikeia ka wauke ; ua loaa ke kapa, alaila, ua imi ia ke kapa i ka ili o ka mamaki, maaloa, poulu.
Pau ko'u makaikai ana ia wahi, huli ae au e ike i kahi i make ai o Kaiana i ke kaua ma Nuuanu i ka M. H. 1795. He alii o Kaiana, he moopuna na Keawe Alii Nui o Hawaii ; no ka ohana alii o Maui kona makuahine.
Ua mahaloia o Kaiana i ke akamai i ke kaakaua, i ke kakaolelo, i ke kalaiaina ; o na olelo huna a Kamehameha me na kukini, ua ike ia e Kaiana.
I ka wa i Hawaii o Kamehameha, ua like ka haihai olelo ana o na'lii i ke kaua me Kaiana : Aka, i ka hiki ana o na'lii a me Kamehameha i Molokai. Ua manao o Kamehameha me na Kuhina a me na Kakaolelo e make o Kaiana. Ua hookumakaia ia oia ma Kaunakahakai. Ua ike no ia, a ua lohe no i kona ohumu ia. Nolaila i olelo aku ai i kona kaikaika ia Malailua Nahiolea, e kipi mahope o na keiki a ko laua kaikuaana o Kahekili.
Aka, no ka halialia ana mai o kana mau olelo hiehie ; a hoohanohano i na'lii a me kona poe koa. I kona kaua ana me na'lii o Kau me Keoua ; ma Puaakoki i Puna.
Penei kana olelo i na koa iloko o ka Poe kaua e kokoke ana ka hoouka kaua : " E li ana, iluna, ilalo, eu kolea i ka puapua, eu ke kanaka e a-i ka hanu." Ike aku la oia i kekahi alii ; olelo aku la ; " Eia'la !" Olelo mai kela alii ; " Alo paha au oi ala ; o Namakeha au i ka lani, o na maka o Kalanikuihonoikamoku." " He haule, he walewale, he poina. " Kou la i koa ai." " A Hana au i Kauiki : Hoopii mai au i ka'u Poe kaua, ua komo mai hoi i ka hulili ; pa kuu maka i ka ala." " Kiekie ; aia iluna lilo, i ke ao eleele — la — o luna lilo aku : Maluna ae hoi o Makalii ; malalo iki iho." " E Kalaikuaiwa a Ahuula e !" " E-o," " Na Ahuula oe na Ahuula au." " O kou la i koa ai."
" A Koolau au i Laiepuao ; ki au i kuu pu ilaila ; ohalahala ka pu a Kalaikuaiwa." " Aia ilalo ; he lalo loa aku hoi o Wakea ; maluna iki ae."
Ua make hoi o Nahiolea ma ke kahea hoopunipuniia e ka poe lanakila ; e hoepaepa ana ma ke kahea ana. Ua kuhi oia he oiaio ; a ua hoike mai oia ; a ua hopu ia ; a ua pepehia. Auwe ! Aloha ino ka poe i hala e aku.
He Alii o Nahiolea no ka Ohana Alii Oahu, me Maui, a me Hawaii.
O Kuimeheua ka makuakane, o Kaupekamoku ka makuahine. O ke Akua kai ike i ka lakou poe mamo, a me ka hoomahuahua ana aku.
I kuu nana ana ia Nuuanu, he kahua kaua kaulana ia i ka wa kahiko. Oia no hoi ke kahua kaua mua a Peleiholani i ku ai i kona aupuni Oahu. A mahope iho o ka make ana o Kapiiohookalani, i Kawela, ma Molokai ia Alapai, ke alii o Hawaii, i ka M. H. 1736.
He nui na wahi kaulana, o Kanoniakapueo, o Nahuina, o Kahapaakai, Luakaha, Pohakumanamana, Makuku, Kukuipuka, Kaniakapuula, Pu, a me Poiake. " O na wahine kiai alanui, o Hapuu, o Kalaiohauola.
Ina e hoike pakahi au i ka moolelo o keia pae aina, mai Hawaii a Niihau, aole no e pau iloko o na makahiki he iwakalua.
I ko'u ku ana e nana i ka nuku o Nuuanu, hoomanao mai la au i keia wahi mele penei :
" Pa makaha Nuuanu na ka makani, He pa uluhe hiwa na Kauahaao, He loko papohaku na ke Kiowao,