Ka Nupepa Kuokoa, Volume XXII, Number 50, 15 December 1883 — ULIA MA KA MOANA. [ARTICLE]

ULIA MA KA MOANA.

Ma ka Poakahi, la 10 o keia mahina, i halawai ai kekahi o na waapa e holo nei mawaena o I.ahaina me Molokai me ka ulia poino ma ka moana. Ma ia kakahiaka i haalele ai keia waapa ia Molokai no ka hoi ana i Maui; maluna o ua waapa nei ka Hon. J. W. Kalua me kana wahine, a me Kaluaaha, Kailianu, Kaniela, Maunakea, me Magogai, he kanaka Gilibati, no Molokai keia poe ; a o Kanakaole a me Waahila, no Kauai laua, a o Malakaua no Wailuku. He keiki o Malakaua, malalo paha o umikumamaha makahiki. Ma ka hora 10 o ke awakea o ia la i halawai ai lakou me ke kikiao makani ikaika loa, a ia wa no hoi i poi mai ai kekahi ale nui a ua uhi pu ia ka waapa a poholo īho la iloko o ke kai. Alaila hoomaopopo iho la lakou he pilikia nui keia, aole maopopo ke ola. Ua puaia na hoe me kekahi mau apana papa a hoopaaia i ke kaula, a maluna olaila ka wahine a Kalua i hoolanaia ai, no ka mea aole oia ike i ka au. Alaila o na poe e ae, ua hoonoho ia lakou ma kela a me keia aoao o ka waapa me ka manao e hoolana, aole nae he hiki no ka ino loa oke kai. Pau ia hoao ana, hoomaha iki iho la, a hookau aku la i na hoomanao ana i ke Kokua o luna, ka Mea nana e paa nei na moana a me na aina iloko o kona poho lima. Pau ka pule, hoomaka lakou nei e au me ka pahu ana i ka waapa imua o lakou, a ua kokuaia no hoi lakou e ke au e ko ana i Lanai, a i ka hora elima o ia ahiahi hiki i ka aina. Aia hoi he pilikia hou malaila no ka nui loa o ka nalu; aka ua pomaikai lakou a pau i ka hoopae ola ia iluna o kahaone, o ka waapa nae ka i nahaha liilii i ka nalu. He aneane loaa ole paha ka lua o keia hoopakele ana. Ma na wa a pau i hala; iloko o na ulia elike me keia ma ke kai o Pailolo, he mea maopopo, ua poino ke ola o kahi niau kanaka. Aka, i ka make ana o keia waapa, o ka waapa wale no a me na ukana ka i poino, a ua pakele na ola a pau. Pomaikai, a ke pahola aku nei keia pepa i kona aloha hauoli pu me na makamaka o kakou i hoopakeleia. Aole no hoi paha e nele ana na hoomaikai pu ana a ko makou poe heluhelu a pau.