Ka Nupepa Kuokoa, Volume XXI, Number 52, 30 December 1882 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXI, HELU 52.   POAONO, DEKEMABA 30, 1882. NA HELU A PAU 1100

 

NA HOOLAHA.

MAIKAI KA HOI

KA PAPA,

- A ME -

KA LAAU O KOU HALE.

NOHEA LA?

KAI NO HOI NO KAHI O

WAILA MA.

 

Nana aku no hoi ia la ohi ka lo o ka laau o Makawao, i ka ua mea hoi o ka nani.

NA PAPA! NA PAPA!

A ME

Na Pono Kukulu Hale

O na Ano no a Pau.

AIA MA KE KIHI O NA ALANUI

Papu me Moiwahine,

HONOLULU.

Malaila e loaa ai e like me ka makemake no ke

KUMUKUAI MAKEPONO LOA.

 

PAPA! PAPA! PAPA!

NA PAPA HULUHULU,

NA PAPA MANOANOA.

NA PAPA I KAHIIA,

NA PAPA KEPA,

PAPA HOLE KEOKEO,

PAPA HOLE ULAULA.

 

Na Laau, N Laau,

NA KUA,

NA KAOLA,

NA AAHO,

NA MOLINA,

NA PEAPEA.

PINE HULUHULU,

PINE I KAHIIA.

NA PAPA A ME NA LAAU ULAULA.

PILI ULAULA,

PILI KEOKEO,

PANI PUKA,

PUKA ANIANI,

PANI PUKA ANIANI,

PUKA OLEPELEPE.

 

PENA

O NA ANO A PAU,

Hulu Pena mai ka liilii a ke nui,

Aila Pena,

Aila Hoomaloo,

Waniti, Pate,

Na Lako o kela a me keia Ano.

NA AMI PUKA HALE,

NA AMI PUKA PA,

ANIANI

PEPA HALE A ME NA LIHILIHI,

E loaa no malaila.

 

PAAKAI HELU I,

O

KAKAAKO ME PUULOA.

 

No ke Dala Kuike, e loaa no na mea a pau i hai ia me la, no ke Kumukuai Ewai Loa.  O na Kauoha mai Hawaii a Niihau, e loaa aku no ia lakou, e hooko koke ia no ia me ka la wa poao. E kipa nui ilaila i ike i ka oiaio.

905-tf

 

NA HOOLAHA.

 

W.O.SMITH,

LOIO! LOIO!

Helu 36 Alanui Kalepa, Honolulu.

 

W.R. KAKELA,

He Loio a he Kokua ma ke Kanawai.

He Luna Hooiaio Palapala.

 

CECIL BROWN.

Loio a he Kokua ma ke Kanawai.

A he Agena no ka Hooiaio ana i na Palapala no ka Mokupuni o Oahu.

Helu @ Kaahumanu, Honolulu, H.P.A. 2-17

 

ASA KAULIA,

LOIO A KOKUA MA KE KANAWAI

Ua makaukau au e lawelawe i na hihia a pau ma keia Oihana imua o na Aha a pau o ka mokupuni o Oahu.  E loaa no au ma Koolaupoko, Heeia, a ma Honolulu i kekahiu wa E hooko ia na kouoha mai na wahi a pau o ka mokupuni me ka eleu a me Kahikiwawe.

 

Jno. Lota Kaulukou,

LOIO A HE KOKUA.

Ua makaukau oia e lawelawe i na hihia a pau o kela a me keia ano iloko o na Aha Hookolokolo a pau o keia Aupuni.  Ua hiki no hoi ke hana i na palapala a pau e pili i ka Oihana Loio me ka eleu.  E loaa no au ma Heeia Koolaupoko, a ma Honolulu nohoii Kekahi manawa.

901-tf

 

C.C.COLEMAN,

Amara a he mea hana Mekina

Kapili Kauai hao lio.

A ME KA

Hana ana Kaa Lio, etc.,

Hale Hana ma Alanui Alii,

905-tf E kokoke la i ke Alanui @apu.

 

KALE KULIKA,

Luna hooiaio

PALAPALA KUA MOLAKI,

A ME NA PALAPALA OIA ANO.

Luna Hooiaio Palapala Aelike mawaena o na Haku a me na Kauwa.  Luna Haawi Palapala Mare.

Ma ke kihi o ke Alanui Moiwahine me Kaahumanu,

kulanakaauhale o Honolulu, ko Hawaii Pae Aina.

159-tf

 

Richard F. Bickerton,

[PEKETONA.]

Loio a he Kokua ma ke Kanawai.

Keena hana Helu 23 Alanui Kalepa,

Elua puka ma o aku o ka hale kauka o Kauka Minuteole.

  E hele ana oia imua o na Ahahookolokolo a pau o keia Aupuni ma na ano hihia a pau, ina paha ma Oahu nei, a ma na Mokupuni e ae.

  Ua makaukau mau oia i ka hana ana i na Palapala pili kanawai o kela a me keia ano.

  Ua hiki no hoi iaia ke hoaie dala aku ma ka morakiana i na aina ma ka ukupanee haahaa loa.

  E hanaia na hana me ka hikiwawe a me ka uku haahaa.

 

C.D. MAKEE.   A.A.COURTNEY.

MAKEE  & COURTENEY

HANA POI! HANA POI!!

MA WAIHEE, MAUI.

  O'na Paiai aweawe, ono, a kuhinia, e loaa no ma ko maua hale hana Paiai ma kahi i hoikeia maluna.  O ka poe a pau ma na mokupuni e ake ana i mau Paiai, e hiki no ia maua ke hoolako aku a lawa pono ka makemake.  E laweia no na Paiai ma Maalaea.  He 2 1/2 keneta o ka paona.

  He 60 aina Kalo a oi e mahiia nei i keia wa.

  Eia ka wa kupono a e hoouna awiwi mai i na kauoha.

  N kauoha ma na leta e hooko awiwi ia.

1089 3ms

 

JAMES M. MONSARRAT,

[MAUNAKEA.]

Loio a he Kokua ma ke Kanawai.

Imua o na aha Hookolokolo a pau o keia Aupuni.  E lawelawe ana no hoi ma na hana pili i ka hooponopono waiwai, me ka imi ana i na palapala Sila Aina, ka hana ana i na Palapala Kuai, Hoolimalima a me ka hoaie dala ana.

A HE LUNA HOOIAIO PALAPALA.

Keena hana alanui Kalepa.

Jan 3,1880. 944 1y

 

Joseph E. Wiseman,

LUNAHOOPONOPONO O NA WAIWAI PAA

A ME

Luna Imi Hana,

Helu 27 Alanui Kalepa, Honolulu

Luna Hoolimalima no na Rumi, na Hale, a me Luna Kuai me Hoolimalima o na Waiwai Paa ma na wahi a pau o ka Paemoku.  Luna imi Hana no ka poe a pau i nele i ka hana ole ma na wahi a pau i makemakeia ma kekahi mokupuni o ka Paeaina.

  N.B. - Na Palapala Hoolimalima e hanaia me ka eleu; e ohiia na Bila Aie a me na hana e ae a pau e pili ana i na hana Oihana Kalepa me ke eleu a me ka pololei.  O na Unuhiolelo a me na Maheleolelo ana, e hookoia me ka maikai.  O na kauoha a me na kamailio ana maloko o na leta no kekahi o na hana mahina ae, e hookoia me ka eleu loa.

1096 @y

 

KA MOOLELO

ONILA MAKA!

Ka Makai Kiu Kaulana

ENELANI!

A O KA MEA

POHIHIHI O KA 1868.

MOKUNA VII.

KA MAKAI KIU A ME KA MEA ELI LUA KUPAPAU - HE LANAKILA MALUNA O KA MEA HANA PAHU - NA LONO LAUAHEA MA H - PUNI KA LEHULEHU - KE KINO MAKE MA ULU PAINA IUIU HE HOAHELE KUPUNAHA MA KA HUAKAI I KA HOME - HE HANA KAMAHAO NO KE KINO MAKE - HALAWAI O IONAKANA WAHINE ME NA NUHOU KUPONO OLE - PUIWA NA MEA HANA HEWA.

 

  Ia wa pane aku la ka Makai Kiu i ka ninau i hoikeia aku ai ma kela moku na i hala; penei:

  Ua maopopo ia'u ka'u mea e ike ai mamua ae o ko'u komo ana aku iloko o kela rumi, no ka mea, ua ko ka'u mea i koho ai.

  E hoao ana ka paha oe e keakea i ke kanu ana i keia kino make?

  Aole.

  Alaila aohe keakea no ke kino make ea?

  Aole mai a'u aku, aka e pane mai oe i ka'u ninau. Ihea e laweia aku ai ke kino mahope iho o ka paa ana iloko o ka olowaa?

  I waho o Mokupuni Loihi.

  Aole anei e hiki ia oe ke hai mai ia'u i ka inoa o kekahi o na ohana o ka mea i make?

  Aole.

  Me ka ninau hou ole aku, huli ae la ka Makai Kiu a haalele iho la i ka mea hana pahu kupapau.

  Ma ua auwina la no hoi, loaa mai la na hoakaka no ka mea i make.

  Ua hoikeia ae ua haalele ia ua wahine opio la e kana kane hoopalau ma ko laua la e mare ai, a iloko hoi o kona hilahila a me ke kaumaha, ua lele aku la oia iloko o ka muliwai a poholo iho la i lalo i ole ai oia e ike hou i na maka o ka mea nana i pakaha mua aku i ke aloha a kona puuwai-

  Malalo iho hoi oia, na pane a na lunahooponopono o na nupepa e pili ana no ke aloha ole o ke kane hoopalau a me kana mau hana.

  Aka, malalo o ka makaala a me ka hoomanawanui ana a kekahi kanaka hookahi, ua haulehia iho la ka manaolana o ka poe hana hewa, a lilo ka lakou moeuhane palau alelo i mea ole.

  He elua la mahope mai o ka loaa ana o ke kino make, hiki ae la kekahi kaa lawe kupapau ma kahi hoolele ukana o na kaa ahi e holo ana i H-

  A lawe ia mai la kekahi pahu a hookomo ia aku la iloko o kekahi o na kaa ahi.

  Hookahi wale no makaikai e haka pono ana i keia mau hana a pau, mawaho ae o ka poe e lawelawe ana i ka lakou mau hana iho.

  A o ua makaikai la he kanaka helehelena eleele oia me na maka kaumaha iaia i puana ae ai penei:

  Auwe oe! E ukali aku ana au mahope ou a hiki i kuu wa e ike aku ai i ka haule ana iho o ka huna lepo maluna o kou kino.

  Nolaila, mahope iho o ka loaa ana o ke kino o ke kaikamahine, ua manaoio loa iho la ka lehulehu e noho ana ma H- mahope o ka loaa ana o na lole i oki loa i ke koko, eia no o Hale Keleneka ke ola nei, a he mau hana hoopunipuni wale no ia nana i pakele ae ai oia mai na hoino ana a ka lehulehu iaia.

  No ia kumu, ua hilinai loa lakou no ka moolelo o ka make ana o Adeline, a ua nana aku hoi ka lehulehu maluna o Ionakana kane a me kana wahine ma ke ano he mau kanaka laua i ahewaia me ke kuleana ole.

  Aka, malalo nae o keia mau ao poluluhi o ke kuhihewa e nee malie ana kekahi kanaka me ka hoomanawanui.

  E like me Nero e hanu hele ana ma o a maanei, pela hoi oia i ukali hoomanawanui ai mahope o ka meheu o ka poe hewa, me ka ike ole ia mai e kekahi mea e aku, a me ka moeuhane ole ae o ka poe hana hewa eia ka make ma ko lakou mau kapuai kahi i hahai ai i ka po a me ke ao.

  I ka wa i hiki aku ai o ke kaa ma kahi hookio, akoakoa mai la ka lehulehu no ka lawe ana aku i ka olowaa mailoko aku o ke kaa ahi.

  A kau ia aku maluna o kekahi kaa lawe kupapau a @@@ loa ia aku la no Ulu Paina Iuiu, i @@@ hoi i laina ae ai ka lehulehu mai @@@ ke kaa a ukali aku la i ka @@@@ a ke kino. 

  Mawaena keia @@@huakai kekahi kanaka nona he@@aena i hoike mai i ke kaumaha @@kou a kona puuwai, oia hoi ke @@@ka i ike i ka wa i hoooau ia aku @@@@  iho iloko o ke kaa ahi.

  Aka, i ka na@@ ku me he mea la, aohe mea i ike i k@@@a Ionakana kane a me kana wahine nalo iho ai, koe wale iho no o ko laua @@@ makamaka i ike i ko laua wahi i noho ai.

  Ma ke poo o @@huakai la e hele ana ua kanaka helehe@@@a eleele nei, a i ka wa i hiki aku ai ka huakai i ka hale, oia no hoi ka mea m@@ i komo aku iloko o ka hale.

  Ia wa kii mai @ o Ionakana i ke kino.

  Aohe ike iki ia aku o Ionakana wahine.

  Ia wa no hoi lo@e ia mai la e malama ia ana ka hoolewa ma kekahi la ae.

  O ka poe a pau i ukali aku i ke kaa e lawe ana i ke kino, ua @@@ aku la lakou ma o a ma@@ei o ka pa@hale no kekahi manawa a@aoi aku la.

  A o ua kanaka helehelena eleele la hoi ka hope loa o ka haalele ana iho i ka hale.

  Ua kahiko ia oia me na lole nani kumukuai kiekie, nolaila, ma kona kulana a pau, he keonimaua oia no ke kulana hanohano.

  E ku ana hoi o Ionakana ma kahi o ka pahhu kupapau, ia wa hookokoe aku la oia iaia.

  He la kaumaha keia, wahi ana i pane aku ai io Ionakana, oiai, hoi oia e haalo'ulo'u ana i ka uwe a e ume ana hoi i na hupe a ka wah@@@@@@@@@@@@@

  Ae, wahi ana i p@he aku ai.

  Aohe paha ou pohihihi i ka ike ana i na helehelena o ka mea make?

  Aohe.

  Ia wa haka pono aku la ua kanaka helehelena eleele nei maluna o ka mea e kanikau ana i ka makani a e hauoli ana hoi i ka puahiohio a pane aku la:

  I kekahi wa ua kuhihewa no kekahi poe.

  Heaha kau e olelo mai hoi! wahi a Ionakana me ka inaina, a auheee aku la na hoailona o ke kaumaha mai kona mau helehelena aku.

  I olelo wale ae nei no hoi au, me ka manao he mea ia nou e oluolu ai, malia ua kuhihewa io oe.

  He mea oluolu no'u i na e malama ana na malihini i ko lakou mahaoi me lakou iho, aole o ka hele mai a ka hale i loohia me na palapu o ke kaumaha e like me keia.

  O oe paha ka hooilina o ke koena waiwai a pau loa o Adeline ea?  wahi a ke kanaka eleele me ka hoolohe ole aku i na olelo pakike a Ionakana.

  Owai oe? wahi a Ionakana me ka huhu.

  He lala wau no ka ohiana loio.

  Pela?

  Ae,

  Alaila e kali malie no oe a e kii ia aku ana kou kokua, alaila hele mai oe.  He keu no oukou a ka poe mahaoi.

 

  Aole e hiki ia makou ke kaukai wale no a kii ia ae, aka e makaala no makou no ka hana.

  A heaha kau o onei?

  He hana no.

  He hana kau o onei?

  Ae,

  Pela io ka hoi.  Nawai oe i koho aku?

  Na ka hooilina o ka waiwai o Adeline.

  Ia wa loli koke ae la na helehelena o Ionakana.

  O kona manao mua he kanaka apiki wale iho no oia.

  Aka, i kona lohe ana aku, he kokua oia no ka hooilina o ka mea i make, ia wa ua holo ae la ke anu i kona puuwai.

  He mea kupanaha no hoi oiai ua ike a maopopo ia Ionakana kekahi hooilina a Mariona Adeline i ike ole ai a eia no ke ola nei, aka, i kona lohe ana i keia koi kamahao a ua hooilina la ua lilo ia i mea kaumaha na kona naau.

  Aole e hiki ia'u ke kamailio pu aku me oe i keia wa, wahi a Ionakana, a pane hou aku la: No ka mea, aohe hooilina e aku i koe i hiki ke koi mai i ka waiwai, nolaila, e hoopokole kaua a kahi wa okoa aku alaila hui hou kaua.

  Malia paha, ua maopopo no ia oe ke kumu e hiki ole ai ia oe ke hakoko iloko o ka aha no keia waiwai, wahi a ke kanaka helehelena eleele.

  Aohe maopopo ia'u oia kumu, nolaila, ke olelo hou aku nei au ia oe, aole o'u makemake e kamailio hou no ia mea.

  Aole no au i hele mai nei e kamailio no ia mea, aka, i komo wale mai nei no au e ao aku ia oe.

  E ao anei oe ia'u i ke aha?

  Mai ka lawelawe ana i kekahi mea e pili ana no ka waiwai imua on na aha i keia wa.

  Mahope iho o kona pane ana aku i keia mau huaolelo, huli ae la oia a hoomaka aku la e hele.

  E kali iki iho, wahi a Ionakana; E oluolu oe e hai mai i kou inoa a me kou wahi noho.

  Aole loa au e hana pela, aka, e hiki mai ana au ianei i ka wa kupono, nolaila aohe waiwai o kou ninau ana mai i ko'u inoa i keia wa, no ka mea, @@ pau ka'u hana no keia mea i keia manawa, a o ka'u olelo hoi ia oe i kiea wa, o ka waiho malie aku i na mea a pau pela me kou lawelawe ole aku i kekahi hana.

  Ia wa huli ae la ua kanaka helehelena eleele nei a haalele iho la i ka hale me kekahi poe kakaikahi i koe iho.

  Me ka noonoo weliweli haalele iho la o Ionakana ia loko o ka rumi a pil ae la iluna o ka rumi ma ka papa hele elua.

  Iloko hoi o ua rumi la e moe ana o Ionakana wahine iluna o kekahi pu@e@.

  I ka nana aku iaia he kilaklila maoli no kona mau helehelena iloko oia hora me ka mino aka oluolu ma kona mau helehelena, a ua like hoi kona mau h@ona me ka mea i loohia ia e ke kaumamaha kukonukonu o ke aloha keiki.

  A i kana kane i komo aku ai iloko o ka rumi ike mai ia oia ma kona helehelena ua hele a nananakea, a pane mai la me ka leo olioli:

  Ua kohukohu @@ no oe.

  Heaha kau e olelo nei i ko'u kohukohu?

  I ko like loa me ka mea e kanikau ana.

  Ma ke ano hea?

  Ma ke ano no hoi paha o kou helehelena, no ka mea, ua like loa me ka mea e kanikau io ana.

  Ke hopohopo nei au he kumu kupono loa ko'u o ke kaumaha ana mamua o ka pau ana o keia hana.

  Kahaha! Eia no ua manao hopohopo wale nei ou.  Auhea oe, aole anei oui ke ua maluhia loa kaua, no ka mea, o ka kaua hana i hana iho nei, ua like me ka hana a ke kanawai, a o kekahi no hoi keia o na hana holopono loa a'u i ike ai.  Oiai ua waiwai kaua i keia wa, a aohe mea nana e kue i ko kaua kuleana.

  Ua pau ka kaua hana, nolaila o ka kaua hana wale no i keia wa o ka lawelawe aku i na mea e pili ana i ka hoolewa, a pau ae aohe hana aku i koe.

  E ka wahine, ua kuhihewa oe, no ka mea, akahi no a niele ia keia hana wahi a Ionakana me ka leo naalulu, a puiwa ae la kana wahine.

[Aole i pau.]

 

KA MOOLELO

A ME NA HANA A

JAS. A. GAFILA,

KA IWAKALUA O NA

PERESIDENA O AMERIKA HUIPUIA.

 

KA MEA I HOOKUMU I KONA KAHUA:

"UA AHONA AU E HOINO IA MAI NO KA PONO, MAMUA O KO'U HOOKO ANA I KA HEWA."

 

  (O ka moolelo o Kenela James A. Gafila, ka Iwakalua o na Peresidena o Amerika Huipuia i make mai nei, oia ke KU MAKANA a ka NUPEPA KUOKOA i keia makahiki, nolaila, ua lawe mai makou i keia helu e hoomaka ai ka puka ana o kona moolelo ma na ano nui.  Ua manao makou o ka loaa ana o keia KU MAKANA a me ka heluheluia o ka moolelo o keia kanaka kaulana iloko o keia au hou o ka naauao, e hookipa aku ana oukou i kona kii a me kona moolelo ma ko oukou mau puuwai, a e ike auanei oukou i ka waiwai o ka moolelo o keia kanaka kaulana, nona ke kulana ilalo loa o ka haahaa, a na ka naauao hoi i hapai ae i kona hilinaiia e na tausani kanaka o ia aupuni nui, a me kona make ana hoi iloko o ka powa ia o ke ano haahaa loa.)

KONA MAU LA OPIOPIO.

  O ka hai ana aku i ka moolelo piha o KENELA JAMES A. GAFILA iloko o keia au hou o na hooponopono aupuni, na kanaka koa, ka naauao a me ka holomua, oia kekahi o na moolelo kaulana loa o ke ao nei, no ke kulana o Gafila, he kanaka kuokoa ma na ano a pau, a he hilinaiia.  Ua olelo pinepine oia imua o kekahi mau haiolelo akea o ka lehulehu me keia mau olelo:

  "Ua ahona au e hoinoia mai iloko o ka pono, - mamua o ko'u hooko ana i ka hewa!"

  Ua hanauia o James A. Gafila ma kahi apana aina kuaaina o Alani, ma ka mokuaina o Ohio, ma ka la 19 o Novemaba, A.D. 1831.  I kona wa i mahuahua ae ai he mau makahiki ekolu a eha, kapa iho la na makua i ka inoa o ka laua bebe hou e like me keia.  O kona makuahine, he kaikunane kona e ola ana oia hoi o Kimo, lawe mai la oia i kona inoa a kau aku la maluna o ka laua keiki, nolaila, paa ai oia ka inoa mua o keia kanaka.  O kona makuakane hoi, lawe mai la no oia i kona inoa o Aberahama a kau aku la maluna o ka laua keiki uuku, a paa ai kona inoa iwaena o na tausani puuwai o Amerika, he inoa i hiipoiia a kumakenaia, oia hoi o KIMO ABERAHAMA GAFILA, ka mea hool@hi nana i pane aku a hoomalielieia ka@@ aina o na kanaka he hapalua miliona a oi iloko o na sekona pokole:  Owai la o na kanaka koa loa o Amerika ke olelo mai ua hanaia ia mea iloko o ko lakou wa?  Owai la o na kanaka Amerika ke olelo ae, aohe o Gafila i heluia iwaena o kekahi mau naauao e ae o ia aupuni mana nui?  Aole loa hookahi.  E hooho mai auanei na haneri tausani kanaka o Amerika, o Gafila hookahi @a Peresidena mua loa i komo ai ia aupuni iloko o ke kumakena, ka minamina a me ke aloha paumako.

  Oiai keia ohana o Gafila e noho ana ma ka mokuaina o Ohio, aia hoi iloko o na makahiki opiopio loa o na keiki, ua make aku la ko lakou makuakane a waiho iho la i ka ohana mahope, a o @@@@@@@@@@@@@@@ mea uuku loa, oia hoi ka mea nona keia moolelo.  O ka makuahine, lilo hookahi iho la iaia ka hiipoi ana i ka laua wahi keiki uuku, aole hoi o na kaikuaana, ua nui lakou, a ua loaa ka ikaika kupono e hoohana ai i loaa ko lakou wahi ola, o ka malama i na holoholona a me ka malama'i na mea kanu.  O Gafila uuku, he mea maa mau iaia ka hahai ana i ka makuahine e kokua ma na mea ana e hana ai, oia hoi, aole oia i hoolilo loa i kona manawa no ka paani lealea wale no me na kamalii.

  He haawina maikai i loaa i keia keiki ka olelo ana "ae;" a o keia huaolelo i ka wa a kona makuahine e olelo aku ai e hana oe i keia a pau, ua hele koke aku la oia iloko o na kaekae kahawai, e huhuki ana i na nahelehele, e paila p@@ no ana i na wahie, e houluulu ana i kela a me keia, a iloko o kekahi mau hora ana e hana hoomaha ole ai, ua pau ae la kahi i haawiia mai ai iaia e hana, a o ka hana a kekahi keiki e like me ia ke ano, he mea ia no ka makua e menemene ai i ka hana a ke keiki nona na la opiopio e like me Gafila opio.

  O kekahi mea nui loa i keia keiki oia hoi kona hai ana i ka oiaio wale no, a oia ka mea a ke Akua i aloha ai.  O kekahi o na makuakane hanai o Gafila opio e noho ana ekolu mile ke kaawale mai ko lakou hale ponoi aku, a o ke alanui e hiki aku ai i ko lakou hale, oia hoi maloko aku o na laau e hihipea ana i ke alanui, alaila, hiki aku i ka hale. He mea mau i ka makuahine ka hoouna ana ia Gafila opio e lawe i kekahi mea a olelo paha i kona makuakane  hanai i ka manawa ao, aole hoi i ka po.  Aia hoi i kekahi la, ua pau e ae la kana hana o ia auinala, nolailla, ua oluolu i ka makuahine ka olelo ana aku i kana kamalei opio, e hele e paani me kekahi mau kamalii me ke kupono, a e hoi mai mamua o ka napoo ana o ka la.  Ua holo aku la o Gafila opio me ka olioli maloko o ke alanui e hihipea ana i na lala laau, a hui aku la me na hoahanau kamalii a kona makuakane hanai.

  E like no hoi me ke ano mau o na kamalii ka lealea ka hui ana ae o kekahi me kekahi, pela iho la keia poe opio e paani nei, a hiki wale i ka wa i uhi mai ai o kekahi ino nui i na kauhale o ka ululaau.  Ua iho la ka ua, pa mai la ka makani, kui iho la ka hekili a olapa ka uwila, kahe mai la ka wai a hakukele na alanui ololi o loko o ka ululaau, a iloko o na minuti pokole o keia ino ana, ua pouli iho la kanahele e like me ka po.

  "Hookahi a'u mea aloha," wahi a Gafila opio e haalo'ulo'u nei i ka uwe' "o ko'u makuahine e kali mai nei ia'u o ko'u hoi aku."  "Aole oe e hoi aku iloko o keia pouli," wahi a kona makuakane hanai, "no ka mea, ua nui loa ka ino o loko o ka ululaau."  O keia leo e kamailio aku nei iaia, aole e hiki i ka naau opiopio o keia keiki ke poina i ka leo o kona makuahine, a me he mea la e kahea okoa mai ana no iaia e hoi aku.  Nolaila, me ka naau koa oia i alawa mai ai iwaho o ka pouli nui, ku ae la oia iluna, puka mai la iwaho, a e kulu hoomau ana na pakaua koikoi maluna o ka @@@, @@ mai la ke keiki opio hoi ana i kona hoike @@@@ a kona makuahine e noho nei me ke kaumaha nona.

  Oiai oia ma ke alanui o na ululaau kanaka ole, ua lohe mau oia i na kana ka o ia mau wahi i ke kamailio no na mea e pili ana i ka powaia o na kanaka e na Ilikini maloko o keia mau ululaau. Oiai oia i haupu mai ai no keia mea, manao iho la ua Gafila opio nei, ina oia e hui io ana me na Ilikini ma keia wahi kanaka ole, alaila e laweia ana paha oia e na Ilikini a ike hou ole oia i kona makuahine. Na keia mau noonoo ona i hookuemi mai i kona manao ihope, nolaila huli hou aku la kona alo i kahi @@ i hele mai ai.  a iloko o na minute pokole ku hou ana keia ma ka ipuka o ka hale o kona makuakane hanai.

  Oiai ke keiki opio e ku ana ma ka ipuka hale o ka hale malihini, e nune ana ka naau i ka makua, pehea la oia e ike ai iaia iloko o keia po, a ina aole paha oia e hui ana me kona mama i keia po, alaila, heaha la kona manao nona aia la ihea kana keiki kamalei opio kahi i auwana ai. Nana mai la kona makuakane hanai iaia a ike mai la i kona kaumaha loa no kona mama, huli mai la oia a pane mai la i ke keiki opio me keia mau olelo:

  "E Kimo," wahi a ka makuakane hanai me ke ano leo huhu i kumu nona e @@@@.  "Ina owau o oe," wahi @@@@@@@@@@@ nui o ka ululaau!"  "Ina aole wau e hoi ana i keia po," wahi a ke keiki opio me ka haalo'ulo'u, "alaila, ke pilihua la ka manao o ko'u makuahine no'u."  Pane koke mai la kekahi mea e ae e noho kokoke ana. "E noho i keia wahi a ao keia po, alaila, hoi aku i kou hale ua pohopoho loa ke alanui no ka ino o ke ala e hiki aku ai i kou hale."  Huli hou ae la ke keiki a pane aku la i ka mea nana oia i paue mai, "aole e hiki ia'u ke hai aku i ko'u mama pela," wahi ana, "a aole no hoi e hiki hou ia'u ke hai aku ua maka @au i na Ilikini maloko o na ululaau!"

  O keia mau olelo mai a kela poe iaia e noho a ao ka po, alaila hoi, he mea hilahila loa iho la ia no keia keiki opio no kona hoao ana e hoi i ka manawa mua a hiki ole, nolaila, makemake loa iho la oia e hoao hou no ka manawa elua.  Ua paa ka manao o ke keiki opio i keia manawa, aole loa oia e hoi hou ana ihope a hiki i kona ike ana i kona makuahine a me ka ole.

  Huli hoi mai la ua Gafila opio nei me ka hoomau ana i kona mau manao koa a komo no iloko o na ululaau, a iloko o na minute pokole, hiki aku la oia i kona home, a ike aku la i kona makuahine e noho ana me ka haohao nui iaia i ua auina la la.  Apo mai la oia i kana keiki me na haalo'ulo'u ana o ka uwe, i ka wa a ke keiki e hai ana i ka moolelo o kona noho ana a poeleele.

  O kekahi o na paani lealea loa a Gafila opio iloko o kona mau la kamalii, oia hoi, he hookahi haneri kumulaau ohia a kona makuakane i kanu ai, a e ku ana lakou ma ke kulana maikai, a o ka hana a ua Gafila opio nei, o ke kapa ana i kak inoa pakahi o na kumulaau ma kekahi inoa kaulana o na kanaka Ilikini, na Moi a me na Kenela kaulana, a o keia mau kumulaau a pau, ua paa wale no ka inoa pakahi o lakou i kona makuahine.       Aole i pau.

 

OLELO HOOLANA.

 

  I kuu mau hoa kaunu o na mea hou kuloko a kuwaho hoi o ko kakou nupepa KUOKOA, e noho ana i ke ahe a ka makani kaulana o ua aina kuahiwi lua nei, oia hoi ke kilioopu o Waihee, e welina kakou:  Ke kokoke mai nei na la e pau ai keia makahiki, a hiki aku kakou i ka M.H. 1883, a ke poloai aku nei au i kuu mau hoa lawe nupepa, e eleu mai kakou e lawe i ka NUPEPA KUOKOA i ike kakou i na mea hou o 1883 e hiki mai ana.  E eleu pu mai no hoi me na dala elua, i lilo e no ia Waihee ke kaa mua.  Me ka mahalo i na keiki o ka Halepai.

  MOSE KEKALOHE.  Luna Nupepa.

  Waihee, Dec. 22, 1882.