Ka Nupepa Kuokoa, Volume XXII, Number 20, 19 May 1883 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

KUOKOA ME KE AU OKOA.

[ 1 Hulia.]

No ka Makahiki          $3.00

Eo@o Mahina 1.00

Dala Kuike ka Rula.

 

POAONO. MEI. 19, 1883.

Paiia e Thos. G. Thrum, ma ka halepai o ka nupepa Satardat "Press,"

 

AINA BEULA.

@@@@@@ A Praye@ Meeting Song. NO. 81

1

Eia au la ma ka puu.

Me Ziona imua o'u.

A hora ma o ae

K@ ka lani nani lai.

Cho. K@ au a hauoli e

M@ @@ aina Beula nei.       

@@@, maha, pomaikai

M@ ka aina Beula lai.

 

2

Paap@ na pua lai,

A moani ala mai.

Nani e ka aina a pau!

Kei ka lama, lama mau.

Cho. K au &c.

 

3

Ani na makani e

Mai na puu uli mai.

Pa na mele, pa a mau,

Oli lea kuu maau.

Cho. Ka au &c.

Kahe na kuu pomaikkai

Mai ia Ieju ke Lii mai.

Piha no kuu oli e.

O kuu Paredaiso nani.

Cho, Ka au &c,

HAWAII.

 

HAAWINA KULA SABATI.

HELU 10. SABATI, IUNE 3.

 

KUMUHANA--Paula ma, ma Anetioka.--Pauku Baibala: Oih, 13: 13-16--43-52.

            13 Holo aku la o Paulo ma mai Papo a hiki mai i Perege no Pamepulia: a haalele o Ioane ia laua, a hoi aku la oia i Ieerusalema.

            14 A haalele iho la laua ia Perege, a hele mai la i Anetioka no Pisidia, a komo ae la no iloko o ka halehalawai i ka la Sabati, a noho iho la.

            15 A mahope o ka heluhelu ana o ke kanawai a me ka na kaula, kii ae la no luna o ka halehalawai ia laua, i ae l: E na kanaka, na hoahanau, ina ia olua kekahi olelo hooikaika no na kanaka, ea, e olelo mai.

            16 Ku mai la o Paula, a peahi me ka lima, i mai la, E na kanaka o Iseraela, a me ka poe makau i ke Akua, e hoolohe mai.

            43 A i ka hoi ana o ko ka halehalawai, he nui loa ka poe Iudaio, a me ka poe haipule i huli mua i hahai aku ia Paulo, laua me Barenaba: na laua no i olelo mai ia lakou, a hooikaika mai ia lakou e ju paa ma ka maikai o ke Akua.

            44 A hiki i ka la Sabati, kokoke pau loa ke kulanakauhale i ka akoakoa, e hoolohe i ka olelo a ke Akua.

            45 A ike aku la ka poe Iudaio i ka nui o kanaka, piha loa lakou i ka paonioni, hoopohala aku la i ka mea a Paulo i olelo ai, hoopaapaa a olelo hoino aku la.

            46 Alaila, hooikaika mai la Paulo laua me Barenaba, i mai la, He mea pono ke hai mua ia ia oukou ka olelo a ke Akua; ua kapae oukou ia mea, a ua manao oukou ia oukou iho, aole oukou e pono ke ola loa, eia hoi, ke huli aku nei maua i ko na aina e.

            47 No ka mea, pela ka Haku i kauoha mai ai ia makou. Ua hoonoho au ia oe i malamalama no ko na aina e, i lilo oe i mea e ola a'i a hiki i na kukulu o ka honua.

            48 A lohe ko na aina e i keia, olioi lakou, a hoonani aku la lakou i ka olelo a ka Haku; a o ka poe i waeia no ke ola loa, manaoio aku no lakou.

            49 A haiia no hoi ka olelo a ka Haku ma ia aina a pau.

            50 Hookonokono aku la ka poe Iudaio i na wahine koikoi, a me na mea kiekie o ke kulanakauhale, a pai mai la lakou ma ka hoomaau no Paulo a me Barenaba, a kipaku aku la ia laua mai ko akou wahi aku.

            51 A lulu aku la laua i ka lepo o ko laua mau wawae ia lakou, a hele mai la laua i Ikonio.

            52 Piha loa iho la na haumana i ka olioli, a me ka Uhane Hemolele.

            Pauku Gula, p 49.

            Manao nui. Pomaikai ka poe lohe a malama i ka Euanelio.

            Na heluhelu la. 1 Oih. 13, 13-39, 2 Oih. 13, 40-52, 3, Tim. II, 4, 1-10, 4, Kor. II, 1 1, 18-33, 5, Rom. II, 1-22, 6, Rom. II, 23-36, 7, Io. 8, 12-32.

            Ka manawa. A.D. 48, Mai Mei a Augate paha.

            Kahi i hanaia'i. Anetioka ma Piridia, Asia Uuku. Ke ano o Asia Uuku o kahi ma ka hikina o ke kai moku liilii mawaena o ke Kai Eleele, me ke Kaiwaenahonua, ua kapaia Asia Uuku. Kona ano aupuni. Malalo ae oia o Roma. Nui na mokuaina, like ole na olelo, na hana, na hoomana, uuku na alanui, paa pu i na powa. Ke ano hoomana, ka hoomana kii ka nui. Diana ko lakou akua nui. Ka hoomana Iudaio, oia ka hoomana Iudaio ma na hale halawai Iudaio.

            Mele. "Hahai Ia'u" Hoku Ao Nani p. 65.

            Pule i ala a hahai ia Iesu.

            KA WEHEWEHE A NINAU ANA.

NA MAHELE

            I Ka haiolelo 2 Paulo, p 13-16.

13 Haalele kakou ia Paulo ma mahea? Heaha ka hena nui ina Papo? Owai Paulo ma? Paulo, Barenaba, Ioane, Mareko, Luka. Haalele lakou ia Papo a holo ihea? Lakou anei a pau ka i holo i Perege? Heaha a mahea Perege? Ke kulanakauhale ia o Pamepulia. He mokuaina ia ma ka hikina hema o Asia Uuku e pili ana i ke Kaiwaenahonua. Ma ka akau ia o Kupero. Mai Papo a Perege, ehia mile?

            Owai ka i haalele ia lakou? No ke aha ka haalele ana o Ioane Mareko ia Paulo ma? No ka makau paha ia aina powa. No ke aloha paha i kona makuahine.. Hoi oia ihea? Ierusalema, ilaila kona makuahine o Maria. He mau kumu pono anei keia no ka haalele i ka oihana misionari?

            14 Ua hiki Paulo ma i Perege, aole nae i noho a hana malaila ia wa. He was kupono ole paha ia no ka hana. Ua hele, a e hele ana na kamaaina i kahi e paha. Nolaila hele lakou ihea? Anetioka okoa keia. Anetioka mua, mahea ia? Mahea keia Anetioka? Piredia, ma ka akau ia o Pamepulia. He wahi powa mai Perege a Anetioka. Na ke kanaka hookahi i kukulu i ne Anetioka elua. Seluku Nikata, ke keiki a Anetioka nona mai ka inoa o na kulanakauhale elua.

            He hale halawai aha malaila? He hale halawai Iudaio. Aloha no Paulo ma i na Iudaio. A pono ke hai mua i ka euanelio ia lakou. Nolaila ke komo ana iloko o ko lakou hale halawai. Komo no lakou elike me na kamaaina, a noho iho ilalo me na kamaaina. Aole noho ma na noho hanohano me ka poe hanohano.

            15 Heaha ka hana ma ka hale halawai? Ka heluhelu ana i na haawina baibala no ia Sabati. Mahea kekahi hapa o ia haawina? A mahea kekahi hapa? Ua like ka nui o na haawina me ka nui o na Sabati ma ka makahiki. Elua mahele o ka haawina, mahele kanawai, mahele kaula. He luna hale halawai kekahi, a he luna heluhelu kekahi. Na ka luna hale halawai i kii i ka haawina baibala a laweia mai loko mai o kona pahu a haawi i ka luna heluhelu. Ku oia a heluhelu. Noho no na kanaka a hoolohe. Pau ka heluhelu, hoihoiia i ka luna hale halawai. Noho ka luna heluhelu ilalo. Olelo ka luna hale halawai ia Paulo ma pehea? Ua weheia ka puka, a hiki ia Paulo ma ka haiolelo, oiai ua konoia.

            16 Ka haiolelo a Paulo ma ka Sabati mua. P 16-43 Pehea Paulo i hoomaka'i? Ku iluna a aha? Elua ano o ka poe maloko, na Iudaio maoli, lakou na Iseraela, ka poe i makau i ke Akua, lakou ka poe i lilo i mau Iudaio ma ka oki poepoeia. Aia no ka haiolelo a Paulo mai ka pauku 17-43. Ano like no me ka Petero a me ka Setepano mau haiolelo mamua. 1 Ka mua, ko ke Akua aloha me ka Iokomaikai i na kupuna a hiki i ke au ia Daniela; p 17--22. 2 Kekali ana no ka puka ana mai o ko Daniela pani; p 23--26. Ma ka Paulo wehewehe ana, ua hiki mai no ia pani. Iesu Kristo no Nazareta. Mau ko Paulo wehewehe ana, me ka paipai ana e paulele ia Iesu, e hahai iaia, oia wale no ka mea e ola'i, ka mea e kalaia'i na hewa. Ina hoolohe ole, e malama o hiki mai ka hoopaiia ana; p 27--41.

            P 42--43. I ka pau ana o ka halawai, heaha ke noi ana o na kanaka e, ka poe Iudaio ole? Pehea hoi na Iudaio me na haipule? (na Helene) Hahai ia Paulo ma. A pehea Paulo ia lakou? Paipai e kupaa, ea. O ke kupaa ana ka mea e maopopo ai, ua huli io lakou.

            II Ka Sabati elua ma Anetioka; p 44--52. 44 Pehea ma ka Sabati elua? Nui ke ala. Nui ka poe hele i ka halawai, e hoolohe i keia mea hou. Akahi a lohe kekahi poe.

            45 A oluolu anei na Iudaio i keia akooakoa nui ana? Huhu loa paanioni, hoopaapaa, hoino ia Paulo ma, auwe!

            46 Alaila, pehea la ka Paulo ma olelo hoahewa a hooweliweli i no Iudaio?

            46 Heaha ka laua olelo hooluolu i ko na aina e? Mahea ia mau olelo? Is. 42; 6, 49;6.

            48 Pehea ko na aina e i ka lohe ana i keia mau olelo? Owai ka poe i manaoio? Ka wa hea ia wa? Ia wa anei? I ka wa mamua loa aku paha? Nawai i wae? No ke aha ka wae ana?

            49 Pehea ka olelo a ka Haku ma ia aina.

            50 Heaha ka hope o keia huli ana o kekahi poe? Nohea keia poe Iudaio? No ka diabolo paha.

            51 Aha Paulo ma? Hana laua elike me ke kauoha a Iesu ma Mat. 10; 14. A hele ihea? Mahea ia? He kulanakauhale ia ma Lukaonia, 60 mile hikina hema o Anetioka. Nana i ka Palapala aina. Pehea na hana mana?

 

KA HOOPILI ANA.

            1 A pau ka hana ma kau wahi, ku a hele i kahi e.

            2 He mau Ioane Mareko no ko keia wa. Makau kekahi poe kahuna, poe kumu i ke ino o ke ala, i na luhi, na pilikia, i napowa. Aloha i na makua. Ku a haalele i ka hana. Mihi mae kekahi, a hoi mai i ka hana, elike me Ioane mahope.

            3 Hoohalike me na Iudaio. Heluhelu nui i ka olelo a ke Akua ma na la Sabati, ma na halawai. I ekolu mahele ko kakou. Ke kanawai, na kaula, na olelo ma ke Kauoha Hou. Ka olelo a ke Akua ka mea mana. Mana ole ka olelo a ke kanaka.

            4 E ka poe hoowahawaha, hookuli, haalele i na halawai, i na Kula Saati, e makau i ko ke Akua hoopai ana. E ku a hoi mai.

            5 E hoouna aku i ka malamalama i ko na aina e. E haalele i ka poe Iudaio, i ka poe hookuli, hoopaapaa, hoopohala, hoino a hele i na aina pegana. E komo lakou iloko o ke ola mamua o  o ko Hawaii nei poe hoomaloka.

            6 E hoolana i ka manao, e na haiolelo. E manaoio ana ka poe i waeia, no ia mea.

            7 E na wahine, mai ae aku i ka poe e hookonoknon ana ia oukou e hoomaau e kipaku aku i kekahi poe pono.

            8 A hana inoia kekahi poe pono ma kau wahi, e ku a hele i kahi e.

            Mele. "Ku, Ku, Ku." Hoku Ao Nana, p 34.

            Pule i ku a hele i ko na aina e &c.

            Haawina no Iune 10 Oih. 14: 1--18.

 

HE MOOLELO EEHLA

--NO NA--

HANA HOOWELIWELI

--O KE--

TOWERA O LADANA.

[Mai ka peni a ka mea unuhi moolelo o "Beriana ka Wiwo Ole, a me Mahone ke Koa."]

            "Aole loa o'u hilinai ia mau olelo," wahi a Lede Hastings. "Aka, ano me he mea la ke ike nei au i kekahi mea."

            "Pela io anei!" wahi a Jane. "Mahea la?"

            "Mahope aku o kela kia pou ma ka akau," wahi a Lede Hastings; me ke kuhikuhi pu ana aku. "Me he kanaka la i owili ia me ke koloka. Aia la! ke nee ae la."

            "E hele koke aku oukou e nana, malia he mea kekahi e hoohalua ana iloko o ka luakini nei," wahi a Jane i pane aku ai me ka leo moakaka i ke kiai e ku kokoke ana ma kona aoao.

            Hooko koke aku la ke kiai i ke kauoha, a i kona huli hoi ana mai, hoike mai la oia aole he mea i loaa iaia.

            "O kou mau manao hopohopo au i manao wale ai, aole he kahua iki e Katarine," wahi a Jane me ka mino aka.

            "Aole e nele loa, oiai, ua ala mai ia manao mamuli o na mea i ike ia maluna ou e kuu haku keikie," i pane aku ai ka Lede Hastings. "He mea e kuu ake e hiki hou i ka halealii me ka palekana."

            "Owau pu kekahi," wahi a Lede Herbert.

            "E hoomanawanui iki olua, a e makaukau no au," i pane aku ai o Jane.

            I keia wa, hele aku la oia imua o ke kuahu, me ke kukuli ana iho iluna o ka uluna veleveta e waiho ana imua o ke kuahu.

            "E ka mea mana loa! ke waiho haahaa aku nei au imua ou me ka hoakaka aku, ina o ke aupuni i haawi ia mai ia'u, ua pololei a kupono anei ia no'u, alaila, e haawi mai oe ia'u i ka makaukau nui a me ka mana, i hiki ai ia'u ke hoomalu ma kou mana, kou inoa a me ka holumua o ko'u hookele ana. Aka, ina aole i kupono ia'u, a he keakea ana keia i ka mea kupono e hooko ana i kou makemake io, alaila, e ka Haku e, e lawe aku i ke kalaunu mai ko'u poo aku, a e hookau aku maluna o kau kauwa i koho pono ia. Ina o na mea i hoike ia mai ia'u i keia po, he mau kahoaka ia e hoomaikeike mai ana i na hana weliweli e kali ana no'u, alaila, ke nonoi aku nei au e ka Haku, e kokua mai ia'u, e hooikaika i ka manaolana e halawai aku au me ia mau hopena a pau; i like ai ko'u hopena me ko'u ola ana, e hilinai ana i koou kiekie a me ka pono o kou ekalesia hemolele."

*          *          *          *          *

            I ka pau ana o ka pule, ku ae la o Jane iluna me ka naau mana, a hui pu aku la me kona mau hoahele no ka hoi ana aku i ka halealii. I ka hiki ana aku o lakou i kona keena ponoi, hookuu aku la oia i kona mau hoahele; a oiai hoi, aole i hoi mai kana kane, oia ka Haku Guilafoda Dudele mai kana hana i hele ai oia, nolaila, ua lilo ia i mea pono ole i kona manao no ka holuolu ana e hiamoe, oiai, o na hora liilii ia o ke kulu aumoe, no ia mea, lalau aku  la oia i kekahi buke iluna o ke pakaukau, a wehe ae la i mea e nanea ai oia, a hiki i ka nalohia ana o kona mau noonoo i na mea kamahao o ka buke.

            Ma keia ano, ua hoohala ia e ia ka hapanui o ka po a hiki wale i ke kokoke ana e ao, aia hoi, ua hoohikilele ia oia mai ka heluhelu ae ma o ke komo ana mai o kana kane.

            "E Jane, kuu allwahine aloha! i hooho mai ai oia me ka hele awiwi ana mai imua e halawai me kana aloha me ka helehelena piha hauoli: "He nuhou hauoli ka'u i lawe mai nei nau, a he mea nou e hauoli ai."

            "Nani wale!e kuu haku aloha,"i pane aku ai kana wahine, me ka waiho ana iho i ka buke ana e heluhelu ana, a ku ae la iluna e halawai pu me kana kane." "Heaha la ia mea hou?"

            "E koho mai," i pane aku ai kana kane me ka mino aka.

            "E kuu Dudele aloha," wahi a kana wahine, "mai waiho mai na'u e koho aku me ka maopopo ole. Aka, e hoike mai ia'u ano i kau nuhou, i komo pu aku ai au me oe iloko o ka hauoli."

            "Eia no ia e kuu aliiwahine." i pane aku ai ka Haku Guilafoda. "ua hooholo mai nei kuu makuakane a me na lii, e hookiekie ae ia'u a i ke kulana like me kou."

            "E kuu haku, aole loa he mana ia lakou e hana pela, owau wale no ka mea nana e hookiekie ae ia oe: i pane aku ai oia me ke kuio.

            "Alaila, ua alii au," i pane aku ai o Dudele me ka haakei.

            "E kuu haku, e kala mai oe ia'u i ka hoike ana aku, he mea pono ia'u e hoomoakaka lea no keia mea."

            "E hoomoakaka lea i ke aha!" i hooho mai ai kana kane me ka hookue maka nui ana. "O kou apono wale no ka'u i makemake ai, oiai, aole ia he mea nou e pihoihoi ai, mamuli o ka makemake ana o ko'u luaui; a oiai au o kau kane, ke ake nei au i kou apono ana no keia mea."

            "Owau nei, e kuu haku, kou moiwahine, a oiai hoi, mamuli nei o'u, aole ma ou la ke ake ana no ka apono. E oki keia @amailio ana no keia kumuhana."

            "E like me ka mea i oluolu ia e oe, e kuu lei," i pane aku ai o Dudele me ka haahaa. "Apopo, e lohe auanei oe i ko ke Duke manaoo."

            "Ia'u e lohe ai mai iaia mai, alaila e lohe pu auanei oia i ko'u," wahi a Jane.

            "Heaha ke ano o keia?" i pane aku ai kana kane, me ka nana ana aku iaia me ke ano kahaha." He oiaio anei, o oe no ka Jane a'u i hoonoho iho ai, me ka oluolu, ke akahai a me ka piha i ke aloha? A iloko o na hora pokole o ka noho hookele aupuni ana; i hoanoe ia ae ai kou kulana a mawehe mai la i ke aloha pilipaa mai ia'u aku i ko na wa i hala?"

            " E Dudele," wahi a kana wahine me ka leo walohia, "he waiwai makamae mau oe na'u; aka, ina i kuikahi ole au me kou mau iini, mai hoano e ae i mea okoa mai ka mea kupono. Ma ko'u ano he Noiwahine, he mau keehina hana ko'u maluna ae o ko na mea e ae a pau, he keehina e likeme ka loihi o ka inoa Moiwahine maluna o'u, a e hooko no au ia mau mea e like me ke kupono i ko'u ike ana a me ke kupono ole paha. Nolaila, mai alakai kuhihewa ia oe oho ma na alakai ana a kou makua, a mai aahu ia oe iho me ke kahiko o ka inaina. O ke keehina au e ake nei, ua koo-u ia me na poino. Maia, o ka hopena o keia noho alii ana, o ka lawe ia aku o keia kalaunu i kau ia iluna o'u alaila, e kau ole aku ia haawina iluna ou."

            "Ua lawa keia," i pane mai ai kana kane, me ka hoemi ia o kona manao mamuli o na olelo a kana wahine. "e hoopanee ia ke kamailio ana no keia mea a i ka la apopo."

            I ka hoea ana mai oia la, o ka hana mua a Dudele, oia ka huli ana no kona makuakane, me ka hoomaikeike ana aku imua oua i na mea i kukai ia mawaena o kana aliiwahine a me ia. Ua lilo keia mau olelo a Dudele, i mea e hookahaha ai i ka Duke manao haakei, nolaila, alakai aku la oia i kana keiki manaolana poho, ma ke kuhikuhi ana aku iaia i ka mea pono. Me keia mau kuhikuhi, makaukau iho la ke Duke no ka launa ana aku me ka Moiwahine ma kona keena; i ka makaukau ana o kekahi anaina ike alii, hoike aku la ke Duke i ke aliiwahine; ua hooholo oia a me na 'lii o ka aha kukamalu e hoonoho aku i kana kane pu me ia iluna o ka nohoalii. O ka pane a Jane i pane mai ai, aole ia i kue ae i kana olelo mua i kana kane ia Guilafoda Dudele: koe wale iho no keia, ua koikoi me ke ku io kana mau olelo imua o ke Duke: oiai, ua ike lea no oia i ka mea i ake ia e ke Duke ma keia hana, oia hoi ka imi ana e loaa iaia ka mana kiekie loa ae. Oiai, i ke Duke imua ona, ua hoao aku oia me ka ikaika ma ka hookikina ana iaia me na olelo maalea loa e hoohuli ana i ka manao o ke aliiwahine, aka, he oia mau no kona Iuli ole. Ua kokua pu ia mai ke Duke e kana aloha ma keia huakai, no ka hoaui ana ae i ka manao o kana hunona wahine; aka, oia pu kekahi i hoonele ia i ka haawina ana i ake ai e hana ia; a mamuli o keia mau hana, ua ho-a ia ka Haku Guilafoda me ka inaina no ka haulehia ana o na manao o ka poe kokua iaia, nolaila, haalele iho la oia i ke Towera a hele aku la no Siona Hale, me ka hoakaka ole mai i ke kumu  i kana wahine.

            No ka hoohoka ia ana o ka manao o ke Duke e ke kama aliiwahine, ua ike lea no oia i ke alanui ana e hoao ai  hookele hou me ka maalahi, nana no e hoohuli i ka manao paakiki o ke aliiwahine a ano hou, me kona hoomakaukau pu ana e hoolala maikai loa i ke kumu o ko ke aliiwahine manao paakiki e like me ia i hoike ia ae nei maluna. Me ko ke Duke hoolilo loa ana i ka noonoo no keia kumuhana e hana ia ana, pela i ulu mai ai iloko ona ka noonoo, aia kekahi poe malu i huna ia lakou iho nana e alakai nei i ke aliiwahine, a malalo o ka lakou kuhikuhi ana oia ee hooko nei e lawelawe; a e mea e maopopo ai i ke Duke owaila keia poe, nolaila, hoopaa iho la oia e kiai makaala loa oia i na hana a me ka noho ana o ke aliiwahine.

            O ka mea pili kokoke loa aku i ke aliiwahine ma ka launa ana, oia no kana kaikamahine, ka lede Hastings; nolaila, kauoha aku la ke Duke iaia ma ka nieniele ana i na mea i ike ia e ia a i kamaaina iaia i ka ike ana a me na hana hoopahaohao o ka luakini o Sana Ioane i ka po a ke aliiwahine i hele ai no ia wahi. Ua hoikeike aku la kana kaikamahine e like me ka hiki iaia, a i ka pau ana o kana mau olelo, ua hoopiha ia iho la ua Duke Northumberland nei me ke kahaha nui, a ike iho la oia he mea nui aka no koe ana e hana ai mamua ae o ka mea mua ana i hoolala ia ai e kona poe enemi. Ike mua iho la no oia, o Simona Renada kekahi oia poe, me kona hoomaopopo lea no i kahi e hui pu mai ai oia me ka hana ana e hoolala nei: nolaila, hookuu aku la oia i kana kaikamahine me na makaukau a pau i kuhikuhi ia aku iaia no ka apana hana ana e hooko ai e like me ko ke Duke makemake, me kona hoomau ana aku i ka nalu ana me ka noonoo no ka mea ana i lohe ai, me ka hoao ana e nalohia aku ia mau mea.

            Aka, i kekahi manawa, hooholo iho la oia e nieniele ia ke aliiwahine Jane no keia mau mea ana i lohe ai imua o ka aha kukamalu, aka, o ke anaina ana i hoomakaukau ai e hooko ia kona mau makemake a pau, ua hoike mai la iaia e hoohuli ae i ke kumuhana i alanui okoa e ala ole mai ai ka haunaele; nolaila, ua haulehia iho la kona mau manao mai ke kumuhana ae mao na hana pili kaumaha he nui e haawe ana maluna iho ona. Iwaena o kekahi oia mau hana, oia ka hiki ana mai o kekahi elele me ka lono no ke kam aliiwahine Mere, ua haalele aku oia i ka halealii o Keninghall, ma Norefoka, kahi ana e luakaha ana a hoi ae la i kahi e maluhia ai oia, ma ke Kakela o Feremelinehana, mamuli o ka hoouna ia ana aku e ke Duke kekahi mahele koa e hooweliweli aku ana iaia; ua kukala ia ae ma Norevika oia ka Moiwahine, a o ka poe e kokua ana iaia, ke pii mau la ko lakou ikaika e kela me keia hora ma na wahi a pau o ka aina. He mea mau ka hele kohana ana mai o na lono ano kaumaha, wahi a ke Duke manao haakei i puana ae ai i na mapuna olelo oiaio a ka poe kahiko. Mahope iho, ua hiki mau mai na elele me na huaolelo, o na Earl o na okna aina o Oxford, Sussex a me Bath, ka Haku Wentworth, Sir Thomas Cornwill a me kekahi poe kanaka koikoi i ae, ua hoike ae ia lakou iho mahope o ke aliiwahine Mere.

            Oiai ke Duke e hakoko ana i ka hana kupono e hana ia ai no ka ako koke ana i ka omaka ana o keia popilikia, aia hoi, hoea ana he elele mai ka lede Hastings a ku ana imua o ke Duke, a hoike aku la iaia, aia ke aliiwahine Jane ia wa me Simona Renada kahi i kukai olelo pu ai maloko o ka luakini o Sana Petero. Ma kanieniele pono ana a ke Duke, maopopo iho la iaia, mamuli o ka hookaumaha ia ana o ka maano o ke aliiwahine no ke kaawale ana aku o kana kane me kona ike ole i ke kumu i hiki ai oia ma ka luakini o Sana Petero; (he wahi hoomana keia ma ka welau akau o ke Towera Omaomao, a i haawi ia no na hana a ka aha kanawai i ka lehulehu a me ke alo alii:) ua ukaliia o Jane e kona makuahine, ke Duke wahine o Suffolk a me na kaikuahine o ke Duke, oia ka lede Herbert a me Hastings, a ua hui pu mai i ka huakai na Earls o Pemeboroke, Arunedela, De Noailles a me Simona Renada.

            Me ke kali ole o ke Duke no kekahi mau olelo hou mai ka elele aku, hoakoakoa koke mai la oia i kona poe kokua a awiwi aku la no ke Towera Omaomao. Iaia i komo aku ai iloko o ka luakini, ua hooiaio koke iho la oia i ka lohe i hoike ia aku iaia e ka elele, oiai, ua loaa aku iaia ka poe a pau e like me ka mea i hoike ia, a o ka emebasedoa hookalakupua, kona enemi ino hoi, e ku pu ana oia me ka Moiwahine Jane imua o ke kuahu.          (Aole i pau.)

 

OKI PUU MA HONOKAA.

            I ke awakea o ka Poalima, Mei r, ua oki iho o Doud Ship Madaena i kona puu i ka pahi, a ua make loa. He kanaka Inia keia e hana ana malalo o W. H. Rickard. Aohe no hoi i maopopo ke kumu o kona haina ana i kona ola makamae. He ano opulepule nae kona i kekahi manawa.

            Ua ike muaia keia hana weliweli e Amona a me elua wahine e ae. Eia nae ua hala e ka manawa kupono no ka hoopakele ana ae i kona ola. Ua noho ka Aha Koronero ma ka Poaono ae e noonoo i ke kumu o kona make ana, a o ka mea a lakou i hooholo ai, ua make no oia iaia iho.

            Ma ka hoike ana a kauka Greenfield no kana mea i ike ai, ua i oia, ua make o Doud Ship Madaena ma o kona oki mua ana i kona puu me ka pahi, a moku ke kani-ai, a koe na aa koko maloko loa, nolaila ua lawe oia i ka pahi oki ko a olo maoli iloko o ka ai, a me ia i moku ai ke aa koko a make ai oia, no ka mea ua nui ka weluwelu maloko o ka io. Ua hoike mai no noi ke kauka, oia ke ano o ke oki ponoi ana o ke kanaka i kona ai iho, oia hoi he oki weluwelu. O keia iho la ka moolelo e pili ana i keia hana manaonao.          S. K. KAMAE                 Honokaa, Mei 7, 1883.

 

NA HOOLAHA KUMAU.

ASA KAULIA,

LOIO A KOKUA MA KE KANAWAI

 

Jno. Loata Kaulukou,

LOIO A HE KOKUA.

 

W. O. SMITH,

LOIO! LOIO!

Helu 36 Alanui Kalepa, Honolulu

 

W. R. KAKELA,

He Loio a he Kokua ma ke Kanawai.

He Luna Hooiaio Palapala.

 

W. L. HOLOKAHIKI.

He Loio a he Luna Hooiaio Palapala.

Keena Wehekealaula Alanui Betera. @@@@ @@

 

SAM. L. KAWELO.

LOIO! LOIO!!

E noho mau ana ma ke kulanakauha'e o

Honolulu Oahu. II04 @@

 

SAML. K. KAEO.

LOIO! LOIO!!

E loaa no ia ma ke Keena Loio e J. L. Ka@ lakou mauka iho o ka Halewai, Honolulu. 1195 1 yr.

 

A. ROSA,

(AKONI.)

He Loio a he Kokua ma ke Kanawai. A he Luna Hooiaio Palapala. Keena hana, aia ma ke Keena o ka Loio Kuhina.  1101 1 yr.

 

S. B. DOLE,

He Loio a he Luna Hooiaio Palapala .

KEENA HANA--Ma Alanui Kaahumanu.

 

CECIL BROWN.

Loio a he Kokua ma ke Kanawai.

A he Agena no ka Hooiaio ana i na Palapala no ka Mokupuni o Oahu.

Helu 8 Kaahumanu, Honolulu, H. P. A.  2-1yr

 

Richard F. Bickerton,

(@EKETONA.)

Loio a he Kokua ma ke Kanawai.

Keena hana Helu 23 Alanui Kalepa,

Elua puka ma o aku o ke hale kauka o Kauka Minuteole.

 

JAMES M. MONSARRAT,

(MAUNAKEA)

Loio o he Kokua ma ke Kanawai .

A HE LUNA HOOIAIO PALAPALA.

Keena hana alanui Kalepa. Jan. 3, 1883         044-IV

 

KALE KULIKA,

Luna hooiaio

PALAPALA KUAI, MOLAKI

A ME NA PALAPALA OIA ANO.

Luna Hooiaio Palapala Aelike mawaena o na Haku a me na Kauwa. Luna Haawi Palapala Mare.

Ma ke kihi o ke Alanui Moiwahine me Kaahumanu,

kulanakaauhale o Honolulu, k@ Hawaii Pae Aina. @59-tf

 

C. C. COLEMAN,

Amara a he mea hana Mekina

Kapili Kaapuai hao lio.

A ME KA

Hana ana Kaa Lio, etc.,

Hale Hana ma Alanui Alii,

E kokoke la i ke Alanui Papu.

 

HALA TELA HOU!

KAUKAIWA

Helu 11, Alanui Nuuanu,

KOKOKE I KA UWAPO.

S. HAMEEKAPU      June 22, 1882  1075tf

 

ANA AINA! ANA AINA!!

Frank Pahia a me Samuel M. Kaaukai.

KEENA HANA--Aia ma Alanui Moi, kokoke loa ka Uwapo o Hooiiliamanu. 1096 tf

 

MAKEMAKEIA.

Ua makemake ia ka poe mea ILI KAOMALOO a me na ILI BIBI, a pela hoi me na ILI MIKO o na ano a pau, e kuai mai i ko lakou mau ILI me makou, a e haawi no makou i ke KUMUKUAI KIEKIE LOA o ko kakou Makeke.

C. BREWER & CO. (Barua Ma.)

 

Joseph E. Wiseman,

LUNAHOOPONOPONO O NA WAIWAI PAA

A ME

Luna Imi Hana,

Helu 27 Alanui Kalepa, Honolulu.

Luna Hoolimalima no na Kumi, na Hale, a me Luna Kuai me Hoolimalima o na Waiwai Paa ma na wahi a pau o ka Paemoku. Luna imi Hana no ka poe a pau i nele i ka hana ole ma na wahi a pau i makemakeia ma kekahi mokupuni o ka Paeaina.

            N.B.--Na Palapala Hoolimalima e hanaia me ka eleu; e ohiia na Bila Aie a me na hana e ae a pau e pili ana i na hana Oihana Kalepa me ke eleu a me ka pololei. O na Unuhiolelo a me na Maheleolelo ana, e hookoia me ka maikai. O na kauoha a me na kamailio ana maloko o na leia no kekahi o na hana mahina ae, e hookoia me ka eleu loa. 1076-@@

 

UA MAKEMAKE IA

NA ILI BIPI,

NA KIWI BIPI,

NA IWI BIPI,

E haawi ia no ke kumukuai kiekie o ko kakou makeke ne e.

H. HACKFELD & CO.

 

NA HOOLAHA KUMAU.

 

KA MIKINI

HUMUHUMU L@@

MAIKAI

ST. JOHN

E LOAA NO MA NA @@@@

MR. GEO. F. WELLS

 

O ka mikini humuhumu @@@@

loa keia, i hiki k@ @@@ @@@@

hope, a i ikeia ma ka @@@

Hawaii nei. @@@@@@

makai @@a @@@@@@

naka Hawaii,

he mikini

Iuhi

ole.

 

KUMUKUAI $55.00

me Hookahi Gita (Kika) hookani maikai loa makana.

 

            O ka poe ma na kuaaina e aia @ i e keia ano mikini humuhumu, e @@@@@@@@@@

kou i ke dala ia.

 

GEO. F. WELLS

Ma Honolulu, a nana noe h@@@@@@@@@@@@

hi i makemakeia, me na mea a @@@@@@@@@@@

ka mikini, a nana e h@@kau aku @@

moku, me ke kaki ole ia o @@@

mekini la.

 

            O ka poe a pau e holo mai @@@@ @@     

lu nei, mai poina lakou i ke kipa ana @@@@

halekuai o.

 

GEO. F. WELLS

Ma Alanui Papu, a e kilohi iho @@ @@@ humuhumu la, oia ka.

 

Royal St. John.

Eia pu no me ia na pila @@@@@@@ @@@@@@@

pau, o ka loaa koke ana @@@@@@

no ia mai Amerika

a me Europa

mai, oia

 

Na Pila Guitar (Kika), he 150 @@@@

mai ka $5 a hiki i ka $125 @@@@

mukuai o ka pila hookahi.

 

200 Koliana mai ka $2 a hiki i ka $@@

ke kumukuai o ka pila hookahi.

 

100 Ohe Puluka, $2.50 a hiki i ka $15

ke kumukuai o ka ohe hookahi.

 

12 Pahu Hookani nunui, a me 25 @@@@

Hookani liilii, a me na ano mea @@@@

keleawe a pau, e loaa no ma kaia ia

lekuai i hoikeia maluna me ke

 

KUMUKUAI EMI WAIPAHE.

Na Piano nunui maikai, e loaa @@

me ke Kumukuai Emi Loa i

ike ole ia ma Hawaii nei.

 

            He nui aku no na mea i k@@ @@@@ ia a me keia e kilohi nona iho, @@@@ ae ma ko'u halekuai ma Alanui @@

            E hookoia ka makemake o keia a me keia me ka eleu.

 

GEO. F. WELLS.       1094 tf                        Alanui Papa.