Ka Nupepa Kuokoa, Volume X, Number 52, 30 December 1871 — Page 4
| This text was transcribed by: | Kamalani Uehara |
| This work is dedicated to: | Kamehameha Schools Maui High School |
Ka Nupepa Kuokoa
Ka Nupepa Kuokoa.
Na hana a ke Akua.
1. Ka nana wale aku no
I ka ke Akua mau hana,
Aole ia ka naauao
E hana a hoomana.
2. Ko waho ano he maikai,
He aka no nae oia
No ko ke Akua akamai,
Ka mana, me ke aloha.
3. Ke aka hoi o na laau
I kau ae ma na loko,
He kii hoike ia kakou
Ka nani o na oka.
4. Ke pa nei no na kulu hau
Maluna o na kula,
Uli ka mauu a me na lau,
He onini hoomau la.
5. A imo nani na hoku,
O ko ka po mau lama,
He mau ouli hoi lakou
No ko ke Akua mana.
6. Na nalu kaa ma kahakai,
Me na makani ani
He mau hailona akaka nei.
No ko ke Akua nani.
7. Na ao hoopuni i na puu
Na manu kau a mele,
Na muliwai kakahe mau,
Na olai a me na pele.
8. Na uila, na hekili pu,
Me na waipuilani,
He mau hoike no lakou
I ko ke Akua nani.
9. Pela e huli a noonoo
Na hana a ke Akua,
Maluna a malalo pu,
A puni ka honua.
10. A ike ae, e hoomaikai,
Mahalo, a hoonani
Ke Akua nui e ola’i,
Ka Moi o ka lani. HAWAII.
Is thy cross heavy.
1. Kaumaha anei kou kea?
Hoohalahala anei?
A nele i ke kea,
E nele i ka lei,
He ao no nolu keia,
Onou a hoolalau;
E amo i kou kea,
E kupaa ae a mau.
2. He ao lauwilihia,
He ao ooloku,
E hali i kou kea,
Nana’ku ia Iesu,
I paa a wainohia,
I palekana no,
I na a maluhia,
A i kaanaho mau.
3.Kaumaha anei kou kea?
Kokoke e kaa ae;
Mai paupauaho ea,
Kokoke e maha’e.
E kai ae i kou kea,
E ahonui e,
Me Iesu oe i eha,
Me ia e pomaikai.
4. Kaumaha anei kou kea?
He kumu paipai nei,
I pau ae ka nanea,
E kai a nauwe ae.
E ulu a hoohua,
Me ka mala i ulu ae,
Ke haule mai ka ua,
A hua nui mai.
5. Kaumaha anei kou kea?
E pule nui ae,
E mele a hoolea,
Hosanna, hoomaikai.
Pela ka poe kahiko
I eha a luuluu,
Memele ae ia Kristo,
A maha a nanan.
6. Kaumaha anei kou kea?
E kai a piipii ae,
Me he manu lele lea,
Me koonei huakai;
E kai a kikoo ea
I kahi e maha’i,
A hemo ae ke kea,
A kau ka lei maikai.
HAWAII.
Ka hopena o ka makahiki.
Ka Pepa hope keia o ka makahiki. Ke pau nei ka makahiki 1871. He wahi oioina keia e noho iho ai, a nana i kahi i hala aku la, a e helu i kekahi mau mea nui i hanaia, a i loohiaia’i ke kau wahi o ka honua iloko o ka makahiki, mai ka mua a i ka hope.
Ma ka hoomaka ana o ka makahiki, ehaeha loa na pepeiao me na naau, i ka lohe mau ana i ke kaua weliweli ma Europa, mawaena o Perusia me Farani. Ua nauwe no Perusia me ka lanakila, e lilo ana na kulanakauhale, na papu ia ia, ma ka pau lehulehu nae i ka make o kanaka, o kela a o keia aoao. Ua nauwe na koa o Perusia a hoopuni i ke kulanakauhale nui o Parisa, a e hoolele ana i na boma wela iloko, a pahu ae la, a pau na ohana okoa i ka make. A e wela ana kekahi hapa o ke kulanakauhale i ke ahi, na na boma pahu kekahi i hoowela, a nan a kanaka Parisa kekahi i hoowela, me ka hoohiki ino e pau o Parisa i kea hi mamua o k’a haawi pio ana ia ia i na koa Perusia.
Aka, ua hoohiolo ke Akua ia manao mainoino, a i ka wa e wela ana ia, a e make nui ana kanaka, kamalii, i kea hi, a i ka wi, a i ka mai ahulau, ua weheia ka puka o Parisa, a komo lanakili na koa Perusia, a oki ae la ke kaua a maluhia iho la Farani me Perusia. Aole nae i like Farani me kona ano mamua. He aupuni nui momua, he Emepera, he aupuni hookiekie; ua hoohaahaa ia nae, ua haule ilalo. Malama ua kaena ka Moi, e like me Nebukaneza, “Aole anei keia o Babulona nui, ka mea a’u i kukulu ai i hale no ke aupuni, me ka ikaika o ko’u mana, a no ka hanohano o ko’u nani?” “E pii aku no au i ka lani, e hookiekie no au i ko’u noho alii maluna o na hoku o ke Akua.” Malama ua kakau ka lima o ka mea i ike oleia ma ka paia o ka hale alii, i keia mau hua weliweli; “Mene, mene, Tekela, Uparesina.” Ua ala hou paha ka hoomanao ana o ke Akua i ka hana ma ka po o Sana Baretolomaio iloko o Parisa, i ka wa i pepehi hala ole ia’i na haipule he 50,000. Malama, ua hoomanao ke Akua i ka hooweliweli ana o na moku manuwa Farani i na mokupuni o ka moana Pakipika mamua aku nei, e lawe ana ia Tahiti ma no Farani, ma ka waha o na pukuniahi; a holo maui a hooweliweli e puhi ia Honolulu I kea hi, kea e oleia ka manao noi a koi o Farani, me ke kaawili pu i ka lehu o na misionari Amerika me ko na kanaka Hawaii. Nalo anei na hana o na aupuni? Hoopakele wale anei ke Akua i na aupuni hana ino i kona aupuni? Aole paha. Nohea mai ka hoohaa ia mai o Farani ilalo? Aole anei no ke Akua mai? A, no ka hoopai ia wale no I hoohaahaaia’i oia? Aole, aka, no ka wehe ana i ka puka i komo nui ai ka olelo a ke Akua ma Parisa, a ma Farani a puni, ma ka hoopau ana i na mea keakea he nui wale mamua, ma ka aoao Katolika.
Lanakila Perusia, no ke aha? He aupuni uuku ia mamua, ilalo ia, iluna Farani; he Emepera ia, he aupuni wale Perusia. Ano, ua hookahuhia, he mua Perusia, he lua Farani; he Emepera Perusia, he aupuni wale no Farani. No ke aha keia? Aole anei i ikeia ka lima o ke Akua iloko o keia? He aupuni hole Pope Perusia iloko o na kenetoria ekolu I hala, a kokua nui mamua o ka aoao hole Pope. He aupuni kokua nui Farani i ka aoao Pope, a nan a koa Farani i hoopaa i ka Pope maluna o kona noho alii Temeporala iloko o na makahiki i hala iho nei, me ke kue i ka makemake o ka lehulehu ma Roma.
Ma ka lanakila ana o Perusia ua haule ka papale Alii o ka Pope, ua pau na kapu ma Roma. Ua weheia ka puka o Roma, ua komo na Baibala, na kahuna hole Pope, na mea kapu loa mamua, aole i ae iki ia e komo.
Ma ka lanakila ana o Perusia, ua loaa ke kahi kao nui ma ka aoao hole Pope. Mai ke Akua mai ia. Aka, mai paulele nui kakou ma ka mana o kanaka, a o na ‘Lii o keia ao. Aole no kea o nei ke aupuni o Iesu. Maluna o Iesu ka hilinai nui ana.
2. He leo kanikau a kumakena, i olo main a pihe main a papu, na kula, na kulanakauhale, na puu o Persia mai.
Nui, mano, kini, lehu, na make no ka wi. Aloha ino lakou. A, no ke aha keia pilikia nui? Ma Peresia kekahi, he make wi ia; ma Rusia kekahi, he make Korela, a ahulau; a ma Amerika Hema make nui no ka mai ahulau no. A ma na mokupuni he nui ka make no na olai, a no na pele, no na makani ino. Ua piha na nupepa i kela pule, i keia pule, i na nu hookaumaha; no ka make i kea hi, i ke kai, i ka ino, i ka uila, i ka hekili, i kela a I keia mea.
3. O ka nu i hookaumaha nui i ko kakou naau, oia ka make nui o na moku okohola he 33 ma ke kai Anu Akau. Uwe pu no kakou no ia make. Mahuahua loa no nae ko kakou uwe, a kanikau ana no ke ahi nui ma Kikako, a ma na aina kula na Prairies ma Winikonisa ma.
Weliweli lua ole! He mea aha na kulanakauhale nui i ko ke Akua manao? He mea ole; ke manao oia e hoopau ia lakou i ke ahi.
No ke aha keia mau kaumaha, keia mau popilikia, keia pau ana o na miliona, biliona dala, me ka pau pu ana o na kino kanaka he nui wale, (me ka pau pu ana o na kino kanaka he nui wale,) me ka waiho neoneo ana o na home he lehulehu, o na aina uliuli, na mala paapu i na pua nani, me na hua ono? Aole anei he maaao ko ke Akua ma keia mau mea? “He ino anei maloko o ke kulanakauhale, aole na Iehova ia I hana?” Aole ke Akua i hana kumu ole i kekahi mea, aole hoi oia i ae e kau kumu ole mai kekahi pilikia maluna o na kanaka.
E aoia kakou e hoopapau ole ma na mea o keia ao; e hoouuku i ka manao ma na waiwai e pau wale ana; a e hoahu i ka waiwai ma ka lani, kahi e pau ole ai i kea hi, a me na ino e ae. HAWAII.
Kumukanawai.
O ka Ahahui Ekalesia Euanelio o Oahu.
1. E kapaia keia Aha, ka Ahahui Ekalesia o Oahu.
2. O na Lala o keia Aha, oia na kahunapule euanelio a pau i kakau na inoa malalo o keia kumukanawai-me na Luna haiolelo euanelio e lawelawe ana ma kekahi kihapai-a me na Elele pakahi no na ekalesia-a o na Luna haiolelo kihapai ole, me na mea i kohoia e keia Aha i kela halawai keia halawai, he po’e hoa kuka lakou no keia Aha.
3. O na Luna o keia Aha, oia ka Luna hoomalu, a me ke Kakauolelo, i kohoia i kela halawai keia halawai, ma ka o lima ana; a e noho laua a koho ia na luna hou.
4. E lilo no keia Aha i mea hooponopono ai na ekalesia o Oahu nei, i ae mai e noho malalo iho o kona malu.
O kana hana nui, ka imi ana i na hana e pono ai, a e malu ai, a e kuikahi ai na ekalesia.
Eia hoi kekahi mau hana;-o ka hookumu ana i na ekalesia hou; a me ka hookahuna ana; a me ka hoonoho ana i na kahu ekalesia; a me ka hoopau ana; a me ka haawi ana i na palapala ae haiolelo; a me ka paipai i kela hana maikai keia hana maikai;-aka, aole lawe keia Aha i ka mana kupono i kela ekalesia keia ekalesia.
5. Elua halawai ana o keia Ahahui i ka makahiki; i ka malama o Feberuari, a me Sepatemaba. Aia no i ka Lunahoomalu ka hoike e mai i ka la a me ka hora no ia halawai ana.
6. E hiki no e hoololi i keia kumukanawai, kea e na hapakolu elua i akoakoa ia; me ka hoakakaia nae ma ka halawai hapa makahiki mamua ae.
Papa kokua mahina hou.
Hamakua Hikina, Hawaii, Okatoba $ 22.80
“ “ “ Nov. 15.00
“ waena “ Okat. 14.35
“ “ “ Nov. 18.15
“ komohana “ “ 16.65
Waimea “ “ 28.00
“ “ Dek. 20.00
Kohala Akau, “ Nov. 140.00
Hilo-Haili “ Dek. 115.75
Kawaiahao Oahu Nov. 87.85
Kaumakapili “ Dek. 34.00
Ewa “ Nov. 6.00
“ “ Dek. 5.75
Hanalei, Kauai, mai June a Okatoba 25.60
“ “ Novemaba 6.75
Oia iho la kahi kokua mahina hou a maua i lohe ai. Nui wale na wahi i koe. Lohe emoole i ka pau ana o Kikako i kea hi;-i ka paa ana o na moku okohola 33 i ka hau i ka moana anu akau;-aka, ane pau ka makahiki, aole i lohea ke kokua mahina hou ana o ka nui o na ekalesia. Ea, e pane e mai oukou mamua o ka pau ana o Hawaii i kea hi.
E Laupahoehoe-e Pahoehoe nei; Hakalau, e Hakalau ana; Onomea i piha i na mea ona; Puula, Opihikao, Kalapana, Kapaliiuka, Waiohinu e kokoke aku ana i ka Luapele;-na ekalesia a pau ma Kona Hema, Kona Akau; na ekalesia a pau ma Maui, a o Molokai, Lanai, Niihau;-me ka nui o na ekalesia ma Oahu, ma Kauai; Eleu, eleu, e lawe i ka hulu, i ka ipu inika, i ka pepa, a e kakau i ko oukou kokua mahina, mai Iune a Dekemaba, a e hooili mai i kekahi o maua, Laiana, Kamika, i paiia ma ke Kuokoa ma Ianuari M. H. 1872, i mea e nani ai ka aoao eha, a e hoohauoli i ka poe heluhelu. Me ke aloha. LAIANA.
KAMIKA.
Halawai ku i ka wa, ka
AHAHUI EUANELIO O KA
mokupuni Oahu, ma Kaumakapili, i
ka hora 10, A.M. Dec. 19, 1871
Ua weheia ka halawai ma ka pule a ka Lunahoomalu.
Eia na kahu a me na lala i hiki mai.
Ekalesia. Kahu Ekalesia. Elele.
Wailupe, Rev. D. Kekiokalani,
Kawaiahao, “ H. H. Pareka, Kekukahiko,
Kaumakapili Kuhana,
Kalihi, “ S. Paaluhi, Kaaiao,
Ewa, “ Keone (Haiolelo) D. Keoahu,
Waianae,
Waialua, “ J. W. Paikuli, S. Ili,
Kahuku, “ J. Kekahuna,
Hauula, “ H. Kauaihilo, Punihele,
Kahana, “ E. Kekoa, D. Eia,
Waikane, “ P. W. Kaawa, Kailaa,
Kaneohe,
Waimanalo “ S. Waiwaiole Nailiwa,
Na lala mau. Rev. B. W. Pareka, Rev. L. Kamika, Rev. J. F. Pokue, P. Naone.
Ma ke noi a Rev. E. Kekoa, e hoike mai ka Lunahoomalu i na hana o keia Aha, Heluhelu mai ka Lunahoomalu i na kumuhana.
1. No ka palapala noi o Kaumakapili ia Rev. G. W. Pilipo i kahu no lakou.
2. No ka hoopanee i ka Ahahui Euanelio Oahu i Feberuari, a i Aperila.
Hapaiia ke kumuhana mua.
Ma ke noi o Rev. B. W. Pareka, e heluheluia mai ka palapala kahea a ka ekalesia o Kaumakapili ia G. W. Pilipo, a me ka palapala pane aku a Rev. G. W. Pilipo.
Heluhelu mai ka Lunahoomalu i ka palapala kahea a ka ekalesia;-a no ka makaukau ole o ka palapala pane aku, nolaila ua kali ka Aha, a loaa ua palapala la.
Ma ke noi o Rev. H. Kauaihilo e hapaiia ke kumuhana elua. Ua kuka mai ka Aha no keia kumu.
Ma ke noi a Rev. H. H. Pareka, e hoopanee i keia kumuhana 2. Hooholoia.
Ma ke noi o Rev. H. Kauaihilo, e lilo keia wa i wa haipule, a loaa mai ka palapala pane aku, a Rev. G. W. Pilipo i ka ekalesia. Hooholoia.
Ua malama ka Aha i wa haipule, a no ka loaa ole ana mai i ka palapala pane;-ma ke noi o Rev. H. H. Pareka, ua hoopaneeia ka Aha a ka hora 2 P.M. Pule o Rev. S. Waiwaiole.
Halawai hou ka Aha i ka hora 2 P.M. pule o S. Ili.
Ma ke noi a Rev. E. Kekoa, ua kohoia o Rev. J. H. Mahoe a me Rev. D. Puhi i mau hoa kuka no keia Aha.
Ma ke noi o J. S. Kekukahiko, e hapaiia ka hana i hoopaneeia.
Heluhelu ka Lunahoomalu i ka palapala pane a Rev. G. W. Pilipo i ka ekalesia o Kaumakapili;-a me ka palapala hookuu a ka Ahahui o Hawaii Komohana, e hui me ka Ahahui Euanelio o ka mokupuni Oahu.
Ma ke noi o Rev. H. H. Pareka, ua apo aku keia Aha ia Rev. G. W. Pilipo i lala no kaia Aha.
Ma ke noi ana o Rev. H. H. Pareka, e kohoia ke komite hooko. Hooholoia.
Noi mai o Rev. J. N. Paikuli, n aka hale e koho i na lala o ke komite. Eia na lala.
Rev. L. Kamika
“ B. W. Pareka
“ J. F. Pogue
“ H. H. Pareka
Komite hooko
Ma ke noi o Rev. H. Kauaihilo, na ke komite a me ka ekalesia e noonoo i ka wa e hooko ai. Hooholoia.
Waiho mai o Rev. P. W. Kaawa he olelo hooholo. Hooholoia ; Ke haawi aku nei keia Aha i ko lakou mahalo nui i ka ekalesia o Kaumakapili, no ko lakou hookipa maikai ana ma ka paina awakea.
Ma ke noi a Rev. S. Waiwaiole, e heluheluia ka moolelo o ka Aha. Hooholoia ; a ma ka heluhelu ana, ua aponoia.
Noi mai o Rev. E. Kekoa, e hoouna i keia moolelo e pai ma ka Nupea “Kuokoa.” Noi mai o Rev. G. W. Pilipo, e pai pu ia me ke Kumukanawai o keia Aha. Hooholoia.
Ma ke noi o Rev. S. Waiwaiole, ua hoopaneeia keia Aha. Pule o Rev. L. Kamika.
G. M. Keone,
Kakauolelo.
He wahi manao no na Ekalesia kahu OLE.
ALOHA OUKOU:
Ua loaa ia’u he manao e kamailio pu me oukou, a ua pili nui nae hoi i na ekalesia i nele i na kahu, a Haiolelo paha.
Ke imi nui nei oukou e loaa ia oukou i Kahu, a i Haiolelo paha no oukou, ua pono no ia; no ka mea, aia no maluna o oukou ka hanai ana, a me ka hoahu ana ia lakou.
Ina e oluolu oukou i ka’u mau wahi kokua ana aku ia oukou, e pono no ke haliu oluolu mai me ka pauaho ole. He poe kakou i hoolilo aku ia kakou iho malalo o na alakai ana a ka mea nana ka hana. Na ka Haku ka hana, he poe lawelawe kakou.
O ke koho ana aku i kahi mea i Haiolelo no ko oukou anaina hoomana, he pono ka noonoo akahele mamua o ke kahea ana. He pono ke koho i mea i hoonaauao mahuahua ia, ua komo paha i kekahi kula nui, a ua ao ia hoi ma ka haiolelo, a Kula Kahuna paha ma Wailuku, a i loheia hoi he inoa maikai kona iloko o na kula ma ka noho kino ana a he ano haipule a me ka makaukau i ka ike. He kanaka kupono ia e kahea ai. O ke kanaka oia ano, he punawai kona mau manao, kana mau haiao, e puai mau mai ai no ka oukou hoolohe aku i na wa a pau e akoakoa ai ko oukou mau anaina hoomana. Mai wikiwiki e koho i ka mea i uuku ke aoia ana;-ua heluhelu Baibala nae he ano haipule kupaa-he kahiko nae na la. E akahele ke kahea ana ia lakou. E loaa auanei ka mea e kue ai- E hoohalahala ai i na haiolelo paha, no ka hoi ana aku no, a hoi aku no o na wahi poolelo, a o na wahi paipai ana paha, o na wehewehe paha.
E loaa no auanei he mea e hoopaapaa ai oukou no ka hanai a oukou e manao ai no na Haiolelo la-o kekahi poe paha, e haawi i hanai e ola pono ai kela, a me koi a la ohana; a o kekahi poe hoi, o ka hooemi mai, no ka mea, aohe nui o ka ike, aole hoi i hoonaauao nuiia, a pela aku, a pela aku; o ka ulu no ia o ka mokuahana i waena o oukou-a hoohuakeeo paha ka Haiolelo-o ka hele loa no ia i ka pono ole.
Eia no hoi kahi: Aole paha e mau loa ko oukou makemake ana ia ia; a pau paha ka wa a oukou i kahea ai, aole hoi i kahea hou ia ia; aole no he ekalesia makemake ia ia a pehea iho la kona hopena? E kahea i mea i lawa ia oukou, a ia hai.
Eia no hoi kahi: O ka Ahahui Euanelio kahi e hana mai maluna o ua Haiolelo la, e ninau ia kona ike hohonu ma ka Baibala-kona makemake ana i keia oihana lau-kona ike e hooponopono ekalesia-ke ano o ke Akua-a pela aku; a ina e haule ma ka hapanui o na ninau, o ka nele iho la no ia o ko oukou makemake.
Eia no hoi kahi: Ina he elemakule ka Haiolelo a oukou e manao ana e kahea, e haule pu no paha na ninau; a ina paha e hiki ka hapanui o na ninau i ka loaa ia Elemakule; aole paha e liuliu, a pau e.
Ua ike oukou ina makua nana i ao mua mai, ua hoomaha ka hapa nui o lakou i ka hana; a pela oukou e noonoo ai e na hoa’loa iloko o ka Haku. A e noonoo pu no hoi e na haipule makua i oo i ka noho hoopono hoahanau ana, a i manaoia ana paha e kohoia aku i Haiolelo. E noonoo e no i ka hiki pono, a me ka ole.
Eia no hoi kahi: Ina e kohoia mai oe, e ke kanaka makua, i hoonoaauao uuku ia, o kou ano naauao, o ka hole aku. No ka mea, he nui na puu au e pii aku ai, a o na wahi hohonu au e luu ai oloko o ka Baibala ke ninau ia mai oe o kou anaina hoomana, a me na hoa kula Sabati o oukou.
(Aole i pau.)
Halelu XXIII.
Hauoli Davida i ka malama mau ana mai o ka Haku.
O IEHOVA ko’u Kahuhipa;
Aole o’u mea e nele ai.
2 Nana no wau i hoomoe iho ma na aina uliuli:
Ua alakai oia ia’u ma kappa wai lana maile.
3 Ke hoola mai nei oia i ko’u uhane:
Ke alakai nei oia ia’u ma na ala maikai no kona inoa.
4 Oiaio, ina e hele au ma ke awawa malu o ka make;
Aole au e weliweli i ka pono: no ka mea, o oe pa kekahi me a’u;
O kou mana, a me kou kookoo, o ko’u mau mea ia e oluolu ai.
5 Ke hoomakaukau mai nei oe i ka papaaina na’u ma kea lo o ko’u mau enemi:
Ua kahinu mai oe i kuu poo me ka aila;
Ua piha a hu ko’u kiaha.
6 Oiaio, e hahai mau ana ia’u ka pono a me ke aloha i na la a pau o ko’u ola ana;
A maloko o ka hale o Iehova o wau e noho mau loa aku ai.
Ua Ane Pae.
Eia kakou iloko o ka malama hope o ka makahiki. Kokoke kakou e pae ma kela kappa o ka makahiki 1871; alaila, e hookomo ia ka makahiki e nane nei iloko o ka heluna o na mea i hala mahope, a e paniia ka buke o kana moolelo a paa loa.
Heaha na hana pono no ka hope o ka makahiki? Eia, nana ia na wahi koena, a hoopau pono ia me ka pau ana o ka makahiki. Na koena aha la? O kela a me keia mea i haawiia mai no keia makahiki. Kau wahi haawina hana, au i hana ai a koe hapa, hoopauia a pau pono. He okoa ka haawina o ka makahiki hou, he okoa ko keia; mai hoohuikau. O ka hana o keia wa, e hana i keia wa, i ikaika oe no na hana hou. Hoopauia na wahi koena aie o keia makahiki. Na wahi dala i koe o kou hale laau, o kahi aina pa, hookaaia aku na koena a pau. Pehea kahi auhau o ke Aupuni nana oe e malama nei? Ua kaa anei? Ua koe hapa paha. Hookaaia aku a pau i maikai oe i ka la mua o Ianuari, i mama oe, i ikaika kou huro ana i ka makahiki hou. Pehea hoi kou wahi aie i ke aupuni o ke Akua? Ua kaa anei? Ua koe iki paha? Aole ia he auhau, he mea aloha; kou wahi mea au i hoohiki ai Nona, hooko ia ka hoohiki o nei makahiki, i olu oe i ke kaa hope ana o ka la hope o Dekemaba. Ua aie nui kakou a pau i ka lokomaikai o ke Akua. O Kona lokomaikai, aole e pau. Oiai na la hope o ka makahiki, e hoopau ia na manao kuee iwaena e oukou. Ka manao ino, ka huhu, ka huahua, a me na mea ano like, kiolaia a pau. E hoolaulea pu me ko enemi, i lealea pu olua i ka la “hape nu ia.” Mai lawe i na kina o keia makahiki a hapala aku i ka makahiki hou.
Eia ka manaohope- O ka luhi hewa ana o keia makahiki, e kanu pu iho me kona mau la hope. He nui ka poe e heluhelu ana i keia i halihali i na haawe kaumaha loa maluna’o ko lakou uhane i keia makahiki holookoa. Kela mea hookah a kou puu i puni ai, a kou naau i kuko ino ai; ua ike no oe he ino, ua hoao oe he awaawa; ua ike no kou uhane he kaumaha, o aha la oe ke kuu iho ka luhi i na la hope o keia makahiki, a lanakila oe? No keaha la e halihali ai ke kanaka i na kaulahao e paa ai kona uhane, oiai he hiki iaia ke kala ia, a hemo na mea paa.
Ina e ae ia kakou e ike i ka makahiki hou, e hookanaka, a e haawi aku ia makahiki holookoa no ka pono, no na hana pono ma ko ke kino, a ma ko ka uhane; a e noho no oukou maluna o ka aina, a e ike i ka hua o ka noho pono ana. KA LAU OLIVA.
Haawina Kula Sabati.
1872: HAPAHA MUA – Iesu ma ka Lani.
HELU I. IANUARI 7.
KA HOOLA I HOONANIIA.
Pauku Baibala. Oihana 2: 32-41.
32. O ua Iesu la, oia ka ke Akua i hoala mai ai, he poe ike maka makou a pau ia mea.
33. Ua hookiekieia’e la ia ma ka lima akau o ke Akua, ua loaa no hoi ia ia, n aka Makua mai, ka olelo hoopomaikai o kona haawi ana mai i ka Uhane Hemolele, no ia mea, ua haawi nui oia i keia mea a oukou e ike nei, a e lohe nei.
34. Aole i pii o Davida i ka lani, aka, nana no i i mai. Olelo mai la ka Haku i ko’u Haku hoi, E noho oe ma ko’u lima akau,
35. A hoolilo ai au i kou poe enemi i keehana wawae nou.
36. No ia mea, e ike pono ka ohana a pau a Iseraela, ua hoolilo ke Akua ia Iesu nei, i ka mea a oukou i kau ai ma ke kea, i Haku a i Mesia hoi.
37. A lohe lakou i keia, walania iho la ko lakou naau, i aku la ia Petero, a i na lunaolelo, E na kanaka, na hoahanau, heaha ka makou e hana’i?
38. Alaila i mai la o Petero ia lakou. E mihi, a e bapetizoia oukou a pau iloko o ka inoa o Iesu Kristo, i kalaia main a hala, a e loaa ia oukou ka haawina o ka Uhane Hemolele.
39. No ka mea, no oukou ka olelo hoopomaikai, a no ka oukou poe keiki, a no ka poe i kahi mamao aku a no na mea a pau a ka Haku, a kakou Akua e hea mai ai.
40. A ma na olelo e ae he nui loa, hoike aku la oia, a noinoi aku hoi, i aku la, E hoola oukou ia oukou iho mai waena mai o keia hanauna kolohe.
41. Alaila, o ka poe makemake i kana olelo, bapetizoia iho la lakou, a ia la no, hui pu ia mai ekolu tasani kanaka.
Pauku Alakai.- Olelo mai o Iehova i kuu Haku-E noho oe ma ko’u lima akau.
Kumu noonoo .-Ka hoi ana o Iesu i ka lani.
Ninau ano nui. -Heaha o Iesu no kakou i keia Manawa.
Manao Wehewehe.- He haiolelo keia na Petero, i ka la Penekoke. E wehewehe ana keia haiolelo i ke kulana hou o Iesu mahope o kona alahou ana. Ua ike hope na Lanaka ia Iesu e laweia ana aku e hoopaiia me ka make mainoino. O na haumana wale no na hoike no kona ike hou ia ma ka honua., a no kona pii ana i ka lani, mai ka mauna Oliveta aku.
No ka mea, he mau hoike lakou no kekahi mea ano nui loa, a kupanaha loa, nolaila ua haawiia ka mana o ka Uhane Hemolele ia lakou i mea e manaoio ai na kanaka ia lakou olelo.
O ke kumumanao nui o ka Petero haiolelo oia keia: O kela Iesu a oukou i pepehi ai, oia no ka Haku a ke Akua ka Makua i hoonani ai.
Nolaila ko lakou mihi, no ka mea, aia paha iloko o ua anaina la kekahi poe i ae me ka manao, i ke kauia ana o Iesu ma ke kea. Ua hele pu ka Uhane Akua me ka olelo i haiia.
Ninau.- Mahope o ko Iesu make ana, ehia la i waiho ai kona kino kupapau ma ke ana? Owai ka i ike iaia mahope e kona ala hou ana? Maihea aku kona pii ana i ka lani? Owai na hoike o ia pii ana?
Ma keia haawina owai ka e haiolelo ana? E hai ana i ke aha? Pane. I ka hoonaniia ana o Iesu? E noho ana o Iesu mahea? Owai kona keehina wawae?
Nawai i kau ia Iesu ma ke kea? Ua mihi anei kekahi o lakou? No ko lakou mea i mihi ai? Pehea ka lakou ninau ia Petero? (p. 36).
Pehea ka Petero pane ia lakou? Heaha ka mea i loaa ia lakou ma ka mihi ana? Heaha kekahi mea hou i loaa?
Ina kakou e loaa i ka Uhane Hemolele pehea ko kakou noho ana? Nawai i hoouna mai i ka Uhane Hemolele.
Ehia poe i bapetizoia ia la? Heaha ke kauoha a Petero ia kakou.
"KA NUPEPA KUOKOA,"
HOOPUKA MAU IA MA HONOLULU
I kela Poaono keia Poaono.
$2.00
No na mahina he UMIKUMAMALUA!
$1.00 no na mahina eono.
ME KA HOOKAA MUA MAI.
----------
NA OLELO HOOLAHA—aole i oi mamua o 10 laina no ka hoopuka hookahi ana, $1.00; alua komo ana, he $1.50; hookahi malama, $2.00. E uku mua ia mai ke dala o na olelo hoolaha a pau e hoounaia ana mai e pai.
KANIKAU—he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi—penei: he 25 lalani, $1.00; 50 lalani, $2.00; a pela'ku.
NA UKU NO NA OLELO HOOLAHA—ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i oleia, e hoouna mai ia Kauka Kulika.
O NA UKU PEPA A PAU E HOOKAA MUA MAI NO—aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa.
AIA KE KEENA O KA NUPEPA KUOKOA—ma ke keena i noho mua ia iho nei e J.W. Aukina, maluna ae o ka Hale Leta. O na hora hana, mai ka eiwa o kakahiaka, a i ka ha o ke ahiahi.
H.M. WINI Luna Hoopuka
KA "NUPEPA KUOKOA."
Is published in Honolulu
EVERY SATURDAY,
$2.00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00; twice or $1.50; and $2.00 for one month; all advertisements must be paid for in advance.
KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.
ALL SUBSCRIPTIONS must be PREPAID. No names, either of foreigners or natives, will be inserted on the subscription list, until paid for. This rule must be strictly adhered to, on account of the low subscription price.
THE OFFICE OF THE KUOKOA is over the Post Office. Office hours from 9 A.M. to 4 P.M.
H.M. WHITNEY, Publisher
Bound Volumes of the KUOKOA, for sale, at the office over the Bookstore. - $3.50 each.
Persons having complete sets of the above, can have them bound by paying $2.00 each.
NA BUKE
HOOLAHAIA E KA PAPA HAWAII
Baibala Hemolele Nui ili eula nani me na kuhikuhi ma na a ao.....$12 00
" " Nui ili eleele kaekae wai gula.....5 00
" " uuku iki ihi " ".....8 00
" " Pananaiki iho ili eleele.....4.00
Kauoha Hou ili gula nani me na kuhikuhi.....3.00
" " eleele kaekae wai gula.....1.00
" " " ......75
Kauoha Hou Hapa Haole.....75
Lira Hawaii 1848 me ke kanawai......25
" " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
" " " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
" " " " 4......25
" " " " 5......25
Buke Euanelio a Ioane.....10
Himeni .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
" " " Ili nani.....3.00
Eia na buke haawi wale
Palapala Liilii--
Helu 4--Makemake anei oe i ke ola
Helu 6--E hele i o Kristo la.
Helu 7--Ka hoi ana mai o ke Keiki Uhauha
Helu 11--No ka hoohiki wahahee i ke Akua
Helu 16--Ka Kehia ana o ka Ahaaina a ka Haku a ma ka Bapetiso ana.
Helu 17--Mai hana ino i na holoholona
Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE.
Kakauolelo o ka Papa Hoeke o ka Ahahui Euanelio o ko Hawaii Pae Aina.