Ka Nupepa Kuokoa, Volume X, Number 51, 23 December 1871 — Hoike Rula Sabati o Wailuku. [ARTICLE]

Hoike Kula Sabati o Wailuku.

E KA NUPEPA KUOKOA E: Aloha oe:--Ma ka la 18 o Novemaba iho nei, hora 10 1/2 o ke kakahiaka, ua weheia ka Hoike Kula Sabati o ka apana o Wailuku, ma ka himeni ana o ka Papa Kula Sabati holookoa, a pule ia e Rev. W. P. Kahale. Ua hoomakaia ke kula ana ma na Haawina Kamalii, Buke I, me ka haawiia i ka himeni i kela me keia papa kula, a pela a pau na papa ewalu. Ua waihoia mai he mau haiolelo ekolu, a ua mahalo nui au i na haiolelo mua

elua, oiai he wahi keiki, a o Puuohan no hoi, kekahi haumana o ke Kula Kahuna. A eia ka'u mea i hoohalahala nui ai, a no ia hoohalahala, ninau iho la au i ka mea e pili ana me a'u, Hookahi no ka kumu o keia Kula Sabati, nona na papa kula 8 i haiia? I mai la kela, Aole, he noi no na kumu a'u i lohe ai, a hoemiia mai nei a ewalu, a ke ike pu ae la no kaoa i keia la, hookahi no ka kumu. Ninau hou aku no au, Owai hoi kela e kula mai la? O kaikapu no hoi ia, wahi a kuu hoa. I hou aku no au, He poe kumu ike ole ka paha na kumu o keia Kula Sabati, i hapai pu ole ai i keia hana maikai? I hou mai no kela, Ae paha, aole kaua i ike. Pau na hana, kai huakai ke Kula Sabati ole wale, ma ke alanui aupuni; he mau wahi keiki wale no, a elua paha wahi kauna o na makua. I ke kai huakai ana, aohe mau mea kani: a i "limu kohu" no ka hoi ka hele ana o ka huakai, i ka hone ae o na mea kani, i ka nunulu mai hoi a na pahu. Ku pono iho la nae i keia mau wahi lalani mele : "Mehameha Puuloa, He hele na Kaahupahau." He wahi ahaaina lulu dala ko keia Kula Sabati, a i ka lulu ana, aohe i Pelehu iho. Owau no. J.N. Makikai. Makawao, Nov 2, 1871.