Ka Nupepa Kuokoa, Volume XV, Number 7, 12 February 1876 — Page 4

KA NUPEPA KUOKOA, ME KE AU OKOA I HUIIA.

HE HIMENI, ROUND THE THRONE.
Silver Song, p. 7.

1. Ma ka noho nani
Ku na kini hou,
Me na lira lani,
Mele ia Iesu ;
Ma na mauna uli,
Ma na kula lai,
Me na wai hauoli,
Mele na pokii.
Cho.— Mele oli nani
Na pokii ma o,
Me na leo lani
Me ia Iesu.

2. Me ka lole lani,
Nani a aiai
Me na lei daimana,
Ku ia poe maikai,
Pau ke kumakena,
Pau ka make nei
Pau no hoi na hewa,
Lanakila ! Cho.— Mele oli nani &c.

3. Pau na mana lima
Ma na lira ao,
Me na Serupima,
Kani like no,
Ku ae a hookani
Pa ma o, ma o
Ko o leo lani,
Mele ia Iesu, Cho.— Mele oli nani, &c.

4. E na keiki kula
Huli mai ano,
Hana i ka pono
I na la a pau ;
Aloha ia Iesu la,
Ku hahai mau,
Pii a haleluia
Me lakou ma o,
Cho.— Mele oli nani, &c.
Hawaii.

HAAWINA KULA SABATI.
HELU 9. SABATI, FEB. 27.
KUMUHANA — Ka lawe ana i ka Pahu Berita ia Ziona.
PAUKU BAIBALA — II Sam. 6 : 1 — 15

                    HOULUULU hou ae la o Davida i na kanaka i waeia a pau o ka Iseraela, he kanakolu tausani.
               2 Ku ae la o Davida, a hele pu aku la me na kanaka a pau me ia mai Baale o ka Iuda, e halihali mai laila mai i ka pahu o ke Akua, i ka mea i heaia aku ai ka inoa, ka inoa o Iehova Sabaota, o ka Mea e noho ana mawaena o na kerubima.
               3 Kau aku la lakou i ka pahu o ke Akua maluna o ke kaa hou, a lawe mai la ia mailoko ae o ka hale o Abinadaba ma Gibea. Kai aku la o Uza a me Ahio na keikikane a Abinadaba i ke kaa hou.
               4 Lawe mai la lakou ia mea mailoko mai o ka hale o Abinadaba ma Gibea, hele pu ana me ka pahu o ke Akua, a hele aku la o Ahio imua o ka pahu.
               5 Hookani aku la o Davida ame ka ohana a Iseraela a pau imua o Iehova, me na mea kani o na laau o kela ano o keia ano ; me na lira, na pesaleteria, na timeberela, na korineta, a me na kimebala.
               6 A hiki aku la lakou i kahi hehipalaoa no Nakona, o aku la o Uza i kona lima i ka pahu o ke Akua, a paa aku la ia ; no ka mea ua okupe na bipikauo.
               7 Huhu mai la o Iehova ia Uza, a hahau mai la ke Akua ia ia malaila, no kona hala ; a make iho la ia malaila ma ka pahu o ke Akua.
               8 Ukiuki iho la o Davida i ko Iehova hahau ana aku ia Uza ; a kapa aku la o Davida i ka inoa o ia wahi, o Perezuza.
               9 Makau iho la o Davida ia Iehova ia la, i iho la, Pehea la e hiki aku ai ka pahu o ke Akua io'u la ?
               10 Nolaila, aole i lawe o Davida i ka pahu o Iehova io na la i ke kulanakauhale o Davida : aka, lawe ae la o Davida ia mea iloko o ka hale o Obededoma no Gata.
               11 A waiho wale ia ka pahu o Iehova ma ka hale o Obededoma no Gata i na malama ekolu, a hoopomaikai mai la o Iehova ia Obededoma a me ko ka hale ona a pau.
               12 Hai aku la lakou ia Davida i ke alii, i mai la, E, ua hoopomaikai o Iehova i ko ka hale o Obededoma, a me na mea a pau ia ia, no ka pahu o ke Akua. A hele aku la o Davida a lawe mai la i ka pahu o ke Akua, mai ka hale o Obededoma mai, a iloko o ke kulanakauhale o Davida me ka olioli.
               13 Aia, hele aku la ka poe halihali i ka pahu o Iehova i na ana eono, mohai aku la oia i na bipi a me na mea i kupaluia.
               14 Haa ikaika aku la hoi o Davida imua o Iehova ; a ua kaeiia o Davida i ka epoda olona.
               15 A halihali mai la o Davida a me ka ohana a Iseraela a pau i ka pahu o Iehova me ka hooho ana, a me ka hookani ana i ka pu. Pauku hoopaa, p. 5, 15.

Mele — Him. 52, 8 — 6. Leo.1
Hooho oli nui ae —
Na leo, na naau,
I ko ke ao alii maikai,
Mahalo, a makau.

2 Iehova kiekie mau,
A weliweli no,
Ka Moi nui o ke ao,
Hoonani mau kakou.
               Pule hoomaikai no ka hiki ana mai o ka olelo a ke Akua maanei, me kona mau pomaikai a pau, &c.

NA NINAU A NA KUMU.

                    P 1. E hia kanaka i houluuluia'e ? He houluulu kana mamua, he houluulu aha keia ? Houluulu wale anei Davida me ke kuka ole me na luna ? I Oih. Alii 13 : 1, 2, 3 Ae anei na kanaka ? p 4. Pehea ka houluulu ana, maihea mai ? a i hea ? p 5.
               P 2. Owai ka i hele pu me na kanaka ? Aia mahea ka pahu berita ? Baale oia o Kirietaieasima. I Oih. Alii 13 : 5. Ma ke Komohana Akau paha ia o Ierusalema. Maihea i lawe ia'i ka pahu berita a hiki i keia wahi ? I Sam. 6 : 20 7 : 1, 2. E hia makahiki malaila ? 75 paha. E huli nae.
               P 3, 4. Ma ke aha i kau ai ka pahu berita ? A laweia mai maihea mai ? Abinadaba, Owai ia ? E ola ana anei ia wa ? Gibea heaha ia ? Baale, Kirietaieasima, ua like pu. He puu Gibea. Nawai i kai i ke kaa ? Owai mamua ?
               P 5. Pehea Davida ma ? He hookani aha keia ?
               P 6. Heaha ka pilikia ma kahi hehipalaoa o Nakona ? o Kidona ma, I Oih. 'lii 13 : 9. Heaha ka hewa o Uza ? Nahelu 4 : 15. O ka hoopa ana i ka pahu me kona lima.
               P 7. Heaha ka hope o keia hewa ? Mahea kekahi hana like ? I Sam. 6 : 19.
               P 8. Pehea Davida ? Pono anei kona huhu ? A kapa ia wahi owai ? no ke aha ? P 9. Makau Davida ia wai ? no keaha ? A, heaha kona ninau no ka pahu ?
               P 10, 11. Mahea i laweia'e ka pahu berita ? Aia no Gata mahea ? Owai hoi Obededoma ? E hia malama malaila ? Pehea hoi Obededoma ma ? poino anei ? pomaikai paha ? Pehea ko oukou ohana ke hookipaia ka baibala maloko ?
               P. 12 — 15. I ko Davida lohe ana ua hoopomaikaiia ka ohana o Obededoma no ka noho ana o ka pahu berita me ia pehea oia ? A hele i na ana eono heaha kana i mohai ai ? No ke aha hoi kona hele ana ? Heaha kona i kaei ai ? E poda, heaha ia ? He lole pili i na kahuna, aole nae he kahuna o Davida, no ke aha kona aahu ana i ko ke kahuna lole ? Malama he epoda ano e keia.
               Nui ka hauoli, ka hookani ana ka haa olioli ana o Davida ? Owai ka i hoowahawaha ia ia ? no ke aha ? Heaha ka hope ? P 16, 23. Heaha ka Davida i haawi aku ai i ko kanaka ? p 19.
Mele. Robina Gula. Mele 2.
Hiki i na naau iki
Ke aloha ia Iesu :
Hiki i na uhane iki
Ke ao i na halelu.
Hui — Iesu nani, e aloha,
Hoomaikai i na pokii —
Iesu nani, e hoolohe
I ko makou himeni.
3 Hiki i na leo iki
Ke memele ia Iesu ;
Ku a mele na kamaiki,
Mele a hoomaikai pu,
Hui — Iesu nani, e aloha, &c.

NA NINAU A KE KAHU.

                    Na makua. Ka pahu berita, heaha ia ? Mahea i hanaia'i ? Mahea i waiho mua ia'i ? Heaha ka iloko ? Mahea ko kakou lohe hope ana nona ? Ma Silo oia i ka wa hea ? Mai Silo i lawe ia'ku ai a i hea ? Nawai ? no ke aha ? Nawai ia i lawe pio ? E hia malama ia me na Pilisetia ? No keaha ko lakou hoihoi ana'ku ? Ua hoihoi ia'ku anei i Silo ? I hea hoi ? Mahea Kiriatasima ? Nawai ia i malama ? He kahunapule anei Abinadaba ? Pehea ka loihi malaila ? Olelo kekahi 20 makahiki, a, o kekahi, 40, a o kekahi 75 makahiki. Mahea ka oiaio ? ma ke 75 mak. paha. Pehea e maopopo ai ? Noonoo nui i loaa.
               Na keiki. Heaha ka manao maikai o Davida no ka pahu berita? E hoihoi i kona kulanakauhale ia Ierusalema ? Owai ka i hele pu e hoihoi mai ia ? A kau ia maluna o ke kaa aha ? Owai na kahu kaa ? Hoomaka lakou e hele me ka pahu, me ka olioli me ka hookani ana i na mea kani he nui wale, heaha ka mea keakea i ko lakou olioli ana ? Heaha ka mea i make ai o Uza ? Ka hoopa hewa i ka pahu berita. He mea makau anei ka hoopa hewa i na mea laa, i ka baibala, i na haawina kula Sabati, i ka pule, i ka ahaaina a ka Haku, i ka ekalesia ? Ae, he mea makau no, aole pono ke lawelawe wale me ka lealea, me ka paani, me ka manao ole, &c.
               Make kekahi poe mamua, hai mai, I Sam. 6 : 19. Ina komo ka make iwaena o ko oukou mau lealea a olioli, pehea oukou ? Pehea Davida ? Pono anei kona huhu no ka make ana o Uza ? Nui na pilikia, na mai, na make i keia wa iwaena o kakou, heaha ka pono ? E mihi paha, e haalele i na hewa. Ke kula a pau. Ua hiki koke aku anei ka pahu berita i ko Davida wahi. Pehea ka loihi mahope o ka make ana o Uza a kii houia'e ia a lawe ia i ka hale o Davida ? Na keaha i paipai hou ia Davida e kii i ka pahu berita ? A i ke kii hou ana'ku pehea ka hana ? I Oih. 'Lii 15 : 1, a pau ka mok. Na manao. 1 Waiho wale ia ke kauwahi a loihi me ka baibala ole, he mau hale, he mau aina a nui, aohe baibala.
               2 E ala me Davida, a hoolako i ka baibala i na wahi i nele. He hana hoohauoli keia.
               3 He mea makau ka lawelawe wale i ka baibala me na mea laa, he mea make ke hoopa wale, me ka malama ole.
               4 He mea hoopomaikai ka baibala ke hookipaia iloko o ka hale, o ka aina, o ka naau ke heluhelu ia, a malamaia.
               5 E hoomakaukau i wahi maikai e waiho ai i ka baibala. Mele, Robina Gula mele 7. Leo Hosana kamalii.
1 E paa mau ka. Baibala,
Mai hookuu wale ae,
Ka olelo oiaio,
Ke panana maikai,
Ke kookoo, ke kokua
No na poohina nei,
Ke alakai kupono
No na pokii liilii.
Cho — Ae, ae, e paa makou la.
I ka Baibala nei,
E lilo e ke ola,
E paa nei keia lei.
Me ka pauku elima.
                    Pule no ka baibala, i hoolahaia i o ianei i heluhelu ia a malamaia i ola kanaka me kamalii.
                    HAAWINA KULA SABATI, NO Mar. 5
2 SAM 7 : 18 — 29. HAWAII.

NO GILIBETA KA IKAIKA !
KA LUA OLE O KE KOA,
A ME KA PUUWAI KINA OLE.
MOKUNA V.
KA HOAILONA.- HE HOAALOHA ILOKO O KA. PILIKIA.

                    O oe anei ia e ke kapena ?" wahi a ke kanaka ia ia i ku iho ai mamua o ke kumu laau me ka pahikaua e hulali ana i ka lima.
               " Owau no O oe anei ia e Robe ?"
               " Oia no. Heaha kela mea au maanei ?"
               " O ka puolo a ke kanaka maauauwa ; oia kela e waiho mai la ma-o."
               Laki oe e ke kapena i ka loaa ana o kau hana o keia po. He po paoa loa keia no'u, aole he wahi mea i halawai iki mai me a'u."
               " Ua nui loa ka hana i loaa ia'u ; aka aohe he manawa i koe. E kokua mai oe ia'u.
               " E lawe anei i ka puolo ? he kaumaha ea ?"
               " Aole. Ua hiki i ke keiki liilii ke lawe ia mea ; aka owau ka i poino, ua kuiia au, ua pepehiia, aole e hiki i kuu mau maka ke ike. Makemake au e kokua mai oe ia'u ma ke alakai ana aku i ka home."
               " Kuiia !" wahi a Robe me ke ano kahaha, hele mai la a kokoke loa, halalo pono mai la i na maka o Wili, aia hoi, ua olopu ae la me he mau ohia la ka nunui, " Penei iho la anei ka ikaika o keia kanaka i eha ai oe ?"
               " Aole, o kona mau hoao ana mai a pau e hakaka me a'u, ua hooki pokoleia ia e ka maka o kuu pahi. Me kekahi mau mea e ae elua i hakaka ai au, a ke olelo paa nei au, aole loa o'u makemake e loaa hou ka lua, o na hakaka weliweli ana e like me keia."
               " A ! he koko keia e hilihili nei maluna ou. No'u ponoi anei keia koko ?"
               " Ae ; me he wai la lakou e hiolo nei. Aole loa au i halawai me kekahi puili ana i oi aku ka ikaika e like me na puili i loaa ia'u i keia po ; aole hoi he wa i honi mua ai ko'u mau papalina i ua puupuu oolea e like me keia ; a ua aneane au e ma-ka-po"
               " Aole keia o kou ano mau e ke kapena," wahi a Robe.
               " Aole. E hele kaua. E huli mua aku oe i kuu pahi." Aole i emo ua loaa ae la ka pahi, lalau iho la ke kokoolua a hookomo iho la iloko o ka wahi. A ia ia i hapai ae ai i ka puolo olelo aku la, " Ma keia mea e uku ia ai kou luhi o keia po, a e hoola ia ai hoi kou mau palapu a me ka eha."
" O na mea wale no nana e lapaau kuu eha," wahi a Wili ; " Oia ka loaa hou ana o keia mau keiki. Ke hoohiki nei au i kuu hoohiki ana maluna o kuu pahikaua, aole loa oia e hoihoi nele mai a hiki i ka inu ana i ke koko o na mau keiki ino la.
               " Ae, o ko kakou moto ia e Wili, he koko no ke koko."
               Me ia mau huaolelo i ike ia aku ai na mau powa la o ka ululaau o Keneti, e kapio ana i ko laua mau kapuai ma ke ala ololi o ka ululaau, e hiki aku ai i ko lakou lua huna. Mahope iho o ka naku hele ana iloko o ke ino, a me ke pohopoho, ua komo aku la laua iloko o ke ana, ko lakou home i pee ai. Na ke ea ano e o loko a me na leo maa mau i hoike mai la ia Wili ua hiki aku kona puuhonua, no ka mea, aole ona mau maka e ike aku ai, ua paa loa ae la. Haule aku la iluna o kena wahi moe, me na manao enemi hoomauhala iloko ona no ka kakou kamaleihiwa.

MOKUNA VI.
NA KEIKI AO-HANA ELUA.— KA HAKAKA.— KA
HOOHIKI ANA E HOOPAI I KA INAINA — KE
KANAKA KUAI PUA-KA LIMA-IKAIKA. KA MEA HOOPAKELE,

                    Hookahi malama i hala ae mahope iho o na ulia i hoikeia aku nei ma kela mokuna, he kahua akea nui ke hoomakaukauia ana ma Heti-eleele, i wahi e hoaoia ai ke akamai o kela a me keia kanaka ma na mea kaua, a me na mea lealea ikaika, oia hoi, ke kaka-pahi, ka pana-pua, ka hakoko, momoko, a me ke kuikui.
               O Sir Keoni Keresewele he Naita kaulana wiwo ole, no ka papa o na'lii nui o Alabiona, oia ka Peresidena o ua mau lealea nei i hoomakaukauia ai, a na kana kaikamahine e haawi aku na makana i ka poe pookela o ka ikaika a me ke akamai i na mea kaua, oiaio o Beta.
               No ka ui a me ka pakela aku o kona nani i ko na kaikamahine alii a pau o ia au, ua kapaia aku oia o ka Pua oi kela o Keneti, a o ka mea laha ole hoi o Alabiona holookoa. Ua kui aku ke kaulana o kona nani a hiki i ka piko o Alabiona, a i na welau hoi a pau o Berekene kahiko. No kona nani a me ka ui laha ole i haaheo ai kona makuakane wiwo ole nona, a oia hookahi no ke kamalei a kona puhaka a na lani i hoopomaikai mai ai, ka onohi hookahi o kona mau aloha makua a pau i hilinai ai. I ka wa i laha aku ai na lono o keia mau hoomakaukau ana, ua kakahe mai la na poe opiopio a pau i Keneti, a me na poe ikaika a pau no ka hoao ana i ko lakou akamai, a no na ake ana hoi e kilohi aku i ko lakou mau ike maluna o ka Pua laha ole o Keneti.
               O na poe hana kakaka ma na wahi e pili mai ana i Keneti ua hooikaika nui lakou i ka lakou hana ike, no ka mea, he wa keia a ke au o na manawa i haawi mai ai i pomaikai no lakou ; a mawaena o keia poe o Simona Teta kekahi, ka mea hana pua i kamaaina mua i ka mea heluhelu, oiai oia e noho ana maloko o ka hale hookipa Omole Ili iloko o kela po ino i powa ia ai ke kanaka maauauwa.
               Ma keia wahi he pono ia makou e hoikeike aku i kekahi mau mea e pili ana no Teta a me kona mau keiki ao hana elua.
               I ka la mamua ae o ua la nui nei, ua mikiala ae la o Teta a me kana mau keiki hana elua e hoomakaukau i na pua a e hana hoi a nui, no ke mea, he wa keia e holo ai ke kuaiia mai o ka lakou mau mea i hana ai. Ke halo pono aku iloko o ko lakou hale hana aole ekolu wale no lakou, e hana nei, eha ko lakou nui, o Balaneke, ke kaikamahine a Teta ka hana pua, oia kekahi e kokua ana i ka hana a kona makuakane.
               O Tobia kekahi o na keiki hana, ua lilo ka hapa nui o kona mau manawa i ka nana ana ia Balaneke mamua o kana hana iho, nolaila i ka wa i hele mai ai ka haku e nana i kana pua i hana ai, aia hoi, ua inoino ke kau ana i ka hulu. Huli ae la o Teta i kana pua ma o a maanei me ka olelo ana. " E nana ! E nana ! no wai keia pua au i hana ai. E mahalo anei kekahi kanaka lena kakaka ke ike i kau pua ?"
               Kulou iho la o Tobia i lalo me ka nana ana i kana pua, aka, no ka piha loa o Teta i ka inaina, ua hahau mai la oia i ka pua ma kona lae, a moku lihi ae la ka ili.
               " Aole anei au i ao aku ia oe i ke ano e hana ai i ka pua no na poe akamai i ka pana pua ma Beretane nei, penei iho la anei ka haawina a'u i ao aku ai ia oe ? " Ua oki kou hana hou ana i ka pua, mamuli nui loa ka pua e ino ma kau hana ana."
               " E kuu haku," wahi a Tobia, " E akahele kou huhu no'u. Ina ua ino ka'u pua i hana ai, no loko mai no ia o kau mau ao ana, a me ko'u ike."
               " Ua pau kou hana ana, mai hana hou i ka pua.
" Aole kupono kou ao ana i keia oihana. E nana oe, ua hana anei kou hoahana i ka pua e like me keia ke ano ? E nana oe i ke ano o ka Koni pua i hana ai.''
               No ka mahalo o ua haku hana nei ia Koni ua hoowela ia ko Tobia huhu nona. I aku la ia. " E nana pono oe e kuu haku i kana mea i hana ai e like me kou nana ana i ka'u. O kou mau hoahewa ana i ka'u mea i hana ai, ua hiki no ia, aka aole loa au e ae aku ana ua oi ae ka Koni pua i hana ai maluna o ka'u. He oi aku ko'u akamai i ka hana pua mamua ona."
               " Ke i aku nei au, aole. Eia ka mea nana i hooia mai — e nana oe i ka like ole mawaena o keia pua a me kela."
               Ia Teta e olelo ana pela, lalau aka la oia i kekahi pua a Koni i hana ai.
               Ia manawa i pane aku ai o Tobia me ka aka hoohenehene aku. " Ae e nana oe, o kela hulu ana i hoopipili ai ma ke kuau o ka pua, i hea la e lele ai ? o ka lani wale no ke ike. Ha ! ha ! nana ia iho !"
               Nana iho la o Teta i ka pua a kekahi keiki hana ona i hana ai, ike iho la he oi loa aku ke ino o kana mamua o ka Tobia ; no ia mea, ua huhu iho la oia me ka nuku pu aku ia laua a i elua.
               Ekemu mai la ke kaikamahine. " E ka makua, mai hoopii ino i kou huhu no laua."
               " No ke aha ? no ke aha ?" i pane aku ai ka makuakane. " Heaha ke kumu o kou kokua ana i na mea nana i hana ino i ka oihana a kou makua. He oi aku ka pono e hoopai ia laua i hooili mai ai maluna o ka'u oihana."
               " Aole, aole," wahi a Belaneke, " No'u nei e ka makua, mai olelo hou oe pela."
               " A ! a !" i pane aku ai o Teta. " Ua oi aku anei kou aloha ia laua mamua o ka oihana a kou makuakane ? pela i makemake ole ai oe e hoopai ia laua no ka laua ino i hana ai ? e noho malie oe e kuu kaikamahine, mai hoauwana i kou manao maluna o kekahi o laua, no ka mea aole i kupono kekahi o laua e malama ia oe."
               I keia wa ua ane hilahila iho la ke kaikamahine, me ka olelo aku, " E ka makua, he oiaio ka'u e olelo aku nei ia oe aole au i hoowahawaha i kekahi o laua, aka, no ke aha au e hoowahawaha ole ai ? No ka mea, he mau keiki hana laua, a he mau mea kokua hoi no kau oihana, oia wale no, aole no ka mea e ae."
(Aole i pau.)

KA BURT LAAU OLA !

                    Mai e loaa mai ana no ka holopono ole o ka ai iloko o ka Opu, A me ka mea hooikaika i ke Akepaa ! O KEIA LAAU E LOAA MAI AI KE OLA A E PAKELE AI HOI ! He mea io no ia e pau ai na mai i kela mai mamuli o ka Holopono ole o ka ai iloko o ka Opu, Ka Paapu, na Io ulu wale, Na waikahe wale mai, na mai Nalulu, Na mai o ke Akepaa, a me KA PONO OLE O NA PAAHANA O KA WAIHONA AI E LOAA KOKE NO KA OLUOLU KE INU I KEIA LAAU MAI KA AKAhi a i ka eono omole, (e like me ka nui o ka mai, pela e nui ai ka laau).
               He mea nui loa ka malama ana i ke kino iloko o ke kulana o ke ola maikai me ka kokua ana i ka mana o ka hooholopono ana o ka ai iloko o ka opu, a me ka hooikaika ana e puliki a e hoomau ma na hana e kokua ai i ke ola oluolu maikai, a mamuli oia mau mea e makala ai na mea ino mai ke kino ae, me ka ai ole ana i na laau awaawa. I mea e maopopo ai, e lawe i ka Laau Ola a Burt, e loaa ai ka ikaikai a me ka mea hooikaika i ke akepaa, he LAAU noloko mai o na MEA KUPU. Ma ka ikaika o keia laau a me ka holo o ka hana maluna o na PAAHANA o ka WAIHONA AI, me ka hooikaika ana i ka opu a me ke kokua i na mea o ke kino, a ma ia wa no e kaawale aku ai na mai o ke akepaa, a ma ka hoonaha kupono ana, e loaa mai ai ka oluolu ma ka pau ana aku o na wai ino. Aole laau maikai e ae i ike ia, e like me ka Burt Laau Ola no na mai e loaa mai ana no ka holopono ole o ka ai iloko o ka opu, a me ka mea hooikaika i ke akepaa, a o lanakila nui no keia laau maluna o na mai i loaa mai no ka holopono ole o ka ai iloko o ka opu, ka paapu, na io ulu wale, ka wai kahe wale mai, a me na ino e pili ana.
               He lehulehu ka poe i ike ole i ke kumu i hiki mai ai na mai no ka holopono ole o ka ai iloko o ka opu ; a nolaila, ua manao ia he mea pono ke hoike aku, i kahi wa, ua loaa ka eha ma ka waha o ka opu ai ai, o ke kumu o ia, o ka holopono ole o ka ai iloko o ka opu, a lilo ia i mea pohapoha, loaa mai ka nalulu, ka wela o ka umauma, wela o loko o ka opu, ka umii ma ka aoao a iloko o ka umauma, ka mulea o ka waha, palaai o ke alelo, awahia o loko o ka opu, ka hiamoe ole a me ka ono ole i ka ai, ka molohai, paupauaho, ka niua, ka moku honua, ka lia o ka ili, a o ka moku ana o na aa lolo Nolaila, o na paahana a pau o ke kino i loaa i ka nawaliwali, ua loaa mai ia mai ka holopono ole o ka ai iloko o ka opu.
               O KA LAAU OLA A BURT, he laau ia e kipaku aku ana i na mea make ; a o ka mea i loaa'i nei mau ano mai a hoomanawanui i ka ai ana no kahi manawa, o ke ola kona hope. Ina he paa ka mai o kahi a inu i keia laau, e loaa koke no ka oluolu maikai, a loaa no ke ola hou. O na ino a pau o ka io ulu wale, he ola wale no ia i keia laau.
               He nui na hoike e ola nei no ke ola ana i keia laau, mahope iho o ko lakou mai ana no kekahi mau makahiki, a i ka ai ana i keia laau ua ola koke. He hiki no hoi ke hoomaemae ia ke koko me keia laau ola a Burt, a pela no hoi na mai mawaho o ka ili, he lilo loa ia i ka ole ke ai i keia mea maikai. A he laau maikai no ma ka inu ana.
               O keia laau, ua loaa mai ia mailoko mai o ke kuhikuhi a kekahi kauka lapaau kaulana, nona ka lapaau ana i kona ohana iho, a ua loaa no ke ola maikai. Ke waihoia aku nei keia laau imua o ka lehulehu, me ka lana o ka manao e hahai ia ana no e ua pomaikai na poe e ai ana, ina paha he nui ka mai, e ola ana no.
               O KEIA LAAU A BURT, KA LAAU MAIKAI MA KE AO NEI, nolaila, he pono i na poe mai ke hoao i loaa ke ola. E loaa no keia laau ma ko makou Halekuai

Na kuhikuhi no ka inu ana :

                    E inu i hookahi puna nui i ke kakakahiaka a me ke ahiahi, hoonui aku paha a hooemi mai paha, i mea e hemo maikai ai oloko, elua a hookahi manawa paha o ka la. Mai inu i ka wai iloko o umikumamalima minute, mamua a mahope o ka inu ana KUMUKUAI, $1.25 no ka omole.
KO KALEPONI LAAU OLA !
A ME KA MAI HANO.
DILLINGHAM & CO.,
720 3m Na Agena no ka Pae Aina Hawaii.

J. PORTER GREEN.
" KEIKI O KAUAUKIUKIU."
LOIO !

                    E HELE MAI NA MAKAMAKA A PAU IO'U nei, a na'u no e kokua ia oukou imua o ka Aha Hoomalu a me ka Aha Kiekie, me ka uku haahaa makepono loa. Aia kuu Keena hana ma kahi o ka Lunakanawai Hoomalu o Honolulu nei, oia ka "Aiko," ma Alanui Kalepa. 688 1y 420

WING SING &Co.
Puhi Palaoa,

                    E waiho mau ana na palaoa a me na berena palupalu. Kihi o na huina alanui Nuuanu a me Beritania. 703 ly 735

E. STREHZ, (AILUENE,)
HAAWI A KUAI
LAAU LAPAAU.

                    AIA MA MONIKAHAAE, KIHI O NA HUINA o na Alanui Papu a me Hotele. Aia malaila na Wa Ala a me na Wai Rukini maikai loa e loaa ai. E hamama mau ana i na ahiahi Poaono a pau. 689 1y 741

Mea HOU Maikai.

                    NA PEPA kakau Farani me na wahi leta o kela ano keia ano, i hanaia maloko o kekahi pahu liilii. O ke kumukuai o keia pepa ano hou, he hapalua a hookahi dala. Aia ma ka hale kuai buke o 1m — 705 H. M. WINI.

He Hoolaha i ka Poe Aie !

                    OIAI, ma ka la 15 o Ianuari 1876, ua aeia ka palapala kauoha hope loa a KALUAHI, o Honolulu, Oahu i make, maloko olaila, ua hookaawaleia ka mea nona ka inoa malalo iho, i hooilina no kona mau waiwai a pau, nolaila, ke kauohaia aku nei ka poe a pau ana i aie aku ai, e hoike mai i na bila oiaio ia'u, iloko o na malama eono mai keia la aku. KALEI. Honolulu, Ian 22, 1876. 738 41* 741

EIA KA MANU HOU

                    HE BUKE MELE HOU NONA KA INOA " Robina Gula." na 110 ka nui o na mele haipule a hoonanea o kela Buke Hou. He 15 keneta ke kope, a i ole ia, he $10 no ka 100 kope. E kuai ia e [3m 804] H. M. WINI.

KA NUPEPA KUOKOA
E HOOPUKA MAU IA MA HONOLULU,
I KELA POAONO KEIA POAONO
$2.00 no na mahina Umikumamalua
$1.00 " " Eono.
ME KA HOOKAA MUA MAI.

NA OLELO HOOLAHA — aole e oi mamua o 10 laina no ka hoopuka hookahi ana, $1.00 ; alua puka ana he $1.50 hookahi malama, 12.*). E UKU MUA la mai ke dala o na Olelo Hoolaha hoounaia mai ana e pai.
O NA UKU A PAU E HOOKAA MUA MAI NO — aole e kau la ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono e hiipoiia keia mau rula, no ka mea, he emi no ka auhau no keia nupepa.
AIA KE KEENA O " KE KUOKOA" MA KA
HALE LETA HOU.
H. M. WINI,
Luna Hoopuka.

Lole Makepono ke Kuike !

                    E LOAA NO IA MA KAHI O KAKELA ME KUKE, E LAA NA AHINAHINA, KALAKOA, KEOKEO, LEPONALO, Pena, Aila, Aniani, Na Mea Piula, Kopa, Aila Honua. Aila Hoomaloo, Kui Kakia, Pakeke, Tabu, Kaula, Noho lio, Hulu-palaki, na Pulumi. A he Agena no hoi no na Mokupuni o Hawaii nei no na LAINAKINI-NAO, LAINAKINI-MAOLI, PALULE KALAKOA, ALAPIA, KELEPA, KILISA, Na Lole kupono i ka wawae, Palule Huluhulu, Na Lole Huluhulu. Na Lole no ka hoohehelo ana Lipine, lihilihi, a me ia mea'ku A HE MAU MEA AI KAHI Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c A HE LAAU LAPAAU KAULANA LOA A Dr. JAYNES. Laau Kunu, Laau Hoomaemae Koko, Laau hoopau naio, Penikila, Huaale, A me na Laau Hamo, a pela'ku. 707 ly 759