Ka Nupepa Kuokoa, Volume XVI, Number 26, 30 June 1877 — Page 4
| This text was transcribed by: | Verna Nalani Podlewski |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Whippoorwill p 111.
1
Hawaii nei ka aina lai,
Nou no kuu mele nei;
Nou mai na pono. na pomaikai,
Na kula kamalii.
Mamua no nae ua naaupo,
Ano ua akamai;
E oli aku a huro
No Hawaii, aina lai.
Cho.-Nohea la mai kou pomaikai,
Hawaii aina lai?
No ko ke Akua kokua mai
Ma na makahiki nei.
2
Hawaii e, ke kupaa nei
Ma kahi naauao;
Ua piha i na kanawai,
Na buke kula no.
Mamua no nae ua nele no,
Ano na lako e.
Alohi mai na lamaku
No Hawaii aina lai.
Cho.-Nohea la mai kou pomaikai, &e.
3
Hawaii e, ke kau kou hae,
A welo nani e
Maluna o na koa nei,
Na koa kamalii,
Na koa no nae i paio ae
I hee na enemi;
Na koa paa, huro, huro
No Hawaii, aina lai.
Cho.-Nohea la mai kou pomaikai, &e.
4
Hawaii e, aina lai,
Kaulana, haiamu,
No kou mau kala kamalii,
Ka kula hanai pu.
Pela e mau ae kou pomaikai,
Kou maluhia e;
E mau ko kakou pule ae
No Hawaii, aina lai.
Cho-Nohea la mai kou pomaikai, &e.
HAWAII.
HAAWINA KULA SABATI.
HELU 3. SABATI, IULAI 15. 1877.
KUMU HANA.-Ka huli ana i ko na aina e.
PAUKU BAIBALA-Oihana 42-52.
42 I ka hele ana o na Iudaio iwaho o ka hale halawai, nonoi aku la na kanaka e ae i hai hou ia mai keia mau olelo ia la Sabati mai.
43 A i ka hoi ana o ko ka hale halawai, he nui wale ka poe Iudaio, a me ka poe haipule i huli mua i hahai aku ia Paulo, laua o Barenaba; na laua no i olelo mai ia lakou, a hooikaika mai ia lakou e kupaa ma ka maikai o ke Akua.
44 A hiki i ka la Sabati, kokoke pau loa ke kulanakauhale i ka akoakoa, e hoohole i ka olelo a ke Akua
45 A ike aku la ka poe Iudaio i ka nui o na kanaka, piha loa lakou i ke paonioni, hoopohala aku la i na mea a Paulo i olelo ai, hoopaapaa a olelo hoino aku la.
46 Alaila, hooikaika mai la o Paulo laua me Barenaba, i mai la, He mea pono ke hai mua ia ia oukou ka olelo a ke Akua; ua kapaeoukou ia mea, a ua manao oukou ia oukou iho, aole oukou e pono ke ola loa, eia hoi, ke huli aku nei maua i ko na aina o.
47 No ka mea, pela ka Haku i kauoha mai ai ia makou, Ua hoonoho au ia oe i malamalama no ko aina e, i lilo oe i mea e ole ai a hiki i ua kukulu o ka honua.
48 A lohe ko na aina e i keia, olioli lakou, a hoonani aku la lakou i ka olelo a ka Haku; a o ka poe i wae ia no ke ola loa, manaoio aku no lakou.
49 E haiia no hoi ka olelo a ka Haku ma ia aina a pau.
50 Hookonokono aku la ka poe Iudaio i na wahine haipule koikoi, a me na mea kiekie o ke kulanakauhale, a pai mai la lakou no ka hoomaau no Paulo a me Barenaba, a kipaku aku la ia laua mai ko lakou wahi aku.
51 A lulu aku la laua i ka lepo o ka laua mau wawae ia lakou, a hele mai la laua i Ikonio.
52 Piha loa iho la na haumana i ka olili, a me ka Uahane Hemolele.
Pauku Gula. “A e paulele hoi na lahui kanaka ma kona inoa.” Mat. 19:21.
Mele 8-9 Leo-
Huli hapa na Iudaio,
Nui nae ka poe kue,
Hoopohala a hookuli
I ka olelo e ola’i.
Pela no ma keia kula,
Huli hope wale no,
Nui no na huli ole.
Hoomaloka naaupo.
Pule no ka poe i huli i kupaa, a no ka poe huli ole, i huli koke mai.
No ninau a na Kumu.
P 42. Pau ka halawai pehea na Iudaio? Pehea hoi na kanaka e? Makemake lakou e lohe hou i na olelo a Paulo. Ua komo ka Uhane iloko o ko lakou naau, e ala ana, e huli ana. Pela anei oukou?
P 43. Nui anei na Iudaio a me na haipule i huli a hahai mamuli o Paulo? Nui iki no, aole nui loa. Hookuli ka nui. Pehea ko Paulo ma hooikaika ana i ka poe i huli? Ke kupaa nei anai oukou?
P 44.45-A hiki i ka Sabati, ua ae o Paulo ma e halawai hou me na kanaka e, e like me ko lakou nonoi ana. Pehea ko ke kulanakauhale? Ua hoala ka Uhane ia lakou e hele mai, e hoolohe hou i ka Iesu olelo. Pehea nae na Iudaio, ka hapanui i hele ole? Pela anei kekahi poe haumana i keia wa? No keaha la ka paoinioni, hoopaapaa, makemake ole?
P 46-Pehea Paulo ma? Heaha ka pono mua? E hai mua i na Iudaio i ko laua poe hoahanau. E hanai i ka ohana ponoi mamua, mahope na ohana e. Pehea Iesu ma Mataio 10:5,6? A no ka hookuli ana o na Iudaio, e aha ana Paulo ma? Pehea Ioana 1: 11. Isaia 1: 3? E ko ana ka Iesu olelo, E lilo ana ka mua i hope a o ka hope imua. Pela paha i keia wa. E lilo auanei oukou i hope ke hookuli, a ao ko na wahi e ae imua, Ola paha lakou, oukou nae e make ana.
P 47. Mahea keia mau olelo a Paulo u hoopuka mai ai, e hoapono ana i kona huli ana i na aina e? Isaia 42: 6 49:6 Luaka 2: 32. Ua hoouna hoi Iesu Mat 28:19. Ka Uhane Oihana 13: 4.
P 48. A lohe na kanaka e i keia mau olelo a Paulo, pehea lakou? Owai hoi ka poe i manaoio a ola? Ua waeia anei oukou no ke ola? Pela ke huli koke makou a hahai mamuli o Iesu. A pehea ke kanalua a hoopanee? “Auwe na poe hoepanee, A mihi ole no, Ua puni i ka wahahee. A make mau lakou”
P 49. Ma Anetioka wale no anei kahi I haiia aku ai ka Paulo mau olelo?
P 50. Owai keia poe wahine haipule? He poe Iudaio no, a he haipule Iudaio ka lakou, aole he haipule Karistiano, Lakou me wai kai hookonokonoia e aha ia Paulo ma? He aha ko laua hewa? Ka hai ana i ke ola ma o Iesu la, aole ma ke kanawai, ma ka pono o ke kanaka.
Ane huhu paha oukou ke olelo au, he mea ole ko oukou pono, ko oukou pule, himeni, hele mau i ke kula Sabati, i ka halawai, i ka ahaaina a ka Haku, ke aloha ole ia Iesu, a malama ole iaia.
P 51. Pehea ka Paulo ma hana? Pehea ka Iesu olelo ma Mataio 10: 14? He hoailona ia no ke aha? A hele aku laua i hea? Ikonio ke kulanakauhale nui ia ma Lukao ia, ma ka hikina aku o Pisidia, Konie ka inoa i keia wa. Pehea ka Iesu kauoha ma Mataio 10: 23?
P 52. Pehea Paulo ma? Pehea Mataio 5: 15 Io. 16: 22? Ina hoomaauia oukou no ka malama ana ia Iesu, hauoli anei?
Mele 7-6 Leo Hosana kamalii.
Hoino na Iudaio,
A pai ia Paulo ma
Mai Pisidia aku.
Me e ke konia!
Ua oli nae na aina,
Na aina naaupo,
Ua lohe, a ua huli;
E huli pu kakou.
Na Ninau a ke Kahu.
Na Makua. Heaha ka Paulo mau olelo hope maloko o ka hale halawai? Pauku 41, I ka lohe ana, pehea na kanaka e? Makemake e lohe hou ea. He hoailona ia no ke aha? No ka makemake e ike i ka mea e ola’i. Akahi no lakou a lohe i ke ola ma Iesu la; komo koke ka Uhane, hoala i ka makemake e lohe hou, e hoomaopopo i ke ala o ke ola. Pela anei ma keia wa? Nui anei ka poe e ala ana, e huli ana, e imi ana, e mihi ana maanei a ma na wahi e ae?
He nui anei ke ola?
Na Keiki. Lohe no kekahi poe Iudaio, a huli mamuli o Paulo ma, a hahai mamuli o Iesu. Pehea nae ka hapanui? Huhu, paonioni, hoopohala, hoopaapaa, hoino a hookonokono i na wahine me ka poe kiekie, e kipaku aku ia Paulo ma mai ko lakou wahi aku.
Heaha ko Paulo ma hewa? Aole hewa lakou ka i hewa, a makemake ole i ke ola.
Pehea na kanaka e? Olioli lakou a makemake i ke ola. Pehea hoi oukou, ke makemake nei anei i ke ola?
Ke Kula a pau. Hai mai i ka pauku gula. Pehea na aina e i keia wa? Pehea Hawaii nei? Pehea kakou ke hoomaauia no ka pono?
Mele. 8-9 Leo.
Olioli a hauoli,
Ke hoinoia mai
No ka pono, no ka pili
I ka Haku e ola’i
Huli, huli, pule, pule,
Hahai mai la ia Iesu,
Ma ka pono, ma ke ino,
I pii ae a noho pu.
Pule no keia kula.
NA PALAPALA I KE KUOKOA..
Make ma ka moana.
E KA NUPEPA KUOKOA, Aloha oe:
E oluolu oe a me kou Lunahooponopono, e hookipa aku i keia wahi ukana ma kahi kaawale o kou kino lahilahi, a nau ia e kiani hele aku ma na kapa kahakai o keia mau pukoa.
Nolaila, me ka naau luuluu i ke aloha, me ka puuwai ehaeha, me ka lihilihi i pulu elo i ka waimaka, me keia mau lima haalulu e hooinu nei i ka’u maka sila i ka wai inika, ke puana e nei au, ke kaue ka hoa pili o ka waine.
Ma ka Poalima, oia ka la 15 o keia mahina, oia ka la i make o Ezekiela Pahia ma ka moana, o ke kumu o kona make ana, I holo i ka lawaia kapae maiole, oia no ka lawaia mau o keia aina i keia manawa, i ke kakahiaka o ka la i olelo ia, paina pu no oia me kona wahi kokoolua he wahi moopuna, a pau ka paina ana, holo ke la, a hele hoi kahi moopuna.
Eia ka me akupanaha, o ka hele no ia o ka moopuna a po ia la, a moe no i kauhale a ao ia po, i ka Poano ae, hiki mai kekahi mea o Kalahoouka kona inua, ike aohe kanaka o ka hale, aohe ka waa. Akahi no a maopopo ua make ke loa aloha ino.
He kanaka makua oia iloko o ka pono, he Lunakahiko no ka Ezaresia o Kohala komohana, ua noho loihi oia ma ke oihana kumu kula, no na makahiki he 30, he wahine mare kana e ia iho i Honolulu, he mau keiki no na kona mau hoa hanau, a he mau ohana e ae no ke kahi nona ma ke kino, aka, i kona make ana, aole hookahi mea iki o ke ia poe iike i kona make ana, ua lawe ke au miki me ke au ka ua poi ka ale nui me ka ale iki, a o kona aloha ia e hea mai nei, e koekoe au, me ke aloha i na keiki okaa oniu owala hoa metala o ka Papa pai.
N S K. HAONA.
Honoipu N. Kohala, Hawaii Iune 24, 1877
Hoalohaloha Alii.
I ka lani Moi Kalakaua, ka Makua holookoa o ke Hawaii Pae Aina Aloha oe
Ua oluolu i ke Akua ka Makua Mana Loa ma ka lani, ka lawe ana aku i ke ola o K@u Pokii ke Alii, Ka Mea Kiekie W. P. Leleiohoku, Ka hooilina kalaunu o ke Aupuni. Ua hiki mai ka lono kaumaha i o makou nei, nolaila, owai he lala no ka “Ahahui Hawa i Kalakaua” ma keia aina malihini, ke kuilima pu aku nei au me ka naau ehaeha walohia ia oe, a ke pakui panai aku nei au i ko’u aloha makee alii, me ke komo pu aku iloko o kou mau la kumakena no ka hala ana o kou Pokii Alii i aloha nuiia.
Hooholoia.-Ke uwe kanikapu pu aku nei au me oe, a me ou Kaikuahine, ka Makuahine, a me na alii hanau o ka aina, ka Lahui mai o a o.
Hooholoia.-Ke noi haahaa aku nei au i ka mana o na Lani, e nooluolu a e hoomama mai i kou mau kaumaha apau iloko o keia mau ia kanikau.
Auwe! Ua hala. Ua nalo ia.
Ua hele no me ke kino wailua,
Nei aku la i ka hikina.
Haalulu aku la i ka welona a ka la,
Kau aku i ka lani mehameha;
I ka lani o Iehova ka Haku.
Ilaila oe ia noho mai,
Ianei ke aloha la uwe aku e.
O palanehe o meheu ole ka nele a kalani
Ka maka o Haiulu.
Ka pua aala o Kahulihu i,
Ka pua o Kaikilani-alii.
Ka lau o Haona
Kapoo ia la po-e,
Powewehi loko naaupo i ke aloha.
Kunehihi loko hoonihi i ka minamina,
Minamin ino, Aloha wale.
Aia ka oe i ka lipo o ka lani,
I ka lipo i Kahea ka hele ana-e,
Ka mea aloha a kakou apau.
O oe kai lele au-lani aku nei.
I lele hoolahalahai aku nei ma ka maka
O oe ka la hiki e kau i Lehua.
He haupu he manaolana,
I kou make ana.
He u he aloha-e,
Aloha wale ka Haku alii o na alii,
Ka Haku kino o keia ola ana,
Ke kanikau nei makou ia oe,
Uwe kane me ka wahine,
Uwe kamali me ka hanehane,
Uwe ko kai me ko uka,
Uwe ko luna me ko lalo,
Uwe ka hikina me ke komohana,
Uwe ka Akau me ka Hema,
Uwe ka hookui me ka halawai,
Uwe Hawaii me Maui,
Uwe Molkai me Lanai,
Uwe Oahu o Kakuhihewa,
Uwe Kauai o Mano,
Uwe Niihau i ka mole o na mokupuni.
Uwe ke Kaupu au moana,
Uwe ka Ake keehi ale,
Uwe ka Aeto i ka maka o ka la,
Uwe ke anuenui pio i ka lewa.
E na lehua o Mokaulele,
E na hala o Upeloa,
Nawai olua e lei?
E ke one o Waiolama,
Na wai oe e hehi?
E ka nalu o Punahoa,
Na wai oe e hee?
E ka wailele o Waianuenue,
Na wai oe e nana?
E ka malu niu o Mokuola,
Owai ke nanea i kou malu?
E ka maile lau liilii o Koiahi,
Nawai e honi hoomau i kou ale?
E ka pahapaha o Poliha’e,
Nawai e hiipoi ia oe?
E na ale o Alenuihaha,
Na ale o Pailolo,
Kai hanupanupa o Kaiwi.
Na ale kualole o Kaieie,
A me ke kai o Kaulakahi,
Owai ka oukou mea i ike ai?
E ka malu Ulu o Lele,
Heku-awa o Wailuku,
Nawai ole e hehi?
E Honolulu City,
E na kula Alanui,
Ka uapo o Ainahou,
Ka uka i Nuuanu,
Kawelo o Lanihuli.
Ka lepo ula o Ewa,
Ke kula o Punahawea,
Ke ehukai o Pu@ena,
Laeahi alo makani,
Na nalu o Kalehuawehe,
Kai ku moku o Mamala,
Ke awawa o Manoa,
Lililehua o Palolo,
Ke Apuakehau muliwai,
Na kumu Kou ola @@@ai,
Na Niu haia nu launa ole,
E na hale haoi ola.
Kawaiahao me Kaumakapili,
Aole e hehi hou ia oukou,
E ka Ua Poaihala o Kahaluu,
He kaumaha, luuluu, walohia
Auwe! Ua hala!
O W.P L Leleipelekane – 3.
J.W.D. Kalehuanui.
Tacoma, Wash. Territory. Iune 1 1877
Pilikia ke ola kino
E ka Nupepa Kuokoa; Aloha oe:-
E oluolu oe a me kou Lunahoponopono, ae hookomo iho ma kahi kaawale o kou mau kolamu i keia mau lalani, a hoike isela maluna, eia ma Kaawaloa nei Kona Hema Hawaii, kekahi mau kino palupalu. O Nuuanu kane ame Kuheleikamoku wahine aole e hiki ia laua nei ke malama ia laua iho na ka palupalu loa”. O ke kane ua makapo loa, o ka wahine hoi hookahi no make ike, pilikia loa laua nei i ka ai ole aole keiki aole ohana nana e malama. Ua kokua iki mai no, o H. Cooper a me Moses Barrett ia laua nei i kahi laiki, auhea la ka poe waiwai, e noho mai nei aole kakou ia keia mau pololi, auhea la ka hui malama ola eia ke a mau mea ilihune, a pololi ke kua ia mai, aole nui loa ka lilo e ola ai keia mau palupalu, eia laua nei ke noho nei malamo o ka malu hale, a ke kama lei Likelike Cleghorn i haawi mai ai no laua, aole paha i hiki aku i ko laua hopena a ka Haku i manao ai, no ka pololi hoi pilikia e, a@nui paha. W.C. KEKAULAILI.
Kalaeaalii, Kona, Hema, Iune 7 1877.
He ahaaina Hoomanao.
E ka Nupepa Kuokoa; Alohe oe:-
Ma ka la 15 iho nei o keia malama, ua haawi ae o Mrs. P. Keawe he wahi ahaaina hoomanao no ka puni ana o ka makahiki o kona kane make, he kanaka oia i alola nui ia e kona mau makamaka, a ua noho no hoi ma ke ano Laua malalo o Mr. V. Knudsen no na makahiki he nui; a hiki wale i kona make ana. Ua nui no ka minamina o kona Haku ia ia.
Ma ke awakea o ka la i olelo ia, ua makakau na mea ai, ua kai aku ka huakai mai kona hale noho aku a hiki i kahi i hoomakaukau a ai o ka ahaaina ma Kualakaheka, mamua ae o ka nho ana o ka huakai e paina, ua hoomaikai ae o Makamaka i ka Haku.
Mahope iho o ka pau ana o ka paina ana, hoomaka mai la na kaikamahine kui pua hala o Naue, a me ke keiki puukano o kaualoku i ka lakou hana he kanikau no ka mea i make a hiki wale i ka wa i lawe ai o Lehua i ka la. He maluhia na hana o ka la. HUAKAIHELE.
Pokii, Kauai, Iune. 19 1877.
I HOOKAHI PUUWAI.-E ka Nupepa Kuokoa e; Aloha oe: I ka hora 12 o ka la 16 o Iune, Poaona. Ua hoohui ia ma ka mare o Raukesila Kaheana k no Laie maloo, Koolauloa, me Kaiulehua Kawalona w no Hauula, Koolauloa, na Rev. J Kekahuna i hooko aku, mahope o ka pau ana o ka hana a ke kahuna mare. Ua lulu aloha ae na makua, na pili koko hoi, o na mea i hoohui ia a me lakou la ae no hoi, me na wahi kenikeni; e like me ka oluolu i ka manao, ua hiki ka huina o na dala i ke 4200 he mahalo kou puuwai ia lakou, oiai, he wa pilikia keia poloki, aole i kaohi aku i ko lakou wahi okeni, aua. Ua haawi me ke alohapumehana i ana mea i mare ia.
A pau keia lulu ana, ua paina ka puaa i hoolua ia i ka imua, he inai no ka houpo lewalea o ke anaina; i hele mai e ike i keia hana maikai e mahalo ia ka mare no na mea apau.
Me ka Luna Hooponopono ko’u anoai mau a me na keiki hoohie hua kepau ko’u welina pau ole. J.L.K. KEALAKUHILIMA.
Laie, Iune 1877
Eia ma ka Hale Kuai o Wini!
NA EA,
NA OMAU 1-I,
NA KULA PEPEIAO,
NA OMAU HAO BUKALO,
NA MEA ANO HOU A EMI,
Buke Pakake Ili a me na Eke Dala
Na Lei Pilali,
Na Lei Eleele,
a me na mea e ae he nui wale.
E HAAWI MAKANI IA ana I keia a me kela mea I kuai a hiki ka ka
ELUA DALA.
E hele mai, e nana I keia mau mea maikai, a e@@,
na no e like me ka makamaka.
Emi loa aole e like me mamua!
Eia ma ka Hale Kuai o
756 2m WINI.
Aila Inika Balaki Hoomau Ili a PINKHAM.
He mea maikai loa, i hanapaka maoliia no ka hoopalupalu ana i na ili kaa lio, na kaulawaha io, no noho lio, a pela aku. E hoao oe – Kumukuai no ke kini 75 keneta.
Na Olelo Mahalo.
Hilo, Nov, 1875.
Ua hono pono wau i na Aila Ham Kamaa e ae, a ua hoao pono no hoi i ka Aila Hamo Balaki a G. S. Pinkham; a ua hiki ia’u ke olelo me ke analua ole, o keia Aila ka helu akahi, a me ka oi o ka maikai, o na Aila Balaki a pau a’u i hoao ai. A.O. FORBES
Ua hoao maua i na Aila Hamo Kamaa a G. S. Pinkham & Co., a ua oi aku ka maikai mamua o na Aila Hamo Kamaa ma ina aina e mai
.R. A. LYMAN,
S. KIPI.
Hilo, Nov. 10, 1875. Kiaaina o Hawaii.
Hilo, Nov 10, 1875.
Ua hoao pinepine au i na Aila Hamo Kamaa a G. S. Pinkham & Co., a ua manao no au oia ka Aila Balaki Kamaa maikai mamua o na aila e ae a’u i hoao ai mamua, a he oiaio keia.
C.K. HAPAI.
Hilo, Nov 10, 1875.
No ko’u ike oiaio loa o ka Aila Hamo Kamaa a G. S. Pinkham he Aila maikai loa no ka Hoowaliwali i ka ili. D. KAMAI.
Hanaia e G. S. PINKHAM & Co., ma Hilo, Hawaii.
E kuaiia aku no e BOLLES & Co., Agena, ma Honolulu.
ANOAI I KA LEHULEHU.
E kipa mai a e nana,
I kumaka ai ka ike i na waiwai na-
ni i loaa mai nei iloko o na
La Kuaiha iho nei.
-
Penei ke ano o ua mau waiwai la:
N Wati a me na kaula Gula,
a na Lede a me na Keonimana!
NA KAULA OPELE A NA LEDE
NA KOMO GULA NANI O KELA A ME KEIA
ano o na Lede a me na Keonimana!
NA KUPEE GULA,
NA LIPINE GULA
Na gula pepeiao o na wahine!
e oaka ai I na pepeiao, a e hulali ai
hoi na manamana lima, a e
kilipohe ai hoi na a-i.
-
Na komo humuhumu gula a me ke kala,
Na pihi pulima gula wahine a kane,
Na lakela gula lei wahine nani,
Na komo daimana o na Lede.
Na kaula laketa,
Na pine omai kihei,
Na laketa aniani,
Na huka gula wahine,
NA LAKO HALE.
NA PUNA,
NA PAHI,
NA KIAHA, KALA,
NA APO KALA
NA KAWELE holoi lima,
NA O DALA o kela a me keia ano, a me na mea nani e ae no he nui wale.
-
E kuaiia aku ana no
ma ke kumukuai haahaa loa i ko
na wahi e ae o ke taona nei,
-
UA MAKAUKAU NO HOINA
mea nani no kanaka makua
a me na kamalii.
Na Kamaa Paa Loa,
e loaa no maanei e like me ka
makemake; a ina e loaa
koke ka ino, he hiki
no ke hoihoi mai
M. McINERNY.
Kihi o na Alanui Papu a me Kalepa. 798 3m 514
J. M. Davidson,
Loio a Kokua!
HALE Oihana, maluna ae o ka Hale Kuai Buke o Wini, ma ke keena i noho mua ia iho nei e J W Aukina. Ua makaukau ola e lawelawe i na hihia o kela a me keia ano, imua o na Aha Hookolokolo a pau o keia Aupuni. 784 1yr 836
E. T. Halolani.
LOIO!
EIA HE $20,000 E MAKEMAKE ANA E hoaie aku ma ka ukupanee haahaa loa mai ka $200 aku a pii ae ma ke moraki ana i na aina, Ua hoomakaukau e no oia i na palapala aelike, hoolimalima, moraki a me na hooilina, a he hiki iaia ke hoomaikai i na aina loaa ole na Palapala Sila Nui.
Hale Oihana, aie ma ka “Real Estate Exchant” Helu 31. Alanui Papa. Honolulu, malaila oia e loaa ai i na kanaka a pau, ina he mau ai na kuai a hoolimalima ko lakou, a e hoopaaia me ka uku ole 792 3m 805
MAI KEIA LA A MAHOPE AKU NEI,
O KA UKU O KA
OHUA ONEKI O
NETI MERRILL,
Mai Honolulu aku a me ka hoi ana mai he
ELUA DALA!
E. D. CRANE. (Kapena)
Mar. 26, 1877 796 6ms 324.
Lole Makepono ke Kuike!
E LOAA NO IA MA KAHI O
KAKELA ME KUKE,
E LAA NA
AHINAHINA,
KALAKOA,
KEOKEO,
LEPONALO
Pena, Aila, Aniani,
Na Mea Piula,
Kopa, Aila Honua,
Aila Hoomaloo
Kui Kakia, Pakeke,
Tabu, Kaula, Noho lio,
Halu-palaki, na Pulumi.
A he Agena no hoi no na Mokupuni o Ha
waii nei no na
LAINAKINI-NAO,
LAINAKINI-MAOLI,
PALULE KALAKOA,
ALAPIA, KELEPA, KILISA,
Na Lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipine, lihilihi, a me ia mea’ku
- A HE –
MAU MEA AI KAHI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina &e.
- A HE –
LAAU LAPAAU KAULANA LOA
A Dr. JAYNES.
Laau Kunu,
Laau Hoomaemae Koko,
Laau hoopau naio,
Penikila, Huaale,
A me na Laau Hamo, a pela’ku
802 3m 814
Papa! Papa!
-NO-
ALLEN A ME ROBINSON.
Ua wehe ae nei maua i
PA KUAI PAPA!
-MA KA-
UWAP O PAKAKA.
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale.
Na Pepa Molina.
Na Pena a me na Aila Pena!
NA KUI O NA ANO A PAU!
Na Pani Puka me
Na Pani Puka Aniani.
Na Pani Puka a me
Na Olepelepe.
-
Na loko kukulu Hale
-O NA ANO A PAU-
Ekuaiia ma ke
Kumukuai Haahaa Loa!
o keia Makeke.
ALLEN & ROBINSON.
Honolulu, Aper 13, 1876. @0@ 8m 814