Ka Nupepa Kuokoa, Volume VII, Number 24, 13 June 1868 — Page 2
KE KUOKOA, HONOLULU, IUNE 13, 1868.
i haawiia i ka mea i koho i oi. E noi mai ana ka Palapala Hoopii, e hoopii luna nuiia ke Kuhina Kalaiaina.
Noi mai o Mr. Laiana e waiho i ka Palapala hoopai i ke Komite Wae o na Lunamakaainana wale no. Ae ia ke noi, a ua kohoia o Messrs Laiana Jones, Kalu, Keawehunahala a me Kanuka.
Heluhelu mai o Mr. Laiana, he palapala hoopii no Kohala, e noi ana e hookaawale i na apana koho o Kohala Akau a me Kohala Hema; e ae ia na makou e wae i kumukula no ka lakou mau keiki; e ae ia na makaainana e koho i ko lakou mau Luna Alanui, a e halawai mau ka Ahaolelo i kela a me keia makahiki me kekahi mau, mea e ae. Waihoia a noonoo hou.
Ma ke noiia ana mai, ua hapaiia ka hana o ka la, oia ka Bila Haawina. Komite ka Hale—o W.P. Kamakau ma ka noho.
Uku o na Luna Alanui—$9,000.
Noi mai o Mr. Mahelona e hoemi iho i $6 000.
Ninauia ko ka Bila a ua hooholoia.
No ke kuai ana i na mea alanui $1,500 hooholoia.
No na alanui poino $2,000 hooholoia.
Noi mai o Mr. Waila e koho i Komite Wae e nana i na palapala hoopii, ma ke pakaukau no na alanui, alahaka o na mokupuni a pau, a e hoopanee ka noonoo ana, a hoike ma ike Komite no ia mea. Kohoia o Messrs Waila, Hikikoki, Nakila, Kaukaha a me Hutchinson.
Ana Aina aupuni—$2.500.
Noi mai o Mr. Nahaku e hoemi i $800.
Noi mai o Mr. Laiana i $3,000.
Hooholoia ke noi.
Unuhi a Maheleolelo aupuni $1,000 hooholoia.
No ka Hale Alii $60,000. Noi mai o Mr. Hikikoki i $30,000 no na makahiki elua, a na keia Ahaolelo aku e hookaawale ae ke koena.
Noi mai o Mr. Koakanu,e hoololi i $40,000.
Olelo mai ke Kuhina Kalaiaina, ua pono no ka haawina o ka Bila, no ka mea e paa ana ka Hale Alii hou iloko o na makahiki elua e hiki mai ana.
Hooholoia e like me ka Bila $60,000.
Pa Hooilina Alii $3.000 hooholoia.
No ka mea malama $600. hooholoia.
No na Hale Oihana Aupuni $20,000 hooholoia.
Manao o Mr. Waila ua kupono iho la no keia mau Hale Oihana Aupuni. He 2,000 e lilo i mau pahu hao malama pepa, ua maalahi loa; a i ole ia i Hale lua no na pepa e malamaia ai.
Kokua mai ke Kuhina o ko na aina e i ka haawina, no ka mea, o ka manao o na Kuhina o ka hoolilo i ka Hale Alii mua i Hale Oihana Aupuni, a ina 20 000 paa pono i ka hanaia, a malaila ka Hale Ahaolelo ma keia hope aku.
Noi mai o Mr. Kale Kauka e hoololi i 1 000, me ia puu dala e kuai ai ke aupuni loaa na pahu hao malama pepa no keia wa. O ka 20 000 aohe makemakeia i keia mau makahiki ae elua.
Kokua mai o Mr. Kapena Loko i ka ka Luna o Koolaupoko, a he oi loa aku ka pono o ka hoolilo ana i ka 20 000 no ka lawe ana mai i na mea ulu o ka aina o Hamakua i ko kakou makeke.
Noi mai o Mr. Kale Kauka, e hookomo iloko o ka Bila Haawina:
"No 2 pahu hao malama pepa no na Oihana Aupuni i 1 000."
Hoihoi hope ke Kuhina Kalaiaina i ka Haawina no na Hale Oihana Aupuni.
Hoihoi no hoi o Mr. Waila i kana noi.
Hooholoia ka hoololi a Mr. Kale Kauka
Hale Leta Hou 9 000.
Noi mai o Mr. A.F. Kauka e kali a Poakolu noonoo.
Noi mai o Mr. Laiana e hoopane loa.
Ninauia na hoololi a Messrs Laiana a me Alapaki a hooleia.
Hooholoia e like me ka bila 9 000.
Noi mai o Hon. Kalakaua e hoopau i ke Komite hooleia.
Hana hou o na Hale Aupuni $10 000 aeia
Hoolimalima o na Hale Aupuni 2 400 "
Na Elele - - 1 144 "
Mau lako hoopaa hou o ka Halewai 1 800 "
Hale Hookolokolo a me ka Hale
Paahao o Waimea, Hawaii - 3 000 "
Hale Hookolokoio a me ka Hale
Paahao o Koolaupoko, Oahu 800 "
Hale Hookolokolo o Hilo, Hawaii 4 000 "
Noi mai o Mr. Hikikoki e hoololi ae i Hale Aupuni a hoomahuahua i - $6 000 aeia
Kilo o ka Hale Paahao o Oahu 3 000 "
No ka malama ana i na Paahao 9 000 "
Hale Pai Palapala Aupuni 12 000 "
Ninau aku o Mr. Hikikoki i ke Kuhina Kalaiaina, ua uku ia anei ka Hale Pai ma ka Bila Haawina aku?
Ae mai ke Kuhina Kalaiaina.
Olelo mai o Mr. Laiana e hookomo i ka Haawina o ka Hoike a ke Komite Wae i waiho mai ai.
Hooleia, 19 hoole 18 ae.
Hooholoia e like me ko ka Bila.
Kuai ana i mau Buke no ka Waihona Buke 1 000, hooholoia,
Na Lilo no ka Papa Ola 30 000.
Noi mai o Mr. Waila e hoololi i 40 000. Hooholoia e like me ka hoololi.
Na lilo no ka Hale Mai Pupule 13 000.
Noi mai o Mr. Jones e hoololi i 13 500, hooleia ka hoololi. Hooholoia e like me ka bila.
Kokua i ka Hale Mai Moiwahine 10 000 hooholoia.
No ka Hoopae Lima Hana me ka mahiai 10 000.
Noi mai o Mr. Waila e waiho ka noonoo ana no kela, no ka mea, he Bila ke hoomakaukauia nei.
Luna Wai me ke Kakauolelo Makeke 3 600.
Noi mai o Mr. Keawehunahala e hoopii loa ae i 4 000—hooleia.
Hooholoia e like me ka Bila.
Na lilo no ka Buro o ka Oihana Wai $3 600 hooholoia.
Hoonui ana i ka Oihana Wai 20 000 hooholoia.
Ma ke noi ia ana mai, hoopauia ke Komite a hoopaneeia.
Poalua Iune 9, 1868.
Halawai ka Hale ma ka hora mau.
Peresidena ma ka noho.
Waiho nui o Mr. Waila he olelo hooholo e hookaawale ana i ka la 16 o Iune, oia ka la e heluhelu akola ia ai ka Bila Hooholo Mokuahi.
Noi mai ke Kuhina o ko na Aina e, e hapai ia i keia la, no ka mea, ua nui ka hoopaapaa ana no ia Bila, a o ka pau ae ka pono.
Olelo mai o Mr. Waila, no ka mea he ano nui keia bila, a nolaila ko'u noi ana i kela la i haiia aku nei, i hiki pau mai na hoa a pau.
Kokua mai o Mr. A.F. Kauka i ka olelo hooholo, no ka mea he bila ano nui, a nolaila aole pono e pupuahulu.
Kokua mai o Mr. Keawehunahala i ka ke Kuhina o ko na aina e, no ka mea, aohe au mea hou aku i koe e olelo ia ana.
Kokua mai o Mr. Hikikoki i ka olelo hooholo, no ka mea i kona manao iho, he mau mea hou kue e kamailio ia ana.
Ninauia ka hoololi a ke Kuhina o ko na aina e, a hooleia.
Ninauia ka pono o ka olelo hooholo a hooleia.
Noi mai o Mr. Hikikoki e heluhelu akolu ia ka Bila i ka Poaha ae nei. Ae ia.
Waiho mai o Mr. Keawehunahala he olelo hooholo e hookaawale i $300, no ke alahaka o Waialua.
Waiho mai Ka Mea Kiekie W.C. Lunalilo he olelo hooholo e kauoha ana i ka makai o ka Hale e hoolako mai i wai ona no ka paina liilii.
Ninauia ka hoomoe ma ka papa a aeia.
Hoolaha mai o Mr. Laiana he Bila e hoopau loa ai i ka Pauku 488 a me 489 o ke Kanawai Kivila.
Noi mai mai o Mr. Laiana e noonoo hou ka Hoike a ke Komite o ka Hale o ka la inehinei, a e noonoo hou hoi no ka haawina ka Hale Pai Palapala Aupuni.
Noi mai ke Kuhina o ko na Aina e a hoopanee loa i ke noi.
Olelo mai o Mr. Laiana, aole i noonoo pono ia ka haawina no ka Hale Pai Palapala Aupuni, he makemake ia e noonoo akahele a ka hana a kela Papa Pai a me ke kulana.
Olelo mai ke Kuhina Kalaiaina, he wahi $1000 wale no kahi kulike ole, a heaha la ka mea e noonoo hou ai.
Olelo mai o Mr. Laiana aole o $1000 wale, aka o ke ano o ka hana ana iloko o kela hale.
Manao ke Kuhina o ko na aina e, o ke ano maoli o keia, o ka hoololi i ka pono a i kekahi aoao wale no. Ua ikeia he nui wale ma keia aina i malu malalo o ka malama ana a ke aupuni, a ano ke kauo nei e hohakaka aku me ka nupepa aupuni. He mea oi aku auanei ka Papa Pai Palapala mamua o ke Kanawai, ka Lei Alii a o ka Hale Alii paha o keia aupuni. (Pane mai o Mr. Laiana ae, a ua ike no na Kuhina,) kamailio aku la ua Kuhina la, aole wahi i oi aku ke kuokoa e like me ka hoomalu ana a Kamehameha V. (Pane mai o Mr. Laiana, aole e kamailio ia ana no ke Kuokoa o ka Papa Pai Palapala. Eia wale no ka ninau, aohe pono no kakou e hookaawale i dala no ka mea e kue mai ana ia kakou.) Manao ke Kuhina aohe no e holo ana.
Noi mai o Mr Laiana e kakau na ae a me na hoole.
Ninauia ka hoopanee loa i ke noi, e noonoo hou, a hooleia. He 21 ae a he 17 hoole.
Ninauia no ka hoopanee a hooleia.
He kanawai e pili ana i ka hooiaio ana o na palapala, heluhelu ia ma ke poo ua holo ma ka heluhelu akolu.
He kanawai e hooponopono ai i ka hoonohonoho ana o na palena aina na ke Komisina, a e hooloihi aku i ka manawa o ke Komisina. Heluheluia ma ke poo a holo loa ma ka heluhelu akolu.
Waihoia mai ka Bila no ka Uku Hoomau o Kalama.
Noiia mai e kakau poepoe.
Noi mai o Mr. Kale Kauka e hoololi ae i $4,000 ma kahi o 2,000.
Noi mai Ka Mea Kiekie W.C. Lunalilo e hoololi i 6,000, no ka mea, ua like no ia me ka Moiwahine Emma, a he pono e hoohalikeia laua.
Mahope o ka hoopaapaa uluaoa ana, ua ninauia ka hoololi i $4,000, a ua hooleia-17 ae a he 18 hoole.
Ninauia ke noi e kakau poepoe ia ka Bila a ae ia.
Ninauia e hoopanee, a hooleia.
Hoike mai ke Komite o na Aha Hookolokolo i ka Bila e hoololi ai i ka Pauku 1 Mokuna 52 o ke Kanawai Hoopai Karaima, e noi mai ana e hoomoe. Hooholoia.
Heluhelu alua ia ka Bila e hooponopono ana i ka uku o na Pailata, a ma ke noi a Mr. Alabati ua waihoia i ke Komite Kalepa.
Heluhelu mua ia mai ka Bila e hoololi ai i ka Pauku 676 o ke Kanawai Kivila. Hooholoia ma ka heluhelu alua, a kauohaia e kakau poepoe.
Heluhelu aluaia mai ka Bila e hoololi ai i ka Pauku 255 a me 256, a e hookomo hou i pauku, e heluia Pauku 256.
Ma ke noiia ana mai, hooholoia ma ka heluhelu alua a kauohaia e kakau poepoe.
Heluheluia ma ke Poo he Kanawai e haawi ana i ka mana i ke Kuhina Kalaiaina e koho i Luna Kakau a Hooiaio Kope no Lahaina.
Ma ke noiia mai ua hoopanee loa ia.
Heluhelu alua ia ka Bila e ae ana i na wahine a me na kane e mare hou, ina ua hoihoi ia na hoa i ka Halemai Lepera.
Ma ke noiia ana ua waihoia i ke Komite o ka Papa Ola.
Heluheluia ka Bila e hoololi ai i ka Pauku 1074 o ke Kanawai Kivila.
Ma ke noiia ana mai, ua hoopanee loa ia.
He Kanawai e haawi ana i ka mana i ke Kuhina Kalaiaina e lawe mai i ka wai o Kunawai. Hooleia loa ia.
Heluhelu alua ia ke kanawai e kohoia ai ka manawa a ka Aha Kaapuni a me ka Aha Keena e hookolokolo ai i kekahi mau hihia.
Ma ke noiia ana ua hoopanee loa ia.
Heluhelu alua ia he kanawai e hoololi ae i ke Kanawai i kapaia. "He Kanawai e hoopau loa i ai ka Mokuna 10 o ke Kanawai Kivila, a e hooponopono ai i ka Buro o ka Oihana Hoonaauao i apono ia i ka la 10 o Ianuari 1865.
Ma ke noiia ana ua holo ma ka heluhelu alua, a ua kauohaia e kakau poepoe.
He Kanawai e hoohalike ai a hoolaha aku i ke Kanawai Hoopai Karaima ma na olelo Hawaii a Enelani. Hooholoia ma na heluheluhelu alua, a kauohaia e kakau poepoe.
Heluheluia he Kanawai e hoololi ai i na Pauku 118, 119, 120, a e hoopau loa ai i ka pauku 121 o ke Kanawai Kivila, a ma ke noi ia ana mai, ua Komite ka Hale.
Heluheluia ka pauku mua.
Mahope o ka hoopaapaa ana, noi mai o Kapena Loke e haawi i ke Komite Wae.
Eia inoa oia Komite: Hons. C.R. Bihopa, J.O. Dominis, V. Knudsen, C.H. Kauka a me A.F. Kauka.
Ma ke noiia ana mai, hoopauia ke Komite a hoopanee ka Hale.
Poakolu, Iune 10, 1868.
Halawai ka Hale i ka hora mau.
Peresidena ma ka noho!
Heluhelu mai o Mr. Halemanu he olelo hooholo e kauoha ana i ke Kuhina Kalaiaina e kuai i mau mouo no ke awa o Honoka ma Hamakua. Hoopanee loa ia ka olelo hooholo.
Heluhelu mai o Mr. Mahelona he olelo hooholo e hookaawale ana i $1.000 no o Hale Hookolokolo ma Ewa a me Waianae. Waihoia.
Heluhelu mua mai o Mr. Laiana he Bila e hookaaia ka auhau alanui ma ke dala aole ma ka hana. Hooleia.
Hapaiia ka hana no ka la, oia ka Bila Haawina. Komite ka Hale. Noho o Hon. D. Kalakaua ma ka noho Lunahoomalu.
Mau uapo hou me ka hana hou
ana - - - $24,000 aeia.
No ka eli ana i ke awa o
Honolulu - - - 10,000 "
Kao hou no ke kakia pahu 1,500 "
Mokumahu Pele na lilo o ka hana ana - - - 11,000 "
Mokumahu Pele hana hou ia ana 9,000 "
Na Heleuma me na Mouo - 4,000 "
Uapo ma Honomalino - - 750 "
Noi mai o Mr. Matina e hoololi i 500,
Hooholoia no e like me ka Bila.
Uapo ma Koholalele - - $750 aeia.
Awa Pae Waapa ma Hilo 1200 "
Noi mi o Mr. Hikikoki e hoololi i $1,500. Hooholoia.
Pahu Hao no ke keena Kiaaina o Hilo $500.
Noi mai o Mr. Matina e kiola ia haawina.
Kokua mai o Mr. Upa e hooholo.
Kue mai o Mr. Hikikoki i ke noi e kiola.
Kue mai o Mr. Koakanu i ko Mr. Hikikoki manao, a noi mai e hoopanee loa.
Hoololi mai o Mr. Kalu, e hookomo maia wahi, na pahu hao no na Kiaaina o Hawaii, Maui a me Kauai $1,500.
Noi mai ke Kiaaina o Oahu e hoololi ae i $1,200.
Hoihoi o Mr. Kalu i kana noi.
Hooholoia i $1,200.
Hale kukui o ke awa o Honolulu $3,500 aeia.
Na lilo no ia Hale - - 1,400 "
Kukui Awa o Lahaina - 500 "
Kukui Awa o Kawaihae - 500 "
Kukui alanui o Honolulu, e loaa ai ma ka auhau ana 3,000.
Noi mai o Mr. Waila, e kiola i kela olelo; e loaa ai ma ka auhau ana.
Kokua mai o Mr. Ailuene i ka haawina o ka Bila.
Manao o Mr. Koakanu e hana ka Ahaolelo i Kanawai e kono ana i na mea a pau, e kau i mau kuikui ma ko lakou mau hale iho, aohe waiwai o ko Lihue a me Koloa.
Ninauia ke noi e hoololi ae i ka haawina a aeia.
Oihana Kinai ahi o Honolulu $8,910 aeia.
Kela a me keia lilo - 1,500 "
OIHANA WAIWAI.
No ke Kuhina - - $10.000
Noi mai o Mr. Koakanu 8,000
Hooholoia e like me ka Bila.
No ka Luna Buke Helu - 4,000
Noi mai o Mr. Keawehunahala i 5.000
Noi mai o Mr. Koakanu i - 3.000
Hooholoia ka haawina - 4,000
Noi mai o Mr. Pilipo e noonoo hou ia ka uku o ke Kuhina Waiwai.
Mahope o ka hoopaapaa ikaika ana ua ninauia ka noonoo hou a ua haule.
No ka Luna Dute Nui - $6.000 aeia.
Kakau olelo a ka Luna Dute 3,609 "
Kiai Oihana Dute - - 2,400 "
Luna Hale Papaa o Honolulu 2.400 "
Na kokua Kiai Dute " 1600 "
Noi mai o Mr. Koakanu 2,000
Noi mai o Mr. Laiana 1,800
Ninauia ka hoololi a Mr. Koakanu a hooholoia i ka 2,000.
Na lilo e ae a me ka hoolimalima
Kakauolelo ku i ka wa - $2,000 aeia.
Luna Dute Awa o Kawaihae 400 "
Luna Dute Awa o Kealakekua 200 "
Waapa Hale Dute - - 800 "
Uku o na Luna Auhau - 9,000
Noi mai ka Loio Kuhina e hoololi i eha hapa haneri no ka helu ana.
Noi mai o Mr Koakanu e hookomo i 5 hapa haneri.
Ninauia ka hoololi a ka Loio Kuhina a hooholoia.
Uku o na Luna Helu $8,000.
Noi mai ka Loio Kuhina e hookomo i 5 hapa haneri no ka ohi ana.
Ninauia a hooholoia e like me ka hoololi.
Dala Hale Mai Moiwahine $3.000 aeia.
Bila dala aupuni e hookaa ia ana 7.050 "
Uku panee maluna o na Bila aie 16.841.25.
Noi mai ka Loio Kuhina e hoopii ae i ka 25,841.
Noi mai o Mr. Hikikoki e hoopanee ka noonoo ana i keia a me ko ka mokumahu holo moana a ka Poalima. Hooholoia.
Makana no ka mokumahu Kilauea 8 000.
Noi mai o Mr. Hikikoki e hoopanee i ka noonoo ana a laweia mai ka Bila.
Kela a me keia lilo o ka Oihana 1,500 aeia
Uku makahiki i hookaa oleia 562 50.
Noi a Iokeve - - 22,50.
OIHANA LOIO KUHINA.
No ka Loio Kuhina - $10 000 aeia.
Kakauolelo - - 2.400 "
Na lilo na hele ana - 1,000 "
Ilamuku o ke aupuni - - 6,000
Noi mai o Mr. Matina i - 7,000
Noi mai o Mr. Koakanu i 8.000
Noi mai o Mr. Mahelona i - 6.500
Hooholoia e like me ka Bila.
Noi mai o Mr. Keawehunahala e hookomo i kakauolelo na ka Hamuku 1,000.
Ninauia a hooleia.
No ka Makai Nui o Hawaii 4,000 aeia.
" o Maui 4,000 "
" o Kauai 2.000 "
Noi mai o Mr. Koakanu i 2,400 hooleia.
Hooholoio e like me ka Bila.
Kakauolelo a ka Makai Nui o Hawaii 1,000.
Noi mai o Mr. Laiana e kiola ia haawina.
Kokua mai o Mr. Hikikoki i kela noi.
Kokua mai ke Kuhina Kalaiaina i ka haawina.
Ninauia ke kiola, a ua hooholoia e kiola Kakauolelo a ka Makai Nui o Maui 1,000.
Noiia mai e kiola loa ia haawina.
Ninauia, a haule. Hooholoia e like me ka Bila.
Noi mai o Mr. Koakanu e hapai hou ka noonoo ana o ka uku o ke Kakauolelo a ka Makai Nui o Hawaii. Ae ia.
Hooholoia e like me ka Bila.
No na Hihia Karaima $3,000 hooholoia.
No na Makai o Honolulu $20,000.
Noi mai ka Loio Kuhina e hoopii ae i ke 36,960.
Noi mai o Mr. Keawehunahala e hoopii loa ae a i ke $37,680 i heluheluia ai, no na Makai o Honolulu a me na wahi e ae a pau o Oahu.
Hooholoia ka hoopii ae i $37,680.
Na Makai o Maui - $7.644.45 aeia.
" o Hawaii 9,816 "
" o Kauai - 3,145 "
Kela a me keia lilo o ka oihana Makai 1,000 hooholoia.
Ma ke noi ana mai ua hoopauia ke Komite a hoopanee ka hana.
KA LUNA HOOPONOPONO, - - L.H. KULIKA.
KA HOPE LUNA HOOPONOPONO, J. KAWAINUI.
POE HAKU MANAO NO KE KUOKOA.
Rev. L. Laiana (Lyons) | S.M. Kamakau,
Rev. M. Kuaea, | Rev. C.B. Anelu,
D. Malo, (Lokoino.) | (Andrews.)
-
Ka Nupepa Kuokoa.
HONOLULU, IUNE 13, 1868.
NO KA HANA A KA AHAOLELO.
HON. W.P. KAMAKAU ME KANA
OLELO HOOHOLO.
-
HOAO E PANI I KE "KUOKOA" KA WAHA
OLELO AKEA O NA MAKAAINANA.
-
KA HOOPIIIA ANA O KE KUHINA KALAIAINA
HIS. EX. F.W. HUTCHINSON.
-
IA HAWAII HOLOOKOA.
-
O KO makou ake nui, ka ike mau i ka pono-a me ke aloha Lahui a Aupuni hoi o na Lunamakaainana a kakou a na makaainana i koho aku ai.
Ma ka pepa o kela pule aku nei i hala, ua hoopuka makou he mau olelo i ike makaia e makou, a i lohe mai hoi mawaho ae, aka, i ka noho ana o ka Hale Ahaolelo i ka Ponono iho nei, ua puiwa ka Mea Hanohano W.P. Kamakou, a ua hana i Olelo Hooholo e like me keia malalo nei:
OLELO HOOHOLO.
No ka mea, ma ka nupepa Kuokoa o keia kakahiaka, ua ikeia kekahi olelo oiaio ole o ia Pepa:
Nolaila, e hooholoia, e kauohaia ka Makai o ka Hale, e lawe mai i ka Luna Hooponopono oia Pepa imua o keia Hale i aoia oia, aole e hoopuka hou i na mea oiaio ole e pili ana i na hana o keia Hale Hanohano.
(Kakau Inoaia) W.P. KAMAKAU.
Ke ike ae la no kakou i kela mau olelo maluna, e hoahewa koke mai ana kekahi o na'Lii, he Lala i kohoia e ka Moi no ka aoao o na'Lii, e kauoha ana i ko makou kino holookoa, e maneleia aku e ka Makai Nui o ka Hale, a imua o ka Hale Hanohano luaole o ke Aupuni Hawaii, a e hookolokoloia makou, a e pani i ko makou waha ke ku ka hewa e like me ko lakou hoao ana e pani i ka waha o kekahi nupepa Kuokoa o keia kulanakauhale.
E ae mai e Hawaii ia makou e ninau aku i ka lehulehu, He mea pono anei no makou e uumi wale i na mea i ike maka ia a loheia mai paha e pili ana i na lala o kela Hale? He mea pono anei hoi no makou e popopulu a huna i ka na Lunamakaainana hana iloko o ka Hale Ahaolelo, i ike ole mai ai na makaainana nana lakou i koho mai?
Ke hai nei makou me ka wiwo ole, aole loa makou e hana pela, no ka mea, o na maka 10,000 a keu nana e heluhelu mai nei keia pepa, aole loa lakou e ae mai e lilo makou i poe huna hewa, a ina makou e lilo i poe huna hewa, alaila, e kau ana maluna o makou ke alina a ke Kanawai.
He makemake anei ka Ahaolelo e pani i ka Hoolaha Nupepa ma keia aina? He makemake hoi auanei ko Hawaii holookoa e hunaia ka hana a ka Ahaolelo malalo ae o na kuineki aaki pouli o ke koloka pouli o Keaka? He liu anei ko keia Ahaolelo i makau ai o komo liilii mai ka wai a puholo i ka moana?
Me ka makau ole, ke hilinai nei makou maluna o ka pono o ka lehulehu a hiki i ko makou wa e auhulihia ai. Aole makou e hopohopo a kuemi hope no ka makou mau olelo i puka, a aole no makou e hoihoi hope ana. Imua makou a make a lanakila no ka pono o ke Aupuni a me na makaainana mai Hawaii a Niihau.
Ma ka Poakolu iho nei, ua waihoia mai he Palapala Hoopii Luna Nui i ke Kuhina Kalaiaina, no na kumu hoopii eha malalo nei, na ka mea kaulana J.W.H. Kauwahi Esq.
AKAHI. Ka haawi ana i ka Palapala Kuai Opiuma ia Afong & Achuck no na dala he $10,000, me ke kudala ole ia e like me ke Kanawai.
ALUA. Ka haalele wale ana a poho ke Aupuni no na dala $720.00, no ka mea, ma ke kudalaia ana, ua kohoia he $10.720 no ua palapala kuai Opiuma la.
AKOLU. Ka hoole ana ia Chung Hoon aole e haawi i palapala hou, no ka mea, ua oleloia ma ke Kanawai, elua Palapala Ae Kuai Opiuma ma Honolulu, a ua haawi aku o Chung Hoon i $2,500, a i ole, alaila e kuai kudalaia.
AHA. Ka hoole ana i ke noi a Ahana no ka Palapala Kuai Opiuma ma Lahaina, ua haawiia aku $2,500 a me ke noi aku e kudalaia.
Ua waihoia ka Palapala Hoopii imua o ke Komite Wae, no lakou na inoa malalo nei: Messrs C.J. Laiana, V. Kanuka, J.W. Keawehunahala, C. Kalu a me E Jones. Ua hooholo ka Hale, imua wale no o na Lunamakaainana e hookolokoloia'i, a ku ka hewa me ka ole paha.
Ia Hawaii holookoa, ina ua hiki ke hoopiiia kei Kuhina, aole anei e hiki ke hoopii Luna Nui ia ke Kuhina Waiwai mua, oia o His. Ex. C.C. Hairasi, no kona lawe ana i ka uku makahiki o ka Oihana Waiwai a pau, a ke hana wale nei kona Hope. Eia nae ka mea pilikia, ina hiki mai kekahi pilikia kuloko, a lilo na Kuhina e ae ma ka lakou hana, kohoia i kanaka e mawaho ae ma ia wahi. Eia ka ninau: Mailoko ae o ka puu dala hea e ukuia aku ai ua Kuhina la no ka manawa, oiai ua heo ka Umi Tausani Dala i ka mea i noho ole a pau ka manawa no ua mau tausani dala la.
I ko makou manao, he mana ko ka Lahui Hawaii e koi ai e hoihoi mai i na dala i lawe waleia malalo o ka lima hana ole. Aole no i pilikia ua Kuhina la i kona holo ana aku nei i Wasinetona, oiai ua hookaawaleia he puu dala nui no kana huakai ma ke ano Elele Kuhina Hawaii, a heaha kona kuleana o ka lawe wale ana i ke dala a na makaainana.
-
Hoike o ke Kula Kaikamahine o Kawaiahao.
-
Ma ka hora 9 o ke kakahiaka Poakolu iho nei, ua hoikeia ke Kula maluna malalo o ke alakai ana a Liha D. Binamu. Ua kokoke e hiki i ke kanakolu na kaikamahine o keia kula. He poe liilii loa ka hapa nui o keia mau haumana; a o ka puni keia o ka makahiki o ke ao ana mai ka hoomaka ana mai.
Ua ao ia keia Kula ma na mea helu haahaa, ka palapala aina, ka pakoli, haku manao, ke pe-la ana a me kekahi mau buke e iho. Ma ka olelo haole ke ao nui ia ana, a he mahemahele no nae ma ka olelo Hawaii
O na himeni a kamalii liilii i mele ai, ua hele a hai-malule na leo i ka hoolohe aku a ke anaina, a ua komo no nae iloko o lakou ka mahalo ana aku. Aole o na mea wale no i haiia ae la maluna na mea i ao ia lakou aka, ua ao po ia ka malama hale ana a me ka hooponopono ana o na wahine ke lilo lakou i mau makuahine.
O na Kumumanao i heluheluia ma ka olelo haole e Maria laukea, a me M.A Painter, a me ke kumumanao a ke Kamalei Haku opio Miriama Likelike i haku ai ma ka olelo hanau iho o kona aina, i hoolahaia e makou ma ka aoao ekolu o ka pepa o keia la oia ke kumumanao no na ke poo "NO KA LOKOMAIKAI ua mahalo loa ia." E pono e mahalo loa ia aku ke kaikamahine a kekahi makua i hoohuli i keia Lahui ma ka pono, a hele aku ma ka aina o na makua, a hoi hou mai i Hawaii nei, e hapai i ka hoonaauao ana i na kaikamahine Hawaii. E lilo kana kula i kula holo mua e like me ia i ikeia iho nei.
-
Ua Heo Ke $50,000 Gula!
-
MA ka Poaha iho nei, ua heluhelu akolu ia ka Bila Kokua i ka Laina Mokuahi Mawaena o Kapalakiko a me Honolulu nei imua o ka Hale Ahaolelo.
Ua ae aku na Lunamakaainana nona na inoa malalo iho nei i ka haawi ana i ka Hui Waiwai nona na miliona Dala he Umi, i ke KANALIMA TAUSANI DALA A HAWAII ILIHUNA.
Hon. J.W. Kumahoa, E. Jones, L. Keliipio, J. Nakila, J.A. Nahaku, C. Kalu, Kapena Loke, J.W. Makalena, S.W. Mahelona, J.W. Keawehunahala, P.F. Koakanu a me D. Kaukaha. Hui 12. Huiia hoi me na'Lii he 11=23 ko lakou nui.
Eia na'Lii a me na Lunamakaainana i aua mai i kela mau dala:
Mea Kiekie W.C. Lunalilo. Hon Ioane Ii, Messrs H.R. Hikikoki, J. Upa. G.W.D. Halemanu, C.J. Laiana, G.W. Pilipo. W T. Matina. Alabati F. Kauka, Asa Hopu, H. Kuihelani, D.W. Kaiue, W. Pinehasa Wood, E.H. Boyd. (Ailuene) Kale H. Kauka, S.G. Waila a me V. Kanuka. Hui 17.
I ka pau ana o keia kau Ahaolelo, e hai aku ana makou i ke kulana o na Lunamakaainana.
-
I na Keiki Kula Sabati.
-
Ke haiia aku nei ka lono i na haumana Kula Sabati a pau o ka Apana o Kona nei, e hoouluulu ae na haumana Kula Sabati o Kawaiahao a me na anana e pili ana, maloko o ka Luakini o Kawaiahao, i ka hora 9 o keia kakahiaka.
Pela hoi na haumana Kula Sabati o Kaumakapili a me na apana e pili ana, e houluulu maloko oia luakini i ka manawa i hana maluna.
E hoomaka ana na Kula Sabati a pau o Kawaiahao e hele mai ma na Alanui, ma ka hora 10 ae, mailoko mai o Kawaiahao, a e hui ana me na Kula Sabati e ae, ma kahi i haiia ka lohe i na Kahukula Sabati. Nolaila i na Kamalii a pau i kuleana iloko o keia oihana, e hoike ia oukou iho he mau koa liilii io. O ko oukou la nui hookahi keia, a nolaila e ulele ae oukou.
I ka hui ana o na Kula Sabati a pau, alaila e kai like aku lakou iloko o ka luakini o Kawaiahao, a malaila e hoonanea like iho ai no kekahi mau mele a me kekahi mau olelo paipai.
O W.W. Holo opio a me na Kahukula Sabati na Luna nana e hooponopono ka huakai i ka hele ana ma ke alanui.
-
Ke Puhi Rama ma Waimea.
-
Ua hiki mai nei ka lono ia makou, a ua hoolaha mua ia ae no hoi e kekahi nupepa o ke kulanakauhale nei, ka nui o ka poe i loaa a i ahewaia no ke Puhi rama, hoolako ana i ka rama a me ke kuai ana aku i ka rama ma kela apana maluna. Ua hooikaika io ka mana o ke kanawai e kinai i keia hewa, a nolaila, ua loaa mai keia mau inoa he umikumamaha malalo nei, a ua hoopaiia ma ka hookolokolo ana:
Makaluhi, ae ua hewa no ke puhi rama, hoopaiia $150; Kauwahahea, ae ua hewa no ke puhi rama, hoopaiia $75; Kauaikopu, ae ua hewa no ke puhi rama, hoopaiia $50, John Lincoln, loaa ua hewa no ka hoolako ana i ka rama, hoopaiia $100; Makaluhi, loaa ua hewa no ka hoolako ana i ka rama, hoopaiia $100, ua hoopii; Pomakai, ae ua no ke puhi rama, hoopaiia $300, ua hoopii, Palema a me Kameo, loaa ua hewa no ke puhi rama, hoopaiia $75 pakahi, hoopii.
William Lincoln, hoopii ia no ke puhi rama, hoopau wale ia, Aa a me Kaliliki, loaa ua hewa no ke puhi rama, hoopaiia $200 pakahi, hoopii.
Kumunui, hoopii ia no ka malama i ka rama, waihoia a Iune 5, Kalilike, kuai rama, waihoia a Iune 5.
Iokua, no ka hoolako ana i ka rama, hoopau wale ia, Kakipi, hoopii ia no ka lawe inoa wale
E ike ia maluna ae, e hoopii ana kekahi mau kanaka, puhi rama imua o ka Lunakanawai Kaapuni, a no ka mea, he pilipilikana iki paha ia ma ia oihana, nolaila, e pakele ana paha lakou, aka, ina nae e hookuuia alaila, e lana haakei wale ana ia Apana.
-
HOIKE KULA O PUNAHOU.—Ma na auina la Poalua a me Poakolu iho nei, ua hoikeia keia Kula nui o na keiki haole a Hawaii o keia aupuni. Aole no i like loa keia hoike ana me kekahi mau hoike o na kau i hala, no ka mea, he mau keiki liilii ka nui loa o keia wa, a nolaila o na haawina haahaa iki mai i ko na kau i hala, kai ao ia i keia poe e like me ke kulana o na haumana. Ua uleu a makaala no kekahi mau keiki liilii ma na haawina i ao ia ia lakou e na Kumu. I keia makahiki, ua manaoia he mea pono e kapae iki ae i ka hoike po, e like me ka manao ana o na kumu he kupono. O ka nui o na haumana o keia kula he 72. Ua lana hoi ko makou mau manao i ka hapaiia ana o ka olelo Hawaii ma ia Kulanui. Elua mau papa kula ma ka olelo Hawaii e ao ia nei, a ua haku kekahi keiki haole i kona manao ma ka olelo Hawaii, oia o Luther Wilcox (Keiki a Wilikoki) o ke poo o kona kumumanao, "No ka ua," e paiia ana e makou ke loaa mai.
O ke Komite hoike kula o keia makahiki, His, Honor Elisha H. Allen, Kapena Simpson o ka Mohongo, Rev. D. Balauina a me Hanale Kamikana Esq.
-
E HOLO ANA IA HOKUAO i na Pae Aina o Maikonisia ma ka la 25 o Iune, nolaila e hoouna e mai i na palapala.