Ka Nupepa Kuokoa, Volume V, Number 6, 10 February 1866 — Page 1
KA NUPEPA KUOKOA:
KE KILOHANA POOKELA NO KA LAHUI HAWAII.
BUKE V. HELU 6. HONOLULU, FEBERUARI 10,1866. NA HELU A PAU 219.
"KA NUPEPA KUOKOA,"
HOOPUKA MAU IA MA HONOLULU I kela Poaono keia Poaono.
$2.00 no na mahina he UMIKUMAMALUA,
$1.00 no na mahina eono. ME KA HOOKAA MUA MAI.
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke kihi hema o ka Hale Hookipa Luina (Sailor's Home.) O na hora kana, ma ka eiwa o kakahiaka, a i ka ha o ke ahiahi. L. H. KULIKA. (Luna Hoopuka.)
KA "NUPEPA KUOKOA."
I s published in Honolulu. EVERY SATURDAY.
$2.00 per annum, or $1.00 per six months, in advance.
A DVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line.
PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is in the South corner of the Sailors' Home. Office hours from 9 A.M. to 4 P.M.
L. H. GULICK. Publisher.
Volume I, II, and III of the KUOKOA, bound, for sale, $3.50 each.
Pe rsons having complete sets of the above, can have them bound by paying $2.00 each.
HALE PAI KII.
AIA KO'U HALE PAI KII MA Monikahaae, Mawaena o ka HALEKUAI BIPI, a me ka HALEKUAI MEA AI o S. SAVIDGE ma ke Alanui Papu. He emi loa ke kumukuai o na KII. H. L. KEIKI (CHASE.) Mea Pai Kii. 174 1y
JOHN H. PATY !
Mea Hooiaio Palapala, Honolulu, Pae Aina Hawaii. AIA KONA KEENA HANA MA KA HALE Banako o Bihopa ma. 195-6m
J. W. KEAWEHUNAHALA.
Loio! Loio!
O KA POE MAKEMAKE I LOIO E KOKUA ma ka Hoopii ana, a pale ana ma ke Kanawai imua o na Aha Hookolokolo o kela Aupuni, e kii koko i ka mea nona ka inoae kau ae la maluna ; a e loaa no oia ma kona Hale noho i Kikihale ma uka o kahi o J. KAHAI Esqr., a i ole ia, e loaa no ma ka Hale Hookolokolo i Honolulu, Oahu. Honolulu, Feb 9, 1866. 219-1y
OLELO HOOLAHA!
I NA KANAKA HAWAII; Aloha oukou:—No kuu makemake e ike kela a me keia kanaka Hawaii i kahi e hiki ai ke hoowaiwai ia ia iho, no laila, ua pai au a ke hoouna'ku nei i keia palapala ma na kihi eha o keia mau Mokupuni, ma ka loa hoi a me ka laula o ka aina; a ke nonoi aku nei au ia oukou, e hoomaopopo i na olelo i hoikeia mahope nei.
Ke hai aku nei au ia oukou a pau loa, ua makaukau au e kuai i ka Loli: a penei ke kuai ana, a me ka hana ana no hoi, i maikai ai, a i makepono ai no hoi oukou ka poe e lawe mai ana i ka Loli:
Ka hana ana o ka Loli:—Aole e hoopakuia ka naau o ka Loli, o ke one ka mea hoolei aku, aole e kahaia ka opu, aka, e kaha no ma ke kua, i akahi iniha ke kaawale mai ke poo mai, alaila, hoomaka aku a koe hookahi iniha, alaila, e hookomo iloko o ka ipuhao i ke kai maoli o ka moana, a e hoolapalapa i elua paila ana o ka wai, a pau ia, kaulai a maloo maikai. A ina pela e hanaia'i, alaila, e kuai koke no au ia.
Ke kuai ana:—Aole e kuaiia ka Loli i emi malalo iho o ka eha (4) iniha ka loihi—mai ka eha iniha a pii ae iluna ka loihi o ka Loli i makemakeia, a o ke kumukuai penei noia: Ina EHA A ELIMA INIHA, he EONO KENETA ka uku o ka paona, a ina EONO iniha, he EHIKU KENETA ka uku o ka paona, a ina EHIKU iniha, a laila, he EWALU KENETA no ka paona, a pela no hoi e pii ae ai ka uku, e like me ka pii ana'e o ka nui o ka Loli.
No ka Pepeiao Laau:—Ua makemake no au i ka Pepeiao Laau, a e uku no au i ke kumukuai makepono ke lawe ia mai i o'u nei, no ka paona hookahi.
Lala Mano:—E kuai no au i ka Lala Mano a ka poe a pau e lawe mai ai io'u nei, i IWAKALUA KENETA o ka paona. Aia ko'u Halekuai ma ke Alanui Nuuanu, ma ka aoao makai o ka Halekuai o Ake (A. S. Cleghorn,) ma ka aoao hikina Alanui Nuuanu. Me ka mahalo. KIULANA. Pake Kalepa. Honolulu, Oct. 25, 1865. 204-6m
Na Buke i Pai ia e ka Papa Hawaii.
Eia na buke kuai, a me ke kumukuai.
Baibala nui no na Awai o na Halepule, $4 00
" Ohana, ano nui, me na kii, 2 50
a me na Moohana, 5 00
" Ohana uuku iho, me na Moohana, ili ulaula, 1 00
" Ohana, me na Moohana wale no, 62 ½
" Okoa, 50 Kauoha Kahiko, i paiia i ka M. H. 1838, 25
Kauoha Hou, me ka pepa lahilahi o waho, 12 ½
Kauoha Hou, hapa haole (Haw. Eng.) 25
Haiao, 25
Hele Malihini Ana, 25
Wehewehehala, 26
Li ra Hawaii, 25
No ko ke Akua Ano, 25
Li ra Kamalii, 25
Kumumua Hou, 12 ½
Moolelo Ekalesia, 50
Hoike Palapala Hemolele, 25
Himeni Hawaii me na Leo Mele, 1834, 25
Ninauhoike, 12 ½
Ui Kamalii no na Kula Sabati 12 ½
Kumu Leomele 12 ½
Eia na buke i haawi walei a.
Haawina Baibala.
Ui.
Na Dawida Malo Kumumanao.
Ko Olelo Ao Liilii.
Ka Moolelo o Batimea Puaaiki.
L. H. Kulika.
Kakauolelo o ka Papa Hooko o ka Ahahui Euanelio o Hawaii.
HE KAAO
- NO -
PIKOIAKAALALA !
Ke Keiki akamai i ka Pana.
HELU 9.
Ia Pikoiakaalala e hoopaapaa ana me na kamaaina o Leapuki, a hai aku la kekahi kanaka kamaaina ia olelo imua o kekahi keiki alii oia wahi, oia o Hoiu ; e lohe ae la o Hooiu no ka hoopaapaa o ke keiki malihini me na kamaaina, hele mai la ia a hiki i Puumanawalea, kahi hoi a ka aha hoopaapaa e ku pinai ana, hookowa ia'e la ka aha, i komo lea'ku ka mea hanohano. A hiki o Hoiu ma ke alo o Pikoiakaalala, ninau aku la ia, (Hoiu) " O oe no anei ke keiki nana i olelo ae nei i ka iole nui kuahinahina?" " Ae, owau no," wahi a Pikoiakaalala. " Aia i hea ? " wahi a ke keiki alii; " Aia no hoi ke moe mai la iwaena o kela pali la, mai luna ae la ka iho ana'e la i ka wa a makou e hoopaapaa ana, a no ka maona o ua iole la, moe iho la iwaena o ka pali."
Ma keia olelo a Pikoiakaalala no kana mea i ike ai, pane mai la ke keiki alii me ke okalakala kunahihi ano huhu, "nohea mai oe e na keiki wahahee, o kau ike ana'ku la, he iole ko ia pali ? Owau ke keiki kamaaina o nei wahi, aole nae au i ike he iole nui kuahinahina, ua hele hoi a wili na niho ma ke kua, he iole liilii wale no nae ; a oia ka mea nana e ai ka uala o uka o Panau." Alaila, pane aku la o Pikoiakaalala, " Ua kuhihewa oukou na ka iole liilii i aihue ka ai, aole, na kela iole nui no e moe mai la iwaena o ka pali la, nana no i aihue ka ai o Panau ; a no ka maona i ka ai e moe mai la." " He wahahee," wahi a ke keiki kamaaina. " Ina he iole io kau e olelo mai nei, a he aha kou kumu pili ? " " He mau iwi no ko kamahele kumu a mau no hoi i kou mau iwi," wahi a Pikoiakaalala. " He mau iwi no paha kou ko ke keiki malihini wahahee, he puaa nui ka ke keiki kamaaina," wahi a Hoiu.
A no ka pololi no o na hoa hele, nolaila, pane aku la o Pikoiakaalala, " Aole e make pono ko'u mau iwi ia wahi puaa wale iho no, aia he mau umeke poi, a he mau imu uala, a he ilio, he ia, alaila, pili pono ana hoi paha i ko'u mau iwi." "Ua mau," wahi a Hoiu.
A pau ka pili ana, alaila, olelo aku la o Pikoiakaalala ia Hoiu penei : " I eha ou kanaka, a i eha hoi o'u kanaka, a i pana au i ka iole, alaila, o ka manawa ia e holo ai o na kanaka e nana i ka iole, eia nae, e pana ana au i ka iole, aole e ku ma ke kino, e ku ana kuu pua ma ka nuku." A no keia olelo a Pikoiakaalala e ku ana ka iole ma ka nuku, ia wa i ulu nui mai ai ke keiki Hoiu, me ka hoole mai, " Aohe iole, a ina he iole io, alaila, aole e ku ma ka nuku ; a ina hoi e ku ma ka nuku o ku iole nui au e wahahee mai nei ea, alaila, o ko'u mau kanaka he umi, a me a'u hoi, (Hoiu) e pau makou i ke kalua ia i ka imu, a o na waiwai i pili mua ia, na oukou no ia, aka hoi, ina he iole liilii, a ua ku ia oe ma ke kino, e pau hoi kou mau kanaka he umi a me oe pu i ke kalua ia i ka imu," pela wahi a Hoiu. Alaila, pane hou mai la o Pikoiakaalala, " E ku ana no ka iole nui ma ka nuku, aole nae e make koke iho i ilaila, e holo ahai ana kela i kuu pua a make aku i kahakai." A no ia olelo ana a Pikoiakaalala, hoolale koke ae la o Hoiu i kona poe kanaka e hoa i ka imu.
A hoa ia ka imu, alaila, lalau ae la o Pikoiakaalala i kana pua i ka puolo; a kena ae la oia i ka poe kanaka i oleloia e holo e mamua o kona pana ana. A i na kanaka i hiki ai ma ke kumu o ka pali o Holei, ia wa, hookuu aku la o Pikoiakaalala i kana pua, oia kau-aheahe no ia a ku ana ka iole, ike aku la na kanaka hahai i hiki mua'i i ka holo ana mai a ua iole nei, aole no hoi o ka nui o kana mai, e paa ana no ka pua ma ka nuku e like me ka mea i oleloia e Pikoiakaalala. I ka iole e holo mai ana, makau aku la ka poe makai, a emi hope mai la lakou, a no ka holo loa ana o ka iole ma kai, alualu aku la ka poe hahai mahope o ka iole ; a i ea aku ua poe la, e waiho mai ana ua iole la, o ka inoa o ka iole, o Apua, nona kela olelo ana, " ma ka iole i Apua," e paa ana no ka pua ma ka nuku ; a ike iho la lakou i ka iole nui launa ole, ua hele a kuahina, a wili no hoi ka niho ma ke kua; a hoi mai la ka poe hoike i oleloia. A hiki ana lakou imua o ka aha i Puumanawalea, ninau ia mai la lakou, " Pehea ka oukou mea i ike ai ? " Hahai mai la lakou e like me ka lakou mea i ike ai no ka iole ; a ua like no me ka Pikoiakaalala mea i olelo ai, aohe he kue iki. A lilo iho la ka olelo a Pikoiakaalala i olelo oiaio, a hooko koke ia iho la ka pili mua, a me ka pili hope, o ka pili mua, he ai, he puaa, he ia, a o ka pili hope hoi, o Hoiu me kona poe kanaka he umi, ulua aku la a loko o ka imu, pau lakou i ka make. A o Hoiu, aia no kela wahi ma kai o Leapuki, ke waiho la a hiki i keia la, na ko laila poe e hai mai i ka oiaio.
A moa hoi na waiwai i eo ia lakou, paina iho la lakou a pau ka paina ana, hoeu ae la lakou e hele, oiai e hoi aku ana ka la e pee ma ke kua'ku o Maunaloa, a e kau mai ana na ao malumalu maluna o ka pali o Holei; a o ko lakou hele aku la no ia, ia lakou e hele akahele ana, haupu mai la ka manao kauoha a kana aliiwahine, oia hoi o Keakalaulani, ina paha pela wale no lakou e hele akahele ai, pau e na la i haiia mai ai iaia, e aho paha e hele mama ka pono; a no ia manao maikai i loaa iaia, nolaila, pane aku la ia i kona mau hoa hele, " E aho e holo mama kakou a moe iluna o Kau," " Aole paha kakou e hiki i Kau poeleele e," wahi a na hoa hele. Pane mai o Pikoiakaalala, " Ka inoa no hoi i ao oukou i ka mama i ke kukini na Keawenuiaumi no ka mama hoi, a he aha hoi ko kakou mea e hiki ole ai i Kau i keia ahiahi? Ka inoa na'u e hopo na ka mea i ao ole i ke kukini, he pana ka'u mea i ao ai," " Oia hoi ha, e holo kakou," wahi a na hoa hele, o ka holo nui aku la no ia a hala o Apua, a hala mai o Kukalaula, a hiki ana lakou nei i Punaluu, i ka wa a ka noe o ka po i uhi mai ai i kona mau eheu ; a ia lakou i hiki aku ai i Punaluu, e noho ana ilaila o Kohaikalani ke alii o Kau. Hele aku la na kukini a Keawenuiaumi, na hoa hele hoi o Pikoiakaalala imua o Kohaikalani ; a olelo aku la lakou penei, " I kauoha mai o Keawenuiaumi ia makou ke hiki i Kau nei i ou la, e hai aku ia oe i ka hunona ana, ei ae me makou, o ke kane hoi a ke aliiwahine opio," "Auhea?" wahi a Kohaikalani, aia no i waho o kahua," kena koke mai la o Kohaikalani, "Kii ia'ku ke kane a ke alii a hoihoi mai i ka hale nei, eia ka hale," o ke kii aku la no ia o ke kahu o Kohaikalani a ka lima o Pikoiakaalala ; a o ke komo aku la no hoi ia iloko o ka hale, me na hoa hele ona, a ike ae la o Kohaikala me Pikoiakaalala ka malihini, ke kane hoi a ke aliiwahine, ka Haku hoi o lakou.
Hoomakaukau ia no hoi na mea ai a na malihini, e like me ka mea mau. A pau ka paina ana, moe nui lakou ilaila, a ia Pikoiakaalala no ke ao, o ke ala ae la no ia a hoala aku la i kona mau hoa hele e ala, " ina kakou," wahi a Pikoiakaalala. Ala like ae la lakou, paina iho la ke kakahiaka, a pau ka paina ana, ninau mai ia o Kohaikalani, " E hele ana ka huakai a ka hunona a kuu Haku i hea ?" " I ka makaikai," wahi a Pikoiakaalala. " E aho maluna o ka waa ke hele, a ina e hele mauka, he nui loa ka luhi, no ke ino a no ka lohi no hoi ke hele mauka."
Ua maikai hoi ia olelo a Kohaikalani i ko Pikoiakaalala manao. Ae aku ia ia ma ka waa, " Ae, ma ka waa io makou, ua ike mai nei au, ia makou i hele mai nei ma kai o Puna, he oi no hoi ka loihi. Ina paha e ike e ia la ke ino a me ka loa o keia moku o Hawaii nei, i na no hoi ua kau no makou ma na waa o Keawenuiaumi," alaila, pane mai la o Kohaikalani, " Ua like no oia mau waa me nei mau waa, no ka mea, nona wale no na mea a pau e waiho mai nei ia'u, a he malama waiwai au," o ka hoomakaukau ia mai la no ia o na waa a paa, a panee ia a lana ana i ke kai, ee ae la no hoi na hoe waa o ua mau waa nei, a ee pu ae la no hoi me Pikoiakaalala a me kona mau hoa hele no hoi he umi, a o ka holo nui aku la no ia a pae i Kaalualu, o ke kumu o ko lakou pae ana, no ka poina ana o ka wai i na hoe waa, no ka wikiwiki loa o ka holo.
Ia lakou i pae ai i Kaalualu, ninau ae la o Pikoiakaalala, " Auhea ka wai o keia wahi ? " " Aohe wai, he wai kai wale no ko keia wahi," wahi a na hoa hele me na hoe waa ona. " A i hea la auanei ko kakou wai e loaa'i ? " wahi a Pikoiakaalala, " I hea hoi, o kahi aku la noia o ka wai maoli o hope aku la," wahi a na hoe waa. " Aohe wai o keia uka aku, he panoa wale no i ka la," a no ko lakou hoole nui mai i ka wai, nana aku la o Pikoiakaalala iuka, a ike aku la i ka paa mai a ka ohu iluna aku o Waiohinu, olelo aku la ia i na hoe waa ona, " Aia no hoi ha ka wai iuka o kela ahua e kau mai la ka ohu iluna pono la," " Aohe he wai o ia wahi," wahi a na hoe waa. Ia wa, kena ae la o Pikoiakaalala i kekahi mau kukini mama ona, e holo i ka wai, me kekahi mau kamaaina pu kekahi elua, aha ka poe i pii i ka wai.
I ka poe pii wai e pii ana me na hue wai, ua pii no lakou me ka hoomaloka, mamua ae nae o ko lakou pii ana, ua olelo mua aku la o Pikoiakaalala, " Ina e hiki oukou i kela ahua e kau mai la la ea, e kali oukou ilaila, a ike oukou i kahi a kuu pua i ku aku ai, alaila, hele aku oukou ilaila, a ike oukou i ka wai, e ukuhi oukou i na hue wai a piha, a i hoi mai oukou, e hoihoi pu mai me kuu pua," " Ae," wahi a ka poe pii wai. A hiki ua poe nei i kahi i kuhikuhi ia ia lakou, ia lakou no a hiki, maalo ana ka pua ma ko lakou alo, a ike aku la lakou i ke kolili o ke kumu o ka pua ma kahi umalu pali, i hele aku ka hana, e paa ana ka pua i ka pohaku me ka lepo, i huki mai ka hana o ua poe la i ka pua, e huai mai ana ka mapuna o ka wai. O ka ukuhi nui iho la no ia i na hue wai a lakou a pau i ka piha, a hoi nui aku la, me ka paa pu ana'ku me ka pua.
A hiki no hoi lakou i kai o Kaalualu, a hai aku la e like me ka lakou mea i ike ai, no ka loaa ana o ka wai. Aia no kela wai ma uka iki aku o Waiohinu, o ka loa oia wahi i loaa ai ka wai mai Kaalualu aku, he 6 1/2 mile, a mai Waiohinu aku a kahi o ka wai, 1 1/2 mile paha ; a o ka inoa o ua wai nei, o Waiakapuna. A o ka wai mau ia o ia kaona e noho la i keia wa, mai mau ka nele o ia wahi i ka wai ole a hiki paha i keia wa, ina aole o Pikoiakaalala.
A loaa hoi ka wai o lakou, panee no hoi na waa no ka holo, a ina hoe waa e liuliu ana, o Pikoiakaalala hoi, iaia e ku ana ma kikepa o ka waa, a ee ae iluna, hiki mai ana kekahi kukini mai a Keawenuiaumi mai, i hoouna ia mai e hele e imi i kahi e loaa'i o Pikoiakaalala, a e hai aku ia ia i kahi e hui ai laua, (o Keawenuiaumi me Pikoiakaalala) no ka mea, e hoi ana o Keawenuiaumi i Waipio me kana kaikamahine pu, Keakalaulani, no ka manao o Keawenuiaumi, o hala loa ka hunona mauka o Hamakua, aole la e iho ma Waipio, no ka mea, he hele wawae wale no ko ka hunona hele ana, aole hoi i ike ia e he waa, eia ka ua loaa ka waa. A pau ka olelo ana a ke kukini (elele) a Keawenuiaumi imua o Pikoiakaalala, hoi no hoi ia i Hilo, a holo no hoi o Pikoiakaalala ma.
[E waiho iki iho kakou i ka olelo ana no ke keiki puukani o Kauai, a e kamailio ae hoi kakou no Keawenuiaumi, no kona hoi ana i Waipio.]
A hiki aku la kahi kukini i ke alii la, ninau mai la o Keawenuiaumi, " Ua loaa aku nei no nae paha o Pikoiakaalala ia oe ? " " Ae," wahi a ke kukini, a hahai pu aku la no ke kukini no na mea a pau ana i olelo ai ia Pikoiakaalala, e like me ka mea i kauoha ia iaia. A pau na olelo a ke kukini, hoomakaukau na waa o ke alii Keawenuiaumi no ka hoi i Waipio. A o ka holo aku la no ia o ke alii, oia a me kana kamalei Keakalaulani; a pae na waa i Waipio.
A ia Keawenuiaumi ma i noho iho ai i Waipio, a hiki i na po io Kane, oia na po kapu o ke alii, ma ia po i inu awa ai o Keawenuiaumi; a o ko ke akua po kapu no hoi ia. Ma ia inu ana a Keawenuiaumi i ka awa, a ona no hoi, a waiho aku la i ka ona a ka awa.
He mea mau no hoi i ke akua ke pahi i ka pu no na po kapu; a o ke puhi ia mai la no ia o ka pu i ka pili o ke ahiahi, o ka inoa oia pu, o Kulu-e, aole no hoi i hia-a o Keawenuiaumi ia wahi pu, a i ke kulu hana o ke aumoe, kani mai ana o Kihapu, ia Kihapu i kani ai, he mea e ka haalulu o na pali o Waipio, ke hele la ke-o ilalo i na hale, a na ia kani nui i hapai ae i ke poo o Keawenuiaumi mai ka uluna'e. Ia ia i puoho ae ai, o ka luai aku la no ia, a no ka luai ana o ke alii, he oi loa kona minamina i kona ona awa, me ka ukiuki nui hoi i ke kani a Kihapu, a me ka poe nana e puhi, nolaila, olelo ae la o Keawenuiaumi i kana kamalei Keakalaulani, " Ina hoi aole i loaa mua kau kane, i na la ua hoohiki hou aku au ia oe."
(Aole i pau.)
Ke Ola Kino.
KA MALAMA ANA I NA KEIKI.
No ka malama pono ole ia o na keiki liilii e pau ai lakou i ka make, aka hoi, ina e malama pono ia alaila pakele ko lakou holo kiki ana iloko o ka make. Nolaila, eia kahi mau rula e pono ai ke hana ia.
1. E hoomoe ia ke keiki ma kahi kupono i hoomakaukau ia nona, maluna o kahi pela mauu.
2. E hoohiamoe i na keiki i ka wa pono mai hoala wale, oiai e hiamoe ana na keiki.
3. Mai hoonuanua wale i na mea ma kahi e moe ai na keiki, e nui ai ka hohono, o na lako wale no o kahi e moe ai, oia wale no na mea kupono loa. E hoomaemae loa ia na kapa moe, a me na wahi a pau e pili ana i ke keena a o ka hale okoa paha.
4. E malama loa i na keiki maloko o ka hale, me ka haawi no nae i mau minute elima e holoholo ai lakou iwaho, a pau ka manawa, alaila, hoihoi mai ia lakou iloko o ka hale, i oluolu maikai ko lakou ola kino.
5. I ka hanai ana i na keiki, aole pono ke hanai pinepine loa, o ka ai ana iho no hanai hou aku no, aole ia he mea pono, he mea ia e uhi ai na keiki a ano iii hoi.
6. E hoaahu i na keiki me kahi kapa mehana i na wa puanuanu, no ka mea, ina e loaa mai i ke anu he make no ka hope. Nolaila, i nui ka mehana e pono ai, ka ai kupono, ka hiamoe, a me ka paani kupono ana, o ka hana ana pela, he mea no ia e mahuahua ai na kamalii. E nana aku no hoi paha kakou i ka na haole poe keiki, nemonemo maikai, a me ka nui maoli no hoi. I mai paha auanei oukou e ka poe e heluhelu ana, no ko lakou lako no hoi paha ke kumu o ka lako o na keiki, ae pela io no, aka, mai ka nele mai lakou o ka hoomakaulii ana, a lilo i poe lako, a ina pela kakou e hana ai, alaila e lilo ana no kakou i poe lako, a lako no hoi na keiki a kakou. Nolaila, i nui mai ke aho e na makamaka i ka malama ana i keia mau rula e pono ai na kamalei o ko Hawaii pae aina.
Inu Awa ma Hanapepe Kauai.
E KA NUPEPA KUOKOA E; ALOHA OE: Mai kuu la i hiki mai ai maanei a hiki i keia la, aole a'u aina i noho ia e kanaka i oi aku ka inu awa e like me Hanapepe nei, o ka inu no ia mai kai a hala loa i uka i ka palena mai o kauhale, mai na makua a na keiki.
I ka nana aku i ke ano o na kane a me na wahine, ua hele na maka a haueka i ke kepia me he kepau ulu la; nana aku no hoi i na wahi lihilihi, ua ole wale ia a mukae, pau o luna me lalo, loaa iho la i keia wahi mele a Kamapuaa ia Pele penei:
" Makole makole akahi,
Hele i kahi o Piheka,
Heaha ka ai e ai ai ?
He lihilihi pau i ke akua."
Eia hoi keia mea a'u i ike ai ma keia awawa, o ka noa loa o ke kuai awa, e kalewa hele ai i kauhale me he paiai la. Auhea la ka Makai nana e hopu i keia hihia ? Aohe Makai, ua pau pu no i ka inu awa, a me ka maka'u ka i ka anaanaia mai, wahi a keia aina o Hanapepe nei. He kuhihewa ia manao ana pela, no ka mea, "Aole e mana ka pule i ka la o ka make" wahi a Lohiau. E aloha auanei e ua hoa. KAHU —
Hanapepe, Ianua ri 5, 1866.
Hookupa Dala Hui Halekuai.
E KA NUPEPA KUOKOA E ; Aloha oe: — E like me na mea i hai mua ia ma kou mau Helu 42, a me ka Helu 46. Poakolu la 15 o Novemaba. Ua akoakoa mai na kanaka malalo o ka malamala o kekahi puhala nui, mawaena o na hale elua. O ka nui o na dala ma keia hookupu ana $218.50. Aole no i paniia ka puka no ka poe e makemake mai ana e komo a hiki i ka la 30 o Dekemaba, he $44.00 ia mau dala. O ka nui o na dala ma keia mau hookupu ana $1001,182 inoa.
I ka la 6 o No vemaba. Ua holo aku ka Peresidena i Honolulu e kuai i ka mea i makemakeia e na ona waiwai, e kuai i na $738.50. Ua loaa mai no na mea i makemakeia. A ma ka waiwai i laweia mai e ka Peresidena $77.50 ka aie. I ka hookupu ana i ka la 15 o Novemaba. Pau ia aie i ka hookaa ia. I ka la 13 o Novemaba. Ku mai ka moku lole i Keanae.
Kukuluia ka halekuai ma Wailuanui, Koolau. Elua la i hana'i ka hale paa i ke kukulu, i ka hoaho, a me ke pai i ka lauhala.
Ke kuai ana i ka lole, Poaono la 18 o Novemaba. Ua kuaiia ka lole i ka Poaono. O na dala i loaa ma ia la $153.25. Holo ka hana o ka " Hookupu dala Hui Halekuai." Holo no ka hana ana i ka hale, a me ke kuai ana o na mea kuai. Nolaila ua kapaia ka inoa o ka hale o Holokahana. Nolaila, ua holo io no ka hana a ko Koolau nei poe ilihune nawaliwali, hapai ana ae nei i keia hana nui i ka wa pokole. A ke ku nei ka Halekuai.
No ka maimai o ka oukou wahi kauwa, nolaila loihi ka waiho ana o na wahi hunahuna mea hou o ka pali Koolau nei. Akahi no a loaa mai ka oluolu kupono e hooili aku i na wahi ukana. Me oukou ke aloha.
J. S. KANEHAILUA.
Kaloa, Maui, Ian. 29, 1866.
O ka laau paha a Kekuaokalani?
E KA NUPEPA KUOKOA E ; ALOHA OE : — Manoanoa pepeekue no hoi ua mea o ka puni wale o ke kanaka Hawaii, paulehia lua i ka makani, hoholo lua e apo i ka puahiohio, i kuhi paha he mea kino ia, o kau mea o ka hoomano o ke alualu.
Ma ka Poalima, la 26 o Ianuali iho nei, ia maua e hele ana mai Honolulu aku, a i ke Koolau ; he lehulehu wale o na kane a me na wahine i loaa'ku ia maua, e hoi mai ana mai ka makaikai laau mai i ka Pali o Nuuanu ; ma na lio, a me na wawae kekahi, i like paha ka nui me ke kanaha a oi aku.
Ninau aku la o S. Ili o Waialua, i hea oukou ? Pane mai la lakou, " I ka makaikai laau ula aku nei hoi." A pehea mai la ua laau ula nei, ua ike ia aku la ? Pane mai la kekahi poe o lakou, "aohe laau, aohe ike ia aku." I iho la hoi au iloko o'u, "o ka laau aku la kena a Kekuaokalani, ke ahu la ka hoka ia oukou."
A ma ia huakai kanaka e hoi mai ana, elua mau kanaka me na ohe-nana ; o J. Kaunamano kekahi, ninau aku la o S. Ili i kekahi mea ohe-nana, pehea kau ike aku i ka laau ula ma ka ohe-nana ? I mai la ia, "he keokeo ke kumu, he like hoi ka lau me ka lau o ke kamani."
Aka-iki iho la maua, a hele aku la no. A hiki maua ma Kahuwailanawai, loaa hou no ia maua kekahi puulu kanaka, e nana ana no i ua laau la a Kekuaokalani, o ko lakou nui, he iwakalua a oi aku. Ninau aku la no o S. Ili, auhea ka laau ? Pane mai la no " hoi lakou la, aohe laau, aohe ike ia aku ; alaila, hoomanao ae la wau i keia mau wahi lalani himeni, penei no ia ;
" Aloha ko na mauna,
I paa mau i ka hau,
A me ko Aitiopa,
Kekahi poe hoi o Honolulu,
Ua puni i ka laau ula,
Ua hopu i ka laau a Kekuaokalani,
E hoolehelehe kii oukou e, aloha wale."
O keia laau he mea wawa nui ia ia, ma Honolulu nei, ke hele nui nei kekahi poe e makaikai, a ke noke mai nei hoi kahi poe i ka hooiaio, me ka liki pu iho no hoi i ka oiaio ; aka, ke kahea leo nui aku nei au ia oukou, he hoopunipuni! Mai noho a manaoio iki mai i keia wawa hoopunipuni wale no.
O ke kumu nui o ko'u kamailio ana no keia, i mea keakea aku i kekahi poe e noho mai la ma kekahi mau moku e aku, o paulehia mai auanei lakou i keia hoopunipuni, o kuhi mai auanei, he oiaio. Aole! aole loa no. E aloha auanei.
E. K. WAHINEHUHU.
Hoopunipuni nui.
Ma na nupepa i hala iho nei, a i hoolaha ia hoi no ka laau kupanaha e ku ana iluna o Konahuanui, i kapaia hoi he laau na ka Moo. He hoopunipuni, he wahawai, he apuhi ia, aole he oiaio.
Ma ka la 29 o Ianua ri nei, elua mau kanaka i pii aku e nana i ka oiaio a me ka oiaio ole o keia laau kupanaha, o Naelau a me Keoho ko laua mau inoa. Ia laua nei nae i makaukau ai no ka pii ana, olelo mai la kekahi poe me ka i mai, " e make mai ana olua i ka Moo," aole nae he loli o ko laua manao no ka lakou mau olelo kuhihewa ano naaupo. I ko laua pii ana, ua lawe pu no i ke koi, ka pahi a me ka ilio, aohe no o laua wahi mea a maka'u iki iho. Ia laua nae i pii ai a hiki iluna ma kahi e kokoke aku ana i ua kumu laau nei, ike iho la laua i ka meheu o ka poe i pii mua i na la i hala. A hiki loa aku la hoi laua nei i ua kumu laau