Ka Nupepa Kuokoa, Volume VIII, Number 28, 10 July 1869 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE VIII. Helu 28. Honolulu. Iulai10. 1869. Na Helu A Pau 397.

 

NA NUPEPA KUOKOA,

@ MAU IA MA HONOLULU

I keia Poaono keia Poaono.

$2.00

No na mahina he Umikumamalua !

$1.00 no no mahina eono.

ME KA HOKAA MUA MAI.

@

“KA NUPEPA KUOKA.”

Is published in Honolulu

EVERY SATURDAY

$2.00 per annum, or $1.00 per six

months, in advance.

 

ADVERTISEMENTS not exceeding 10 lines @ longer for $1.00 @

 

KA NUPEPA KUOKOA.

 

Na Hunahuna o ka moolelo Hawaii.

 

Aka, i kana wa uuku, ua hele no ia mai Kamelewai a i Honolulu me kona mau kahu nana ia i malama. Mamua nae o ko lakou haele ana, ua hoomakaukau ua mau kahu la i ka ia hou, no loko  mai o na loko puepue kalo, a loaa na kauna amaama, kapiia i ka paakai, a waiho ia iloko o ka puolo lau-kalo, a kau i ka mamaka, i loaa ka inai a ua keiki nei ke pololi oia ma ke alanui. Elua wahi e oioi (hoomaha) ai, ma Kahuawai i Kalauao, a o Napeha, i Halawa, a malaila e oioi ai a paina hoi. I ka wa nae e wehe ae ai i ka puolo lau kalo la, hele ka ia a uanii, a ua kekee no hoi me he niho la no ka puaa, no ka paa i ka puolo, a pela no e oleloia ai ua aina lae lua la.

I kekahi hele ana o kokoke i Napeha, mai Honolulu mai, ua maloeloe ua keiki nai i ka hele wawae, a makemake oia e wahaia ma ke kua o kekahi o laua, aka, he ukana no hoi ka laua la, oiai i kekahi na wahi ukana kapa, a i kekahi no hoi na wahi ukana ai; a no ka uwe na ole o ua keiki  nei, oiai e iho malie ana lakou, aia hoi, iho ana mahope o ua keiki nei kekahi mau haole elua, mai Honolulu mai no hoi laua, a e haele ana ma ko laua aina aia ma Waimalu; o Mela ka inoa o kekahi, a o Kiwalao ko kekahi. I ka ike ana mai o kekahi o laua la i ua mau haole nei, eia ka ia ala nane mua mai, O ua mau haole makemake ole nei keia la i keki uwe loa. A lohe mai la no ua mau haole la i keia olelo a ia la, o ka ninau ae la no ia ma ka olelo maoli, Heaha ana no ia? Pehea olelo ana no oe ka haole? Maikai no ka haole, keiki no aole maikai, nuinui loa uwe. O na makua no mamua, a o ua keiki nei mahope iho, a o ua mau haole nei mahope iho o ke keiki. A o ua keiki nei nae, he makau loa oia i ka haole, Ina he keiki uwe loa a na ole, maua no lawe iaia. A no keia olelo a ua mau haole nei, pau loa ae la ka uwe ana o ua keiki nei.

A ma keia wahi, e nana kakou e na hoa, ua aneane hoopunipuni keia mau olelo a lakou la i ke keiki; pela mau no ka hana a na makua a me na kahu hanai naaupo e kamailia mau ai i ka lakou mau keiki, aka, he kumu no ia e paakiki ino loa ai na keiki, e like me ka keia keiki e ike la.

O ua keiki nei nae, ua ike oia i kona pilikia maoli mai kona mau kahu ae, a pela no oia i hoopau loa ai i kona uwe loihi ana. Ninau nae ua mau haole nei, Olua no keia keiki? Hahai ae la no hoi ua mau kahu la i na makua ponoi o ke keiki a me ka inoa one e o ana, no ka mea, ua kamaaina paha laua ia lakou.

I kekahi wa mahope mai, manao iho la ke kaikuaana o ua keiki nei e hele i Waialee, Koolauloa, ka aina hoi o kona makua; ua noi koke ua keiki nei e haele po, a ne ae@a. A pela no oia i ike mua ai ia aoao o ka aina, a me kekahi o na keiki i mahiai i oleloia ma Kukuilolo. Ua kipa iki malaila, a makaikai no hoi i na mea i hanaia e like me ka lohe mua ia ana, ua like no hoi ia me ka ia nei. Aole no i huli malaila, a hele aku la a hiki ma Waialee, ia la hookahi no mai Ewa aku. He wahi aina maikai kela, makai a puni o ka loko na auala loi, a pela no hoi ma kahakai, maloko o koa-nalu. He aina maikai keia a lako pono hoi.

I kekahi mau la nae mahope mai, ua ane hala aku na la malihini, ia wa, lawe ae la ua keiki nei i kana wahi umeke a me ka pa paakai, a noho iho la mawaho iho o ka puka a hale o lakou, a malaila oia i paina ai, no ka mea, he keiki malama akua oia, a he ano haipule no hoi.

A iaia nae e ai ana, a me he ia la ka paakai i na keiki nei, ka hele a nunui kipe. Nana mai la ke kaikuahine maloko o ka hale, a ike mai la i ko ia nei hoohialaai aku, a ninau mai la. Heaha kau ia? He paakai no, mahi a ke kaikunane-e! O ko ia la puka mai la no ia mai ka hale mai, a hele aku la i kahakai. Aole no hoi i e@o ia kaha ana aku, hoi ma ana, me hookahi kauna manini, a elu hoi opule; a ko ia la unaunahi mai la no ia i na opule, a ihi no hoi i ka ili o na manini, a o ka ia kupono hoi iaia nei ka ia la i waiho mai ma ko ia nei alo, a pela iho la keia i ai ai.

Ike maopopo iho la ua keiki nei i ke ano pihoihoi o kona kaikuahine nona, a pela no ia i hoomanao mau ai i ka ia la mau hana a pau o ka noho pu ana. Aole no hoi i liuliu ma ia hope koke iho no, o ka u hoi mai la no ia i Ewa, a hahai aku la i na mea a pau i kona mau makua.

Eia kekahi; ua haiia imua o kakou kona ano haipule ma o aku la, a e pono paha e kamailio iki kakou malaila, no ka mea, ua hoomaalo mau ia oia ma ia ano i kona wa uuku, oia no hoi ka wa aole i hoopaaia kona hope i ka malo, a ua lawe pinepineia oia e ka makuakane a me na kahu kane, i ke kuahu, i na kakahiaka a pau o Kane, a nolaila, ua mau no kona malama akua ana.

A i kekahi wa hoi, ua haounaia oia e kona makuahine e hele i ke kuu ia na laua ma Puuopae, oia hoi ka inoa o kekahi apana aina o lakou; he mau loko ia malaila, malalo o ka malamaia ana e ke kaikuahine o kona makuakane a me kane kane; a malaila no oia e hoounaia ai. A iloko no hoi o kona mau wa a pau e hoounaia ai, ua nui na keiki e ae i hahai aku mahope ona, no ka hoi mai me ka ia; a na ia keiki a mau keiki paha e lawe mai i ka ia. Aia a kokoke aku lakou i ke kulanakauhale, a hoomoana iho la lakou e wehe i na ope ia, a hookaawale ae la oia i na mea kupono i kona manao, nana akua kane a me na akua wahine, a o ke koena iho, puunaue ae la oia nana a me kona mau hoa kamalii. Hoi aku la kela a me keia keiki i ko lakou mau wahi iho, a o ia nei hoi a me kona kokoolua, hoopuka loa aku la i ko lakou hale. Aia nae a hiki laua nei i ka hale, heluia iho la ke koena o ka ia imua o ka makuahine, a kauoha aela no hoi ua makuahine e hookaawale i kekahi mau ia na na’kua kane a me na’kua wahine. Ua kaawela mua no ia wahi a ke keiki. A o ka ko hoa hele hoi. Ua kaawale no kana, a o ka kakou wale no keia, wahi a ua keiki nei.

A no keia mea, i aku la ka makuahine, E kuu keiki, o ka makaukau maikai keia au e hoomaka nei ma ko maua alo, i mea e pono ai kau hana ana imua o kahi a maua i hai aku ai, e hoi ana oe i ke alo alii me kuu kaikunane. A ina e hoomau oe ma keia ano e hana ai, alaila, o ka pono no ia. Nolaila, o na koena mea ai a pau, e malama, a pela no i na mea e ae i waihoia mai ai e malama, a hiki i ka wa e ninauia mai ai, ua kupono no ia oe ke hai aku, ‘ei ae no’. A no kou malama ana pela, e manaoia mai no auanei oe he keiki na’u a na kuu kaikunane hoi.

A no ke ano haipule no hoi o ua keiki nei, ua hoouna pinepineia oia i na kakahiaka po-iki o Kane, me ka kahuna, no ka pilikia o ka loko o Hanaloa, no ka mohai a me na alana i laweia ma kahi kupono ia ano, a ua kapaia ia mea he Aoa, he wahi e  mohaiia ai no na’kua, a ua pili keia ano i na loko; a o na kuula hoi, no na kai, a moana lawaia, a koa ia aku a ahi paha, ko ia mea he kuula.

Na mohai no ka Aoa, he puna hiwa o ka makahiki hookahi a hapa makahiki paha : he huhui kalo maka, he ahui maia, a he mau kauna amaama, e like me ka mea lawa pono i na hoalawehana, oia mea a me ke kohekohe (he mauu auala loi).

I ka wa po-iki o Kane, ua makaukau na mea i hoolakoia, alaila, ke pono ia ka umu a me na pohaku ekolu a eha paha, e waiho mua malaila, a o ka pulupulu, he mauu pili maloo, malalo ia o ka aunaki, mamua o ka hia ana i ka aulima, oia kahi laau pokole, eha a elima paha iniha, a o kona puipui, ua like no ia me ka manamana lima miki poi a oi iki ae paha. Ua nalinali kapakahiia na aoao elua i miomio ka hia ana iho o ia mea maluna o ka aunaki, a na ka wawae a lima paha o kekahi mea nana e paa iho maluna o ia mea, a na kona hoa e hia ua aulima la, me kona mau peahi lima i huiia ma kahi hookahi e hia ana. Ia wa pule no ke kahuna ma na mea i maopopo iaia, ma na aumakua o ka po, (oia ka poe i make mamua) alaila i na aumakua o ke ao (oia ka poe e ola ana) a mahope aku na hua pule e ae. E like paha me ka Iesu pule i ao mai ai, alaila, o na olelo pule e ne.

Aole i pau

He Palapala Hoike hana mawaena

O NA PAKE MA KA MOKUPUNI

O Kauai, na S. P. Ahiona.

 

I ka pau ana o ka halawai, hookipa lokomaikaiia ako la makou e Mr. Maioha, e ai iho i na moa ai o kona papaaina, ua ai iho makou a ana i kona lokamaikei.

A no ka ikiki hoi o ka la o ke awakea, ua ka-ua mai la no kela ia makou e luana oluolu        malaila a haumana mai, alaila, naue aku. Aka, iloko nae oia wa, loaa iho la ia’u he manawa e kamailio ai a kukakuka pu hoi me kekahi pake e noho ana mailaila.

P.M. Hora 3-Mamua o ko makou haalele ana ia Kalahea, ua noi olulu mai no o Mr. Maioho a me kana lede ia makou e paina hou, a ua hooko no makou e like me ko laua lokomaikai.

Haalele iho la makou ia wahi, a hele aku la au a me kuu kanaka, a o Mr. A. Kaukau hoi ke lalakai aku oia wahi, a o Mr. Helekunihi hoi, ua emi hope aku no. Hele aku la makou a hiki ma Wahiawa, kipa aku la ma ka hale o D. McBryde, ka Lunakanawai Kaapuni o Kauai, oiai ua lono mai au, he pake no malaila. Ma ko makou hiki ana aku, halawai mua iho la makou me ua mea la i Mahaloia Mr. D. McBryde, a ua oluolu oia e hoouna mai i kana pake kuke e halawai pu me a’u. Ua ao aku au iaia ma ka olelo maikai a ka Haku, a he mau buke pake no hoi kekaei a’u i hai aku ai iaia. Ua kamailio iki no hoi au i na Iapaua e noho ana malaila no na hana pono a ka Haku, e like me na wahi mamala iki i loaa ia’u ma ka lakou olelo, a ua lohe no laua.

Haalele iho la makou ia Wahiawa, a “kipopou” aku la makou ma ke “kaulu” o Hanapepe, a kipa aku la makou ma ka hale pake. Ua launa oluolu au me na pake hale kuai a me na pake mahi raiki, he eha ko lakou nui. Ua hoomaka no au i ke kamakamailio pu ana me lakou no na hana pono a ka Haku.

Ia makou malaila, ua manao no o Mr. Kaukau, e hoi makou ma ka hale kamaaina e moe ai i keia po, ua ae aku no au, ake, ua aua ia mai hoi au e na pake, nolaila, ua moe iho ko au i keia po ma ka hale kuai o na pake, a ua loaa no hoi ia’u he manawa e kukakuka hou ai me lakou no ka ka Haku hana.

Aper 27. – Ma keia kakahiaka, halawai pu iho la au me ka mea i Mahaloia J. Kauai, ka Lunakanawai Apana hoi o Waimea, a ua lawe pu mai no hoi oia i lio uo’u e holo aku ai i Waimea. Nui ka lokomaikai no kona hoomanao aua mai i keia wahi malihini.

Ma ka hora 2 o ka auina la, halawai makou ma ka luakini hou ma Hanapepe nei. Ua haneri a oi na mea i hiki mai ia halawai; a o ka hapa nui nae o lakou, he poe ohana no Mr. Lowela. Ua launa mai no hoi ka pake mea hale kuai, a o na pake hana hoi, ua pilikia no lakou i ka hana. Ua hapai au i ka hana, me ke akahele no, a ua oluolu no ke anaina holookoa. I mai nae o Mr. Kaukau ia’u, akahi no oia a ike i ka nei o ka poe i hele mai i ka halawai. I iho la nae hoi au iloko @’u, ina pela aole no lakou i hele mai no ka manaoio maoli, aka, he makemake wale no e makaikai i ka haiolelo a kahi pake i hoonaauaoia ma keia pae aina, ma na mea o ka Uhane, oiai no hoi paha, akahi no a ike ia kekahi pake iwaena o keia lahui, e auamo hele ana i ke kea o Kristo.

Ma ka hora 4 o ke ahiahi, ua lulu lima hou me na kamaaina a me na pake no hoi malaila.

Haalele iho makou ia Hanapepe, a hele aku i Waimea. Ua hookipa lokomaikai ia maua e noho pu me Mr. Kaukau, e noho pu ma ka hale nui a oluolu kupono o J. Kauai esq.

I ka’u makaikai ana a kilohi ana hoi i na hiohiona o ka aina, mai Koloa a hiki i Waimea nei, he maikai wale no ke alaweele aka nae, he lelehu no na kaiaulu a me na hanahanai, iluna ilalo e kipopou ai; aka nae, ua hiki no ke ki ka lio, a o ka ula loa ka hewa o ka lepo. O ke kahawai nae o Hanapepe a me Wai@ne, oia na mea a’u i makamoe loa ai, no ke akea loa a me ka pau pono o na loi i ke kanuia i ka raiki a me ke kalo; a o ka raiki no nae ka hapa nui i kanuia ma keia mau wahi. Ua ike au i kekahi papohaku nui e hahaia ana e na pake o Hanapepe; me he mea la he 30 eka a oi ae ka nui; a e kanuia ana i ka raiki maloko o ua pa la; a o ka mea i hanaia ai o keia pa nui, i ole ai a komo na lio a me na bipi iloko e kamaa ai i na loi raiki i kanuia.

Eia nae k mea pilikia loa ma Waimea nei, ua ikaika loa ka la, nolaila, ua maloo na mea ulu ma ke kula, a pilikia iho la na holoholono no ka ai ole.

Hookahi no pake maanei, a nona no hoi ka hole kuai, a oia wale no ka mea i loaa ia’u. Ua kamakamailio pu maua no ka pono o ka Uhane. Ua haawi aku au iaia i kekahi mau buke pake, i hoopihaia i na olelo maikai a ka Haku, me kuu paipai pu aku no hoi iaia e malama i na hana maikai o ko ke Aua aupuni.

Ua lohe mai no hoi au, he pake kekahi mauka o Makaweli, a ua pii aku hoi au me Mr. Kaukau, aka uae, ua nui mai ka wai ma ke alanui, a no ka hopohopono hoi kekahi o’u no ke ahiahi loa, no ka mea, ke welo aku la ka la i Lehua, a nolaila, ua hoomoe ia manao o’u apopo.

Aper 28. – Ma ka ae oluolu ana mai o Mr. Kauai, nana e kii aku ka pake mauka, e noi aku iaia e iho mai e kamailio pu me a’u. A no ka hooholoia ana o ka manao pela, nolaila, ua loaa ia’u he wa kaawale e hele aku ai e makaikai ma na wahi kaulana o keia apana.

Ala ae la ko makou kakahiaka nui, a hoomakaukau no ka holo aku i ka makaikai. Holo aku la makou a hiki ma Waiawa, kipa aku au me Mr. Kauakau a me kuu wahi hoa ae ale no hoi, ma ka hale o Mr. Kaukau, ua hookipa oluolu mai oia a me kona ohana ia makou; ma. laila no hoi i malamaia ai ko makou pule ohana. Ua haawi mai no hoi oia ia’u $2.00 no ke aupuni o ke Akua, a ua hanai mai no hoi ia makou i ka ai a me ka ia no hoi.

Ma ia hope iho o ka luana ana, ua holo pu aku oia i kamaaina no makou nana e kuhikuhi i na wahi pa-na a me ka heiau kaulana o Polihale; he heiau kahiko loa keia a me ka limu pelaho ole (Pahapaha o Polihale), ua ike makou i keia limu kupanaha.

Haalele makou ia wahi, a hoi mai la a hiki ma ke one kani o Nohili. Ua lohe mai nae makou, aole ka e kani ua one nei, no ka ua ana i kekahi mau la iho. A hiki makou malaila, ua hoao koke no makou, a ua ike io au i ke kani, a o ke kani paha ia la, ke puiwa la na lio o makou e ku kokoke mai ana. He mea kupanaha maoli keia.

Haalele hoi makou i keia wahi, me ka pau ole no nae o ka makemake, a hali hoi mai la, a i nana mai ka hana, e haalele ana ka wailiula o Kaunalewa, oiai e lana ana i ka lepo. O keia mea kupanaha no hoi kekahi.

Ua hoike ia mai ke kupanaha o keia mea, ma ko hoouna mua ia ana o kekahi wahi kanaka i hele pu mai me makou ma ia huakai, e holo e oia mamua, a e kali iki hoi makou mahope, i ike pono ia ke ano o ka wai. Iaia nae e holo la me kona lio, me ke kuehu ae hoi o ka lepo, a nana aku la makou i ke aka o ka lio a me ka kanaka ilalo o ka lepo hula, alualu mai la makou ia ia la, oiai ke holo la kela ma ua wailiula la, a ke holo aku nei no hoi makou a hiki i kahi i hui ai. A ia makou hoi e ku ana, huli like aku la makou a nana i hope, e lana mai ana ka wai, aka, aole nae he wai maoli, he lepo wale iho no. He keu no hoi o ka maikai o keia wahi. Ua kamailio mua ia mai no au e na kamaaina no keia mea a me ke one kani, aole nae au i manaoio, aka, i ka ike maka ana, akahi no a hoopauia ko’u kuhihewa a me ka hoomalo ka hoi.

He nani lua ole hoi na wahi kaulana o Waimea. i ike ole ia e a’u mamua. aka, o Kawailiula nae ka’u mea makamoe loa.

Hiki awakea aku makou ma ka hale. a maha iki, ninau aku au ia Mr. Kauai, no ka pake ana i kii ai, aka, i mai la kela, “Aole au i hiki, no ka nui loa o ka wai ma ka muliwai, aole e hiki aku ma kekahi aoao, ma kahi hoi o ka pake i noho ai.”

P.M. Hora 2 – Halawai pule no na kanaka ma ka halepule o Waimea nei, no ka hoolohe ana i ka haiia o na olelo a ke Akua ma ka waha o kahi malihini. Me he mea la he elua haneri kanaka a keu i hiki mai ma keia anaina pule, aka, ua oluolu no i ka hui pu ana mai e hoolohe i ka olelo maikai a ke Akua. Ua maikai no ka makou malama ana, mai ka hoomaka ana o ka hana a hiki wale i ka pau ana. Ua lulu dala lakou no ka Oihana Misionari Pake, a ua loaa ma ia lulu ana, he $13.00, a hui pu me na dala elua a Mr. Kaluahi, ua loaa he $15. O keia mau dala, ua waiho aku au ka lima o ke Kahu Malama Waiwai o ia Ekalesia, oia hoi o J. Kauai Esq., a nana no e hoihoi aku i ka Puuku o ka Papa Hawaii.

P.M. Hora 2 ½ - Haawi au i ko’u aloha hope ia Mrs. a me Mr. Kauai, no ko laua hookipa lokomaikai ana mei ia’u, a me ke kokua pu mai no hoi i na lio.

Ma ka ae oluolu ana mai o Rev. A. Kaukau, nolaila, ua holo pu aku makou no ka hoi i Koloa. Ia makou e naue hele ana, kipa iki ae la au e launa me na pake ma Waimea a me Hanapepe, ua waiho aku au i kuu manao paipai hope loa ia lakou, no ko lakou malama ana i na hana pono a ka Haku.

Ia makou ma ke alanui, he wahi kilihuna ua iki ka i hoopulu elo iho ia makou, aka, ia makou i hiki ai ma Koloa, ua hakukele loa ke alanui i ka ua, oiai ua ua ia iho iloko o na la o’u ma Waimea a me Hanapepe. Kipa o Mr. Kaukau a me kuu kanaka ma kahi o Mr. Kaukau a me kuu kanaka ma kahi o Mr. Helekunihi, a owau hoi, ua hoi hou au ma kahi o Mr. Kamika, kahi a’u i noho oluolu mua ai.

Aper 29. – No ka pilikia o Mr. Helekunihi, ua hele hou makou me Mr. Kaukau a hiki ma Lihue. Ma ka lokomaikai no o Mr. Kamika, ua kokua mai no oia i lio no’u, a pela hoi o Mr. Helekunihi i ho no kuu kanaka. Haawi aku no au i ko’u aloha ia Mr. Kamika a me kona ohana, a ia Mr. Helekunihi no hoi a me kona ohana, a o ko makou holo no hoi ia i Lihue. He la ua liilii no keia, aka, aole no makou i pulu nui loa i kaua, a hiki awakea ana makou ma Lihue, a kipa aku la ma ka hale o Rev. J. Waiamau, a aloha aku me ka lulu lima pu me ka ohana. Ua paina awakea makou malaila me ka oluolu.

Ua launa mai kekahi pake a Mr. Laiki me a’u, a ua kukakuka au me ia no na hana pono e pili ana i ko ke Akua aupuni.

I ka auina la, ua kii mai Mr. Laiki ia’u e hoi aku me ia a me Mr. Wilikokiopio e noho ai. Ua ae aku au i kana noi, a malaila ko’u paina ahiahi.

I ka po ana iho, ua iho aku au e ike i ke kula himeni a Mr. Waiamau, maloko o ka luakini. He eha kane a me eha no hoi wahine e himeni ana. He mau puukani no, o ua maikai ko lakou himeni ana.

I keia po, ua hookipaia aku au e Mr. Raiki e moe ma kona hale i hoomakaukauia me ka maikai.

Aper 30 – Ma ka ae oluolu ana mai o Mr. Waiamau, ua holo aku maua e launa me na pake ma na halekuai ma Nawiliwili, a me na pake kanu raiki o ke kahawai o Hulaia a me na pake hana ma ka hui wiliko. Ua haawi aku au ia lakou i na buke i pili i ka olelo maikai, a pela no e ao aku ai ia lakou no ka pono o ka uhane, a paipai ia lakou e hale mai i ka halawai pule ma ka la Sabati. Ua ae oluolu like mai no lakou i na mea a’u i noi aku ai. Elua hele ana o’u e ike i na Iapana. He eono ka nai i loaa ia maua. Ua kamailio au ia lakou e like me ka mea i loaa ia’u. Ua lohe no lakou, a ua hoike mai i ko lakou manao olioli no na olelo paipai ia lakou no na hana pono.

O Mr. Kaukau hoi, ua hoi aku oia i keia kakahiaka i Waimea, a ua waiho mai i kona aloha ia makou. Ua lana ae ko’u manao, aia pu me ia ka Uhane o ke Akua, e malama maikai ana iaia ma ke alanui, a hiki aku i kona home o ka aina lepo ula o Waimea.

(Aole i pau)

 

He lili maoli no ko Hua-a!

 

Ia’u e hilinai ana a kalele muku ma ka palekai o ka oluolu, kaalo ana o Hua-a me kona mau koa pualu, mawaho ae o ka pae humu o ka pahu-kani o ko’u pepeiao, ua kaumaha nae i na iwi bipi io ole.

Ua makaikai au i na olelo a Hua-a a me kona mau koa pualu, i loko o na la i hala mai ka mua a ka hope, aole wahi io i loaa ia’u. O ke ano o na olelo a Hua-a me kona mau koa pualu; he au ikaiki no ia e ko aku ana i ko’u lahui iloko o ka hewa e poino ai. I na o ka lako, o ke kuonoono o ke kane mamua o ka mare ana, ke kahua; me ka nela o ka makemake, ka oluolu o ke aloha, alaila, ua kuai maoli ia ka wahine e ke kane; ua mare ia no ka wahine e ka waiwai o ke kane, o ka haalele no ia o ka wahine i ke kane me ka hewa ole, alaila, ua lilo i mea ole ke kauoha a ke Kahuna, e malama ke kane me ka wahine ia laua, oiai ko laua mare ana; i ka wa ai, i ka wa ai, i ka wa lako, i ka wa ilihune, i ka wa ola, i ka wa mai. A o ka noho ana o ka wahine he hoomanawanui wale iho no me ka oluolu ole, aloha ole. Ua like ka mare me ke kupapau!

Ke olelo mai nei o Hua-a me ka bakelo o na upe, “o ka makou puni ka mare ana i loko o keia au hou.”  Ka olelo nei au; he manao koho wale kou, wahi a ka hoakaaka 21, o ka Moleanahonua. Aole ia o ka oiaio o kau mea e hoohalahala nei, eia no ke kumu o kau hoohalahala akea ana; o ka lilo o na pua maemae i ou hoa kaua ma ke kahua hahana; nolaila make kaanini o Hua-a me kona mau koa pualu. He lili makehewa ka oukou e o’u hoa kaua, o ke kahua hahana.

Ke olelo mai nei o Hua-a, “o ke aloha ke kahua o ka mare ana, aole ia he kahua; eia ke kahua oiaio, o ka mare ana, o ka hoouluia o ka lahui, o ka maluhia o ka noho ana ka malamaia o ke ola. O ka hale e kukulu iho ai maluna o keia kahua, oia kau i hoike ai i ke akea, o ke ano oia kamailio au, he lili no e like me ke poo o keia kumumanao. He lili makehewa na kaua iluna o ka laau. I paa paha ko maka i ka hualu i ike ole ai oe i ke kahua oiaio o ka mare ana, a’u i hai ai ia oe, a me ou hou makapo, he oiao, ke haha poeleele mai nei oukou, me ka ike ole i ke kahua o ka mare ana; a me he mea la he malihini ka olelo a ke Akua ia oe, a me ou hoa makapo o ke kahua hahana. Ua kanaha makahiki a oi ka Olelo a ke Akua i Hawaii nei, a heaha la ka mea i hakilo ole ai iloko oia mau olelo a ke Akua? I ike ai oukou i ke kahua oiaio a’u i kukulu ai imua ou, a me ka lehulehu. He kahua kamalii kau Hua-a, a me ou houa i hoohalahala ai, a make kaanini hewa, kole hewa ka wahi ka ia maka ole, ke kole pono iho no o na wahi wawaeke kukini aku i Waialua, a i ole ia, i Makawao ae, welo pono ana hoi paha kihei a Keaeloa i ua mau kanaka.

Ke kauleo mai nei oe e hooponopono kakou i ko kumumanao. Oia hoi ka waiwai, ke kuonoono o ke kane, mamua o ka mare ana, mai pono ia, ina aole au i hoakaka ia oe mamua, a no kou uwalo ana mai ia’u, ke kuhikuhi aku nei au i ke kahua oiaio o ka mare ana, aia ma ka Buke 7 Helu 42, o ka malama o Okatoba 17, 68, malaila oe e ike ai i ke kahua oiaio: e maluhia ai oe, a kuonoono ai o ua o Hua-a, me kou mau koa pualu. Ke i mai nei oe, mamuli o na kumu eha, ka hapa nui o ka poe e mare nei, mawaena o na kanaka Hawaii, a ke haalele nei i ko lakou berita mare. Ke pane nei au me ke kanalua ole; he like loa na kumu a ka poe e haalele wale nei i ko lakou mau berita mare, ma ke kahua a Hua-a i hoike ai, imua o ka lehulehu, no ka mea, oia ke kahua a Hua-a i kukulu ai, he kahua ia e nui ai ka lahui Hawaii, no ka mea, he ano piikoi ka lahui Hawaii i na mea panio a ka haole, e like me Hua-a. Ua oki malie oe, mai pii ae oe i ka lala o Kauhala-li, o ikeia kou wahi hilahila me ou hoa.

Ke haukeke mai nei ka waha o Hua-a, a hua nui na maka i ke kino, a piha ka opu i ka makani, kapalili ka welelau o ke alelo, i ka ua mea he lili. Ua like na alelo o Hua-a me ka opala e puhiia ana e ka makani. Nolaila, ke oni nei no W.B. me ko’u mau koa, me he lupe lele la a pului kaua-awa; i ke ku a ke kahua oiaio, mai kania-a oe e Hua-a; o pehu na maka, o like no auanei me ko inoa, o Hia-a i hoololi iki ia ae o Hua-a.

Me ke aloha.                                                   

 W. B. KALA

June 29, 1869.