Ka Nupepa Kuokoa, Volume XVI, Number 47, 24 November 1877 — Page 2
| This text was transcribed by: | Kawena Komeiji |
| This work is dedicated to: | Hawai'inuiakea School of Hawaiian Knowledge |
KA NUPEPA KUOKOA, ME KE AU OKOA I HUI IA.
MA KE KAUOHA.
O KA Poalima la 15 o Novemaba, oia ka la hanau o ke Alii ka Moi. e malama ia i la kulaia Aupuni e paniia na ipuka o na Hale Oihana Aupuni a puni ka aina.
J. MOTT SMITH Kuhina Kalaiaina.
Keena Kalaiaina. Nov. 2, 1877. 602 1t
Hoolaha - O ka poe a pau i ku i ka Auhau, aole i hoolaweia mai ko lakou waiwai a ke kanawai i ke ai, e loaa no ia lakou ka hoopololeiia ma keia keena, a hiki i ka la 1 o Dekemaba ae nei. J. O. CARTER, Luna Malama Buke
Keena Waiwai, Novemaba 5, 1877. 882
Ua hookohoia o Mr. D.S. Kahookano i keia la i Luna haawi Palapala Ae Mare no ka Apana o Kohala Akau Hawaii. J. MOTT SMITH, Kuhina Kalaiaina.
Keena Kalaiaina, Novemaba 5, 1877. 832 218
Ma ka Poaono, la 29 o Dekemaba 1877, i ka hora 12 auina la, e koalia aku ana ma ke kudala, ma ke ala komo o ka aoao mauka o Aliiolani Hale. Eono @, Loi. e waiho ia ma Auaukai, Waikiki: a penei ka nui o na eka o keia a me kela @@@@10@ eka, @@@@@ eka, 103-1000 eka, 124-1000 eka, 65-1000 eka, 75-1000 eka.
O ke kii a me ka Palapala Anaaina o na aina i oleloia maluna, e ike ia no ma ke Keena Kalaiaina.
J. MOTT SMITH, Kuhina Kalaiaina.
Keena Kalaiaina. Novemaba 8, 1877 872 3t
Keena Waiwai. Honolulu, Nov. 5, 1877.
Hoolaha - O na mea a pau e makemake ana e maopopo pono ia lakou na auhau o na waiwai i auhauia maluna o ka hoopuka ana o ka Ahakiekie i ka olelo hooholo, a loaa no ia lakou na hoomanaoio ana mai na Luna Helu mai aka ina ua pau e ka hana a ka Luna Helu, e ninau i keia keena. O na hoopii a pau mai ka auhau ana mai a ka Luna Helu maluna o na waiwai. e hoike maopopoia lakou. J O CARTER. Malama Buke Nui o ke Aupuni.
Ua hookohuia na kanaka malalo iho i mau Lala no na Papa Hoopii Auhau o ka 1877:
OAHU.
Honolulu..... E P Adams, A S Cleghorn.
Ewa and Waianae.....H U Mahi. Kaanaana.
Waialua.....S F Anderson, N Kalaikawaha and P Kuhalehili.
Koolauloa.....Wahinemaikai, J Naili
Koolaupoko.....Edwards, P Kahuhu.
MAUI.
Lahaina.....T C Forsyth, A Pali
Wailuku.....W F Mossman, J Haole.
Makawao.....F L Cara, M Kapihe.
Hana.....M Kahunaalole, Sam'l Kaai.
Molokai.....J Kaom* J Kekuhi.
Lanai.....J Nailikipi, Apaki.
HAWAII.
Hilo.....J P Simon, E Richardson
Puna.....S H Kaaihili, Kapahu.
Kau.....C N Spencer, J Kauhane
S Kona.....H Cooper, S Kekumano
N Kona.....H N Kahulu, H Greenwell
S. Kohala.....G C Williams, Z Paakiki
N. Kohala.....J Wood. D K Nalapaakai.
Hamakua.....J K Kaunamano, R P Kuikahi,
KAUAI.
Koloa.....G T Shipley, A K Mika
Waimea.....P R Hoil, G B Rowell,
Lihue.....S Kulu, G W Wilcox
Hanalei....A Kananonni, R Puiki
Anahola.....Kalaanne, Kaaka
Niihau.....Keale, Kimo.
J.M. KAPENA, Kuhina Waiwai.
Keena Waiwai, Novemaba 6, 1877. 832 1m
HALEHOOKOLOKOLO. HONOLULU. - Ua hookohu aku na Lunakanawai o ka Aha Kiekie i keia la, ia Antone Rosa, i Kakauolelo Kokua no ka Aha Kiekie. Kakauia i keia la 25 o Okatoba, A D 1877. Ma ke Kauoha a ka Aha.
841 4ts JNo. E. BARNARD. Kakauolelo Nui.
AHA KIEKIE. - Kau o Okatoba, A D 1877. - Ke hoika ia'ku nei ka lohe i na mea a pau, a o G B Kamaukane, he Lolo o na Aha o keia Aupuni, ua holoia kona inoa mai ka Papa Inoa aku o ka poe e lawelawe ana i ka oihana loio o keia mau Aha, no kona imi loaa ma ke ano hoopunipuni. Ma ke Kauoha a ka Aha. JNO. E. BARNARD.
Honolulu, Oct. 27, 1877. 831 3ts Kakauolelo
KE hoike ia'ku nei ka lohe i na mea a pau, o na poe malalo iho nei, he mau ohua lakou no ke Kuhina Noho o Amerika Huipuia, e like me ka mea i hoikeia mai i keia Keena e ka His Ex. James M Comley, ke Kuhina Noho o Amerika Huipuia.
Mrs. Mary McKay, he Amerika
George A. Carter, he Amerika
Paulo, he Hawaii
Ah Chew, Honokaona, Kina
J MOTT SMITH, Kuhina Kuikawa o ko na Aina e.
Keena o ko na aina e, Honolulu, Oct. 19, 1877. 830 3ts
O NA Palapala Kuai, Hoolilo a hoolimalima, e paiia lakou i ka Hoailona Pai mamua o ka lawe ana mai i ke Keena Hooiaio Kope, no ka hoopaa ana ma ka buke.
THOMAS BROWN, Luna Hooiaio Kope.
Keena Hooaio Kope, Oct. 24, 1877.
Aponoia J MOTT SMITH, Kuhina Kalaiaina.
UA hookohuia o Mr. S W Wilcox e ka Papa Hoonaauao i Luna Kula no ka Apana o Koolau, mokupuni o Kauai.
W. JAS. SMITH, Kakauolelo
Keena Hoonaauao, Oct. 24, 1877. 830 3ts
UA hookohuia kela mau Keonimana malalo iho, i mau Luna Haawi Palapala Ae Mare, penei:
T. Seta, no Hanalei, Kauai.
David Alawa, no Kona Akau, Hawaii.
J MOTT SMITH, Kuhina Kalaiaina.
Keena Kalaiaina, Oct. 15, 1877. 829 3ts
Hoolaha.
O na Bona Aupuni Hawaii ma na puu dala he $100, $200, $500, $1,000 a me $3,000, e uku aku ke Aupuni he 7 keneta no ka makahiki, a e ukuia iloko o aole e emi malalo o umi makahiki, e hiki no ke loaa ma ka puu dala e kau palenaia ai, a hiki i ka wa e hoike hou ia'ku ai, ke noi mai i keia Keena. JOHN M. KAPENA, Kuhina Waiwai.
Keena Waiwai, Aug. 27, 1877. 828 tf
Hoolaha.
O na Kahu Malama Keiki, na Lunahooponopono Waiwai, na Lunahooko Kauoha a Kahu Malama Waiwai e ae paha e makemake ana e hoopukapuka, ke hoike ia'ku nei ka lohe ia lakou, e hoopukaia no na Bona Aupuni Hawaiik na puu dala he $100, $200, $500, $1,000 a $5,000 paha, ma ka ukupanee ma ka 6 keneta no ka makahiki, ke noi mai i keia Keena, a e kau palenaia no nae ka nui o ke dala e hoopuka'l. JOHN M. KAPENA. Kuina Waiwai.
Keena Waiwai, Aug. 27, 1877. 828 tf
HE HOOLOLI i manaoia no ka Pauku 20 o ke Kumukanawai i haawiia ma ka la 20 o Augate, M H 1864, e like me na olelo o ka Pauku 80 o ia Kumukanawai.
E hoololiia a ma keia ua hoololiia no ka Pauku 20, ma ke kapae ana i ka huaolelo "Ahakakau" mamua iho o na huaolelo, "iloko o ka Hale Ahaolelo," a penei e heluhelu ia ai ua Pauku la:
Pauku 20. E maheleia ka Mana Nui o ke Aupuni i ekolu Apana okoa, oia hoi ka Mana Hooko, ka Mana Kau Kanawai, ka Mana Hookolokolo.
E ku kaawale ia mau mahele ekolu; aole hoi e noho kekahi Lunakanawai iloko o ka Hale Ahaolelo.
Aponoia i keila la -o- MH 1876
HE HOOLOLI i manaoia no ka Pauku 6 o ke Kumukanawai i haawiia ma ka la 20 o Augate, M H 1864, e like me na olelo o ka Pauku 80 o ia Kumukanawai.
E hoololoia a ma keia ua hoololiia no ka Pauku 61 o ke Kumukanawai, a penei e heluheluia ai ua Pauku la:
Pauku 61. Aole no e kohoia kekahi i Lunamakaainana ina he pupule a he hupo paha, a ke ole ia he kanaka malalo o ka Moi, a ke hiki ole aku oia i na makahiki he iwakaluakumamakahi, a ke ike ole hoi i ka heluhelu a me ke kakaulima, a ke maopopo ole hoi iaia ka helu waiwai, a ke ole hoi oia i noho ma keia Aupuni i ekolu makahiki, mamua iho o kona kohoia ana; a ke ole hoi ona waiwai paa, a waiwai lewa paha i maopopo i hihia ole iloko o keia Aupuni e like me elima haneri dala.
Aponoia i ka la -o- M H 1876
KA BANAKO HOU - Ke pii ae nei ka uhau ia ana o ka Banako hou o Bihopa ma, iloko o ka lima o ka poe mikia'a hana, ke hoike mai nei oia i kona mau paia panio nihoniho pohaku i hana mikioi ia e ka poe hahau puna, a he kulana kilakila o ka nani kona ke nana ia'ku e na maka o ka lehulehu, oiai, ua hoike e mai no ia i kona mau hiona nani mamua ae o kona paa loa ana; a ke pau pono kona mau hemahema, oia kekahi o na hale pohaku nani ma ke kikowaena o keia kulanakauhale.
Olelo Hoolaha.
Ke paipaiia aku nei na Luna a me ka poe a pau e noho aie ana i ke "Kuokoa" e hookaa koke mai i ko lakou mau aie mamua ae o ka pau ana o keia makahiki 1877. A ina aole e hookaa ia mamua ae o ia manawa, alaila e waihoia no ka hana na ke Kanawai.
H.M. WINI,
Luna Hoopuka.
Ka Nupepa Kuokoa
ME
Ke Au Okoa
I HUIIA.
Published every Saturday, $2 a year
HONOLULU, NOVEMABA 24, 1877.
MAI KA LA 1 o Ianuari 1878 a mahope aku, e waiho ana au i ka noho Lunahooponopono ana o ka nupepa "Kuokoa." A keia pule ae, e pahola aku ai au i ko'u leo aloha hope loa i o'u mau tausani makamaka a me na hoaloha a pau i kokua mai ia'u ma ka hoolaha ana aku i keia nupepa iloko o na makahiki he umikumamalua a'u i noho iho ai ma ka noho ana hookele no ko kakou Kilohana Pookela. J.U. KAWAINUI,
Luna Hooponopono.
MA KA hoea ana mai o na kukuna la o ka Poalua iho nei, o ka wa ia a ka Hooilina Moi Liliuonamoku i niau aku ai ma kana huakai kaapuni i ka moku o Kakuihewa nei, me kona muli pokii Mrs. Miriama Cleghorn. Ma Makapuu aku nei kona hanau mua, a ma Nuuanu aku nei kona pokii me ke Kama Alii Victoria Kaiulani, a hui aku i Waimanalo; ua maikai ka la o ka huakai makaikai a ka Hooilina Moi ma Honolulu nei, a pehea la ma na pali Koolau o kakou? Ma ka lono hope loa i loaa ia makou, ua apo lokahi mai na makaainana a hookipa aku i ka Hooilina Moi ma na wahi a pau i kipa ai, a ua maikai ka la o kana huakai ma ia mau pali hauliuli. He ohaha maikai ke ola o ka Hooilina Moi a me ka poe a pau me kana huakai kaahele.
Hoomakaukau no ka hooilo maloko o Bulagaria
O ka ninau no ka hoomakaukau ana o na puali kaua Rusia no ke kau hooilo e hiki mai ana maloko o Bulegaria, ke hooiaio ia mai nei. Ua manao wale ia, o na hoolako ai ana no na koa a me na holoholona, ke hoahu ia nei maloko o Roumania a me Bulegaria, no ka hoolawa ana ia 300,000 kanaka a pau ke kau hooilo, a he 150,000 kanaka kupono no ka paa ana i ko lakou mau kulana no keia manawa, oiai na alahele ua kaawale no ka lawe ana mai i na puali koa a me na lako kaua, a o ke koena aku o na puali ua hoonoho ia aku ma kela kapa o ka muliwai Danube a hiki i ka haule lau. O ka ninau no kahi e loaa ai keia mau hoolako ana i ka puali kaua, he mea ano nui no ia.
Ua paa loa ka muliwai Danube i ka hau, aole e hiki i na mokuahi ke komo mai, aka, ua hoomaka ia ka aolo ana aku o na koa a me na lakou kaua maluna aku o ka muliwai, a ina aole i makaukau ka puali kaua lio nui no keia hooilo, a o kekahi hapa paha oia poe, alaila, o na lio o lakou a me ka puali pukaa a me na kaa lawe ukana e hoakokoa ia a hookahi manawa o ka lawe ana i loaa ai ke kokua ana aku i na puali koa hele wawae ma kela aoao. O ka nele i ka wahie oia ka pilikia nui i ike ia, a o na malumalu hale o lakou malalo o ka honua, he malumalu kupono wale no ia no na koa me na aahu koloka huluhulu mehana o lakou, aka, no ka hoomoa ana i ka lakou ai, ua nele i ka wahie, a oia ka mea nui i makemakeia; a ina ua hiki i na Rusia ke hoolawa ia lakou me ka wahie, ua hiki ia lakou ke noho maloko o Bulegaria no keia wa hooilo.
NA MANA HOOMALU O KE AO NEI.
Eia maluna o keia poepoe honua he aneane 120 mau mana aupuni, e noho hoomalu ia ana, he aneane he mau kane wale no, no ka mea, he ekolu no mau moiwahine e noho hoomalu nei maluna o kekahi mau lahui, oia ka Moiwahine Victoria I o Enelani, Ranavola II o Madekaseka a me Pomare o ka Pae Aina o Tahiti; aka, mailoko ae o keia mau mana hoomalu ekolu, he elua wale no e ola nei he mau Moiwahine, oiai, ua make aku kekahi o lakou; aka, he nui wale no na moiwahine e ae ma ka inoa a me na ano like, aka, o keia mau lede wale no ekolu na mana hoomalu oiaio o ke ao nei e noho hoomalu ana i kekahi mau lahui; a ma ka make ana o kekahi o lakou, oia ka Moiwahine Pomare, ua koe wale no he elua mau Moiwahine e ola nei, a e noho mana ana hoi maluna o kekahi mau tausani kanaka.
O ke Czar o Rusia, ke hoomalu nei oia maluna o 75,148,690 kanaka a oi. He huina nui hewahewa keia a keia kanaka hookahi e hoomalu nei, aka, aole keia i lihi launa aku ma ka papa hookaulike me ke aupuni o Kina, ka mea e hoomalu ana i kapaia ka Emepera o na puali o ka lani, nona ka huina he 415,000,000 kanaka.
O Kale III ke Keiki Alii o Makao, he 1,200 wale no na kanaka malalo o kona malu, oiai ke Keiki Alii Keoni II o Li@itenetini, he 7,150 wale no ka heluna kanaka malalo o kona malu, e kaukoo aku ana kona nanaina pili kaumaha i kona hoahanau ma na kapakai o ke Kaiwaenahonua.
Ka Repubalika.
O ka oi aku o na Repubalika, oia o Amerika Huipuia, ka mea nona ka heluna kanaka he 39,558,371. O kona ukali mai a kakou e olelo ae ai, oia ka Repubalika o Farani, ka mea nona ka heluna kanaka he 38,472,732; o Sepania hoi he 16,560,813. Ua kaena hoi o Mesiko no kona mau tausani kanaka 7,665,120; o Helevitia hoi no 2,390,116; Peru me 2,500,000 a me Colomabia 2,223,837, ka oi aku hoi o na repubalika e ae a pau o Amerika Hema, oiai hoi o Kili ke hoopulapula nei me 1,558,319.
No na Moi.
O Uilama I, Moi o Perusia, aia malalo ona, he 23,589,701; o Vitoa Emanuela o Italia me 23,120,000; ke Suletana o Toreke me 33,400,000; ka Moiwahine o Enelani me 29,307,199; a o ka Empera o Auseturia me 35,019,058; o ka Lama o Tibeta me 30,000,000, e kukuli hoomana ana iaia, ma ke ano he akua a he Moi, a ke ninau oe nona, e akahele oe no ke okiia o kou poo; pela pu hoi me Zung Che ka Moi o Korea me 11,000,000; ka Moi o Hawaii me 59,000; ka Imaum o Musakata, me 250,000, ka mea hoi i like me he wahi huna one la iloko o ka bakeke ke hoohalike aku me Tu Due, ka Moi o Anama, ke hoomalu nei oia maluna o 13,500,000 kanaka.
Na Moi ma na wahi e ae.
O ka oi aku o na inoa i kapaia ma ka papa o na lii, oia no ko ka Moi o Siama, ka mea i hoike i kona manao maikai ma ka lawe mau ana i ka nupepa Pou Ahiahi o Nu Ioka, a oia wale no ka mea ma keia ano, a ua lawa piha oia ma ke kapa ana iaia iho o ka Chau-fa Chula-Long Kora; ke hoomalu nei oia maluna o 3,620,000 poe kanaka Siamese e kahea nei iaia ma keia inoa. O ka Tenno o Iapana, ka mea nona ka inoa Montschito, ke hoomalu nei oia maluna o 35,000,000 kanaka. Ke kapaia nei nae ke Tenno e kakou i keia manawa he Mikado.
Ina hoi kakou e hoolaunaia aku me ke Suletana o Zanzibar, a manao e kaku aku iaia ma kona mau inoa ponoi, me ke ake e kamakamailio pu me ia ma ke kumuhana o ke kalepa kauwa kuapaa ana, e kakau aku kakou iaia me keia: Kou Hiwahiwa Haahaa Maluhia o ka Olelo Maikai. O ke Khau o Bokhara ua kapaia o Mozaffared-di, a ua kapa pu ia no hoi o Adahoonzou, he lua keia no ka inoa mua ona.
O ka inoa ponoi o ka Moi o Kina o T'oung Chi. Aole i kapaia keia T'oung Chi he Empera ma kona aina ponoi iho, aka, he Hoang Ti, he inoa hoi i hoopohihihi aku ia Haku Domerire. O keia mau Moi, he poe mahele ano e loa lakou, me he la o ke kumu, ua hiki ia Ali Kuli Khau ke kapa iaia iho o Taksir Khan. He oiaio, aole makou e hoopahaohao wale i ka manao o ko makou poe heluhelu mau, ma ka hoaiai ana o ke Taksir Khan oia no ke Khan o Khiva aka, e hoomoakaka lea malia o kuhihewa kekahi a hoomaopopo ole aia malalo o ke Taksir he 2,000,000 kanaka.
O Abdul Mumed, ke Sultana o Boroneo, eia malalo ona he 2,5000,000 poe pegana hana lapuwale; oiai hoi o Abdul Aziz, he poo kiekie oia no na Aha Hookolokolo o Tureke, a ua hiki iaia ke pana aku me kana kanaka 132,490,000 kane, wahine a me na keiki, ke manao ae oia e hana pela, aka, aole nae oia i hana iki pela; ina nae oia i hana, e koe iho ke koena o kona lahui he hapa uuku, na lakou e hoomanao iaia, me ka hooho ana ma ke ano o ko Tureke noho ana, "Bismillah! e hehi auanei na hoki maluna o ka luakupapau o kona kupunakane!"
O Milan oia ka inoa o kekahi kulanakauhale kaulana o Lombardy, aka, oia inoa hookahi ko ka Hospodar o Serevia, ka mea e hoomalu ana maluna o 985,000 kanaka. Aia pu no hoi he Hospodar ko Monetenegero, o Nikolosa I ma ka inoa, ke hoomalu nei oia he 130,000 kanaka malalo ona. Ka Imaum o Zemen, aia malalo o kana hoomalu ana he 2,500,000. Ka Emir o Moroko, ma Aigupita, he mana nui kona maluna o 8,000,000 kanaka ana e hoomalu nei.
Na inoa o na mana koikoi.
Ke lawe mai kakou a makaikai i ka papa inoa o na mana hoomalu o na aupuni o ke ao nei, e ike maopopo lea kakou me keia mau inoa hoohanohano malalo iho: Emepera, Czar, Moi, Moiwahine, Ka Mea Kiekie ka Duke, Duke, Keiki Alii, Shah, Khan, Imaum, Emir, Lama, Tenno, Suletana, Hospodar, Hoangti, Taksir-Khan, Khedeve a me ka Bey. A mai waena mai o keia mau inoa, he ekolu mau Kiaaina o na kulanakauhale lanakila ekolu o Lubeck, Bremen a me Hamebuga; a ua kapaia he Domau, Keiki Alii hoi o Roumania, i kapa hou ia i keia wa ke Keiki Alii Kale o ka hale o Hohenzollern; a oia hoi ke Kiaaina mua i hilinaiia e kona mau 10,000 kanaka malalo o kona hoomalu ana, a o ka puuhonua hoi o kahi Repubalika uuku o Andorre ma na pae mauna o Perene.
He elua mau Shah, ko Peresia a me Afekenikana; ekolu mau Kahn, ko Bakhara, Kaokau a me Khiva; ekolu mau Sultana ko Tureke, Boroneo a me Zanzibar; elua mau Imaum, ko Muscat a me Yemen; hookahi Khedive, ko Aigupita; hookahi Bey, ko Teripoli. He iwakalua Peresidena a he elua Ilamuku, oia o Ilamuku Makemahone o Farani a me Buenventura Baez o Dominica.
Na Moi i make a me na pani.
Ma ka hala ana aku o na au o na makahiki i hala, o ka heluna o na mana hoomalu ua hoemiia mai. O na Moi o Napela a me Hanovera, Ka Mea Kiekie ka Duke o Tuscany, ke Duke o Parma a me Modena, ua holoi ia aku lakou mai ka papa o na mana hoomalu aku o ke ao nei. Ke Alii Kui o Hesse a me na Duke e ae he lehulehu wale o Geremania, ka Moiwahine Pomare, o ka Pae Aina o Tahiti, ua ukali pu aku lakou i na kapuai o ko lakou mau mua ma ka nohoalii.
A mawaena o ka poe i pani i ka hakahaka o ko lakou mau mua, oia ka Emepera Johannes o Abesinia, i pani aku i ka noho o kona mua, Theodorus i make ma ke kahua kaua; Lerdo de Tejada Peresidena o Mesiko, i kohoia ma kahi o kona mua i make Benita Juarez; Ilamuku Makemahone, Peresidena, kohoia ma kahi o M. Tiere i waiho aku i kona palapala hookohu; Oscar II ka Moi o Sue dana a me Norewai, i pani aku i ka hakahaka o kona hoahanau; ka Moi Lunalilo o Hawaii nei, i pani aku i ka noho o Kamehameha V; o Abert ka Moi o Saxony, ka mea i noho ae ma ka nohoalii no kekahi mau hebedoma pokole ma kahi o kona makuakane ka Moi Keoni.
He lehulehu wale o keia mau mana i halawai aku me na ulia pomaikai, i ike ia e ka lehulehu i ko ke ao nei me ko lakou mau mana nui. O ka Moi o Italia, ua pii ae ia mai ke kulana haahaa loa a i ke kulana kiekie. Ka Moi o Perusia, i keia wa he kulana ae kona, he Emepera no Geremania Hui.
He mau hana haahaa a nawaliwali kekahi elua oia na Henere o Reuss, Henere XXII o ka lalani kahiko, a me Hanere XIV o ka lalani hou. Ke hoomalu like nei laua maluna o 120,000 kanaka. E like me Adolphus o Lippe-Schaumbeurg, Leopolo o Lippe-Detmold, Lui III o Hesse-Darinstadt a me Ioane II o Likitinetini, aole o lakou ume kaumaha ma na hana pili aupuni o Europa, he inoa wale no, ua lilo aku ko lakou mau pono mai ia lakou aku.
Na Nu Hou Kuloko.
Mai ka mea lawe leta o keia mokupuni i lohe mai ai makoa, he nui ka ua a me ka makani ma na pali Koolau o kakou ae nei.
Maluna mai o ka kiapa D.C. Mare, ua lawe ia mai he lio, bipi a me na hipa na kekahi o ko kakou poe haole o keia kulanakauhale, a ua lohe mai makou, na J.L. Richardson o Kahuku ae nei kekahi oia mau waiwai.
Ma ke ku ana mai o ke kiapa Norman, Kapena Campbell mai Alika mai, i haiia mai ai ka lohe no ka noha ana o kekahi mau moku okohola ma ka paa ana i ka hau, oia na moku Farnsworth a me Java.
MAHALO. - He mahalo nui ko'u a me ka poe lawe i ke Kuokoa i keia makahiki, no ka haule ole o kekani helu a makou. E mahaloia ka Hookele no ka makaala.
J.N. KAMOKU.
Puula, Puna, Nov. 19, 1877.
A hiki i ko makou hoi ana e pai i ka kakou pepa, ua loaa mai ia makou ka huina o na moku kalepa a me na okohola e ku nei maloko o ke awa o Kou, oia hoi he 9 mau moku kalepa a he 5 mau okohola.
Ke hoaikane hou nei kakou me na po pouli, oiai, ua kaihi aku nei ke aliiwahine o ka lewa i kona nani a aumoe hoea mai, aka, ke kani iki nei ka Makanakeke ma aka, ua hoi mai ka wa maikai no ka lakou hana, o ke paeaea ma na pali uapo.
Ma ka po o ka Poakolu iho nei, ma ka Hotele Hawaii he anaina lehulehu kai akoakoa ae no kekahi wahi paina hoolaulea. malaila ae ko kakou mau keiki puhi ohe kahi i puhi ai no ka lakou mau hoonanea luana ana.
Mawaena o na eepakeke maluna mai o ka mokuahi Auseteralia i ku mai ai i ka pule i hala, i hoi mai ai kekahi o ko kakou mau haole kamaaina i nalo aku no ka wa pokole ma ka aina hanau, oia ka Hon H.A. Wilimana, F.A. Schaefer a me kekahi poe he lehulehu wale.
Aole he holoke mau o kahi waapa mokuahi Robbie no na awa o Puuloa a me Waianae i keia mau la, ua hapa ke kahea ana a kona wahi hokio leo nui, a ke ike ia aku nei oia i ka mono mai makai o ka uapo.
Ke panio mai nei na paia o ka hale pohaku o Burus ma, ma ke kihi o na alanui Hotele me Papu, ke mili lima ia mai nei e na kamana a palahinu, a he mau la wale no koe, hoau mua ae na ukana o ka halekuai o Ake ma paha maloko.
Aole i ikeia kekahi o na la makani ikaika loa ma ka nuku o Nuuanu e like me ka Poakahi iho nei, ke hele le na lio a me he mea la ua ona, ka hio i o a ia nei, ma ka hoopii ana'ku o Kaholoakeahole.
No ka nui o ka hahana o na kapuai a ka la, ua hiki ole i na omaka wai hou ke paa aku ma ko lakou mau makalua, nolaila, ua konoia mai ko makou mau keiki lawe poahi kepau e hina aku ma na ipuka makani, i loaa mai ai na kuilima ana me na ea huihui.
Ma ka po Poaha iho nei, mauka o Kaakopua, ua hookomoia maloko o ke apo maluhia o ke kuikahi (mare), o Robt. K. Parker, ka moopuna a keiki hoi a ka Hon. J P Parker o Waimea, Hawaii, me Miss Sarah Kekoa, na ka Rev. M. Kuaea laua i hoohui ma ka hale noho o ka wahine.
Ua haiia mai makou e ka Agena Hackfeld & Co., mahope aku o ka malama o Dekemaba, e haalele ana na mokuahi i ke awa o Kapalakiko ma na Poakahi a pau, aole ma na Poakolu e like me ka mea maa mau, i hakalia ole ai ko lakou manawa holo mau ma na awa a lakou e ku aku ai.
Ma ka hora 1 o ka Poalima e hiki mai ana a pela aku, e haawi mau ana na haumana o ke Kula o Kapunahou he hoike ma kekahi lala o ka ike, a ua konoia ka lehulehu e naue ae ma keia mau hoike e ike i na mea i hanaia. Ma nehinei, ua hoikeia ka papa e pili ana no ke ano o na holoholona.
O ka la 29 o Nov. e hiki mai ana, ua hookaawaleia ia la e ka Peresidena Hayes o ka Repubalika o Amerika Huipuia, i la hoalohaloha i ke Akua, no ka hoomau ia ana o ko lakou noho kuokoa ana, a e malama ia'na ia la e ko kakou mau kamaaina Amerika ma ka luakini o Kaukeano, malalo o ka haiolelo ana a Rev. Dr. Hyde.
Ma ka po Poalua iho nei, ma uka o Maemae, ua haawi ae ke keiki lalawai Maka Robinson he wahi paina ma kona home panio hou no ke komo ana'ku malalo o ka uhi maluhia o ka mare; malaila ae ke Alii ka Moi a me ka puali puhi ohe kahi i hoonanea ai iaia a me kona kokoolua opiopio hou.
Ma ke ku ana mai o ka Mokuahi o Kapalakiko i kela pule aku nei, ua kau mai maluna ona ka epaepa hou o ko kakou mokuahi holo pili aina Likelike, a malalo o ka mikiala o na lima hana, ua hana ia kona hemahema a paa; a ma ke ahiahi o ka Poalua iho nei i hoau mua aku ai oia i kona epaepa no ko kakou mau kai ma kana huakai holo mau.
I na la mua o keia hebedoma, he mau ao hakumakuma kai hoopoluluhi iho ma na paia o ka lewa, he hoailona no kekahi kuaua nui e haule mai ana, ka mea hoi a ka mahiai e ake nei o ka hooma-u ia o kona waena, aka, aole he mau ouli no ka ua i ikeia, oiai ua omo hou aku la na ao i huna wai a paa i ka lewa, a o ka wela ka mea i paholaia mai no keia mau la.
KA LA 28 O NOVEMABA - Ma ka Poakolu ae o keia pule e hiki mai ana, oia ka la i ae ia mai ai kou kuokoa e Hawaii, e na mana aupuni o Beritania a me Farani, a he la kulaia ia nou e ke kanaka Hawaii; e hauoli kakou ma ia la me ke kupono, me ka haawi ana ae i na huro ekolu o ka olioli no na kahakahana o ka Hae Hawaii e welo mau aku i ka makani ma na huini o na wahi ana e kau ai, a e mau aku ke kuokoa ana.
Ma Waikahalulu, ua lawe aku la ke Akua ia Willie Kuaea, ke keiki hiapo a ko makou makamaka maikai hai ola o ka luakini o Kaumakapili, a ua hoi aku la ia ma ka poli o kona Makua Lani, ma ke kakahiaka o ka Poalua iho nei, maluna o ka makua a me kona ohana ua haawe lihaliha o ke kanikau, a pela makou e komo pu aku nei malalo oia koloka hookahi o ke kumakena.
Ua ike iho makou maloko o kekahi o na nupepa o na aina, he heihei waapa mawena o kekahi moku manuwa i ku loihi ma ko kakou nei awa mamua aku nei, oia ka moku kaua Likawana a me kona hoa heihei, o ka loa kahi i hoe ia mawaena o na waapa elua he elima mile, a ua eo aku i ka waapa o ka Lakawana he 14 sekona oi aku imua o kona kokoolua. O na poe hoe, he poe i waeia ko laua a elua; keia heihei ana nae, he heihei makamaka mawaena o laua.
KA PULE HOPE LOA. - A keia pule ae, e hoopau ia ai ka hele ana o ka Luna Ohi o Koolaupoko i ka ohi, nolaila, he pono i na poe a pau i koe e hookaa koke mai, o helu auanei na makai ke waiho ia'ku ia lakou ka ohi. E noho ana ka Luna Ohi ma Kaneohe i ka Poakahi a me ka Poalua ae nei. A mahope o ka la 3 o Dekemaba, e hoomaka ia ka hoopii me ka hookaulua ole. Nolaila, e ohi no ka Luna Ohi ma kona Keena Hana ma Honolulu, i na auhau a hiki i ka la 1 o Dekemaba.
Nu Hou o na Aina E.
Enaena na ahi a ke Kaua!
Hoike ka Bea i kona mau niho wakawaka!!
Holo olohelohe ke Tiga inu koko!
Haaheo Rusia i ka lanakila!!
Hooauhee nui ia na koa Tureke.
Hoehaia o Muketara Pasha o na Tureke.
HOOKUPA NA RUSINI MA KA LEPO O TUREKE.
Pioo Tureke no kona hopena.
Hoomauia ke kaua no ka hopena
Ma ke ku ana mai o ka mokuahi mai Kapalakiko mai i kela pule aku nei, ua loaa mai ia kakou na mea hou ano nui o ke kaua o na aupuni hookahe koko e molia mai nei i ke ola o ko laua mau makaainana ua hoopuka aku makou i kekahi a koe kekahi no ka piha e ana o ka kakou wahaolelo, a ma keia pule ke kuupau aku nei makou i ka loa a me ka laula, no ka pomaikai e haaheo piha ai ko mako mau tausani poe heluhelu; me he la, eia imua o ko kakou mau alo e hana ia nei na mea o ke kahua mokomoko o Kawelo ma.
KA HOOLAKO ANA IA PELEVENA.
ME NA LAKO AI.
Konatinopela, Oct. 25. - O na hoolako ana aku ia Pelevena me na lako ai, ua hali ia aku mai Pilipopoli a me Sofia, no ka hoolako ana aku ia Pelevena no ekolu malama lako ai. Ma ka la 13 o Oct. he 4,5000 poe i hoehaia maloko o Pelevena. Ua hookaawaleia na hale noho i mau hale mai. Ua makemake nui ia na lole lilina aeae i mea wahi no na palapu a me na laau lapaau.
NA MAKE O RUSIA.
Berelina, Oct. 25. - O na make o Rusia ma ke kahua kaua a hiki i ka la 18 o Oct he 60,100.
KE KAUA MA ASIA.
Ladana, Oct. 27. - Ua hoike ia mai, ua hahai aku na Rusia ia Ghazi, a ua nee aku o Muketara Pasha a hiki i Kavasana, Muketara hoi ua hoi hope aku oia a hiki i Loporosi, mawaena o Kavasana a me Hosana Kaleh. Ke hoomakaukau nei o Ezerouma no ke kaua. Ke kahei nei na makaainana i na mea kaua a ke hele awiwi mai nei he puali kaua mai Zerebigona mai. Ua hoike ae o Ghazi Mutera, aole i nee loa aku na Rusia a mamao mai Melidoo aku, ma ka aoao komohana o Loghauli Dagh, kahi i oi aku ka maikai mai ke kulana mua mai.
HOOPUNIIA O PELEVENA - AKOAKOA NA PUALI KAUA TUREKE.
Ladana, Oct. 27. - Ua hoike mai kekahi mea kakau nupepa no ke kulana o na Rusia, mai kekahi aliikoa Rusia mai Pelevena mai.
Aole he mau kokua o na puali koa Tureke i hiki ae i Pelevena, mai ka manawa mai o ko Generala Gouka o na Rusia hiki ana aku, a lawe ae la i na hooponopono ana malalo ona. Ua lawa pono na puali kaua lio a puni o Pelevena; a ma ka hiki ana mai o ka puali koa kiai Imeperiela, ua lawe ae lakou i na kulana ma ka welau hema o ko lakou mau koa ponoi iho, i hooloihi ia aku ai ka laina o ka hoopuni ana a i ke alahele mai Lovatz aku a hiki i Sofia. Ma ka hikina akau o Pelevena, ua hoopuni ae na puali koa hele wawae Rusia e moe ana a hiki i ke kulana o na koa Roumania ma ke alahele o Soifa ma ke komohana. Ma ke komohana ponoi hoi, ua hui ae na welau o ka poepoe hoopuni, ma ka paa ana mai me ko Generela Gouka mau puali kaua lio, e hiki loa ai ke pale aku i na kokua e hiki mai ana.
Ke loaa mau mai nei i na Rusia i kela a me keia la na puali kokua a ma na mea a pau, ua manao lakou e hoopuni aku ia Pelevena, e like me ko na Geremania hoopuni ana ia Paresa. He manawa pokole wale no koe a loaa mai i na Rusia na puali koa e lawa pono loa ai ka hoopuni ana me na koa hele wawae, i hoopuipui aku hoi i na puali koa hele wawae mua e hoopuni la. Ua manao ka mea kakau nupepa aole paha i lawa pono loa o Pelevena me na lako ai e pale mai ai i keia hoopuni ana a hiki i keia haule lau ae, a he mea paha ia no Osman Pasa e konoia mai ai, e kaua aku no kona ala e puka aku ai i waho.
Ua hoea mai kekahi lono ma Konatinopela, e olelo ana, ua hui luna aku o Ismail Paso me Mukatera Paso.
Ladana, Oct. 27. - Ua nui ka olioli o na Rusia no ka loaa ana o ka lanakila nui ia Gen Geouka ma ke okiia pu ia ana o ka laina koa kokua o na Tureke ma ke ala ae o Sofia no Pelevena. He mea kahaha no ka manao, ka ike aku i ka weliweli o ka poino o na Tureke, a he lanakila haaheo hoi i loaa i na Rusia ma ka loaa ana o ke kulana maikai ia lakou ma Lovatz a me Genevika. He pani paa ana ia ia Osman Pasa mai ka launa kamailio pu ana'ku me na wahi ma ke komohana aku o Pelevena he oki pu ana aku hoi iaia mai na hoolako ana aku me na lako ai kupo io no ka wa hooilo, me ke kipaku pu aku iaia, a me ka luku pu ana aku i ka mahele waenakonu o kona puali kaua, i hoonou hou ole mai ai ia i ke kukule ana i kaupale ma ia wahi. O keia lanakila i loaa i na Rusia, ma ka hiki lehulehu ana mai o na puali kaua mai ka akau a me ka hema mai o