Ka Nupepa Kuokoa, Volume XVI, Number 34, 25 August 1877 — Page 4
| This text was transcribed by: | Ku'uipo Thomson |
| This work is dedicated to: | Carrie Kaleo Hanohano |
Ka Nupepa Kuokoa
KE KILOHANA POOKELA NO KA LAHUI HAWAII.
READY TO GO.
Crown of Glory p 32.
1
Wehe oukou, na anela,
Na puka gula no ʻ u
E hee ka po, a poha ke ao
Ma kela aina i pua mau
A ao mau loa no
Cho--We--he--oukou--
Baso Wehe oukou --wehe oukou
Na pu--ka no ʻ u
Baso Na pu--ka no ʻ u
We--he oukou,
Baso Wehe oukou, wehe oukou
Ke piipii ae la no au.
2
Iesu ke Lii, ku a kii mai,
Kii oli mai la ia ʻ u;
Kii a kai ae mai na ino nei
I kau kauwa i kou noho la@
Ma kahi nani e.
Cho.--Wehe oukou &c.
3
Oukou na hoa aloha e,
Ku ae a hele mai,
Kokua no i kuu pae ma o,
A e ae mai i kuu launa pu
Me ke Lii, me Iesu.
Cho.--Wehe oukou, &c.
Hawaii.
HAAWINA KULA SABATI
HELU 11 SABATI, SEPT. 9, 1877.
KUMU HANA.--Paulo ma Epeso.
PAUKU BAIBALA--Oih. 19:1-12
I ka wa a Apolo i noho ai ma Korineto, kaahele o Paulo i na aina mauka, a hele aku la i Epeso ; a loaa ia ia kekahi mau haumana
2 I mai la ia lakou, Ua loaa anei ia oukou ka Uhane Hemolele i ko oukou manaoio ana? I aku la lakou ia ia, Aole makou i lohe no ka Uhane Hemolele.
3 I mai la kela ia lakou, I ke aha la oukou i bapetizoia ʻ i? I aku la hoi lakou ia ia, I ka bapetizo a Ioane.
4 I mai la o Paulo, Bapetizo mai la o Ioane i ka bapetizo ana o ka mihi, i ka i ana mai i kanaka, e manaoio aku lakou i ka mea e hiki mai ana mahope on a, o ka Mesia no ia o Iesu no.
5 A lohe lakou, bapetizoia iho la lakou ma ka inoa o ka Haku, o Iesu
6 A kau aku la o Paulo i na lima maluna iho o lakou, hiki mai la ka Uhane Hemolele maluna o lakou; a olelo ae la lakou ma ka olelo e, a wanana mai la.
7 A oia mau kanaka a pau, he umikumamalua lakou.
8 Hele mai la ia iloko o ka halehalawai, olelo wiwo ole mai la, ekolu malama ana i hooakaka ai, a i hoohuli mai ma na mea o ke aupuni o ke Akua.
9 A paakiki kekahi poe, a hoomaloka no hoi, olelo ino no lakou i keia aoao imua i ke alo o kanaka; alaila haalele oia ia lakou a hookaawale iho la i na haumana, a hoakaka mai la ia i kela la i keia la, ma loko o ke kula o kahi Turano.
10 Ua hana mau ia keia mea i na makahiki elua; no ia mea, lohe ka poe a pau i noho ma Asia i ka olelo a ka Haku, a Iesu, o ka poe Indaio a me ka poe Helene.
11 Na ke Akua no i hana i na mea mana ano e , ma na lima o Paulo.
12 No ia mea, laweia ʻ ku la, mai kona kino aku, na hainaka a me na pale, no ka poe mai, a haalele iho la ka mai ia lakou, a puka aku la na uhane ino mailoko aku o lakou.
Pauku Gula. "No ka mea, aole ma ka olelo wale no i hiki aku ai ka makou euanalio io oukou la aka ma ka mana no hoi, a me ka Uhane Hemolele, a me ka hooiaio loa." 1 Tes 1:5
Hoopaa naau, p 1-6
Na mahele. 1 Ka bapetizo mua me ka bapetizo hope aua p 1-7
2 Ka hookaawale ana i kekahi poe no ke aoia p 8-10
3 Na hana mana i hana ia p 11-12
Mele. Mele hou, 8-7.
Bapetizo no Ioane,
Bapetizo i ka wai;
Bapetizo nae Iesu la
I ka Uhane mana e.
E ka Uhane Hemolele,
Bapetizo is makou
I ala ʻ e a hooikaika
No Iesu a mau loa no.
Pale i bapetizoia kakou a pau e ka Uhane Hemolele a hana ikaika no Iesu, &c.
Na Ninau a na Kumu.
Ia Paulo e noho ana ma Korineto, ua hopuia oia e na Indaio a alakai ia imua o Galio, ke kiaaina e hookolokoloia. Aka, ma kona noonoo ana, aole kupono ke kumu hoopii i kona aha hookolokolo, nolaila hookuu aku oia ia ia Mahope iho, lawe Paulo ia Akula me Perisekila a holo i Suria. Mailaila aku a Epeso. Halawai oia malaila me na Indaio A noi lakou ia ia e noho loihi me lakou. Aole nae oia i ai e noho ia w@. Holo oia mai Epeso aku a hiki i Kaisareia e pili ana i ke Kaiwaenahonua. Mailaila aku oia i pii aku ai i Ierusalema. Aloha oia i ka ekalesia malaila, a hele aku i Anetioka ma Suria. Mailaila aku oia i kaahele ai a pau Galatia, me Perugia ma Asia uuku, e hooikaika ana i na haumana a pau. Ua haalele Paulo ia Akula me Perisekila ma Epeso. Loaa ia laua kekahi Indaio malaila, o Apolo kona inoa, he kanaka ikaika i na palapala hemolele He haumana oia na Ioano Bapetizo. A ua ike oia i kekahi mau mea e pili ana i ka Mesia Ua hemahema nae oia ma kekahi mau mea. Na Akula ma no nae i hoopau ia hemahema. A mahope iho hoohuli nui oia i na Indaio e hoomaopopo loa ana, o Iesu no ka Mesia, a lilo oia i lunahaiolelo akamai a ikaika loa. Mok. 18:12-23.
Mok. 19 P 1-7. Ka bapetizo mua, me ka bapetizo hope. Ia Apolo ma Korineto Ua hele Apolo mai Epeso aku a i Korineto ma Akaia mok. 18:27. Ia Apolo ma Korineto, ua kaahele Paulo i na aina mauka, ma Galatia, ma Perusia, a hiki hou oia i Epeso e like me kanaolelo, mok. 18:21 Epeso, he kulanakauhale kaulana ia ma Ionia ma ka aoao komohana o Asia uuku. Kaulana ia no ka heiau nui o Diana, ko lakou akua nui Oia heiau kekahi o na mea kamahao ehiku o ke ao nei, 220 ma kahiki ka loihi o ke kukulu ana a paa maikai. He mau haumana he 12 ka i loaa ia Paulo ma Epeso, heaha kaua i ninau aku ai ia lakou? Heaha hoi ko lakou pane a@a? Heaha ko lakou bapetizo mua? Heaha ka bapetizo hope? Heaha ka i loaa ia lakou ma keia bapetizo hope ana? Ka bapetizo aha ka i loaa ia oukou? Hai mai Mat. 3:6-11. Ioane 3:5. Pil 4:19.
P 8-10. Ka hookaawale ana i kekahi poe no ke ao ia. Ehia malama i ao ai Paulo iloko o ka hale halawai? Pehea hoi kana ao ana? A i ka hoopaakiki ana ka hoomaloka ana, ka olelo ino ana o kekahi poe no ka aoao o Iesu. heaha ka Paulo i han ʻ i no ka poe i manaoio? He Iudaio o Turano, he kumu akamai, a ua oluolu oia ia Paulo, a ae e haiolelo oia ma kekahi keena o kona hale kula. Pehea ka loihi o ka Paulo ao ana malaila? Nui anei ka poe lohe a manaoio? Noloko mai oia poe ua loaa anei he ekalesia? A he ekalesia anei ma Galatia? Ma ke aha i maopopo ai? Haimai i kela hookaawale ma 2 Kor. 6:17.
P 11-12. Na hana mana i hanaia. He mau hana mana, nawai i hana? ma ka lima owai? Heaha ka hana a ua kanaka? Pehea hoi na mai, na uhano ino? Hai mai Mok. 5:15. 10. 14:12.
Mele. Mele hou, 8-7. Leo Beutley.
1
Hooikaika, e na kahu,
Me na kumukula pu,
I ke ao i na haumana,
Ao, paipai, hoohuli no.
2
Noi aku i ka Uhane
E kokua mai a mau,
I ala ʻ e a huli nui,
A hoopili ia Iesu.
Na ninau a ke Kahu.
Na makua. Owai na hoa kokua elua a Paulo i waiho ai ma Epeso, a hoomau oia i kona kaahele ana? Owai ka haumana i loaa ia Akula ma ma Epeso, a lawe laua ia ia a ao lea ʻ ku no ko Iesu aoao, a lilo oia i lunahaiolelo akamai a ikaika loa mahope? Heaha Epeso? aia mahea? Kaulana oia no keaha? Ehia makahiki ke kukulu ana a paa maikai? He poe haumana i loaa ia Paulo ma Epeso ka i bapetizoia ma keaha? Ma keaha i bapetizo ia ʻ i lakou mahope? Ehia lakou?
Na keiki. Ehia haumanaa mua a Iesu? Ehia makahiki i kukulu ia ʻ i ka luakini o Solomona a paa? Ka luakini hea ka i kukuluia iloko o na mak. 46? Ehia mak a paa ka luakini o Diana? Owai ka haumana ikaika i ka huli me ke ao i na palapala hemolele? Ua like pu anei oukou me Apolo? Hai paanaau mai. 2 Kor. 6:17, 18. lo. 5:39.
Ke kula a pau. Owai ke kiaaina i kipaku aku i ka poe i hoopii ino aku ia Paulo? Heaha ke kumu o ka hahauia o Soretene? Ua lilo anei oia i haumana na Iesu mahope? Heaha ke ano o kela pane, aole makou i lohe no ka Uhane Hemolele? Mahea ka liko ole o ko Ioane bapetizo ana me ko Paulo bapetizo ana? Heaha ka bapetizo e ola ʻ i? He kila Sabati anei ka Paulo ma ka hele kula o Turano? He kula la paha? Ma keaha e hoohalike ai kakou me Paulo, me Apolo, me Akula ma?
Hai like mai i ka pauki gula, me na mahele ekolu.
Mele. Mele hou, 8-6. Leo.
1
E na pokii, hoolohe e,
E hele mau mai no;
E ao, hoopaa, a himeni,
E pau ka naaupo.
2
Aloha i na hoa e,
E kii apaipai ae
E komo i ke kula nei,
I lohe a ola ʻ e
Pule i ikaika na kumu me na haumana i ke ao i ka ke Akua olelo.
Haawina no Sept. 16. Oih 19:17-28.
Huakai Pokole ia Kauai.
[ Koena mai kela pule mai. ]
Ka Hoomakaukau aloha ana. Ia makou e ku nei ma kahaone me na kamaaina o ka aina, e nana ana no ka pae mai o na waapa o ka moku, aia hoi, ke awiwi mai nei na kamaaina o ko maua home i kipa malihini aku ai, me ke kahu o na uhane malaila, e hoomakaukau no ko maua paina ahiahi, me ke ano mau o ko Hawaii nei noho a hookipa malihini ana.
Ka pae ana mai o na waapa. Pae mai la na waapa me kahaone me na ohua, ka eke leta, a me na ukane. Awiwi ae la na kamaaina mea malihini e apo aloha aku i na malihini, a e hookipa mai ia lakou. O ka ukana, a na kanaka, hooleleia mai la ma kahaone, a o ko ka Hoi, hookauia ae la maluna o ke k@o i hekau kokeia ma ke awa pae.
Ko Hanalei Hale Leta.
O ka eke leta keia mailuna mai o ka moku, wehe kokeia ae la ma kahaone, a hele mai kela a me keia e hopu a e nana i kana leta elike me ka makem. Aohe malu iki o ka eke leta, no ka mea, aohe hale kahi e wehe ai a aole no i hookaawaleia kela a me keia kanaka mai ka waha aku o ka eke leta. I ka nana aku, ua hana mau ia paha ka eke leta o Hanalei ma keia ano, ka wehe wale ia ma kahi kupono ole. Ina pela, akahi no a maopopo ia ʻ u ke kumu o ka nalowale o na nupepa i hoounaia malaila, a e hoohalahala pinepine mai ana kekahi poe lawe pepa. Ke kahea nei au i ko ka Luna Leta manao, e ui a e ninau he hana pono anei keia no kahi e ano pii ae ana ke kulana ma ka holomua, ka weheia o ka eke leta ma kahi maluhia ole?
Ka Po Hookahi ma Hanalei.
Lawe aku la o Malio i ka la, a ke naholo mai la na eheu o ka poeleele maluna o Hanalei. Hoi aku la au a me na kupakako o Kilauea a hiki i kauhale, e uwahi mai ana ka imu a kamaaina o ka hale, e liuliu ana no ko makou pono ola kino. Kali makou me ka nanea ma ka hale, me na puka e hamama ana, a e komo mai ana ke ea oluolu mai ka liko waokele mai o na kakai kuahiwi uliuli e puai mai ana i keia awawa. Aole i emo kuku ana ka mea ai i ke pakaukau. He hoike ana keia he malihini i alohaia.
Ua hoohalaia ka po o ka Poaha maanei, a maloko hoi o ka Hale o Lota, me ka oluolu a me ka hiolani lealea a@a. No ka oluolu o ke ea a me ka maluhiluhi o na lala o ke kino, ua waiho oni ole ae ka nui oia mau lala no ka po a ao.
Ka haule ana i Hanalei.
Ua haiia mai i ke kupakako i ke ahiahi Poaha, i ka hora 8 o ke kakahiaka e haalele ai ke Kilauea i ke awa o Hanalei, a holo aku ma na pali ae, no Waimea. Nolaila, nanea makou i ke ala ana ae i ke kakahiaka Poalima me ka manao i ka hora 8 e holo ai. Eia ka auanei, e holo e ana no i ka hora 7, he hookahi hora mamua ae o ka manawa i hai mua ia mai ai. Ua kani mai no na oeoe ekolu, aka manao loa hoi i ka lohe mua i ka hora 8 e holo ai. I ke kani ana nae o ke oeoe hope, awiwi aku la makou e hiki i kahaone, aia hoi, ua hala e aku ia ka waapa hookahi a ka moku i hoouna mai ai, me ka haalele iho i kahaone o Hanalei i na kupakako elua o ka mokuahi, he elua mau ohua kanaka a me ka mea nona keia pulima e kakau nei. Ku kakali iho la makou me ka manao e kii hou ia mai ana, aka, aole nae pela ka manao o ke al@imoku kiekie. Hiu ae la ia i ka heleuma, huki ae la i kana bele, kokope ka huila a pupuhi aku la ka ahai O makou noi, k@ iho la me ka n@@e nui a me na kahaha, aka owau, he keu aku ko ʻ u nauki i mua o na mea a pau, no ka mea, ua makemake loa au e ike ae i na pali ahiki i Waimea, alaila la, lele iuka a holo ma ka aina ahiki i Koloa, no ka mea, ua makemake au e puni ia ʻ u, a o ka mua hoi ia o ka ʻ u huakai ia mokupuni. O ua moku nei nae, holo wale aku la no ia a ku iki i Waimea, a ku palaualelo iho la no i Koloa a ao ka po Poalima.
Ka Huli Hoi ana i Nawiliwili.
Hoi aku la makou i kauhale, hoomaha iho la, a ma ka hora 1 a me 30 minute auina la oia Poalima no, Augate 10, haalele aku la makou i ka home nana i hookipa ia makou me ka maikai, kau maluna o na lio a o Nawiliwili ka ihu.
Ike ana i ka moi.
Hiki makou i Kapaa i ka hora 5 a me ka hapa, 22 mile mai Hanalei mai. Lele iho la au a me ke Kupakako alua mai ko maua mau lio iho, a hele aku la e ike i ka alii ka moi. E noho ana oia maloko o kekahi lanai hou me na aialo he nui e poai ana. He maikai kona ola kino, a o kona moiwahine, aia oia ma Wailua kahi i noho ai. O ka hoi ana mai no ia o ka moi mai ka noho luna kino ana no ka Ahahui Kawaihau, ka poe hoi e noho hana nei malalo on a. I ka ike aku, he mau hiohiona hana kona, a ke manao nei au, ua hopu oia i kela olelo a kekahi moi kaulana o Perusia, nana i puana ae, "O ka hana paa i ka oo palau ke ala e hiki aku ai i ke kaulana" He wa pokole loa ke kamailio ana, a awiwi aku la na malihini e hiki i Nawiliwili. Hiki nae i Wailua, ma ka aoao ma Nawiliwili o ka muliwai, komo ma ka hale inuki o Kapalehua, a hoomaha malaila.
Mai Wailua aku, hoi polo ei makou me ka hele malie a@a ahiki i Nawiliwili ika hora *:45 ma ka Hale o Kahele, kekahi o na kanaka hookipa a heahea malihini nui wale a ʻ u i ike maka ai. Moe me ka pumehana malaila ia po, a i ka hora 5:30, o ke kakahiaka nui Poaono, oiai no e hiolani ana ko ʻ u mau hoahele ma ko laua moe, no ka maluhiluhi paha oia hele ana mai.
Haalele iho la au ia Nawiliwili no Koloa.
Hora 6 a me 40 minuke, hiki kino aku la au i Koloa no ka manawa mua loa, iloko o hookahi hora a me 10 minute wale no, ka loa: he 10 mile; kipa ma na Hale ʻ o Rev. J. H. Mahoe a me Puniwai, kahi a ʻ u i wehe ai i ka noho ana paa o ko ʻ u po i moe ai ma Nawiliwili, Makaikai uuku, a i ka hora 10 a oi ae, huli hoi hou no Nawiliwili, kahi o makou me ka lehulehu i hiki aku ai iloko o elua hora.
No Nawiliwili a me kona aluka kanaka.
O ke awe hope keia a ke Kilauea e haalele ai ia Kauai, a nolaila, ua hele mai la na kanaka puni makaikai o na kama like ole a me na ohua no hoi e makemake ana e kau a holo aku no Honolulu, mai Hanalei Anahola, Kapaa, Koloa a me Waimea mai. Ua piha pono a ohuohu ua wahi awa nei o Nawiliwili i na hora auina la o ka Poaono
Ia makou i hiki mai ai mai Koloa mai, e haiamu ana kekahi anaina kanaka mawaho o kekahi hale kuai lole pake, a e kuai kudalaia ana na lole mumuku e Mr. Kaio i okioki mua ia e like me ka lawa. He hana mau ka keia a ka pake nona ka hale kuai, o ke kuai kudala mau i na lole i kala a ke Kilauea e ku ai a hoi mai no Honolulu. Ua akamai no keia noonoo ana i ka lehulehu e mumulu ana ma keia hale kuai, aia hoi, hoohoia ana, e i ae ka waapa o
Na Alii n@ Moi
I alawa aku kuu hana, e hooiho mai aua ka waapa, ua poho pono ka pea i ka makani, a na ke Alii ka Moi e hookele paka ana, oiai no hoi, ua ike ua makaainana a pau, he kawa ia nana i lele mua a maa o ka hookele waapa. I ka pae ana ae i ka hone, ua miki ae la ka Lunakanawai Maioho a me ke kamaaina, apo aloha mai la i na Moi, a hookipa aku la ma ka hale o William Lovell, kahi a laua i hooluana ai ahiki wale i na hora liu@a paha o ia Poaono.
Kuke-pai, Nawiliwili.
I ka hora 3, auina la hoolale mai la ke Kapena o ke Kilauea i ka hana o ka huki i ke oeoe, e kahea mai ana, e luelue a e hoi aku na ohua, oiai hoi, ua hoolaha e ia aela o ka hora 4 ka wa e haalele ai. He hapalua hora mahope iho, alaila, na kani hou ka lua o ka oeoe, a hoi aku la makou. Aka no ka nui loa o na ohua o m a a me hope e aloia aua, nolaila, ua panee ka wa holo a hiki i ka hora 4 a me 30 minute, oia hoi ka wa a ke Kilauea i hu ae ai i kona heleuma, hookani ae la i kona oe oe akolu, a haawi aku la i kona aloha hope loa i ka mokupuni o Kauai, no ka mea in a aole au e kuhihewa, o kaua huakai hope no ia i "ka moku kaili la."
O Honolulu ka ihu.
Kupaka ae la ka huila, hukiia ae la na pea, a hookele aku la ko makou ihu i Honolulu, ke awa hoi a makou i ku aku ai i ka hora 9 a me 45 minute o ke kakahiaka Sabati Augate 12, mahope o ka hala ana o ka po holookoa ma ka moana a me kekahi mau hora o ke ao.
Ke Kilauea kaulana.
O ka nui o na ohua o keia huakai a Kilauea, 46 o hope a he 172 o mua, aole i heluia na aliimoku a me na kanaka. Nolaila, ma keia e ikeia ai aole i pau ko Kilauea makemakeia e na kanaka a pau o na ano waihooluu like ole e noho ana ma keia pae moku. Aka me ka minamina au i lohe mai ai, e kanu aku aoa kakou i keia inoa kaulana, a e hoopoina ana paha, aka iloko o na makahiki he umikumamahiku o kona holoholo ana ma keia mau kai, oia ka inoa paanaau hookahi mai na kamalii akahi a loaa ka olelo a i na malihini loaa ole o ka olelo kanaka i makaikai mai i keia mau mokupuni. Aloha! Aloha ino ka inoa Kilauea!
Ka Panina.
Pela iho la i pau ai keia wahi huakai pokole ia Kauai i hele ia ma ke kai a ma ka aina, mai ka @iha i kai loa, ka ikiiki o ka la, na nanaina oluolu a i k@ auau ana i kona mau muliwai. Mai ka hora 5:30 ahiahi o ka Poakolu, Augate 8 a i ka hora 10 kakahiaka o ka la Sabati, Augate 12, ua pau na mie he 186 me ke k@i a me na mile he 80 ma ka aina i ka heleia. Ina pa ha he hele me kamaaina loa la ua kuhikuhiia mai na wahi pana, aka he hele malihini nolaila ua nele i keia mau ike ole.
I ka hookuu ana aku e hoopau i keia wahi moolelo pokole o ka ʻ u huakai malihini kamaaina ole, ke haawi nenei au i na mahalo a me na hoomaikai palena ole maluna o ka Lunakanawai Maioho, na kamaaina o ka home heahea o W. Lovell, Kahele, Lota o ka ua lokuloku, Puniwai o Koloa a me ka poe no a pau i pahola mai i ko lakou mau hookipa ana i ka malihini nei.
Ulumaialii
Hale Pai Kii O Ahi.
EMI LOA NA KII!
Ma ka Hale Pai Kii o Ahi, Helu 63, Alanui Nuuanu, Honolulu. O ka uku o ke kakioi Kii Pepa mamua, he $3.00, a i keia manawa, ua hoemiia i $2.50. O ka uku o ke kii Aniani. He $4.00 mamua, ua hoemi loa ia a i ka $2.00 wale no. Emi loa maoli a makepono! Aole like pu mamua. E wiki mai oukou, oiai ka manawa kupono a ka lia e upu nei. I keia manawa, hanaia na kii m@ kai loa!
Hale Kamana Nui!
Aia no maloko o keia Hale maluna ae, a ma ka Helu 69, Alanui noho, na pakaukau, na pahu ume me na aniani ku, na mamalu a me ia mea aku ia mea aku. E loaa no na pahu pa@@na a me na pahu koa ma ke kumukuai oluolu a makepono loa, i ike ole ia mamua.
Hale Kumeka Kamaa!
MALALO o ka Hale Pai Kii, na hoana okoaia he keena humuhumu kamaa o keia a me kela ano a ka makemake e hiala@i ai. E kipa mai a e ike oukou "I ka nani o Aipo." Malaila no e loaa ai na Pale Ili Noho Lio, no ke kumukuai haahaa a ka launa ole mai. E kipa mai a e kuai no oukou iho.
Hale Hana Kika Puhi!
Ma ke Keena makai o ka Hale Kamana. Helu @, Alanui Nuuanu, he wahi e hana pakala nei na lau paka. I mau kika puhi maikai loa. He mau paka kika maikai, i kupono i ko na kanaka makemake, he on a hoi ke puhi. E hele mai oukou e kuai i ike maka. E hoohihi ana oukou. (806 6m 331) AHI.
ANOAI I KA LEHULEHU
E kipa mai ae nana, i kumaka ai ka ike i na waiwai nani i loaa mai nei iloko o na La Kulaia iho nei.
Penei ke ano o na mau waiwai la:
Na Wati a me na Kaula Gula,
a na Lede a me na Keonimana!
NA KAULA OPELE A NA LELE
NA KOMO GULA NANI O KELA A ME KEIA
ano o na Lede a me na Keonimaua!
NA KUPEE GULA. NA LIPINE GULA
Na gula pepeiao o na wahine!
e oaka ai i na pepeiao, a e hulali ai hoi na mauamena lima, a e kilipohe ai hoi na a-i.
Na komo humuhumu gula a me ke kala,
Na pihi pulima gula wahine a kane,
Na laketa gula lei wahine nani,
Na komo daimana o na Lede.
NA kaula laketa,
Na pine omau kihei,
Na laketa aniani,
Na buke gula wahine.
NA LAKO HALE.
NA PUNA, NA PAHI, NA KIAHA, KALA, NA APO KALA
NA KAWELE holoi lima, NA O DALA o kela a me keia ano, a me na mea nani e ae no he nui wale.
E kuaiia aku ana no ma ke kumukuai haahaa loa i ko na wahi e ae o ke taona nei.
UA MAKAUKAU NO HOINA mea nani no kanaka makua a me na kamalii.
Na Kamaa Paa Loa, e loaa no maanei e like me ka makemake; a in a e loaa koke ka ino, he hiki no ke hoihoi mai
M. McINERNY.
Kihi o na Alanui Papu a me Kalepa. 814 3m 326
Lole Make pono ke Kuike!
E LOAA NO IA MA KAHI O KAKELA ME KUKE, E LAA NA
AHINAHINA, KALAKOA, KEOKEO, LEPONALO
Pena, Aila, Aniani, Na Mea Piula, Kopa, Aila Honua, Aila Hoomaloo
Kui Kakia, Pakeke, Tabu, Kaula, Noho lio, Hulu-nalaki, na Pulumi.
A he Agena no hoi no na Mokupuni o Hawaii nei no na
LAINAKINI-NAO,
LAINAKINI-MAOLI, PALULE KALAKOA, ALAPIA, KELEPA, KILISA,
Na Lole kupono i ka wawae,
Palule Huluhulu, Na Lole Huluhulu, Na Lole no ka hoohehelo ana
Lipine, lihilihi, a me ia mea ʻ ku
A HE
MAU MEA AI KAHI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina &c.
A HE
LAAU LAPAAU KAULANA LOA
a Dr. Jaynes.
Laau Kunu,
Laau Hoomaemae koko,
Laau hoopau naio,
Penikila, Huaale,
A me na Laau Hamo, a pela ʻ ku
814 3m 826
E.T. Halolani.
Loio!
Eia he $20,000 e makemake ana e hoaie aku ma ka ukupanee haahaa loa mai ka $200 aku a pii ae ma ka moraki ana i na aina, ua hoomakaukau e ao oia i na palapala aelike, hoolimalima, moraki a me na hooilina, a he hiki iaia ke hoomaikai i na aina loaa ole na Palapala Sila Nui.
Hale Oihana, aia ma ka "Real Estate Exchange" Helu 31, Alanui Papu, Honolulu, malaila oia e loaa ai i na kanaka a pau, in a he mau ai ka kuai a hoolimalima ko lakou, a e hoopauia me na uku ole
815 6m
Papa! Papa!
no
Allen a me Robinson
Ua wehe ae nei maua i
PA KUAI PAPA!
ma ka
UWAPO o PAKAKA.
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo
Na Pepa Hoonani Hale.
Na Pepa Molina.
Na Pena a me na Aila Pena!
NA KUI O NA ANO A PAU!
Na Pani Puka a me
Na Pani Puka Aniani.
Na Pani Puka a me
Na Olepelepe
.
Na Lako kukulu Hale
--O NA ANO A PAU--
E kuaiia ma ke kumukuai haahaa loa!
o keia makeke.
Allen & Robinson
Honolulu Aper 13, 1876. S14 3rd 268
Mai keia la a mahope aku nei, o ka uku o ka ohua oneki o NETI MERRIL,
E.D Crane (Kapena)
Mar. 16, 1877
Eia ma ka Hale Kuai o Wini!
Na ea, na omau ai, na kula pepeiao, na omau hao bukalo, na mea ano hou a emi, Buke Pakeke Ili a me na Eke Dala. Na lei pilali, na lei eleele, a me na mea e ae he nui wale. E haawi makana ia mua i kela a me keia mea i kuai a hiki i ka elua dala. E hele mai, e nana i kela mau mea maikai, a e loaa no e like me ka makemake.
Eia ma ka hale Kuai o WINI. 756 2m
HALE KUAI MANUAHI!
NO KONA, NO PUNA, NO KOOLAU, NO NAPALI, NO MANA!
Eia ma Koloa nei ka mea Hou ano e kupaianaha, a e nane nui mai oukou e na mamo a MANOKALANIPO!
a e ike i na mea maikai o kela a me keia ano, ma ka HALEKUAI O PENI!
Ua makaukau ola e kuai aku i Na Lole o ua ano a pau, na papa o na ano a pau, na Lako kukulu hale, na mea mahiai, na mea ai, mai ua aina e mai a me na mea a pau i makemakeia e ke kane, ka wahine a me ke keiki. Ke loaa mau mai nei kela mau mea ma keia moku kela moku a no ka mea, ua hoopaeia mai ma Honolulu.
He au hou o ke Kuikahi!
No laila, e hiki ia ʻ u ke haawi i keia mau pono ia oukou, ma ka kumukuai haahaa loa, i ike ole ia mamua aku nei.
E lulumi mai a hoao!
FRANK BINDT
Koloa, Kauai, Aperila 14, 1877.
Kuai Haahaa Loa!
E KUAIIA aku no ma ke kumukuai haahaa, ma ka Hale Kuai o H. M. WINI.
Na Kula Pepeiao Ea a me na Kula kanikau, a me na kula e ae o kela a me keia ano
Na Lei Kaaikau a@ hoi a me na Lei e @@ no e linohau ai o na Lede opiopio, e kinikohu ai ke nana aku i ke kau mai @una. Na apo lima ka@ikau a me na mea e ae a pau no ke kumukuai haahaa loa. E wiki mai! 816
NO KA HOOLIMALIMA.
HE PA HALE, he Eka a oi ae ka nui o ka aina, a he wahi hale uuku e ku ana maluna o ua aina la, aia ma ALEKOKI. Nuuanu. he mau anana maluna aku o ka Luawai, e hoolimalimaia ana no ka manawa, aole e oi aku mamua o Elima Makahiki. He hookahi hapa o keia a@@@ he kupono no ke kanu kalo, a o ke koena no ka manu.
E ninau ia (816 41 819) S B DOLE.
E ike auanei na kanaka a pau, o makou o na mea nona na inoa malalo nei, ua hoolimalimaia e makou ka Pa A@@@ o JOSEPH MORRIS a me na mea a pau e waiho la ma Kapalama, ke papala aku nei na mea a pau a me ko lakou mau holoholona, aole e hele wale maluna o ua aina la i laila ae la maluna. O ka mea kue i keia, e hoopili@ ma ke kanawai.
ANTONI JOSEPH
FRANKK ANTONI,
JOHN D. KONIA.
814 41@ 819