Ka Nupepa Kuokoa, Volume XXII, Number 8, 24 February 1883 — LULU MANAWALEA. [ARTICLE]

LULU MANAWALEA.

Ma ka halawai o Maunakiekie kekahi apana o ka Ekalesia makua o Kawaiahao ma ka la 18 o Feberuari nei, ua lulu ia anaina uuku i akoakoa mai, no kekahi palapala noi kokua luakini mai Kahakuloa Maui, ma ka lima o Kanealai ke Komite i hoomanaia e Rev. O. Nawahine ke Komite nui, ua loaa eono dala, ($6.00) He mea haohao nae ia'u, aole i hoopaa ke Komite i na inoa o ka poe i haawi ma kana pepa, oiai o kana hana ia, i ole e hoohuoi ia ka waiwai o ka lehulehu ma kona lima. Ua hoike mai ke Komite i ka mea e kakau nei, o ka huina nui o na dala a pau i loaa iaia ma ke Kapitala nei ia manawa, he $57.25, nui kela ; hele hoi a huli hoi i kuaaina, e pehu ana ka heluna mamua o keia. O na dala i loaa mua i ko Kahakuloa ponoi iho, he $40.00 wale no. Ina pela, e hoomahuahua hou oukou i ka oukou haawina mamua o ka waho aku nei. Oiai, o na lilo a pau i manaoia wahi ana, he $200.00 alaila lawa. He haawina haahaa keia, i Maui aku la no pau ke lokahi ia. MEA KAKAU.