Ka Nupepa Kuokoa, Volume XVIII, Number 29, 19 July 1879 — Ua hala o Mrs. Moakeawe Aseu. [ARTICLE]

Ua hala o Mrs. Moakeawe Aseu.

Mamuli o ko makou nonoi ia mai, nolaila, ke hoolaha aku nei makou he wahi moolelo pokole no Mrs. Moakeawe Aseu mai kona hanau ana mai a hiki i kona make ana. Ua hanau ia oia ma Kohala Akau, Hawaii, ma ka la 5 o Iulai, o ka M H 1854, a i kona mau la opio ua noho oluolu oia me ke akahai malalo o kona mau makua. Ma ka la 31 o Augate, o ka M.H. 1871, ua mare ia oia me Mr. L. Aseu e ka Rev. W. Frear ma Honolulu nei, iloko o ka 17 a oi ae o kona mau makahiki, a iloko o na mmeakahiki a laua i noho pu ai kana kane iloko o ka berita o ka mare, he oluolu a maikai ko laua noho ana. Aka, ma ka Poaono hope o Iane oia ka la 28 oia mahina, ua loohia ia oia me ka mai i kapa ia he Typhoid Fiva, a mai ia la mai a hiki i ka la 5 o Iulai, oia ka Poaono, ua hanau mai he kaikamahine na laua, aka, ua lawe koke ia aku no ua kaikamahine la e ka Makua Lani ma ia po no. Aka, mahope mai ua ano maikai kona kino, a hiki ma ka hora 3 pm, o ka Poalua o ka pule i hala ae nei, loaa hou no oia i ka fiva, a iloko oia mau hora pilikia, ua nonoi aku oia i ke Akua e kala mai i kona mau hewa a pau mai kona wa i hanau ai a hiki ia wa, me ka nonoi pu aku no hoi e lawe aku i kona uhane, no ka mea, ua makaukau oia no kona hele aku me ka makau ole i ka make, a ma ka hora 2 am, o ka la 9 iho nei o keia mahina, 4 ua hookuu malie aku la oia i kona uhane a waiho iho la ke

kino lepo me he mea la e hiamoe ana. O ka nui o na makahiki a laua i noho pu ai iloko o ka berita mare me kana kane, ua kokoke ewalu. O ka nui hoi o kona mau makahiki mai ka hanau ana mai he 25, a oi ae. Ma ka Poaha o ka pule i hala i manele ia aku ai kona kino lepo ma ka ilina ma Makiki, a he nui na makamaka a me na - hoaaloha i ukali pu aku no kana huakai hope loa ma keia ao. A o makou ma ko makou ano he mau hoaaloha no ke kane a ka mea i make, ke komo pu aku nei makou iloko o ia kaumaha hookahi, a na ke Akua e hoomaha mai ia ia.