Ka Nupepa Kuokoa, Volume XII, Number 20, 17 May 1873 — Palapala a ka Mei i na Mai lepera ma Kalawao. [ARTICLE]

Palapala a ka Mei i na Mai lepera ma Kalawao.

Ke pai iho nei makou malalo i ka palapala a ka Moi Lunalilo i kona mau Makaainana i hoopoinoia e ka mai lepera, a me ka lakou pane mai. E heluhelu ia laua me na manao aloha. Honolulu, Apr. 20, 1873. I O'u Makamaka Na Kalaupapa: Aloha oukou:Ma keia hiki ana aku o kekahi mau hoa o ka Papa Ola, Ke palapala aku nei Wau ia oukou a pau loa, no na kumu penei: Ua ike oukou, ua loohia ia ko Kakou lahui i keia mai a ua hookaawale ia kekahi Apana Aina i wahi e noho kaawale ai, i huikau ole ia me na mea e ae. O keia hana ana, he mea ia e pomaikai ai ka lehulehu a e like me ka hookoia ana o na kanawai a pau, pela keia e hooko ia nei. He mea kaumaha io no keia hookaawaleia ana, mai waena ae o na makamaka a hoaaloha. Aka, pehea la e pono ai ke ole e hooko ia na kanawai a pau? Eia wale no na olelo malama ia oukou, ua loaa ia oukou na pomaikai o ko kakou Aupuni, e haawi nei ia oukou, a ke lana nei Ko'u manao, ina he hiki ia'u a me na hoa kuka pu me A'u e iike me ka hana hiki Ia'u ke hana.

Na ke Akua Mana Loa oukou e kiai a e malama a e hoopomaikai no hoi. Oia ka pule a ko oukou Makua Opiopio a oukou no i koho ai Makua no keia lahui. "E ola o Hawaii!" Owau me ke Aloha ia oukou. LUNALILO Palapala Pane A Na Mai Lepera I Ka Palapala A Ka Moi. Hale mai Lepera, ma Kalaupapa, Molokai, Apr. 26, 1873. I ka Moi W. C. Lunalilo, A ke Akua i hoonoho ai i Alii o ko Hawaii Pae Aina, ma ka balota hui, Aloha oe' No ka hiki ana mai o kau palapala, ma Kou mau luna hanohano la, S. G. Wilder a me J. Moanauli i kakauia ma Honolulu, Kou Kulanakauhale Alii, ma ka la 20 o Aperila. E hoike mai ana i Kou manao Alii ia makou, ka poe i loohia i keia mai i kapaia e na kanawai he mai lepera. 1 Ka loohia ana Kou lahuikanaka i keia mai. 2 Ka hookaawale ana a ke Aupuni i kekahi Apana Aina, i wahi no makou, ka poe i loohia i na mai. 3 Kou malama akahele ana e hooko i na kanawai a Kou mua ma ka Noho Alii E ka Makua Nui, ke mahalo aku nei makou i ka nui o kou lokomaikai no ka loaa ana mai o Kau olelo aloha lahui ia makou. He oiaio maoli, he mea kaumaha ka hookaawale ana i na makamaka mai waena ae o ka ohana mamuli o ke kanawai. Aka hoi, no Kou hiki ana aku nei i ka Noho Alii, ua loaa ia oe ka manao hana oluolu, e hui pu aku ma Kou mau hoa kuka no ka imi hooloea ana i ka pono o ka lehulehu. A no keia mea ano nui Au e ke Alii ka Moi e pane mai nei, e loaa ia oe ka oluolu e nana i keia. O ka inaina o ke Akua Mana Loa, e kau nei maluna o keia lahui, ua maopopo loa ia mea, aole hiki ke maihi ia ke ole e loaa ka mea e maalili ai kona inaina. Eia wale no, e imi aku oe a me Kou Aha Kuka i mea e kapae ae ai ia, i kona inaina nui mai luna ae o Kou lahui, i loohia ia e ka mai lepera, weliweli. E like me keia: "He mea maikai i ke Akua ke huna i kekahi mea, a he mea maikai i na Alii o ka honua ke huli aku." Nolaila, o makou na Komite i koho ia e pane aku i Kau olelo e ke Alii ka Moi. Ke waiho haahaa aku nei makou na ka lokomaikai o na lani e hoomauia Kou Noho Alii e ka Moi a e ola ka Moi Lunalilo i ke Akua. O makou kau poe kauwa haahaa. Me ka Mahalo. W. N. Pualewa, James Paiaina, Na Komite. A. S. Nuuanu, J. H. Hao, L. P. S. Halulu.