Ka Nupepa Kuokoa, Volume X, Number 22, 3 June 1871 — Page 4

Ka Nupepa Kuokoa

KE KILOHANA POOKELA NO KA LAHUI HAWAII

The Beautiful Snow.

1.         Nani ka hau! na lelehuna hau!

            I pa ma na pua, a pa ma na iau;

            I pa ma na hale, a pa ma na poo;

            I pa ma na poo, a poohina mau no—

            Huiahula mama, me he mea oli e—

            A pa ma na mauna a olino mai—

            A pa me he honi onini maikai

            Ma kuu papalina a ulaula'e—

            A pa noi mai me na lau helelei—

            Maemae a huali ka hau nani nei!

2.         Nani ka hau! na lelehuna hau!

            Huhui a ahu, a lelele no,

            A inuwali wale, oniu pokaka

            Me he paani lea ke ku a nana;

            Aiualu, heihei i ka maalo ae.

            A ku i ka maka, a pa ma ka lae—

            Ala'e na ilio, a aoa huhu.

            A naho i ka hau no ka pa ia lakou,

            Olioli kauhale a aloha maikai

            No ka pa nahe mai o ka hau nani nei.

3.         Nani ka hau! na lelehuna hau!

            Olioli na keiki a lele mele pu;

            A pahee na holua ma na alanui hau.

            A kani na bele o na lio alako—

            Kakani, hoholo, houho huro,

            Ma ka hau pahoehoe mao a mao.

            Keokeo ka hau i ka haule ana mai,

            M@a ka hehiiaʻe e na kini naueue ae,

            A hui me ka lepo na huna niai e,

            Paumaele a ino ua hau nani nei.

4.         Maemae au me ka hau i ka wa mamua'e

            Ua haule no nae me ka hau haule nei.

            Ua hehi ia'e ia e koonei wawae,

            Ua lepo, ua ino kuu inoa maikai;—

            Kuaiia kou uhane i kuu enemi

            No ka uku kulia, he apana ai—

            Kue i na hoa a holohua'e,

            Me ke noi e make, makau la o nae.

            Auwe kuu haule! a haumia e!

            Maemae nae mamua,me ka hau nani nei.

5.         Maikai ao mamua'e me ka hau nani nei;

            He maka huali, he nanu aiai,

            Aloha ia'e la no kuu akahai,

            Mahaloia'e no ka noho maikai.

            Ano, ua kaawale na hoaaloha o'u,

            Na makua, he Akua no kuu hoolalau;

            Aloalo, haalele na hoa hune no,

            Makau i ka launa ke hookokoke au.

            Paumaele no au me na kanaka e,

            Aohe mea maemae me ke hau nani nei.

6.         Nani ka hau! na lelehuna hau!

            I pa olu mai ma ka mea i lalau.

            Mai haohao nue oukou la ke pa ma ku po

            Me ke anu ikaika a ku i kuu naau,

            A maule, opili a aili no.

            Pono ole ka pule, ua hewa loa wau,

            Oolea, kahe ole na waimaka o'u,

            Aohe o'u oli, nohe manao.

            Auwe la kuu hewa! ke make nei au,

            Ka hau nei kuu moe, kuu wahi kupapau.

7.         Nani ka hau! na lelehuna hau!

            Mana ole no nae i ke hoomaemae ia'u.

            Mahea la kuu holo e hoomaemae ia'e?

            I na lelehuna koko o Iesu anei?

            Ua u, a, ua eha, a make pu no—

            He aloha anei kona i ka mea i lalau?

            Malia he aloha, e hono no au,

            E Iesu aloha, e hoolohe i ka'u.

            A hooauau ia'u ma ia punawai au,

            A oi kuu maemae mamua oka hau.

HAWAII.

 

Ka Oihana; Kahunapule a Kahu

EKALESIA.

HELU 3.

            Ua weheweheia ka pono, ka waiwai o ke akamai e pili ana i ka uhane. Pehea e Ionu'i ke akamai, ka naauao, ka makaukau? Ma ka hele ana no i na kula kahuna—a hemo mai iwaho—e hoomau no i ka imi ana, i mau ka oi o ka pahi. Aole mau ka oi o ka pahi ma ka hookala hookahi wale no. E kumumu a manumanu ana no ia ma ka okioki pinepine ana, a pono ke hookala hou, a hookala mau ia i oi. Aole piha mau ka pahu ai, pahu wai, ma ka hoopiha mua ana. E emi mau ana i ka ai ia, i ka inu ia, i ka haawi aku paha. E hoopiha mau ka pono. @ E hoomau no i ka ai, i ole e pololi, i mau ka maona. Pela ke kahunapule a kahu ekalesia. Aole mau ka piha o kona waihona, i ke akamai, i ka ike; Ke hookahe aku aku nei oia i ka ike, nolaila, e iini a hoopiha mau i ka waihona ike, i ka uhane, oia hoi ka ike i ka ke Akua olelo. E hoolakoia i na buke a pau i paiia ma ka olelo Hawaii, e pili ana i ka ke Akua olelo, ka wehewehe ana i ke ano, ka Moolelo Baibala. Moolelo ekalesia, a i kela buke i keia buke e pili ana i kana oihana. A e ao mau i ka olelo Beritania, i hiki ke kuai a heluhelu i na buke Haole, kahi e loaa'i ka naauao he nui wale. A, e mau ka pule i ke Akua, i  piha mau i ka Uhane Hemolele, i lako i ke akamai, no ka mea, aole i ike ke kanaka i na mea o ke Akua, o ka Uhane o ke Akua wale no. E nana, a heluhelu, a hoomaopopo, ia I Kor. 2:4-15.

            I na nele oe i ke akamai a ka Uhane Hemolele i haawi mai ai, hemahema loa oe, a maua ole ma ka hoohuli mai i na kanaka ma ka pono.

            3. Ua hookahunaia oe a hookahuia paha, heaha na pono, na hana, mahope?

            1. E lawe oe i wahine pono nau, ke noho wahine ole oe. 1. Timoteo 3:2. He mea mau ia, mai ia Adamu mai. He kahuna e Adamu, he wahine kana; he kahuna o Aberahama, he wahine kaua: he kahuna Ruela, he wahine kaua; he kahuna nui o Aarona. he wahine kaua; he kahuna o Samuela, he wahine kaua; pela hoi o Eli, o Ezekiela; Petero hoi, he kahuna ia, he Luheolelo, 'ka kihopa mua, wahi a ke aoao Pope, a he wahine kaua. Mat. 8:14. I Kor. 9:5 O Kepa, o Petero ia.

            Nohea ka hoole o na Katolika, aole pono ke mare na kahuna me ka wahine? a  mare ia, e okiia? No ke kuhi hewa, a no ka diabolo paha, i haole na kahuna iloko o kana pahele, a iloko o kona lua hohonu.

            A heaha ke ano o ka wahine? i wahine aha ka wahine kupono i ke kahunapule?

            1. I wahine naauao, no ka mea, he kumu no ia nana e ao i na wahine a pau ma ke kihapai o ke kane; nana no e malama i na halawai wahine, e paipai aku ma ka ke Akua olelo, a nana no hoi e ao maloko o ke kula Sabati. Pono ke naauao ka wahine ma na mea e pili ana i ka uhane, a ma na hana e pili ana i ke kino, i ka humuhumu, i ka okioki lole, i ka holoi a aiana lole, i ke kuke ana, i ka malama ana i ka hale, i ka malama ana i na keiki ke loaa. Pono no hoi ke makaukau i ka himeni ana.

            2. I wahine kuoo, noho malie, noho maikai, akahai, oluolu, aole uki, aole hoohiehie, aole hookiekie, aole haaheo, he haahaa, aole huhu, a lili, a huahua, a nuku aku.

            3. I wahine ikaika, a hoomanawanui ma na hana pono; a launa a halawai pinepine me na wahine, me ka noonoo a hoopuka aku i na hana e hiki ai i na wahine ke hana i mea e pono ai ke aupuni o ke Akua.

            I ehia wahine ka pono na ke kahuna hookahi? 1 elua, eha, a lehulehu no. wahi a na Moremona. Ma ka hoole loa i ka wahine ka aoao Pope ! ma ka mare lehulehu ka noao Moremona. Pehea Paulo? "he kane na ka wahine hookahi," I Tim. 3:2  Tito 1:6. Pela no, mai ka wa kahiko mai. Hookahi wahine a Adamu; hookahi a Aberahama—hoao no nae oia e lawe i ka lua; huhu nae ke Akua, a heopai ia ia, ma ke kauoha e kipaku aku i ka lua me kana keiki; nole o laua kuleana o ka waiwai hooilina,

            Hoao hoi ka moopuna, o Iakoba e lawe palua paha i na wahine nana. Huhu ke Akua. a hoopilikia nui wale ia ia.

            A, ke oki no ia o ka lawe palua ana o na kahuna i na wahine. Hookahi no wahine a Ruela, a Mose, a Aarona ke poo nui o ka oihana kahuna, a Eli, a Samuela, a Ezekiela, a Petero ma.

            Ua loaa ka wahine, he wahine maikai, kupono, makaukau ma na hana a pau.

            2. A heaha ka lua? he hala ole. I Tim. 3:2.  Tit. 1:6. Heaha keia hala ole? ua pau ka nana ana i ke kino, a me ka uhane, he kino kina ole, he uhane maemae.

            Pili keia hala ole i ke aha? I ka noho ana imua o kanaka. Imua o ke Akua, ua hewa no, ua halu no, ua hewa pinepine. Maloko o ka naau ka hewa he nui wale. Ua mihiia nae, a ua paio mau aku no i komo ole, a komo i kipakuia'ku. E hala ole kou noho ana imua o ke ao nei. E hala ole ma ka olelo, aole olelo huhu, hoopunipuni, hoomaewaewa, nuku, hoohenehene, hoopaapaa ino, hoonaukiuki, hookonokono i ka hakaka, hoahewa wale, hookiekie, kaena, haanou. E hala ole ke alelo, ka waha, na lehelehe, ka puu kani-a-i. Mai komo, mai hoao, mai lawelawe i na mea awaawa;—i ka waina. i ka paka, i na mea ona a pau. He kumu hoohalike oe, e ke kahu, na na kanaka, na na hoahanau. I na hala oe ma keia mau mea' oi loa paha ka hewa o na kanaka, o na hoahanau. E pale mau aku ia mau mea.

(Aole i pau.)

Na Hipa o ka Hoomaloka.

            Mawaena o na puu Nu Enelani, ma Amerika Akau, ua noho elua mau haole hoomaloka;—ua ola laua a oo e hoino ana i ka inoa o ke Akua.

            Ua lohe kekahi o laua i ka Euanelio o Karisto, a no ka lohe ana, ua manaoio oia i ke ola mau loa. Aole liuliu aku, ua hele oia e kamailio pu me kona hoalauna hoomaloka; a i aku la ia ia, penei;

            "Ua hele mai nei au e kamailio pu kaua. Ua huli au ma ka pono."

            Ae mai ka hoomalokoa, "ae, ua lohe au, ua hele oe i ka halawai pule, a ua noi aku ia lakou e pule nou; a ua kahaha no au, no ka mea, manao au ua oi aku kou noiau i ko na kanaka e ae a pau ma keia kulanakauhale.

            I aku la ke Karistiano ia ia, penei; "He wahi hana no ka'u me oe, a ke makemake nei au ia oe, e uoki ke kamailio ana, a hoolohe mai ia'u. Elua po aole au hiamoe, no ko'u noonoo ana i keia mea.

            "Eha o kou mau hipa ponoi, aia no lakou iloko o ko'u ohana hipa. Eono makahiki mau ua aku nei, ua komo lakou iloko o ko'u aina hanai hipa, a ua ike au i kou hoailona maluna o lakou; a ua hopu au ia lakou, a kau i ko'u hoailona maluna o lakou—Ua huli ninau oe mai o a @ ole nae lohe iki i ko lakou wahi i hele aku ai. Aka, aia no lakou me ko'u ohana hipa, a me ka lakou mau keiki. A ke makemake nei au e hooponopono i keia mea. Ua hiamoe ole au i kekahi mau po. me ka uwe nui hoi no keia mea. A ua hele mai au e mihi, a e hoepau i keia pilikia o ka manao. Eia no au iloko o kou mana. A e hana no au e like me kau olelo. Ina olelo oe, he pono ia'u ke noho i kekahi mau makahiki iloko o ka hale paahao, ke ae aku nei au. Ina makemake oe i na dala, a i waiwai paha, e hai mai pela. Eia no ia'u kekahi aina maikai, a me na dala i hoolimalimaia, no ka uku hoopanee, a e koho mai oe e like me kou manao. Makemake no au e hooponopono i keia mea. i pau ko'u kaumaha ia ia.

            Pihoihoi ae la o Hoomaloka, hoomaka ia e haalulu, i aku la ia, penei; "Ina ia oe kela mau hipa, ke makana aku nei au ia lakou ia oe. Aole au makemake ia oe e uku mai ina e hoi wale aku oe;—o ke kanaka e hele mai ia'u e like me kou hele ana mai,—ua loaa ia ia kekahi mea maopopo ole ia'u. Ia oe no na hipa, ke hoi wale aku."

            I mai la o Karistiano, "Aole, ua paa ko'u manao e hooponopono i keia mea ano, a e uku no wau ia oe no na hipa. Aole au oluolu ke ae ole mai oe ia'u. A nau no e hai mai i ka nui."

            I aku la o Hoomaloka, "Ina paa kou manao e uku mai ia'u no na hipa, pono ke haawi mai i mau dala e like me ko lakou waiwai, i ko lakou komo ana iloko o kou pa hipa, a me ka uku hoopanee (eono hapahaneri no ka makahiki) o ia mau dala, mai ia wa mai; a hoi aku oe, a waiho wale mai ia'u."

            Nolaila, ua helu aku oia i na dala no na hipa, a me kona uku hoopanee—a hoomoe ia lakou ilalo; alaila, helu hou, i papalua na dala a me kona uku hoopanee, a hoomoe  pu me kela; a hoi aku la, a waiho i ke kauma ha maluna o kona hoalauna, ane like me kona kaumaha ponoi mamua aku nei. Aia no i ke Akua ka hope nui, o keia mau hana ana

            Eia nae kekahi mea maopopo; ua hele pinepine o Hoomaloka i ka pule; a ua akaka lea hoi, ua ike oia, he mea mana ka Enanelio o Karisto; a o kekahi poe Karistiano, he poe pono, oiaio, hookamani ole. H. L. H.

Halawai Pomaikai.

            O ke keikikane o Rev. Caesar Malana ma Geneva, Switzerland, ka i hai mai i keia, no kona hele pu ana me kona makuakane.

            "Elua hora ko maua hele wawae ana, a komo iloko o kekahi hale e inu kope. I ko maua kali ana i kekahi wahine e hoomakaukau i ke kope, ua uwe waimaka oia, a holoi aku me kona hainaka."

            I aku ko'u makua ia ia, "ua popilikia paha oe"? I mai kela, "Ua make ka'u kane i keia mau la i hala ae nei, a ua kaumaha loa ko'u manao." I aku la ko'u makua ia ia penei; "E hele mai a noho kokoke mai, a e hai aku au ia oe i kekahi mau pauku o ka Euanelio, e hooluolu i kou naau kaumaha." Aole liuliu kona kamailio ana, a i mai la ka wahine; "Alia, makemake au e kii aku kehahi kaikamahine, o Jene kona inoa. E oluolu nui oia e lohe i kou kamailio ana. Ua kamailio pinepine mai oia ia'u e like me oe."

            Ua hoi koke mai oia me kekahi kaikamahine opio, a puka aku la au iwaho, e waiho ana i ko'u makuakane e kamailio pu ana me laua.

            Aole liuliu a wehe mai ko'u makua i ka ipuka, a kahea mai ia'u, e hele pu i ka hale kokoke mai, e ike i ka makuakane o Jene ka mea mai. A hiki makou i ka hale, ua alakai o Jene ia maua iloko o kahi keena nui, aia kokoke i ka puka aniani, e moe ana kekahi elemakule poohina.

            I aku o Jene penei; "E ka makuakane, ke alakai mai nei au ia oe i kekahi kahuna Euanelio."

            "E hoomaikaiia ke Akua," wahi ia. Ua noho ko'u makua ma kona aoao, a ua ike koke he nui kona manao ma ka pono. I ko laua kamailio ana, ninau ko'u makua, no kona huli ana ma ka pono? Olelo mai kela, "maluna o keia moe, kahi au i paa ai i kekahi mau makahiki; a no ka heluhelu ana i kekahi mau buke, i kukauia e Mi. Malana, ma Geneva. Ina aole au popilikia i ka mai, a me ka elemakule, ua hele kahiko au i Geneva e huli ia ia. Ikaika loa ko'u haipule ana i ke Akua, e ae mai ia'u e ike ia kanaka, mamua o ko'u make ana. He loihi ka manawa, ua manao au e ae mai ke Akua i ko'u pule; aka, ua pau ko'u manaolana ma ia mea."

            Nana ae la au i ko'u makua, a ike ia ia e nana ana ilalo. Ala koke ae la kona poo, ninau aku la ia ia penei; "Owai ka inoa o kela buke au i olelo mai nei"?

            Eia no ia, aole ona haalele mai ia'u." Alaila, ua unuhi mai la oia, mai lalo mai o kona uluna, he wahi buke kahiko, Songs of Zion kona inoa, a haawi aku la ia i ko'u makua.

            I kona huli ana i ua buke la, a ike i na le himeni, ninau ia ia, penei; "Hiki anei oe ke himeni i keia mau himeni"?

            "Ua ike o Jene i kekahi o lakou, a pinepine kona himeni ana ia lakou no'u; he mele ia e hoohauoli mai ai i ko'u manao." A laila olelo oia ia ia iho, "Ina hiki pono ia'u e @ i ka mea nana i kakau ia mau himeni maikai! He wahi Karistiano oiaio no ia."

            "Ea! auhea oe e kuu kaikuaana? Mai Geneva mai no maua." "Mai Geneva mai ka! olua anei?" wahi mai ka elemakule. "A ua ike anei olua malaila i keia Mi. Malana"?

            "Oiaio no," wahi a ko'u makua, "ua ike no maua ia ia, a ina maanei oia, e hai aku oia ia oe, ua like pu olua, he mau kanaka hewa; aka, e ola ana oe no ka lokomaikai o ke Akua."

            Kamailio iki hou aku laua, alaila pule aku la ko'u makuakane, a himeni hoi i kekahi mea maopopo ia Jene; a pau ia, ala mai oia e hoi aku—a hiki i ka ipuka.—ua huli a hoi hou i ka moe o ka elemakule; i aku la oia me ka uwe nui—

            "E kuu makuakane, ua hoolohe no ke Akua i kau haipule ana; owau no M@ Malana, no Geneva, kou kaikuaana i ka manaoio i ko kakou Haku hoomaikai!"

            Nana loihi ae la ka elemakule ia ia me ka uwe waimaka; alaila, hoala ae la oia i kona mau lima haalulu, olelo aku la, "E hoomaikai mai ia'u, e hoomaikai mai ia'u, mamua o ko'u make ana."

            "O oe, ea! loihi ko'u haipule ana i ke Akua nou! Ano, i ko'u ike maka ana ia oe. E hoomaikai mai oe ia'u."

            Kukuli ko'u makua ma ka aoao o kona wahi moe, a, me ka leo haalulu nui, i aku la oia; "Mai ke Akua mai, na hoomaikai a pau loa, a e noi pu hou kaua ia mea." Alaila, me ka manao aole laua e halawai hou ma keia ao, "ua ape mai ia ia me kona lima, a nonoi aku oia i ka maluhia a Iesu i haawi mai ai i kona poe, a hoi aku lu." T.C.

Ke alii o na Manu

            O ka manu hea ia? Aole anei o ka Aeto? Oia no. He manu kupaianaha ia! Me ka ikaika maoli, lele aku la ia a pii ae la iluna, a iluna loa, a kokoke i ka La, a huli mai la, a iho mama iho ia ilalo i ka honua, a hopu aku la i kana mea ai. Ua kapaia oia e ka poe hoomanakii, "ka manu i hali mai i ka Uwila"! He nui wale na lahui i hoolilo iaia i hoailona maluna o ko lakou mau hae, a pai aku la i kona kii i na apana dela, a goula paha. Pela ko Turo, ko Anetioka, ko Peresia a me ko Roma i ke kau kahiko. O ka hae hoi ia o Napoleona Akahi; o Kilikia, Sepania, Sara Kania, a ua ike makaia hoi kona kii ma na hao o ka poe Rusia, a me ka poe Amerika Huiia i keia wa a kakou i no ho mai nei. Ka Sila no hoi ia o ka Emperor o Geremania. O Othe Aha. Na Pilipo, ke alii, i pai aku ia ia maluna o kona mau apana dala. Oia no hoi ke kii maluna o na moni o ke aupuni o Amerika Huiia, a kakou i ike pinepine ai ma keia pae moku. He manu kaulana a mahaloia! Aia la iluna loa o ka pali kiekie, kahi hiki ole i ke kanaka, kona wahi i hana ai i kona punana. He aloha nui kona i kona ohua, a ikaika ka pale ana aku i na enemi. Nana i kaikai i na keiki ma na eheu, a lawe aku i kahi malu, a palekana. Ma ka Baibala, Ua hoohalikeia ke aloha o ke Akua no kona poe ponoi me ke aloha o ka Aeto i kana mau keiki. Wahi a Iehova, "Ua ike no oukou i na mea a'u i hana'i i ko Aigupita, i ko'u kaikai ana ia oukou ma na eheu o ka Aeto, a lawe mai ia oukou io'u nei." E nana hou oukou, penei;

"Me he Aeto la e hoala ana i ko ka punana,

A hoolahalahai maluna o na keiki ana.

Hohola i kona mau eheu a lawe a e la ia lakou

A kaikai aku maluna o kona mau eheu;

Na Iehova wale no i alakai aku,

Aole hoi ne Akua e ae me ia,

No ka mea, Olelo mai no oia

He oiaio, o ko'u poe kanaka lakou,

He poe keiki wahahee ole,

Nolaila, Oia i lilo ai i mea hoola no lakou."

            Pomaikai ka põe haipule io! Aole anei? O Iehova ke Akua oiaio, ke alii o lakou. Nana hoi i kaikai aku ia lakou, me ko ke alii o ka Manu i kona mau Pokii!

            Penei ka ke Akua olelo ana no ka poe hilinai ia Iehova.

"Aka, o ka poe hilinai aku ia Iehova,

E ulu hou no ko lakou ikaika.

E pii eheu aku no lakou iluna,

E like me ka Aeto;

E holo no lakou, aole hoi e maloeloe,

E hele mua no lakou, aole hoi e maule."

            Hookahi haneri makahiki a keu aku paha ke ola o keia alii o na Manu; a nui ae la kona ikaika i kela a i keia makahiki, a hala kona manawa, a make iho la. Pela hoi ka poe i koho aku i ke Akua i alii no lakou. E mahuahua ia ae ko lakou ikaika i ka hele ana'ku i ka ala ololi, a hiki i a palena, a make ke kino. E komo ai lakou iloko o ka pomaikai o ka poe i hoahu aku i ka waiwai ma ka lani.

            E heluhelu aku oukou e ka poe i puni i ka Baibala, i na pauku kahi i ikeia ka inoa  o keia alii o na Manu. Halelu 103:5. Mataio 24:28. Ioba 9:26, 39:27. Na Solomona 23:5. Ke Kamakau 4:19 Ezekiela @:3,7. 2 Samuela 1:23. Hoikeana 12:@.

Haumana manaoio ole.

            I ke ala ana mai o Iesu, mai ku make mai, halawai oia me kana poe haumana. O Toma nae, aole ia me lakou ia manawa. Aka, i ko lakou halawai ana me ia, hai aku lakou ia ia i ka nu hou. I aku la lakou, "Ua ike makou i ka Haku." Pehea? hau@oi anei o Toma i keia? Ina manao oia he oiaio, e hauoli nui no; aka, i kona manao, ua kuhihewa lakou, aole paha ala mai o Iesu, mai ka make mai. "I mai la oia ia lakou, ina e ike ole au i na puka o na kui ma kona mau lima, a e o i  ko'u manamana lima ma ka puka o na kui; a e o hoi i ko'u lima ma kona aoao, aole loa au e manaoio."

            He kanaka maikai no o Toma, a he haumana oiaio na Iesu; aka, ua hewa oia no

na manaoio ole i ka olelo o na haumana e ae

            Ina ua huli nui oia i ka Palapala Hemolele a pule hoi i ke Akua e wehewehe mai @ i ke ano, alaila, ua maopopo ia ia, e ala @ mai ana o Iesu; alaila hoi ua oluolu i ka nu hou, oia hoi, i ke ala ana mai o Iesu, mai ka make mai.

            Ewalu la i hala ae; he mau la hauoli i na haumana e ae, no ka mea, ua manaoio

 au, ua ala maoli mai o Iesu. Aka, he mau la oluolu ole ia Toma, no ka mea, aole @manaoio. Nui kona eha ia mau la no ka manaoio ole. Ua ike nae o Iesu i ko Toma naau, aole pau kona aloha ia ia. "A awalu ae la, maloko hou kaua poe haumana, a o Toma kekahi me lakou. Ua pani na puka, hele mai la o Iesu, a ku-mai i waena i mai la. Aloha oukou." Ua la@ mai o Iesu i keia halawai, i ike pono o Toma, a hoomaopopo ua ala mai o Iesu, mai ka make mai. Nolaila, i aku la oia penei:

            Toma, e o mai i kou manamana lima maanei, a e nana i ko'u mau lima: a e o mai i kou lima, a e hou iho ma kuu aoao; a mai noho a kanalua, aka, e manaoio." Alaila, ua ike  pono o Toma, o Iesu no ka! A hea 'ku la ia, me ka manaoio, a me ke aloha; "E ko'u Haku, a me ko'u Akua!" I aku la o Iesu ia ia. "E Toma, I kou ike maka ana mai ia'u, ua manaoio oe, pomaikai ka poe ike maka ole, a manaoio hoi."

            O kakou e noho nei, aole kakou ike maka ia Iesu, e like me Toma, a me kona poe hoa haumana; aka, e hiki ia kakou ke nana ia ia me ka maka o ka manaoio, a e manaoio ia ia me ko kakou naau, ke ole kakou e ike maka ia ia. Pomaikai na mea a pau e manaoio ana ia Iesu pela; "Ka mea oukou i ike maka ole ai, a ua makemake no nae; a, me ka ike ole aku ia ia, ua manaoio oukou me ka hauoli i ka olioli nani pau ole i ka hai aku; e loaa mai ana ka hope o ko oukou manaoio, o ke ola o ko oukou poe uhane."

HAAWINA KULA SABATI.

HELU XXIV. IUNE 11, 1871.

Ka Lulu Hua.

Pauku Baibala, Mareko 4:1—20

            1 Hoomaka iho la oia e ao hou ma kapa o ka moanawai, e no ka nui loa o ka poe i akoakoa mai io na la, ee aku la ia maluna o kekahi moku, noho iho la maluna o ka wai, a pau mai la ka ahakanaka mauka, ma kapa  o ka moanawai.

            2 Ao nui mai la oia ia lakou ma na olelo nane, i mai la ia lakou ma kana ao ana,

            3 E hoolohe mai; aia hoi, hele aku la kekahi kanaka lulu hua, e lulu.

            4 A i kana lulu ana, helelei iho la kekahi ma kapa alanui, a lele mai la na manu o ka lewa, a ai iho la ia mea.

            5 Helelei iho la kekahi ma kahi paaa, kahi i nui ole ai kona lepo, kupu wawe ae la ia, no ka papau o ka lepo.

            6 A puka mai ka la, mae iho la ia, no ke aa ole.

            7 A helelei ae la kekahi mawaena o na kakalaioa; kupu mai la na kakalaioa a kahihi iho la ia mea, nolaila, aole i hua mai i ka hua.

            8 Heleli iho la kekahi ma kahi lepo maikai, a puu mai la i ka hua, i kupu a mahuahua, a hua mai, pakanakolu, a pakanaono kekahi, a pahaneri kekahi.

            9 I mai la oia ia lakou. O ka mea pepeiao lohe la, e hoolohe mai ia.

            10 A loaa ia ia ka mehameha, alaila, ninau aku la ia ia ka poe e ku pu ana me ia a me ka poe umikumamalua, i ua olelo nane la.

            11 I mai la oia ia lakou, Ua haawiia mai ia oukou e ike i na mea pohihihi o ke aupuni o ke Akua, aka, ua naneia'ku na mea a pau i ka poe mawaho.

            12 I ka nana ana, e nana auanei lakou, aole nae e ike; i ka hoolohe ana hoi e lohe, aole nae e hoomaopopo, o huohuliia mai lakou, a e kalaia ko lakou hala.

            13 Alaila, i mai la oia ia lakou. Aole anei oukou i ike i keia olelo nane? Pehea la oukou e ike ai i na olelo nane a pau?

            14  O ke kanaka lulu hua, ua lulu i ka olelo.

            15 Eia ka poe ina kapa alanui, ma kahi i luluia'i ka olelo, a lohe lakou, alaila hele koke mai o Satana a kali aku i ka olelo i luluia iloko o ko lakou naau.

            16 Eia no hoi na mea i luluia ma kahi paaa; a lohe lakou i ka olelo, hopu koke lakou ia me ka olioli.

            17 Aka, aole o lakou mole iloko o lakou, nolaila, aole i mau, a hiki mai ka pilikia a me ka hoinoino no ka olelo, alaila, lilo koke lakou.

            18 Eia hoi na mea i luluia iwaena o na kakalaioa, o ka poe i lohe i ka olelo,

            19 A o ka manao nui i na mea o ke ao, a o ka hoopunipuni ana o ka waiwai, a me na kuko ana i na mea e, oia na mea kinai i ka olelo, a lilo ia i mea hua ole.

            20 Eia no hoi na mea i luluia ma kahi lepo maikai, o na mea i hoolohe i ka olelo, a hoopaa iho, a hua mai i ka hua, he pakanakolu kekahi, a he pakanaono kekahi, a he pahaneri kekahi,

            Pauku Alakai.—E noonoo i ko oukou hoolohe ana. Luka 8:18.

            Kumu noonoo.—Ka mea e ulu ai ka hua o ka olelo, a hua hou mai.

            Ninau ano nui.—Ke waiwai nei anei ka mea lulu hua ia kakou?

            Manao Wehewehe.—O ka makamua keia o na olelonane a Iesu. Aia o Iesu ma kae o ka lokowai o Galilaia i kekahi kakahiaka; a ike ae la paha ia i kekahi kanaka mahini, a hele ana e lulu i ka hua huita ma kona aina mahiai; a hoopili ae la ia mea i mea e ao aku ai i ka poe hele wale mai e lohe i kana mau olelo me ka noonoo ole. O ka noho ana o na kanaka o ia aina ua like iki no me ke kauwahi o Hawaii nei. O ka poe no nona na ama mahi ua akoakoa ko lakou noho ana ma na kulanakauhale liilii, aole i kukulu hale lakou ma na mahinaai o lakou. E like no me na kauhale o ko Hawaii nei ma kahakai, a aia iuka ka auala loi e hele aku ai e mahiai.

            P. 4—8. E hookaawale pono i na ano eha o kahi i haule ai ka hua i luluia. E hoomanao, aole i paia i ka pa na mala huita oia wahi, nolaila e haule no kekahi mau huna huita ma kapa o na ala liilii i hele wawaeia. A e hoomanao no hoi, he aina olapalapa, pohaku, o Palesetina, nolaila he nui na wahi papapa o ka lepo maikai. Ma ka helu ana i ka "pa-kanakolu" "pa-kanaono" &c. o ia poe, ma ka hua i ulu mai wale no ka helu ana aole ma ka hua kupu ole. Nolaila ina ua loaa he kanaono hua huita ma ka opuu hookahi, alaila ua pa-kanaono iho la ia lakou.

            O ka hana hewa pinepine, oia ka mea nana i hehi i na manao o na kanaka a paakiki, a kupu ole o ka hua malaila. O kalepo papapa he mehana maikai i ka la a nolaila he kupu koke ka hua, eia nae aole wahi e iho aku ai ke aa o ka huita. Pela kekahi poe me he la aohe wahi hohonu e ulu ae ka pono ma ko lakou mau mau. Ua wehewehe pono no o Iesu i kana olelonane.

            Ua like paha ka olelonane me kahi i komo balota ia. Aole i pani maoli ia, aia nae a loaa ka balota, alaila komo-ia. Pela ke ao ana i ka ahakanaka ma ka olelonane, O ka poe e manaoio ana ua weheia no no lakou, a o ka poe e makemake ole ana, aole i weheia. Aole nae i hiki ia lakou ke hoahewa i ka mea e ao ana, no ka mea, ua waiho mai no ia i ka oiaio, ke makemake lakou e kii aku. e like me ka hamama o ka puka i ka poe i kuai i balota no lakou.

            Ninau.—1. E ao ana o Iesu mahea? No ke aha kona kau ana maluna o ka waapa? 2. Ma ka olelo hea kana ao ana i na kanaka? Heaha ka olelonane? 3. Mai hea aku ka hele ana o keia kanaka e lulu hua? 4. Ehia wahi kaawale i haule ai ka hua ana i lulu ai? He hua aha keia i luluia a aole i kanu maoli ia? E hai mai i na wahi eha i haule ai ka hua. Ehia wahi pono ole? Ehia wahi pono? No ke aha ka ulu ole o ka hua i haule ma kapa alanui? Ka hua ma kahi papau e ka lepo maikai? Ka hua ma kahi nahelehele?

            P. 14-20. Ma ka hoohalike ana o keia olelonane, owai ke kanaka lulu hua? Heaha ka hua i luluia? Owai ka poe i like me kapa alanui? Owai ka poe i like me ka lepo papau? Owai i like me kahi nahelehele? Owai me ka lepo maikai?

            P. 10-12. Ia wai i wehewehe aku ai o Iesu i keia olelonane. Ua naneia keia mau mea ia wai? I aha ai lakou? He lokomaikai anei keia a ke Akua? Ua pohihihi anei kekahi olelonane a Iesu i ka mea makemake e ike?

            Ninau hou aku. No ke aha i hehi i ka manao o ke kanaka a like me ke alanui ka paakiki? No ke aha ka waele ole ia o ka nahelehele maloko o ka mano o kekahi poe?

KA NUPEPA KUOKOA,

HOOPUKA MAU IA MA HONOLULU

I keia Poaono keia Poaono

$2.00

No na mahina he Umikumamalua!

$1.00 no na mahina eono.

ME KA HOOKAA MUA MAI.

 

            NA OLELO HOOLAHA- aole i oi mamua o 10 laina o ka hoopuka hookahi ana $1.00; alua komo ana. he $1.50; hookahi malama $2.00. E uku mua ia mai ke dala o na olelo hoolaha a pau e hoounaia ana mai e pai.

            KANIKAU- he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi-penei: he 25 lalani, $1.00; 50 lalani, $2.00; a pela 'ku.

            E UKU NO KA OLELO HOOLAHA- ka uku pepa a me ka uku o ke Kanikau, e haawiia no ma ka lima o na Luna o ke Kuokoa a i oleia, e hoouna mai ia Kauka Kahua.

            O KA UKU PEPA A PAU E HOOKAA MUA MAI NO- aole e kauia ka loaa o kekahi haole a kanaka maoli paha. ma ka loaa o ka poe lawe pepa ke ole e hookaa e mai mamua.  E pono ke hiipoiia keia mau rula no ka mea he emi no ka auhau no keia nupepa.

            AIA KE KEENA O KA NUPEPA KUOKOA- ma ke keena i noho mua ia iho nei e J.W> Aukina, maluna ae o ka Hale Leta. O na hora hana, mai ka eia o kakahiaka,a a i ka ha o ke ahiahi.

            H.M. WINI (Luna Hoopuka)

 

"KA NUPEPA KUOKOA."

Is pulsihed in Honolulu

EVERY SATURDAY,

$2.00 per annum, or $1.00 per six

months, in advance.

            Advertisements not exceeding 10 lies, inserted once for $1.00 twice or $1.60; and $2.00 for one month; all advertisements must be paid for in advance

            Kanikaus will be charged 1.00 per page or 4 cts. a line.

Payments for advertisements, subscriptions or Kanikaus, may be paid to any of the Agents of the Kuokoa , or may be enclosed in a letter to the Publisher.

            All subscriptions must be prepaid.  No names, either o foreigners or natives, will be inserted on the subscription list until paid for.  This rule must be strictly adhered to on account of the low subscription price

            The office of the Kuokoa is in the South corner of the Sailors Home. Office hours from 9 A.M. to 4 P.M.

            H.M. WHITNEY, Publisher

            Bound Volumes for the KUOKOA for sale at the office over the Bookstore--$3.50 each.

            Persons having complete sets of the above, can have them bound by paying $2.00 each.

 

NA BUKE

HOOLAHAIA E KA PAPA HAWAII.

BAIBALA HEMOLELE NUI ILI GULA NANI

            me na kuhikuhi ma na aoao                                         $12.00

Baibala Hemolele Nui ili eleele kaekae wai gula                       5.00

Baibala Hemolele uuku iki iho kae wai gula                              3.00

Baibala Hemolele pananaiki iho ili eleele                                   4.00

Baibala Hemolele ili eleele                                                         2.00

Kauoha Hou ili gula nani me na kuhikuhi                                  3.00

Kauoha Hou ili eleele kaekae wai gula                                      1.00

Kauoha Hou ili eleele                                                                    75

Kauoha Hou Hapa Haole                                                              75

Lira Hawaii 1848 me ke kanawai                                                 25             

Lira Hawaii 1855                                                                          25

Moolelo Ekalesia                                                                           50

Haiao ili lahilahi                                                                            10

Hele Malihini ana                                                                          25

No ko ke Akua ano                                                                       25

Lira Kamalii                                                                                  50

Hoike Palapala Hemolele                                                              25

Moolelo o Heneri Opukahaia                                                        15

Hoike Akua                                                                                   22

Wehewehehia                                                                                10

Ninau Hoike ili manoanoa                                                            50

Ninau Hoike ili lahilahi                                                                 20

Kumumua Kula Sabati                                                                  20

Buke Lawe Lima                                                                          20

He Buke no ka Pope                                                                     15

Ui Kula Sabati Helu 3                                                                   25

Ui Kula Sabati Helu 4                                                                   15

Ui Kula Sabati Helu 5                                                                   25

Buke Euanelio a Ioane                                                                              10

Himeni Hawaii                                                                           1.05

Himeni Hawaii ili nani                                                                           1.75

Kumu Leo Mele                                                                            10

Kumu Leo Mele ili nani                                                                50

NA KAUOHA HOU PAKEKE.

Ili gula nani                                                                                1.50

Ili eleele kaekae nani                                                                     50

Ili eleele                                                                                         35

KAUOHA HOU PAKEKE ME NA HALELU.

Ili gula nani                                                                                1.70

Ili eleele kaekae wai gula                                                              65

Ili eleele                                                                                         50

Buke Wehewehe Huaolelo Baibala, elua ano

Buke Wehewehe Ano Mataio

NA HALELU PAKEKE.

Ili Gula nani                                                                                  50

Ili eleele kaekae wai gula                                                              30

Ili eleele                                                                                         20

Ka Hae Hoonani (Buke Mele)                                                                  25

NA BUKE MELE HOU.

Himeni Hawaii ili nani                                                                           1.75

Himeni Hawaii                                                                           1.00

Kumu Leo Mele ili manoanoa                                                       50

Kumu Leo Mele                                                                            10

Lira Kamalii                                                                                  25

Lira Hawaii 1848                                                                          25

Lira Hawaii 1855                                                                          25

Hae Hoonani                                                                                 25

Leo Hoomana                                                                               20

EIA NA BUKE HAAWI WALE.

PALAPALA LIILII—

            Helu 4—Makemake anei ae i ke eia?

            Helu 6—E hele i o Kristo la.

            Helu 7—Ka hoi ana mai o ke Keiki Uhauha.

            Helu 11—No ka hoohiki wahahee i ke Akua.

            Helu 16—Ka Eehia ana o ka Ahaaina a ka Haku a me ka Bapetizo ana.

            Helu 17—Mai hana ino i na holoholona

            Helu 18—No ka mahi ana, kuai ana a me ka inu ana i ka Awa.

Ka Davida Male Kumumanao.

Ka Moolelo o Batimea Punaiki

J. F. POKUE.

                        Kakauolelo o ka Papa Hooko o ka Ahahui Kuanello o ko Hawaii Pae Aina