Ka Nupepa Kuokoa, Volume VI, Number 17, 27 April 1867 — Ka Nupepa Kuokoa. KA MOOLELO O KAMEHAMEHA I. [ARTICLE]

Ka Nupepa Kuokoa.

KA MOOLELO O KAMEHAMEHA I.

Na S. M. Kamakau.

HELU 24. KA MOOLELO O KEKAHI MOKU I KU MAI MA HONUAULA I KA A.D. 1790. Holo aku la ua moku Elenora la i Hawaii, a he wahi moku kiakahi uuku kekahi i hiki pu aku i Hawaii. I ke ku ana o ka moku Elenora i Hawaii, ua lele o John Young (Olohana) i ka makaikai, a ua lele no oia me ka makaukau i ka pu a me ka pahi kaua. He 46 a keu kona mau makahiki ia manawa. Ua makemake no hoi o Kamehameha i ka haole ia manawa. He wa kana nui no hoi ia o na 'lii ai aupuni, a he kaua kuloko hoi ko na aupuni ekolu o Hawaii, he kaua me ko Maui poe alii. A o ko Kamehameha manao mua nae, he makemake oia i ka pu; a o ka lua, he makemake oia i ka haole nana e ao i ke ki ana o ka pu. O keia mau makemake hoi o Kamehameha, oia no kekahi mau kumu i hiki wawe ai ka hoohuiia ana o na aupuni malalo o ke aupuni hookahi malalo o Kamehameha. la John Young (Olohana) e makaikai ana, a kau aku la ke ano ahiahi, manao ae la oia e hoi i ka moku, aka, ua aua ia oia e Kamehameha e noho i uka, aole e hoi i ka moku, no kona makemake hoi e lilo i aikane nana. a no kona makau paha kekahi o olelo aku o John Young (Olohana) i ke pio ana o ka moku kiakahi ia la, a pepehiia ai na haole o luna o ua wahi moku la, a me ke ola mahunehune ana o kekahi haole, oia hoi o Mr. D. lsaac (Aikake). O keia mau haole elua, ua lilo laua i mau aikane punahele na Kamehameha, a i mau luna kaua pu hoi no kona aupuni, a i mau kupuna haole no kekahi poe alii a me kekahi poe makaainana. HE MOOLELO NO KA MAKE ANA O KA MOKU KIAKAHI. O ka uluku a me ke kuko ino i ka pu a me ka hao, ka pahi a me na mea make a pau a ka haole, oia no ke kumu i kii ai e lawe pio i ka moku, a no ka hoomaau ana kekahi o Kameeiamoku. A o ke kumu hoi o ko Kameeiamoku hoomaau ana, oia hoi kona pii ana iluna o ka moku, a hahau ia kona kua e ka haole i ke kaula, e like no me ke ano mau o ka haole, he kanaka huhu koke iho no, aole e kakali, a hoopai no ; a ina he mea oioi ma ka lima, he hoopai koke aku no. A no keia hahauia ana o Kameeiamoku, kuko ino iho la ia me ka i ana, "Ina e loaa ana ia'u kekahi moku haole, alaila, e make no ia'u." E noho ana hoi o Keeaumoku ma Kaupulehu, Kona Akau, a ike aku la oia a me kona poe kanaka i ka holo ana ae o kekahi wahi moku kiakahi, alaila, manao iho la lakou e kii e pepehi i ka poe haole o luna o ua moku nei, a e kaili hoi i ka moku. Kena ae la o Kameeiamoku ikona poe kanaka a me kona mau hoahanau e hapai i na waa, a e holo aku lakou i ka moku. Hapai ia aku la na waa, a hoonoho ia aku la na kanaka o na waa, o Mauki, Kuaiwa, Kuahiku, Manohili, o Naluhi, o Ahuole, o Pee a me kekahi poe e ae, a he mau hoahanau no ke alii kekahi, oia hoi o Kalaukoa, Manuhoa, Kanuha a me Keakaokalani. Holo aku la lakou a pili i ka moku. Eono no kanaka o luna o ua wahi moku nei. O Kapena D. Isaac (Aikake) a me na haole sela elima. Kena koke ae la no o Kameeiamoku e pepehi i na haole. Ua pepehi ia iho la na haole elima, a pakele mahunehune ae la o Kapena D, Isaac Aikake. Hohonu no hoi ka pouli a me ke aloha ole o ka noho ana o ke au kahiko o na kupuna. O na waiwai i loaa maluna o ua wahi moku nei, he pu kuniahi, oia hoi ka pu i kapaia o Lopaka, a he mau pu kaupoohiwi, he mau pahi kaua, he mau koi, he pauda a me ka lole. Ua lawe ia keia mau waiwai imua o Kamehameha ; a o Kapena Dr. Isaac Aikake kekahi i lawe pio pu ia aku imua o Kamehameha, aka, ua laweia oia i hoaaloha nona e like me John Young (Olohana). KE AU IA KAMEHAMEHA I., A ME KA MOOLELO O KONA KAUA ANA ME KALANIKUPULE KE KEIKI A KAHEKILI, KE ALII O MAUI. I ko Kamehameha manao ana a me kona mau Kuhina a me na'lii, ua lako lakou i kekahi mau mea kaua haole, a ua loaa kana mau haole, o John Young (Olo-

nana, a me D. Isaac Aikake, a ua ike no hoi o Kamehameha i ko laua ki pu ana i ka moa a me ka puaa ma kahi mamao loa, a ua ku no ia laua, nolaila, olioli loa o Kamehameha ia laua no ke akamai loa i ke ki pu ana. Nolaila, hoouna aku la o Kamehameha i mau elele i o Keawemauhili la ka Moi o Hilo, me ka nonoi aku ia ia i waa, i ahuula, a i mau koa e hoouna mai, e holo i ke kaua i Maui me Kalanikupule ke keiki a Kahekili. Ua ae mai no o Keawemauhili i na kauoha a pau a Kamehameha. a ua hoouna mai o Keawemauhili i mau waakaulua, a i ahuula, i hulu, a i mau koa, a i mau alii, o na keiki no kekahi a Keawemauhili, o Keeweokahikiona o Eleele o Kaleipaiahala, o Koakanu a me na keiki alii a me na'lii e ae a Keawemauhili i hoouna mai ai e kokua ia Kamehameha. O keia kokua a Keawemauhili ia Kamehameha, ua kue ia hana a Keawemauhili ia Keoua Kuahula. O ko Keoua Kuahuula manao e kuokoa i ka Kamehameha mau kaua me na'lii o Maui, aole pono e kaua aku me na keiki a Kahekili. Oia ke kumu o Keoua Kuahuula i kii mai ai e kaua ia Keawemauhili. Ka hoouka kaua nui ma Koapapa. Aia ma Koapapa ma Hamakua Hiki na, malaila ka hoouka kaua nui o na kaua o na aoao elua o ko Kamehameha mau puali kaua, me ko Keoua mau puali kaua. He kahua kaua maikai o Koapapaa, he ulu laau ma ka Hema he kahua akea no hoi. He ikaika loa ke kaua ana ia la o ka makaukau loa ko Kamehameha aoao i na pu me ka pauda, aka : ua loaa ka pu i ko Keoua Kuahuula ma ke kaili me ke koa launa ole, ua hemahema hoi i ka pauda, aka, ua make na aoao elua ; ua hee ko Keoua Kuahuula, a hoi aku la i Hilo. A o ko Kamehameha aoao, ua hoi mai la i Waipio, a ma Kohala. I ko Keoua Kuahuula noho ana ma Hilo, a okioki iho la i ka aina no kona mau alii a me kona mau puali koa. O ka anae puko momona o Waiakea me Piopio. A pau ko Keoua Kuahuula noho ana ma Hilo a manao iho la oia me kona mau alii me na puali koa e hoi i Kau. Mauka o Laa ka hele ana, a ma ka lua o Pele a hiki i Kalanihale ma Kapapala. O ka poe mahope o ka huakai a ke Alii a Keoua Kuahuula, ua pau i ka make i ka Pele. Penei ke ano: Ua ulu ae la ke one me ka pohaku a lilo me he kia kupololei la iluna, a haahaa na mauna o Maunaloa me Maunakea. Ua ike ko kai o Kawaihae i keia kia ahi kupanaha i kupololei iluna o ka lewa, a maluna o ua kia ahi nei he ahi e lapalapa ana. O kekahi mea kupanaha i ike ia o ka pii ana o kekahi wahi puu uuku nana e hapai i ka puu nui, o ke kia e kupololei ana, a puehu ae la, he one, a he pohaku nui. Oia na pohaku nui e ahu la ma ke kae o Kilauea, a ma kahi momao aku. Pela mau ka hana ana iloko o kekahi mau la, a o na huakai hele, ua nui ka poe i make, me ka waiho maikai o na kino, o na kane me na wahine a me na keiki. Olelo mai o Mona, he mea ike maka, o ko lakou mea i pakele ai i ka make, oia kekahi wahine i loaa i ka mai waimakaolehua, alaila, he lepa mamua, a mahope o ka huakai, i na he mau lau ia huakai, aole no e loaa ka poino ia lakou. Aole paha lakou i manao na Iehova, a na kona mana i hoopakele ia lakou. O kekahi o ua mau kia one nei oia na puuone e ahua ana o Kilauea. A o kekahi o na kia one, ua iho pololei aku la i kai o Ahua, aole i hala na pule elua, hiki ke one i Punaluu ma Kau. E noho ana o Keoua Kuahuula e kapu ia Punaluu. Ma kai o Apua ka hele ana mai o ke one a hiki i Punaluu, a ua pani ia mai o Punaluu Wailau me Ninole, a lilo iho o Punaluu iloko no ka ia a hiki i keia la. Olelo kekahi poe kaula ia Keoua Kuahuula. Ua huhu o Hiiaka ka wahine a Keoua i ka haalele ia Hilo, ua makemake o Hiiaka i ka anae momona o Waiakea. E aho ke kuhihewa o ka wa kahiko, ua oi aku ko keia wa malamalama. Ua hanaia keia mau hana kupanaha a me keia hana mana a ke Akua i ka malama o Novemaba i ka A. D. 1790. A noho alii iho la o Keoua Kuahuula ma Kau a me Puna a me Hilo, a he mau kaua liilii no i waena o Keoua Kuahuula me Kamehameha. O ka hana nui iwaena o Keoua Kuahuula me Kamehameha, o ka hanene,

me ka hoole aku hoole mai. aole he alu o Keoua Kunhuula. He nui ka poe Kuauhau alii o na aoao elua, a me ka poe mailo kupuna, a he poe kaalau olelo, a he poe nonenone hai moolelo, kupuna lepo, a me ka poe kalaiaina o pohokono, a o ka poe nana ouli a hauli o ke ku maoli i ke alii. O ka poe haku mele kekahi i komo iloko o na aoao elua, a maloko oo ke mele, ua hai ia ka loina o na kupuna, ke kiekie, ka haahaa a me ke Akua. Ua kaulana no hoi ka laua mau hana a hiki i keia wa, a mau loa aku. No Ke ku ana o Kaiana ma Hawaii. I ka noho ana o Kamehameha ma Kona Hawaii, ku mai la kekahi moku ma Kealakekua, a o Kapena Kane ke alii moku. O Kaiana kekahi maluna o ia moku. He alii o Kaiana, he moopuna na Keawe. O Ahaula ka makuakane ke keiki a Keawe, ka Moi o Hawaii, a o Kaupekamoku ka makuahine. Ma Kauai ko Kaiana holo ana, a ua noho iho kona mau hoahanau ma Kauai, oia hoi o Namakeha a me Nahiolea. I ke ku ana mai o Kaiana ma Hawaii, halawai pu iho la laua me Kamehameha, a hoopunahele aku la o Kamehameha ia Kaiana. Haawi aku la o Kaiana ia Kamehameha i ka pu kaupoohiwi a me na pu kuniahi he nui wale. Aua iho la hoi o Kamehameha ia Kaiana e noho i Hawaii, me ka i aku, "Eia ka aina, eia na alii, eia na makaainana, e noho kakou i Hawaii nei. mai hoi oe i Kauai a me o Oahu." A ike iho la o Kaiana he mau olelo maikai ka Kamehameha, a he mau hoahanau no hoi kekahi ona e noho ana ma Hawaii, oia hoi o Kalanikuaiwa ma, o Kaiana Ukupe, ka makuakane o Kaikioewa a me ka hanauna alii o Hawaii. Manao iho la no hoi o Kaiana, ua pono ka noho i Hawaii, i ka aina kauoha mai na kupuna mai. Aka, olelo aku la nae oia ia Kamehameha, e kii oia i kona mau hoahanau, ia Namakeha a me Nahiolea i Kauai. Ua ae mai o Kamehameha e kii, nolaila, hoouna mai la o Kaiana ia Kapena Kane, kana aikane a hoa aloha hoi, nana i lawe i na aina o Tahiti. O Kaiana, he alii nanuao, a ua kuhohonu kona akamai ma ke kaakaua, ma ke kuhikuhi puuone, ma ka papa huli , honua, ma ka oihana kahuna, ke kakaolelo, he kilo aohe e nalowale na olelo huna, he kalaiaina no pohokano, he mailo i ko na'lii ano, he akamai i ke kuauhau kupuna, a oia paha kekahi mau kumu i ohumu ai na Kuhina o Kamehameha mahope mai. Olelo ae la hoi kekahi, "He akamai o Kaiana, he haawi i kana mau mea make a pau ia Kamehameha, a haawi aku no hoi i kona ola ia Kamehameha." Aole oia ke kumu he kumu e ae no; A ike o Kamehameha i ko Kaiana makaukau i ke kaua, ame ka makaukau i na loina o ke ki pu ana, a oia no hoi ke kumu o ko Kaiana holo ana i Tahiti i na makahiki ekolu me ke ano alii, me kana aikane a hoa aloha, oia o Kapena Kane. He mau makahiki kaua nui ia o na aupuni o Europa a me ko Amerika, a he kaua powa na moku ma ka moana me ke kaili wale i na moku ina ka moana Oia ko Kaiana mau makahiki i makaikai ai i na aupuni o Tahiti, a oia hoi ke kumu o kona makaukau. A no keia mea, koho aku la o Kamehameha ia Kaiana i Pukaua a i Alihikaua Nui nona, a e hele e kaua me Keoua Kuahuula, no ka mea, ua hoouna o Kamehameha ia Keeaumoku ma a me na'lii, na haole, John Young Olohana a me D. Isaac Aikake i Hilo e kaua me Keoua Kuahuula, aka, ua hoopuehu ia lakou e Keoua Kuahuula, a pela no hoi ma Kau. (Aole i pau.)