Ka Nupepa Kuokoa, Volume IV, Number 28, 13 July 1865 — Page 1

Page PDF (1.46 MB)

KA NUPEPA KUOKOA
KE KILOHANA POOKELA NO KA LAHUI HAWAII.
BUKE IV. HELU 28. HONOLULU, IULAI 13, 1865. NA HELU A PAU 189.

" KA NUPEPA KUOKOA.,"
HOOPUKA MAU IA MA HONOLULU
I kela Poaha keia Poaha.
$2.00 no na mahina he UMIKUMAMALUA,
$1.00 no na mahina eono, ME KA HOOKAA MUA MAI.

NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani, $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O KA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA — ma ke kihi hema o ka Hale Hookipa Luina (Sailor's Home.) O na hora hana, mai ka eiwa o kakahiaka, a i ka ha o ke ahiahi.
L. H. KULIKA, (Lona Hooponopono.)

KA " NUPEPA KUOKOA."
Is published in Honolulu
EVERY THURSDAY,
$2 00 per annum, or $1.00 per six
months, in advance.

ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must he paid for in advance. KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives will be inserted on the subscription list until paid for. This rule must be strictly adhered to, on account of the low subscription price. THE OFFICE OF THE KUOKOA is in the South corner of the Sailors' Home. Office hours from 9 A. M. to 4 P. M.
L H. GULICK.
Publisher.
Volume I. II. and III of the KUOKOA, bound, for sale, $3.50 each.
Persons having complete sets of the above, can have them bound by paying $1.50 each.

KA BUKE UNUHIOLELO A ANERU !

                UA PAA UA BUKE NEI, E HOIKE ANA I ke ano o na hua olelo Hawaii, a ke kuai ia nei ma ka Hale Kuai Buke o Wini. Elua ano o ua Buke la ma ke kuai ana, $5 Dala ko kekahi, $6 Dala o kekahi. Eli-
ma haneri me kanalima kumamaiwa aoao iloko o keia BUKE UNUHIOLELO, a ua piha loa i ka momona o ka naauao.
H. M. WINI. Mea Hoopuka Honolulu, Mei 22, 1865.

S. KUPANEA. J. W. KEAWEHUNAHALA.
Loio ! Loio !

                KE HOOLAHAIA'KU NEI I NA KANAka a pau o keia Aupuni, ua makaukau na mea nona na inoa maluna e Kokua, a e lilo hoi i LOIO no na mea a pau e loohia ia'na i ka hihia, a e pale ana no kekahi hihia imua o na Aha Hookolokolo o keia Aupuni. He mau mea laua i aoia i ka OIHANA HOONAAUAO ma ke Kulanui o LAHAINALUNA, a ua aoia hoi ma ka OIHANA Kanawai, a me ke kakau ana i na Palapala o kela ano keia ano, e ka Mea Hanohano G. M. ROBERTSON (LOPIKANA.) A o ko laua Hale Oihana, aia mauka iho o ka huina o ke Alanui Hotele a me Maunakea ma Honolulu, Oahu.
Honolulu. Feb. 6, 1865. 167-y

HUA KUKUI, HUA KUKUI.

            E IKE AUANEI NA MEA A PAU LOA O ke kua aina, owau o ka mea nona ka inoa malalo iho nei, he hoaloha no oukou no na kau i hala ae nei, ma ke kuai Pepeiao Laau ana. Ua hala aku la ia kikina, he AU HOU keia, a ke kahea aku nei au, e kuai no au i na HUA KUKUI i kalua ia a moa, alaila, e ki-ke ia ka iwi a pau, a o ka IO wale no ke lawe mai, e hoomaemae i ka la a maloo maikai. A e haawi no wae EKOLU DALA ME HAPALUA ($3.50) no ka barela hookahi. I ka poe e imi ana i keia, a lawe mai, e loaa no wau ia lakou ma ka Halepohaku o M. Kekuanaoa, ma AIENUI.
E WIKI, MAI KAULUA !
CHUNG HOON & CO. Aienui, Honolulu, Mei 1, 1865. 2-3m

HALE PAI KII.

                AIA KO'U HALEPAI KII MA KA HALE e pili ana me ka Hale Leta, maluna'e o ke Keena Pai o ka " Nupepa Kuokoa," Ua emi loa na kii. Elima dala no ke Kakini Pepa Kii hookahi. A elua wale no dala no ke kii aniani.
H. L. CHASE (Keiki.)
174-6m Mea Pai Kii.

KUOKOA HUMUHUMUIA.
EKOLU BUKE — BUKE 1, 2, A ME 3

                Umi ke kumukuai no na buke ekolu. No ka akahi buke $3.50. E ninau ma ka Hale buke o H. M. WINI.

Na Buke i Pai ia e ka Papa Hawaii.

Eia na buke kuai, a me ke kumukuai, Baibala nui no na Awai o na Halepule, $4 00
  " Ohana, ano nui, me na kii, } { 2 50
a me na Moohana, } 5 00
  " Ohana uuku iho, me na Moohana, ili ulaula, } 1 00
  " Ohana, me na Moohana wale no, 62 1/2
  " Okoa, - - - 50
Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 1/2
Kauoha Hou, hapa haole (Haw. Eng.) 25
Haiao, - - - - - 25
Hele Malihini Ana, - - - - 25
Wehewehehala, - - - - - 25
Lira Hawaii, - - - - - 25
Na Olelo Hoopomaikai, - - - 25
No ko ke Akua Ano, - - - - - 25
Lira Kamalii, - - - - - 25
Kumumua Hou, - - - - - 12 1/2
Moolelo Ekalesia, - - - - - 50
Hoike Palapala Hemolele, - - - - -25
Himeni Hawaii me na Leo Mele, 1834, 25
Ninauhoike, - - - - - 12 1/2

Eia na buke i haawi waleia.
Haawina Baibala.
Ui.
Olelo Ao i na Wahine Hawaii.
Na Dawida Malo Kumumanao.
Ko Olelo Ao Liilii.
Ka Moolelo o Batimea Puaaiki.
L. H. Kulika.
Kakauolelo o ka Papa Hooko o ka Ahahui Euanelio o Hawaii.

Ka Nupepa Kuokoa.

KE KAAO O ASIMEDA !
HELU 7.
(I unuhiia noloko ae o ka Buke Moole-
lo a Geberiana.)

                Mahope iho o ka laua kamailio oluolu ana, hoi aku la o Asimeda ma ke alanui ana i hele mai ai a hiki i kahi mau ona, ma ka Hale Alii o Cinigamalaina, oia ka hora ekolu o ka wanaao.
            Ma ke kakahiakanui o ua la la, hoouna mai la ke Alii moku o ka manuwa Helu 1 i kona Ahaiolelo me ka i aku ; " E holo ae iuka ma ka Hale Alii o Cinigamalaina, e ike pono i ke ola o ke Alii (Asimeda,) a e hoi mai oe a hai mai ia makou." Nolaila, holo aku la ka Ahaiolelo iuka e like me ke kauoha.
            I ka Ahaiolelo i hiki aku ai ma ka Hale Alii ; a i na kaikamahine lawelawe hoi malalo o Asimeda e noho mai ana, ninau aku la ka Ahaiolelo, " Auhea la ke Alii ?" Hai mai la na kaikamahine, " E-i ae no : I ka holoholo no i keia po, a ma ka hora ekolu o keia wanaao ka hoi ana mai."
            A lohe ka Ahaiolelo i keia mea, hoi aku la a hai i ke Alii moku : Ia manawa, ua hoihoiia mai ko lakou naau kaumaha no ke Alii Asimeda : Ma ia kakahiaka no, ma ka hora ewalu paha, haawi ae la na moku manuwa a pau i ko lakou olioli i ekolu hora ma ke ki pu ana : (E waiho kakou malaila, e pono e kamailio hou no Tamala.)
            Mahope iho o ko Asimeda kaawale ana mai ka launa pu ana me Tamala. Hele aku la o Tamala i ka luakini, i pule aku ai oia imua o ke Akua, no ko laua halawai ana me Asimeda : Ua pono paha, aole paha.
            A pau kana pule ana, hiki mai la ka Epitobo a ku ma ka puka, a puka mai la o Tamala mailoko mai o ka luakini, e ku ana ua Epitobo nei, ia manawa, kukuli iho la o Tamala imua o ka Epitobo, me ka i aku : " Auhea oe, e kala mai oe ia'u mamua o kuu olelo ana aku ia oe ; no ka mea, ua hiki mai au maloko nei i ka manawa aole i ae ia no'u ; a o ka manawa i ae ia no'u, ua pale ae au ia mea, aka, aole no he kumu nui e ae o ko'u hiki ana maloko nei i keia manawa, o ka halawai wale ana no o maua me Asimeda, ka mea a'u e moeuhane mau ai, a'u hoi e olelo pinepine ana ia oukou iloko o na makahiki he nui mamua ae nei."
            I aku la ka Epitobo ; " Aole o'u kuleana e hiki ai ia'u e kala aku ia oe, no ka mea, aole oe i hewa ; aka, ke olioli nei au imua o ke Akua ano, no kona hoouna ana mai i kane nau e like me ka makou noi ana'ku, i kulike ai me ko makou makemake : A o ua mea la nana i hoohalawai mai ia oe i keia manawa, no ka lani mai ia, aole ia no keia ao. O ka hooko hope loa ana ia o ka makou pule ; a no ia mea, he pono oe ke hooko aku i kana mea i noi mai ai." A pau ka laua kamailio ana, komo aku la ka Epitobo i ka luakini e like me kona ano mau.
            A pau ka manawa o ka Epitobo, mahope iho oia manawa ; hui ae la na mea a pau e like me ka lakou mea mau : Oia ka manawa a Tamala i komo mai ai.
            Ia manawa, i ka lehulehu e akoakoa ana : Ku mai la ua Epitobo Nui nei iluna o ke Kuahu, a olelo mai la, " Aole a kakou hana nui i keia manawa e like me na halawai mamua, no ka mea, ke makemake nei au e hai aku i kekahi mea hou e pili ana i ka " HUA O KO KAKOU OPU." Ia manawa, hooneoneo iho la ka ahakanaka ; alaila, ku mai la o Tamala, a olelo ae la i na mea a laua i olelo ai me Asimeda, (e like me ka hoike ana ma ka Helu 6) A pau ka Tamala olelo ana, ku mai la ka Epitobo, a olele ae la i ke Anaina. " Pomaikai kakou i ka lohe ana i keia mea ; no ka mea, he mau makahiki mamua ae nei, ua nui a lehulehu ka kakou noi ana i ke Akua, " E haawi mai i kane kupono" na ka " HUA O KO KAKOU OPU" oia nei ; aka, aole nae i makehewa ka kakou pule ana no ia mea, ua hookoia mai ia noi ana a kakou, no ka mea, ke lohe ae la no kakou i ka mea nana i hoohalawai mua ka kakou kaikamahine :
            A ke hooiaio nei au i keia manawa, aole no keia honua nei ke kane a ka kakou kaikamahine, no ka lani mai no ia, nolaila, o kuu manao maopopo, he pono ia kakou ke hooko aku e mare o Tamala me kela keiki ; a o ka hooko hope ana, ua like me ke kupono a me ka pololei i ka oukou noonoo ana." Ia wa, hooho koke mai la ka aha me ka leo oliloli, " E ae aku e mare ! E ae aku e mare !! A pela aku.
            Ia manawa, kauoha ae la ka Epitobo ia Tamala e kakau aku i palapala ia Asimeda e komo aku iloko o ka pa. Alaila, kakau iho la o Tamala i palapala, a hoouna aku la i ka Luna maloko o ka Hale Kaa, a puka aku la iwaho a hiki ma ka Hale Alii o Cinigamalaina, a haawi aku la i na kaikamahine, a lawe loa aku la ia Asimeda, oiai e hiamoe ana oia.
            I ka manawa i komo aku ai ka palapala, lohe ae la oia i ke kamumumu ana o ke pakaukau iloko o kona poliuliu hiamoe, ia wa ike mai la oia he palapala ke waiho ana, ia manawa hoopau loa ae la oia i kona hiamoe, kii aku la i ka palapala, aole nae oia i wikiwiki e nana, no ka mea, waiho iho la oia elima minute paha, me kona manao, he palapala e hoahewa mai ana ia ia no kona komo ana iloko ia po ; a i ole ia, no kona ae ia paha e komo aku. A pau kona pihoihoi, wehe ae la oia i ka wepa o ua leta nei, aole nae oia i wikiwiki e nana mua ma ke poo, aka, nana mua oia malalo, aia hoi e kau ana ka inoa malalo, o ka inoa hoi o kana mea i moeuhane ai ; alaila, heluhelu iho la oia i na olelo a pau o ka leta, e like me keia ka olelo :
E ASIMEDA }
KE ALII E ; }
            Aloha oe :— Ua hiki mai ka hookoia ana o ka kaua mea i kamailio ai ma ka po i hala iho nei, no ka mea, ia oe i haalele iho ai ia'u, mahope iho o ka kaua kamailio ana, hele aku la au ma ka luakini, a hoomaikai aku la i ke Akua, no ka kaua mea i kamailio ai ; ia manawa, hiki ae la ka Epitobo nui, ahai aku la au ia oe. A ma keia kakahiaka hoi, hui ae la ka lehulehu a pau loa, ia manawa ko'u hai ana aku ia oe, a me na mea a pau a kaua i kamailio ai. A no ia mea, ua apono ia oe. A mamuli hoi o ka makou ae like ana, a hooholo ana hoi, nolaila, ke kauoha aku nei au ia oe, e kau koke ae oe maluna o ka Hale-Kaa a'u e hoouna aku nei, mahope iho o ka pau ana o kau heluhelu ana i keia palapala, a e komo mai oe iloko nei, ia manawa e hooko pau loa ia aku ai kau mau mea a pau i noi mai ai.
TAMALA,
Kau Kauwa.
            Ike iho la o Asimeda, ua maikai ka olelo kauoha nona mai kana wahine hoopalau mai, aka, aole nae e hiki ia ia ke hooko koke aku e like me ke kauoha, a, nolaila, kakau iho la oia he wahi palapala penei : E TAMALA,
            Aloha oe :— Ua loaa mai kau palapala ia'u ma ka lima mai o ka Luna, mai loko ae o ka Hale-Kaa au i hoouna mai ai no'u, aka, he mea olioli nui ia no'u. A no kau olelo hope, "e kau koke au maluna o ka Hale-Kaa, mahope iho o ka pau ana o ka'u heluhelu ana i kau palapala." Aole pela e pono ai au e hooko aku, no ka mea, he mau makahiki mamua ae nei, a iloko o kuu manawa e ike uhane ana ia oe, he oiaio, ua hoomakaukau au i kapa nou no ko kaua la e mare ai. Ua kuai au me ke kumukuai nui hiki ole ia'u ke hoomanao; o kuu Kakauolelo kai ike. A mamuli o keia mea, ke noi aku nei au ia oe e ae mai e puka mai i waho nei, i hoaahu aku ai au ia oe no na mea a'u i hoomakaukau ai nou; i hiki ai hoi ia'u ke kauoha ae i ko'u mau Moku Manuwa, e haawi ae i ka hanohano nui no ko kaua mare ana malalo o ka inoa o kuu Aupuni. A i loaa ka ae ia mai kou lehulehu mai no kou puka mai iwaho nei, alaila, e waiho hou mai oe i palapala hoike no ia mau mea, i makaukau ai au mamua o kou hiki ana mai."
ASIMEDA,
Kau Kauwa.
            A hiki aku la keia palapala ia Tamara, a hai ia aku la imua o ka poe nana ia e ae mai. A mamuli oia mea, ua emoole hiki ana ka palapala hoike imua o Asimeda, e like me keia :
E ASIMEDA }
KE ALII E ; }
ALOHA OE :
            Ua loaa ia kaua ka hoopomaikaiia ma kau mea i palapala mai nei ; a no ia mea, e hoomaka no au e hiki aku i ou la ke loaa ia'u ka manawa maopopo e puka aku ai iwaho mai a oe mai ; no ka mea, aole he hana i koe e kaulua ai wau.
TAMALA,
Kau Kauwa.
            A hiki keia palapala ia Asimeda, ia manawa, kakau hou aku la o Asimeda he wahi palapala penei : E TAMALA MAIKAI E ;
ALOHA OE :
            Ke hoomaikai ae nei au i ko kaua Akua no na pomaikai i hookoia mai maluna o kaua mamuli o kau palapala i loaa mai nei ia'u ano ; a nolaila, i ekolu hora mahope iho o ka loaa ana'ku o keia palapala ia oe, oia kou manawa e puka mai ai iwaho nei.
ASIMEDA,
Kau Kauwa.
            A hala keia palapala iloko, ia manawa, kauoha ae la o Asimeda i na'Lii o na manuwa a pau e akoakoa mai ma ka Hale Alii, mai ka Lutanela elua a hiki i na'Lii maluna loa, o lakou ka poe i kauohaia.
            A kokoke i ka manawa e puka mai ai o Tamala iwaho, kukuluia'ku la na laina o na alii koa ma na aoao elua o ke Alanui mai ka puka mai o ka pa a hiki i ka Hale Alii, a o na mea puhi-ohe a me na hookani-pahu, ua kukuluia ma ka puka ponoi e hemo mai ai o Tamala, a o kekahi o na mahele oia ano, ua kukuluia ma ka hapalua ponoi o na laina, a o ka mahele akahi oia ano, ua kukuluia mawaho o ka lanai ma ka papa hele ma kahi e kokoke aku ana i ke Alapii.
            A hiki i ka manawa i ae ia no Tamala e puka mai iwaho, i ka wa hoi o ka la i kiola pau mai ai i kona malamalama olinolino i ua la la, ia wa lohe aku la ka lehulehu i ke kani o na pani hao, a puka mai la o Tamala iwaho, ia manawa, hoomaka iho la na mea hookanikani o ke Alii e haawi ae i ka hanohano o ke Aupuni o Beritania maluna iho o Tamala.
            Ia Tamala i puka mai ai iwaho, ia ia hoi i ike aku ai i na laina alii koa e ku ana me ka hanohano, a me na mea hookanikani ia lakou iho ma ko lakou ano. Ia wa, he mea malihini loaia ia Tamala, aka nae, ua pauhia oia e ka naau eehia : A i mea e pono ai oia imua o keia hanohano, o haulehia paha auanei kona naau haipule i mea ole, nolaila, kukuli iho la oia iluna o ka Hale Kaa, e paa ana me ka Buke pule o ka Oihana Katolika, a hana aku la e like me ka mea mau : Aka, ma ia ano, ua mama mai ka manao kaumaha maluna ona. A hiki o Tamala i ka Hale Alii, ia manawa, haawi ae la na manuwa i na pu he lehulehu : Ia wa no hoi, hoomaka hou keia e pule e like me kona ano mau.
            Ia wa, aia hoi e noho ana na kaikamahine a Cinigamalaina maloko o kekahi rumi o ka Hale Alii ; a i ka puka ana mai o Asimeda mailoko mai o ka Hale Alii a ku ma ka papa hele o ka lanai, me kona Hanohano Nui, ua kahikoia i na ano o ka Oihana Moi.
            Ia wa, hele mai la na hoa ponoi o ke Alii, na mea i kauohaia, o lakou na mea e ku pu ma ka aoao akau o Asimeda i ka hora e mare ai ; a lawe aku la a hui me Asimeda, pili ae la o Tamala ma ka aoao hema o kana kane, a komo aku la o laua wale no ma ka Rumi Hooluana, a hoopaa ae la i ka puka mahope o laua.
            Ia manawa a laua i komo aku ai, holo aku la na kaikamahine Alii ma kekahi puka o ka Hale Alii me ko laua mau aahu nani o ka Oihana Alii, a kaa aku la i lalo o ka lepo, me ka naau kumakena, e uwe alala ana me ka leo hoohiki ino, " E Cinigamalaina e ! Auwe maua e !! Ua haule pu kakou i ke kuhihewa mamuli o ka maikai o ka olelo a ke Alii Asimeda, au hoi i haawi ae ai i ka maluhia o ko maua Hale Alii malalo o na kapuai hoopunipuni o keia keiki Alii me ko maua manao, nana e kaili mua'ku ia maua i ka ike mua ana, i nei mea he kane, eia ka hoi he hoopunipuni kana olelo. A nolaila, ke noi aku nei maua ia oe a no, e hookokoke mai oe ma-o maua nei me kau pahikaua, a e hooili iho maluna o maua : E aho paha ia mamua o ko maua ola ana, i ole ai maua e ike aku i ke kino haumia o keia keiki Alii i hoopihaia i ka hoopunipuni."
(Aole i pau.)

KA. MOOLELO.
— O —
HAWAII NEI.
HELU 5.
NO KE KAAPUNI MAKAIKAI I NA WAHI KAULANA A ME NA KUPUA, A ME NA'LII KAHIKO MAI HAWAII A NIIHAU.

                Holo e aku la keia mamua, a eli iho la i wahi lua, a kupou iho la, o ke poo malalo, a o ka elemu maluna, hooinohaluhalu ae la i ka makani, a pu makani ae la.
            O ke kaikuaana mamua, ike oia i ke kani o keia mea, holokiki oia ; me ka i iho a ma ka'u pu. A puhi iho la keia i ka olemu, e puhihio makani ae ana kela ; e okaoka, hanahana nae he lau la no ka pilo la. Olelo mai la kekahi, he pu hou, ua pala nui. E ohikihiki i ka laau, i pau ka pala o loko, alaila pau ka pala o loko kani ke puhi iho, alaila kii akula kekahi i ka laau, a hooponopono iho e ohelo, e olelo ae ana o Poiake. E aha ana oukou i ko'u olemu, ka-haha ! o Paiake no ka. Hu a ka aka i Kahaukomo.
            (Ina oukou e makemake e ike i ka pu a Poiake, na ka poe e noho maila i Kahuailanawai e kuhikuhi aku, i ka puka ana o Kahaukomo ma ka aoao ma uka o ke alanui kahiko.) I ko'u ku ana e nana ia Waipuilani, e iho haaheo mai ana kona mau kulu wai i opiopi ia e ka welelau o ka makani ; me he lauoho piipii la i hoanuunuuia la, a noho hoohiehie mai i ka pane poo o Lanihuli.
            Huli ae au e nana ia Waipuhia, ua moni ia kona mau huna wai e ka makani ; me he lauoho kalole la i luhe i ka makani, i kiaweawe makalii i ka lau o ke kawelu, ka puaki i ka pua o ka ahihi o Malailua. Hu mai la ko'u hoomanao i ko'u ike ana i ka mea huna. O ke ku mai a keia laau nui i nani kona mau lala, i luhe maikai kona lau, ua hoonua ia oluna e kona mau pua, a ma kona kumu he loko i hoomanao ia.
            Hoi mai la au a Niolopa, huli ae la au i ka aoao hikina, a ike aku la au i ka pohaku i pili ai o Kapuni, i kii mai i ka pu (oia hoi ka pu i kapaia o Kihapu.)
            E hoonanea iki kakou no kona wahi moolelo. (E waiho iki au i ke kumu mai o ka pu ; aia no ma Lahaina, aia a hiki kakou ilaila.)
            He keiki o Kapuni na Kauhola. Ua olelo ia oia he Alii i hanau i ka la hookahi, a hele no, a nui no, a kanaka makua no, a elemakule no, a make no i ka la hookahi.
            Ma Waipio kahi i hanau ai, a ua waiho ia iloko o Pakaalana o ka Heiau, a ua hoolilo ia i akua.
            Hele mai keia mau akua, o Kaakau me Kaohuwalu mai Puna mai. A luna o Hakalaoa ; nana ia lalo o Waipio. E lele ana o Kapuni iluna, a pa i ka lala kukui; haule no ilalo, lele no iluna, a pa no i ka omuku kukui, haule no ilalo. Olelo aku o Kaakau ia Kaohuwalu, e kii kaua ia Kapuni i hoahele no kaua, akahi no ua ikaika, o ke kaumaha o na kawau, oia ka mea i hiki ole ai ke lele, ae no hoi o Kaohuwalu, ia wa no ku ana laua nei ilalo.
            Hoolako laua nei e lele, a lele no, a haule i lalo. Olelo hou aku o Kaakau, e lele hou. Ia lele ana o Kapuni, e oki ae ana o Kaakau i na pohaku i kaumaha ai o na Opea, aole o kana mai o ka lele, oi lele-a-hiki i ka lani, hoi hou ilalo.
            Olelo aku o Kaakau, pehea oe ? " olelo mai o Kapuni. Ua mama au i ka lele."
            Olelo aku o Kaakau, e hele kakou i ka makaikai, ae mai la o Kapuni; ae. Haele aku la lakou i kukulu o Kahiki, a hoi mai lakou nei a Kauai; Lohe lakou nei i ke kani o ka pu a ke akua o Waolani.
            Olelo aku o Kapuni, heaha la keia mea kani. Olelo mai la o Kaakau he pu na ka poe eepa o Waolani, aia i Oahu. Makemake ino wahi a Kapuni. Aole anei e loaa ia kakou, olelo mai la o Kaakau; e loaa ana paha, aole paha, he nui ka poe kiai, mai Kahookane a ka nuku o Nuuanu. Mai Hononumi a Peapeakuaha. Aia ke alanui makai o Kalia, a ma Mamala ae, a ma ka Puuone aku no hoi, hiki i Leleiwi. Hoi mai lakou nei mai Kauai mai, a luna o Kahakea, noho lakou a po. Lele mai lakou a kela pohaku pili ilaila (oia ka pili o Kapuni), aia ka Heiau e kani ai o ka pahu iluna aku o Waolani, iluna o ka puu, o Pakaaluna ka inoa o ua Heiau la.
            Olelo aku o Kapuni ia Kaakau ma, e noho olua ia nei, i kali olua ia'u a i wehe ke alaula; ua make au. E hoi olua, aka i hoi mai au, alaila ua loaa ka pu.
            O ko ia nei hele aku la no ia a pili i ka pae humu o waho o ka Heiau, pili keia a paa loa. Kakali keia o ka hiamoe oloko a kiekie iluna o Humu ma, pii mai o Keoe, a kiekie iluna, pii mai o Nuuanu a kiekie iluna, pau oloko i ka hiamoe, o ko ia nei komo aku la no ia iloko a loaa ka pu. O ko ia nei lele mai la no ia a loaa o Kaakau ma. O ko lakou lele aku la no ia a ka lae o Kalaau; pa ua pu nei i ka ale, kani ua pu nei, lohe ke akua o Waolani, lilo ka pu i ka aihue. Aohe manawa paapu ana ke kai o Kaiwi. Pee ae ana o Kapuni ma iloko o ka ale. Huli wale ke akua aole loaa, hoi okoa ana.
            Lele aku lakou nei a ka moana o Maui me Hawaii, pa ana ua pu nei i ka puu ale, naha ke kihi, a hiki i ke kuahiwi o Hawaii; a luna o Hainoa kahi i kukulu ai o ka Heiau, a malaila kahi o na akua o Hawaii i akoakoa ai.
            O Kiha ke Alii o Hawaii ia manawa, e noho ana oia ma Waipio, o ka mahiai kana hana, o ke kanu awa, a o ke kukulu Heiau no kona mau akua. Aka, i ka manawa e kakai ai ka aha, ua lilo wale.
            I ka manawa i noho ai o Kiha ma Kawaihae i ke kukulu Heiau. I ke kapu ana i ka Heiau ; ua lele wale ka aha. Nolaila, pilikia ka manao o Kiha, a imi iho ia o Kiha i ka mea e loaa ai o ka pu.

NO PUAPUALENALENA.

                He ilio imi kahu o Puapualenalena mai Niihau mai, a loaa ke kahu i ke kaha o Hawaii.
            O keia ilio ka oi i ke akamai i ka aihue, i ka waiwai, i ka puaa, i ka moa, i ke kapa no ke kahu.
            Olelo aku la ke kahu, o ua ilio nei e kii i ka awa kapu a Kiha i lalo o Waipio.
            Hoomaka iho la ke kii o ua ilio nei i ka awa. Noke ia ka awa a pau o na pali o Waimanu a hiki ilalo o Waipio, a kokoke e pau ka awa.
            Nolaila, kauoha ke Alii e kiai ia ka awa e na kanaka, i loaa ka mea nana e aihue nei ka awa.
            I ka hoomaka ana e kiai a kokoke e ao ka po, alaila loaa ka aihue. Eia ka he Ilio ka aihue, oia ka mea i pau ai o ka awa. Ua alualu ia e na kanaka ka aihue, a loaa i kekaha iloko o ke ana, a ilaila ke kahu o ka ilio ua mahuna i ka awa.
            A ua lawe pio ia ke kahu a me ka ilio imua o ke Alii o Kiha, a ua paa ka manao o ke Alii e make ke kahu a me ka ilio ke loaa ole ka pu. Oia ke Kanawai i holo i ka manao o ke Alii.

NO KA LOAA ANA O KA PU.

                Ia manawa olelo iho ke kahu o ka ilio. Eia ka olelo paa a ke Alii ia kaua ina e loaa ole ka pu a ke akua ia kaua. A hookahi hope e loaa ia kaua o ka make mainoino, e holehole ia na iwi, i uku no ko kaua aihue ana i ka awa a ke Alii.
            Hoike mai la ka ilio i kona ano e lanakila no oia maluna o ke akua ke kii e aihue i ka pu.
            I ka uhi ana a ka po, i ka wa a ka pololei a me ke kahuli e hookani mai ai i ko laua leo mele, me ka leo winiwini nahenahe. A ia manawa i hookani ia mai ai na ano pu a pau.
            Aka, i ke ano ana o ka leo; ia manawa kani mai ai ka leo o Kihapu.
            " Kani o Kihapu kahea i Kauai, Kukulu a ka hale i Kamauliaola, Ola aku la ka noho ana a Kuulani, O ka lani o Waka ka kai laila, O Waka o ka wahine i ka pukui, Ola kapakapa-kaua lii, Haina 'ku e ka la i lonoia." Ia manawa aia ka ilio mawaho o ka hiku o ka anuu o ka pa. I ka wa i kakali loihi ai, a kokoke e ao; alaila, hiamoe ka poe kiai, alaila nihi aku la ka ilio a komo iloko, a wehe i ka pu a hemo, alaila hoomakaukau ka ilio iaia iho, a lele aku la oia mai loko aku o ka Heiau e ono humu a o ka hiku o ka humu owaho,— pa iho la, a kani ae la ua pu nei. A ala ae la ke akua, alualu aku la, aka, holo ka ilio a pee i ka wai o Hiilawe; a no ke ao e ana pau koke ka imi ana.
            Ua lawe ka ilio i ka pu imua o Kiha, oia ka Moi o Hawaii.
            Ua punahele ke kahu a me ka ilio. Ua kapaia ka inoa o ka pu mamuli o ka inoa o ke Alii o Hawaii o Kiha Pu.
            Ua malama ia keia pu e na'lii o Hawaii, mai kahiko mai a hiki i ka wa ia Kamehameha I, a me Kamehameha III. A aia paha ma Halealii i keia wa.
            O na iwi o Kapuni, ua hoomana ia i akua, a hiki i ke au ainoa, a aia paha ma Kaawaloa.